Biblica® Open Lao Contemporary Version
ເຢເຣມີຢາ 31
ພຣະເຈົ້າຢາເວປະກາດວ່າ “ໃນເວລານັ້ນ, ເຮົາຈະເປັນພຣະເຈົ້າຂອງອິດສະຣາເອນທຸກຕະກຸນ ແລະ ພວກເຂົາຈະເປັນປະຊາຊົນຂອງເຮົາ”.
ພຣະເຈົ້າຢາເວກ່າວວ່າ:
“ປະຊາຊົນທີ່ລອດຊີວິດຈາກດາບ
ຈະໄດ້ຮັບຄວາມເມດຕາໃນຖິ່ນແຫ້ງແລ້ງກັນດານ;
ເຮົາຈະມາເພື່ອໃຫ້ອິດສະຣາເອນໄດ້ຮັບການພັກຜ່ອນ”.
ພຣະເຈົ້າຢາເວໄດ້ປາກົດແກ່ພວກເຮົາໃນອະດີດ1ກ່າວວ່າ:
“ເຮົາໄດ້ຮັກເຈົ້າດ້ວຍຄວາມຮັກນິລັນດອນ;
ເຮົາໄດ້ນໍາເຈົ້າມາດ້ວຍຄວາມເມດຕາອັນບໍ່ມີທີ່ສິ້ນສຸດ.
ອິດສະຣາເອນພົມມະຈາລີ, ເຈົ້າຈະໄດ້ຮັບການສ້າງຂຶ້ນໃໝ່,
ເຮົາຈະສ້າງເຈົ້າຂຶ້ນອີກຄັ້ງ,
ພວກເຈົ້າຈະຍົກກອງຂອງພວກເຈົ້າຂຶ້ນມາອີກ
ແລະ ອອກໄປເຕັ້ນລຳກັບຄົນທີ່ຊື່ນຊົມຍິນດີ.
ເຈົ້າຈະປູກຕົ້ນອະງຸ່ນ
ຢູ່ເທິງເນີນພູຊາມາເຣຍອີກ;
ບັນດາຊາວສວນຈະປູກຕົ້ນອະງຸ່ນ
ແລະ ຍິນດີກັບພືດຜົນທີ່ໄດ້ຮັບຂອງຕົນ.
ຈະມີວັນໜຶ່ງ ເມື່ອຄົນເຝົ້າຍາມສົ່ງສຽງຮ້ອງຂຶ້ນ
ເທິງເນີນພູເອຟຣາອິມວ່າ,
‘ຈົ່ງມາ, ໃຫ້ພວກເຮົາຂຶ້ນໄປທີ່ຊີໂອນ,
ເພື່ອໄປຫາພຣະເຈົ້າຢາເວ ພຣະເຈົ້າຂອງພວກເຮົາ’ ”.
ພຣະເຈົ້າຢາເວກ່າວວ່າ:
“ຈົ່ງຮ້ອງເພງດ້ວຍຊື່ນຊົມຍິນດີໃຫ້ຢາໂຄບ;
ຈົ່ງໂຫ່ຮ້ອງໃຫ້ກັບຜູ້ຍິ່ງໃຫຍ່ທີ່ສຸດໃນຊົນຊາດຕ່າງໆ.
ຈົ່ງໃຫ້ຄໍາສັນລະເສີນຂອງພວກເຈົ້າໄດ້ຍິນທົ່ວໄປ, ແລະ ກ່າວວ່າ,
‘ຂ້າແດ່ພຣະເຈົ້າຢາເວ, ໂຜດຊ່ວຍປະຊາຊົນຂອງພຣະອົງ,
ຄືປະຊາຊົນທີ່ຍັງເຫລືອຢູ່ຂອງອິດສະຣາເອນ’.
ເບິ່ງແມ, ເຮົາຈະນຳພວກເຂົາມາຈາກດິນແດນທາງທິດເໜືອ
ແລະ ຈະຮວບຮວມພວກເຂົາມາຈາກສຸດປາຍຂອງແຜ່ນດິນໂລກ.
