Biblica® Open Lao Contemporary Version
ເຢເຣມີຢາ 37
ເຢເຣມີຢາຖືກຂັງຄຸກ
ກະສັດເນບູກາດເນັດຊາແຫ່ງບາບີໂລນໄດ້ແຕ່ງຕັ້ງເຊເດກີຢາ ລູກຊາຍຂອງເຈົ້າໂຢສີຢາຂຶ້ນເປັນກະສັດແຫ່ງຢູດາຍ; ເພິ່ນໄດ້ຂຶ້ນປົກຄອງແທນເຢໂຮຍອາກິນ1 ລູກຊາຍຂອງເຢໂຮຍອາກິມ. ທັງເຊເດກີຢາ ແລະ ບັນດາຂ້າລາຊະການຂອງເພິ່ນ ແລະ ປະຊາຊົນໃນດິນແດນນັ້ນບໍ່ໄດ້ເອົາໃຈໃສ່ແຕ່ຢ່າງໃດຕໍ່ຖ້ອຍຄຳທີ່ພຣະເຈົ້າຢາເວທີ່ໄດ້ກ່າວຜ່ານທາງຜູ້ທຳນວາຍເຢເຣມີຢາ.
ແຕ່ກະສັດເຊເດກີຢາໄດ້ໃຊ້ເຢຮູການລູກຊາຍຂອງເຊເລມີຢາກັບປະໂລຫິດເຊຟານີຢາລູກຊາຍຂອງມາອາເສອີຢາມາຂໍຮ້ອງຜູ້ທຳນວາຍເຢເຣມີຢາວ່າ, “ຂໍອະທິຖານຕໍ່ພຣະເຈົ້າຢາເວ, ພຣະເຈົ້າຂອງພວກເຮົາເພື່ອພວກເຮົາແດ່”.
ໃນຂະນະນັ້ນ ເຢເຣມີຢາເປັນອິດສະຫລະໃນການໄປ ແລະ ການມາໃນທ່າມກາງປະຊາຊົນ, ເພາະລາວຍັງບໍ່ໄດ້ຖືກຂັງໄວ້ຢູ່ໃນຄຸກເທື່ອ. ກອງທັບຂອງຟາໂຣໄດ້ເຄື່ອນທັບອອກມາຈາກເອຢິບ ແລະ ເມື່ອຊາວບາບີໂລນ2ທີ່ກໍາລັງປິດລ້ອມເຢຣູຊາເລັມຢູ່ໄດ້ຍິນເລື່ອງນີ້, ພວກເຂົາກໍຖອນທັບໄປອອກຈາກເຢຣູຊາເລັມ.
ແລ້ວຖ້ອຍຄຳຂອງພຣະເຈົ້າຢາເວໄດ້ມາເຖິງຜູ້ທຳນວາຍເຢເຣມີຢາວ່າ, “ພຣະເຈົ້າຢາເວ, ພຣະເຈົ້າແຫ່ງອິດສະຣາເອນກ່າວດັ່ງນີ້ວ່າ: ຈົ່ງໄປບອກກະສັດຢູດາຍ, ຜູ້ທີ່ໃຊ້ພວກເຈົ້າມາຖາມເຮົານັ້ນວ່າ, ‘ກອງທັບຂອງຟາໂຣ, ທີ່ໄດ້ເຄື່ອນທັບອອກມາເພື່ອສະໜັບສະໜູນເຈົ້າ, ພວກເຂົາຈະກັບຄືນໄປທີ່ເອຢິບດິນແດນຂອງຕົນ. ແລ້ວຊາວບາບີໂລນຈະກັບຄືນມາ ແລະ ໂຈມຕີນະຄອນນີ້; ພວກເຂົາຈະຢຶດເມືອງ ແລະ ຈູດມັນຖິ້ມ’.
“ພຣະເຈົ້າຢາເວກ່າວດັ່ງນີ້ວ່າ: ຢ່າຫລອກລວງຕົນເອງໂດຍຄິດວ່າ, ‘ຊາວບາບີໂລນຈະໜີໄປຈາກພວກເຮົາຢ່າງແນ່ນອນ’ ພວກເຂົາຈະບໍ່ກັບຄືນມາ! ເຖິງແມ່ນວ່າເຈົ້າໄດ້ເອົາຊະນະກອງທັບບາບີໂລນທັງໝົດທີ່ກໍາລັງມາໂຈມຕີເຈົ້າ ແລະ ຍັງເຫລືອພຽງແຕ່ຄົນທີ່ບາດເຈັບຢູ່ໃນເຕັນຂອງພວກເຂົາ, ພວກເຂົາກໍຈະອອກມາຈູດນະຄອນນີ້ຖິ້ມ”.
