Biblica® Open Lao Contemporary Version
ເຢເຣມີຢາ 32
ເຢເຣມີຢາຊື້ນາທົ່ງໜຶ່ງ
ຖ້ອຍຄໍາຂອງພຣະເຈົ້າຢາເວໄດ້ມາເຖິງເຢເຣມີຢາໃນປີທີສິບຂອງການປົກຄອງຂອງກະສັດເຊເດກີຢາແຫ່ງຢູດາຍ, ເຊິ່ງເປັນປີທີສິບແປດແຫ່ງການປົກຄອງຂອງກະສັດເນບູກາດເນັດຊາ. ກອງທັບຂອງກະສັດແຫ່ງບາບີໂລນກຳລັງປິດລ້ອມເຢຣູຊາເລັມ ແລະ ຜູ້ທຳນວາຍເຢເຣມີຢາຖືກກັກຂັງໄວ້ຢູ່ໃນເດີ່ນຂອງທະຫານເຝົ້າຍາມໃນລາຊະວັງຂອງຢູດາຍ.
ບັດນີ້ ກະສັດເຊເດກີຢາແຫ່ງຢູດາຍໄດ້ຂັງລາວໄວ້ຢູ່ທີ່ນັ້ນ ແລະ ເວົ້າວ່າ, “ເປັນຫຍັງເຈົ້າຈຶ່ງທຳນວາຍແບບນັ້ນ? ເຈົ້າເວົ້າວ່າ, ‘ພຣະເຈົ້າຢາເວກ່າວດັ່ງນີ້ວ່າ: ເຮົາກຳລັງຈະມອບນະຄອນນີ້ໄວ້ໃນມືຂອງກະສັດແຫ່ງບາບີໂລນ ແລະ ເພິ່ນຈະຢຶດເອົານະຄອນນີ້. ກະສັດເຊເດກີຢາແຫ່ງຢູດາຍກໍຈະໜີບໍ່ພົ້ນຈາກມືຂອງຊາວບາບີໂລນ1 ແຕ່ຈະຖືກມອບໄວ້ຢູ່ໃນມືຂອງກະສັດບາບີໂລນຢ່າງແນ່ນອນ, ແລະ ລາວຈະເວົ້າກັບເພິ່ນໜ້າຕໍ່ໜ້າ ແລະ ຈະເຫັນເພິ່ນດ້ວຍຕາຂອງລາວເອງ. ເພິ່ນຈະຈັບເຊເດກີຢາໄປທີ່ບາບີໂລນ, ບ່ອນທີ່ລາວຈະຢູ່ທີ່ນັ້ນຈົນກວ່າເຖິງວັນທີເຮົາຈັດການກັບເນບູກາດເນັດຊາ’, ພຣະເຈົ້າຢາເວປະກາດວ່າ, ‘ຖ້າເຈົ້າຕໍ່ສູ້ຊາວບາບີໂລນ, ເຈົ້າກໍຈະບໍ່ຊະນະ’ ”.
ເຢເຣມີຢາໄດ້ເວົ້າວ່າ, “ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ: ຮານາເມນລູກຊາຍຂອງຊໍລູມ ລຸງຂອງຂ້າພະເຈົ້າກໍາລັງມາຫາເຈົ້າ ແລະ ຈະເວົ້າວ່າ, ‘ຂໍໃຫ້ເຈົ້າຊື້ທົ່ງນາຂອງຂ້າພະເຈົ້າຢູ່ທີ່ເມືອງອານາທົດ, ເພາະເຈົ້າເປັນພີ່ນ້ອງທີ່ໃກ້ຊິດທີ່ສຸດມັນເປັນສິດຂອງເຈົ້າ ແລະ ມີສິດທີ່ຈະຊື້ທົ່ງນານີ້ໄວ້’.
“ຈາກນັ້ນ, ຕາມທີ່ພຣະເຈົ້າຢາເວໄດ້ກ່າວວ່າ, ຮານາເມນຍາດພີ່ນ້ອງຂອງຂ້າພະເຈົ້າໄດ້ມາຫາຂ້າພະເຈົ້າໃນເດີ່ນຂອງທະຫານເຝົ້າຍາມຕາມທີ່ພຣະເຈົ້າຢາເວໄດ້ກ່າວໄວ້ ແລະ ເວົ້າວ່າ, ‘ຂໍຈົ່ງຊື້ທົ່ງນາຂອງຂ້າພະເຈົ້າຢູ່ທີ່ເມືອງອານາທົດໃນເຂດແດນຂອງເບັນຢາມິນ. ເພາະມັນເປັນສິດຂອງເຈົ້າເພື່ອໄຖ່ ແລະ ຄອບຄອງທົ່ງນານັ້ນ, ຂໍຈົ່ງຊື້ມັນໄວ້ເປັນຂອງເຈົ້າສາ’.