ໃນທ່າມກາງພວກເຂົາຈະມີຄົນຕາບອດ ແລະ ຄົນເປ້ຍ,
ຜູ້ຍິງທີ່ຖືພາ ແລະ ຜູ້ຍິງທີ່ກຳລັງຈະເກີດລູກ;
ຝູງຊົນອັນໃຫຍ່ຫລວງຈະກັບຄືນມາ.
ພວກເຂົາຈະມາດ້ວຍການຮ້ອງໄຫ້;
ພວກເຂົາຈະອະທິຖານຂະນະທີ່ເຮົານຳພວກເຂົາກັບມາ.
ເຮົາຈະນຳພວກເຂົາຕາມແຄມນ້ຳ
ຕາມທາງທີ່ພວກເຂົາຈະບໍ່ສະດຸດລົ້ມ.
ເພາະເຮົາເປັນພໍ່ຂອງອິດສະຣາເອນ,
ແລະ ເອຟຣາອິມເປັນລູກຊາຍກົກຂອງເຮົາ.
“ຊົນຊາດທັງຫລາຍ, ຈົ່ງຟັງຖ້ອຍຄໍາຂອງພຣະເຈົ້າຢາເວ;
ຈົ່ງປະກາດຖ້ອຍຄຳນີ້ໃນດິນແດນແຄມຝັ່ງທະເລທີ່ຢູ່ຫ່າງໄກວ່າ:
‘ພຣະອົງຜູ້ທີ່ໄດ້ເຮັດໃຫ້ອິດສະຣາເອນກະຈັດກະຈາຍໄປຈະຮວບຮວມພວກເຂົາ
ແລະ ຈະເຝົ້າເບິ່ງຝູງແກະຂອງພຣະອົງເໝືອນດັ່ງຄົນລ້ຽງແກະ’.
ເພາະພຣະເຈົ້າຢາເວຈະປົດປ່ອຍຢາໂຄບ
ແລະ ຈະໄຖ່ພວກເຂົາອອກຈາກມືຂອງພວກຜູ້ທີ່ເຂັ້ມແຂງກວ່າພວກເຂົາ.
ພວກເຂົາຈະມາ ແລະ ໂຫ່ຮ້ອງຊື່ນຊົມຍິນດີເທິງພູເຂົາຊີໂອນ;
ພວກເຂົາຈະຊື່ນຊົມຍິນດີໃນສິ່ງທີ່ດີທີ່ພຣະເຈົ້າຢາເວມອບໃຫ້ຄື:
ພືດຜົນ, ເຫລົ້າອະງຸ່ນໃໝ່ ແລະ ນໍ້າມັນໝາກກອກ,
ຝູງແກະໜຸ່ມ ແລະ ຝູງສັດຕ່າງໆ.
ພວກເຂົາຈະເປັນເໝືອນສວນທີ່ຖືກຫົດນໍ້າ,
ແລະ ພວກເຂົາຈະບໍ່ໂສກເສົ້າອີກຕໍ່ໄປ.
ແລ້ວຍິງໜຸ່ມຈະເຕັ້ນລຳ ແລະ ດີໃຈ,
ຊາຍໜຸ່ມ ແລະ ຜູ້ເຖົ້າກໍເໝືອນກັນ.
ເຮົາຈະປ່ຽນຄວາມໂສກເສົ້າຂອງພວກເຂົາໃຫ້ກາຍເປັນຄວາມຍິນດີ;
ເຮົາຈະໃຫ້ການເລົ້າໂລມ ແລະ ຄວາມຊົມຊື່ນຍິນດີແກ່ພວກເຂົາແທນຄວາມໂສກເສົ້າ.