ຫລັງຈາກທີ່ກອງທັບບາບີໂລນໄດ້ຖອນທັບອອກໄປຈາກເຢຣູຊາເລັມ ຍ້ອນກອງທັບຂອງຟາໂຣ, ເຢເຣມີຢາກໍອອກຈາກເຢຣູຊາເລັມໄປທີ່ເຂດແດນຂອງເບັນຢາມິນເພື່ອຮັບເອົາສ່ວນແບ່ງຊັບສົມບັດຂອງລາວໃນທ່າມກາງປະຊາຊົນຢູ່ທີ່ນັ້ນ. ແຕ່ເມື່ອເຢເຣມີຢາໄດ້ມາຮອດປະຕູເບັນຢາມິນ, ຫົວໜ້າຄົນເຝົ້າຍາມ, ທີ່ຊື່ວ່າ ອີຣີຢາລູກຊາຍຂອງເຊເລມີຢາ, ຫລານຊາຍຂອງຮານານີຢາກໍໄດ້ຈັບເຢເຣມີຢາໄວ້ ແລະ ໄດ້ເວົ້າວ່າ, “ເຈົ້າກໍາລັງຈະໜີໄປຫາຊາວບາບີໂລນ!”
ເຢເຣມີຢາໄດ້ເວົ້າວ່າ “ນັ້ນບໍ່ແມ່ນຄວາມຈິງ! ເຮົາບໍ່ໄດ້ກໍາລັງຈະໜີໄປຫາຊາວບາບີໂລນ”. ແຕ່ອີຣີຢາບໍ່ໄດ້ຟັງລາວ; ລາວໄດ້ຈັບເຢເຣມີຢາ ແລະ ນໍາລາວໄປຫາບັນດາຂ້າລາຊະການ. ພວກເຂົາໃຈຮ້າຍໃຫ້ກັບເຢເຣມີຢາຫລາຍ ແລະ ໄດ້ຂ້ຽນຕີລາວ ແລະ ໄດ້ຂັງລາວໄວ້ໃນເຮືອນຂອງເລຂາທິການໂຢນາທານ, ເຊິ່ງພວກເຂົາດັດແປງເຮືອນໃຫ້ເປັນຄຸກ.
ເຢເຣມີຢາຖືກຂັງໄວ້ຢູ່ບ່ອນມືດໃນຫ້ອງໃຕ້ດິນ, ລາວໄດ້ຢູ່ໃນທີ່ນັ້ນເປັນເວລາດົນນານ. ຕໍ່ມາກະສັດເຊເດກີຢາໄດ້ໃຊ້ຄົນໄປຫາເຢເຣມີຢາ ແລະ ໄດ້ເອົາລາວໄປທີ່ວັງ. ກະສັດໄດ້ຖາມລາວເປັນການສ່ວນຕົວວ່າ, “ມີຖ້ອຍຄຳຫຍັງແດ່ມາຈາກພຣະເຈົ້າຢາເວບໍ?”
ເຢເຣມີຢາໄດ້ຕອບວ່າ, “ມີ, ທ່ານຈະຖືກມອບໄວ້ໃນມືຂອງກະສັດແຫ່ງບາບີໂລນ”.
ແລ້ວເຢເຣມີຢາໄດ້ເວົ້າກັບກະສັດເຊເດກີຢາວ່າ, “ຂ້ານ້ອຍໄດ້ເຮັດຜິດຮ້າຍແຮງອັນໃດຕໍ່ທ່ານ ຫລື ຕໍ່ພວກຂ້າລາຊະການຂອງທ່ານ ແລະ ຕໍ່ປະຊາຊົນເຫລົ່ານີ້, ທ່ານຈຶ່ງໄດ້ຈັບຂ້ານ້ອຍຂັງໄວ້ໃນຄຸກ? ບັນດາຜູ້ທໍານວາຍທີ່ໄດ້ທໍານວາຍໃຫ້ກັບທ່ານວ່າ, ‘ກະສັດແຫ່ງບາບີໂລນຈະບໍ່ມາໂຈມຕີທ່ານ ຫລື ດິນແດນນີ້ ພາກັນໄປໃສໝົດ’? ແຕ່ບັດນີ້ ຂໍພະລາຊາຂອງຂ້ານ້ອຍ, ໂຜດຮັບຟັງ. ຂ້ານ້ອຍອ້ອນວອນຂໍຕໍ່ທ່ານວ່າ: ຢ່າສົ່ງຂ້ານ້ອຍກັບຄືນໄປທີ່ເຮືອນຂອງໂຢນາທານເລຂາທິການ, ບໍ່ດັ່ງນັ້ນ ຂ້ານ້ອຍຈະຕ້ອງຕາຍຢູ່ທີ່ນັ້ນ”.
ແລ້ວກະສັດເຊເດກີຢາຈຶ່ງໄດ້ສັ່ງໃຫ້ເອົາເຢເຣມີຢາໄປໄວ້ໃນເດີ່ນຂອງທະຫານເຝົ້າຍາມ ແລະ ໄດ້ເອົາເຂົ້າຈີ່ກ້ອນໜຶ່ງໃຫ້ລາວຈາກທາງຍ່າງຂອງຄົນເຮັດເຂົ້າຈີ່ທຸກໆວັນຈົນເຂົ້າຈີ່ໃນເມືອງໝົດ. ສະນັ້ນ ເຢເຣມີຢາກໍຍັງຖືກຂັງໄວ້ຢູ່ໃນເດີ່ນຂອງທະຫານເຝົ້າຍາມ.
Source notes (2)
- Footnote ພາສາເຮັບເຣີວ່າ ໂຄນິຢາ ເປັນອີກຮູບໜຶ່ງຂອງເຢໂຮຍອາກິນ
- Footnote ຫລື ຊາວຄານເດອາ ເຊັ່ນດຽວກັບຂໍ້ 8, 9, 13 ແລະ 14
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.