ເຮົາຈະໃຫ້ບັນດາປະໂລຫິດອີ່ມໃຈໄປດ້ວຍຄວາມອຸດົມສົມບູນ
ແລະ ປະຊາຊົນຂອງເຮົາຈະເຕັມໄປດ້ວຍສິ່ງທີ່ດີຈາກເຮົາ”,
ພຣະເຈົ້າຢາເວປະກາດດັ່ງນີ້.
ພຣະເຈົ້າຢາເວກ່າວວ່າ:
“ມີສຽງໜຶ່ງໄດ້ຍິນໃນຣາມາ,
ເປັນສຽງໄວ້ທຸກ ແລະ ສຽງຮ້ອງໄຫ້,
ນາງຣາເຊັນກຳລັງຮ້ອງໄຫ້ໃຫ້ກັບລູກຂອງຕົນ
ແລະ ບໍ່ຍອມຮັບຄຳເລົ້າໂລມໃຈ,
ເພາະລູກທັງຫລາຍໄດ້ເສຍໄປແລ້ວ”.
ພຣະເຈົ້າຢາເວກ່າວວ່າ:
“ຈົ່ງເຊົາຮ້ອງໄຫ້
ແລະ ເຊັດນ້ຳຕາຈາກຕາຂອງເຈົ້າສາ,
ເພາະການງານຂອງເຈົ້າຈະໄດ້ຮັບລາງວັນ”,
ພຣະເຈົ້າຢາເວປະກາດດັ່ງນີ້.
“ພວກເຂົາຈະກັບຄືນມາຈາກດິນແດນຂອງສັດຕູ.
ພຣະເຈົ້າຢາເວປະກາດວ່າ,
ດັ່ງນັ້ນ ມີຄວາມຫວັງສໍາລັບເຊື້ອສາຍຂອງເຈົ້າ”,
“ລູກໆຂອງເຈົ້າຈະກັບຄືນມາທີ່ດິນແດນຂອງພວກເຂົາເອງ.
“ເຮົາໄດ້ຍິນສຽງຄວນຄາງຂອງເອຟຣາອິມຢ່າງແນ່ນອນວ່າ:
‘ພຣະອົງຝຶກຂ້ານ້ອຍເໝືອນຝຶກງົວນ້ອຍໂຕໜຶ່ງທີ່ບໍ່ເຊື່ອຟັງ,
ແລະ ຂ້ານ້ອຍກໍໄດ້ຖືກຝຶກຝົນ,
ຂໍຊ່ວຍໃຫ້ຂ້ານ້ອຍຄືນສູ່ສະພາບດີ, ແລ້ວຂ້ານ້ອຍຈະກັບຄືນມາ,
ເພາະພຣະອົງເປັນພຣະເຈົ້າຢາເວ ພຣະເຈົ້າຂອງຂ້ານ້ອຍ.
ເມື່ອຂ້ານ້ອຍໄດ້ຫລົງທາງໄປ,
ຂ້ານ້ອຍກໍໄດ້ກັບໃຈໃໝ່;
ເມື່ອຂ້ານ້ອຍໄດ້ເຂົ້າໃຈແລ້ວ,
ຂ້ານ້ອຍກໍຕີເອິກຕົນເອງ.
ຂ້ານ້ອຍອັບອາຍ ແລະ ຕົກຕ່ຳ.
ເພາະຂ້ານ້ອຍເບື່ອໜ່າຍກັບຄວາມອັບອາຍຂາຍໜ້າຈາກບາບຂອງຂ້ານ້ອຍໃນຄາວທີ່ຍັງໜຸ່ມ’.
ເອຟຣາອິມເປັນລູກຊາຍທີ່ຮັກຂອງເຮົາ,
ເປັນລູກທີ່ເຮົາພໍໃຈນໍາບໍ່ແມ່ນບໍ?
ເຖິງແມ່ນວ່າ ເຮົາຈະກ່າວຕໍ່ສູ້ລາວຢູ່ເລື້ອຍໆ,
ແຕ່ເຮົາກໍຍັງຄິດເຖິງລາວ.
ເຫດສະນັ້ນ ຈິດໃຈຂອງເຮົາອາໄລຫາລາວ;
ເຮົາໃຫ້ຄວາມເມດຕາແກ່ລາວຢ່າງຫລວງຫລາຍ”,
ພຣະເຈົ້າຢາເວປະກາດດັ່ງນີ້.
“ຈົ່ງຕັ້ງປ້າຍບອກທາງຂຶ້ນ;
ຈົ່ງຕິດປ້າຍຊີ້ທາງໄວ້.
ຈົ່ງສັງເກດເບິ່ງທາງຫລວງ,
ຖະໜົນຫົນທາງທີ່ເຈົ້າດຳເນີນໄປ.
ອິດສະຣາເອນພົມມະຈາລີເອີຍ, ຈົ່ງກັບຄືນມາ,
ຈົ່ງກັບຄືນມາຍັງເມືອງຕ່າງໆຂອງເຈົ້າ.
ລູກສາວອິດສະຣາເອນທີ່ບໍ່ສັດຊື່,
ເຈົ້າຈະພະເນຈອນໄປມາອີກດົນປານໃດ?
ພຣະເຈົ້າຢາເວຈະສ້າງສິ່ງໃໝ່ເທິງແຜ່ນດິນໂລກຄື
ແມ່ຍິງຈະກັບຄືນມາຫາ2ຜູ້ຊາຍ”.
ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່, ພຣະເຈົ້າແຫ່ງອິດສະຣາເອນກ່າວວ່າ: “ເມື່ອເຮົານຳພວກເຂົາກັບມາຈາກການເປັນຊະເລີຍ,3 ປະຊາຊົນໃນດິນແດນຢູດາຍ ແລະ ເມືອງຕ່າງໆຈະກັບມາເວົ້າອີກວ່າ: ‘ຂໍພຣະເຈົ້າຢາເວອວຍພອນເຈົ້າ, ນະຄອນທີ່ຈະເລີນຮຸ່ງເຮືອງ, ພູເຂົາສັກສິດ’. ປະຊາຊົນຈະອາໄສຢູ່ນໍາກັນໃນຢູດາຍ ແລະ ໃນເມືອງທັງໝົດຄື ພວກຊາວນາ ແລະ ພວກຜູ້ທີ່ຍ້າຍຖິ່ນຖານພ້ອມທັງຝູງແກະຂອງພວກເຂົາ. ເຮົາຈະໃຫ້ຄົນອິດເມື່ອຍມີແຮງຂຶ້ນໃໝ່ ແລະ ໃຫ້ຄົນທີ່ອ່ອນແຮງລົງໄດ້ກິນພຽງພໍ”.
ຮອດຕອນນີ້ຂ້າພະເຈົ້າກໍໄດ້ຕື່ນຂຶ້ນ ແລະ ແນມເບິ່ງໄປອ້ອມຮອບ. ການນອນຫລັບຂອງຂ້າພະເຈົ້າເຮັດໃຫ້ຂ້າພະເຈົ້າຊື່ນໃຈ.
ພຣະເຈົ້າຢາເວປະກາດວ່າ “ວັນນັ້ນຈະມາເຖິງ, ເມື່ອເຮົາຈະສ້າງອານາຈັກຂອງອິດສະຣາເອນ ແລະ ຢູດາຍ ໂດຍເຮັດໃຫ້ມະນຸດ ແລະ ສັດມີລູກຫລານຢ່າງຫລວງຫລາຍ. ດັ່ງທີ່ເຮົາໄດ້ເຝົ້າເບິ່ງພວກເຂົາເພື່ອຖອນຮາກ ແລະ ເຮັດໃຫ້ເພພັງລົງ, ເພື່ອທຳລາຍ, ໂຄ່ນລົ້ມ ແລະ ນໍາໄພພິບັດມາ, ສະນັ້ນ ເຮົາກໍຈະເຝົ້າເບິ່ງພວກເຂົາເພື່ອກໍ່ສ້າງ ແລະ ເພື່ອປູກຝັງ”, ພຣະເຈົ້າຢາເວປະກາດດັ່ງນີ້. “ໃນວັນເຫລົ່ານັ້ນ ປະຊາຊົນຈະບໍ່ເວົ້າອີກຕໍ່ໄປວ່າ,
“ ‘ພໍ່ແມ່ໄດ້ກິນໝາກອະງຸ່ນສົ້ມ
ແລະ ພວກລູກກໍພາກັນເຂັດແຂ້ວ’.
ທຸກຄົນຈະຕາຍເພາະບາບຂອງຕົນເອງ; ຜູ້ໃດທີ່ກິນອະງຸ່ນສົ້ມ ຕົນເອງກໍຈະເຂັດແຂ້ວ”.
ພຣະເຈົ້າຢາເວປະກາດວ່າ, “ວັນນັ້ນຈະມາເຖິງ”,
“ເມື່ອເຮົາຈະເຮັດຄໍາໝັ້ນສັນຍາໃໝ່
ກັບປະຊາຊົນອິດສະຣາເອນ
ແລະ ກັບປະຊາຊົນຢູດາຍ.
ເປັນຄໍາໝັ້ນສັນຍາທີ່ບໍ່ເໝືອນກັນກັບຄໍາໝັ້ນສັນຍາ
ທີ່ເຮົາໄດ້ເຮັດໄວ້ກັບບັນພະບຸລຸດຂອງພວກເຂົາ
ເມື່ອເຮົາໄດ້ຈູງມືພວກເຂົາ
ເພື່ອນຳພວກເຂົາອອກມາຈາກເອຢິບ,
ເພາະພວກເຂົາໄດ້ລະເມີດຄໍາໝັ້ນສັນຍາຂອງເຮົາ,
ເຖິງແມ່ນວ່າເຮົາເປັນຜົວຂອງ4ພວກເຂົາກໍຕາມ5”.
ພຣະເຈົ້າຢາເວປະກາດດັ່ງນີ້.
ພຣະເຈົ້າຢາເວປະກາດວ່າ, “ນີ້ແມ່ນຄໍາໝັ້ນສັນຍາທີ່ເຮົາຈະເຮັດກັບປະຊາຊົນອິດສະຣາເອນ,
ຫລັງຈາກສະໄໝນັ້ນ.
ເຮົາຈະໃສ່ກົດບັນຍັດຂອງເຮົາໃນຈິດໃຈຂອງພວກເຂົາ
ແລະ ຂຽນມັນໃສ່ເທິງຫົວໃຈຂອງພວກເຂົາ.
ເຮົາຈະເປັນພຣະເຈົ້າຂອງພວກເຂົາ
ແລະ ພວກເຂົາຈະເປັນປະຊາຊົນຂອງເຮົາ.
ພວກເຂົາຈະບໍ່ສັ່ງສອນເພື່ອນບ້ານຂອງຕົນ
ຫລື ບອກຕໍ່ກັນ ແລະ ກັນອີກຕໍ່ໄປວ່າ, ‘ຈົ່ງຮູ້ຈັກພຣະເຈົ້າຢາເວ’,
ເພາະພວກເຂົາທຸກຄົນຈະຮູ້ຈັກເຮົາ,
ຕັ້ງແຕ່ຜູ້ທີ່ຕໍ່າຕ້ອຍທີ່ສຸດໄປຈົນເຖິງຜູ້ທີ່ໃຫຍ່ທີ່ສຸດ”,
ພຣະເຈົ້າຢາເວປະກາດດັ່ງນີ້.
“ເພາະເຮົາຈະໃຫ້ອະໄພຄວາມຊົ່ວຮ້າຍຂອງພວກເຂົາ
ແລະ ຈະບໍ່ຈົດຈຳບາບທັງຫລາຍຂອງພວກເຂົາອີກຕໍ່ໄປ”.
ພຣະເຈົ້າຢາເວກ່າວວ່າ, ພຣະອົງຜູ້ທີ່ຕັ້ງດວງຕາເວັນໃຫ້ສ່ອງແສງໃນຕອນກາງເວັນ,
ຜູ້ທີ່ໃຫ້ສັ່ງດວງເດືອນ ແລະ ດວງດາວ
ໃຫ້ສ່ອງແສງໃນຕອນກາງຄືນ,
ຜູ້ທີ່ເຮັດໃຫ້ທະເລຄຶກຄະນອງ
ຈົນຄື້ນຂອງທະເລຮ້ອງດັງກ້ອງວ່າ, ນາມພຣະອົງຄືພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່.
ພຣະເຈົ້າຢາເວປະກາດວ່າ:
“ຕາບໃດທີ່ດໍາລັດຕ່າງໆເຫລົ່ານີ້ບໍ່ລ່ວງຫາຍໄປຕໍ່ໜ້າເຮົາ,
ຕາບນັ້ນອິດສະຣາເອນ
ຈະດໍາລົງຢູ່ເປັນຊົນຊາດໜຶ່ງຕໍ່ໜ້າເຮົາຕະຫລອດໄປ”.
ພຣະເຈົ້າຢາເວກ່າວວ່າ:
“ເມື່ອໃດຟ້າສະຫວັນຢູ່ເທິງຖືກວັດແທກໄດ້
ແລະ ຖານຮາກຂອງແຜ່ນດິນໂລກຢູ່ລຸ່ມໄດ້ຖືກຄົ້ນພົບ
ເຮົາຈຶ່ງຈະປະຖິ້ມເຊື້ອສາຍຂອງອິດສະຣາເອນເມື່ອນັ້ນ
ເພາະທຸກສິ່ງທີ່ພວກເຂົາໄດ້ເຮັດ”,
ພຣະເຈົ້າຢາເວປະກາດດັ່ງນີ້.
ພຣະເຈົ້າຢາເວປະກາດວ່າ, “ວັນນັ້ນຈະມາເຖິງ, ເມື່ອນະຄອນນີ້ຈະຖືກສ້າງຂຶ້ນໃໝ່ເພື່ອເຮົາ ຕັ້ງແຕ່ຫໍຄອຍຮານາເນນຈົນເຖິງປະຕູແຈ. ເຊືອກວັດແທກຈະຄຶງອອກຈາກທີ່ນັ້ນໄປຈົນເຖິງເນີນພູຄາເຣັບ ແລ້ວກັບຄືນມາຈົນເຖິງໂກອາ. ທົ່ວຮ່ອມພູທີ່ເປັນບ່ອນຝັງຊາກສົບ ແລະ ບ່ອນຖິ້ມຂີ້ເຖົ່າ, ແລະ ທາງລົງໄປສູ່ຮ່ອມພູກິດໂຣນທາງທິດຕາເວັນອອກໄປຈົນເຖິງປະຕູຄອກມ້າຈະບໍລິສຸດສຳລັບພຣະເຈົ້າຢາເວ. ນະຄອນນີ້ຈະບໍ່ຖືກຖອນຮາກ ຫລື ທໍາລາຍອີກຈັກເທື່ອ”.
Source notes (5)
- Footnote ຫລື ພຣະເຈົ້າຢາເວໄດ້ປາກົດແກ່ພວກເຮົາຈາກທີ່ໄກ
- Footnote ຫລື ຈະທ່ຽວເສາະຫາ ຫລື ຈະປົກປ້ອງ
- Footnote ຫລື ເມື່ອເຮົາໃຫ້ເຂົາກັບສູ່ສະພາບດີດັ່ງເດີມ
- Footnote ສະບັບ LXX. ແລະ Syr. ວ່າ ແລະ ເຮົາໄດ້ຫັນໄປຈາກ
- Footnote ພາສາເຮັບເຣີວ່າ ຜົວຂອງພວກເຂົາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.