“ຂ້າພະເຈົ້າຈຶ່ງຮູ້ໄດ້ວ່ານີ້ແມ່ນຖ້ອຍຄໍາຂອງພຣະເຈົ້າຢາເວ; ດັ່ງນັ້ນ ຂ້າພະເຈົ້າຈຶ່ງໄດ້ຊື້ທົ່ງນານັ້ນທີ່ອານາທົດຈາກຮານາເມນຍາດພີ່ນ້ອງຂອງຂ້າພະເຈົ້າ ແລະ ຊັ່ງເງິນຈຳນວນສິບເຈັດຫລຽນເຊເຂວ2ໃຫ້. ຂ້າພະເຈົ້າໄດ້ເຊັນຊື່ ແລະ ປະທັບຕາໃນໃບສັນຍານັ້ນໄວ້ເປັນພະຍານ, ແລ້ວໄດ້ຊັ່ງເງິນຈ່າຍໃຫ້ລາວ. ແລ້ວຂ້າພະເຈົ້າໄດ້ເອົາໃບສັນຍາຊື້ທີ່ປະທັບຕາແລ້ວຄື ສະບັບອັດສໍາເນົາທີ່ມີເງື່ອນໄຂ ແລະ ຂໍ້ກໍານົດຕ່າງໆ, ສະບັບອັດສຳເນົາທີ່ບໍ່ໄດ້ປະທັບຕາດ້ວຍ ແລ້ວຂ້າພະເຈົ້າໄດ້ມອບໃບສັນຍານີ້ໃຫ້ບາຣຸກ ລູກຊາຍຂອງເນຣີຢາ, ເຊິ່ງເປັນຫລານຊາຍຂອງມາຣະເຊຢາຕໍ່ໜ້າຮານາເມນຍາດພີ່ນ້ອງຂອງຂ້າພະເຈົ້າ ແລະ ຄົນທີ່ເປັນພະຍານທັງຫລາຍທີ່ໄດ້ເຊັນຊື່ລົງໃນໃບສັນຍານັ້ນ ແລະ ຕໍ່ໜ້າຊາວຢິວທັງໝົດທີ່ກໍາລັງນັ່ງຢູ່ໃນເດີ່ນຂອງທະຫານເຝົ້າຍາມ.
“ຢູ່ຊ້ອງໜ້າພວກເຂົາຂ້າພະເຈົ້າໄດ້ໃຫ້ຄຳແນະນຳເຫລົ່ານີ້ແກ່ບາຣຸກວ່າ: ‘ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່, ພຣະເຈົ້າແຫ່ງອິດສະຣາເອນກ່າວວ່າ: ຈົ່ງເອົາເອກະສານເຫລົ່ານີ້, ທັງໃບສັນຍາຊື້ຂາຍທີ່ປະທັບຕາແລ້ວ ແລະ ໃບສັນຍາທີ່ອັດສຳເນົາທີ່ບໍ່ໄດ້ປະທັບຕາ, ແລະ ຈົ່ງເອົາເອກະສານນັ້ນເກັບໄວ້ໃນໄຫເພື່ອວ່າພວກມັນຈະຄົງຢູ່ໄດ້ອີກດົນນານ. ເພາະພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່, ພຣະເຈົ້າແຫ່ງອິດສະຣາເອນກ່າວດັ່ງນີ້ວ່າ: ເຮືອນ, ທົ່ງນາ ແລະ ສວນອະງຸ່ນຈະມີການຊື້ຂາຍກັນອີກໃນດິນແດນນີ້’.
“ຫລັງຈາກ ຂ້າພະເຈົ້າໄດ້ມອບໃບສັນຍາໃຫ້ບາຣຸກລູກຊາຍຂອງເນຣີຢາແລ້ວ, ຂ້າພະເຈົ້າໄດ້ອະທິຖານຕໍ່ພຣະເຈົ້າຢາເວວ່າ:
“ຂ້າແດ່ພຣະເຈົ້າຢາເວ ອົງເຈົ້ານາຍ, ພຣະອົງໄດ້ສ້າງຟ້າສະຫວັນ ແລະ ແຜ່ນດິນໂລກໂດຍມີລິດອໍານາດຍິ່ງໃຫຍ່ຂອງພຣະອົງ ແລະ ແຂນຂອງພຣະອົງທີ່ໄດ້ຢຽດອອກມາ. ບໍ່ມີສິ່ງໃດຍາກເກີນໄປສຳລັບພຣະອົງ. ພຣະອົງສໍາແດງຄວາມຮັກຕໍ່ຫລາຍພັນຄົນ ແຕ່ນຳການລົງໂທດສໍາລັບການບາບຂອງພໍ່ແມ່ໄວ້ໃນຕັກຂອງລູກຫລານຂອງພວກເຂົາ. ຂ້າແດ່ພຣະເຈົ້າຜູ້ຍິ່ງໃຫຍ່ ແລະ ຜູ້ມີລິດອຳນາດຍິ່ງໃຫຍ່, ຜູ້ທີ່ມີນາມວ່າ ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່, ຄວາມປະສົງຂອງພຣະອົງນັ້ນດີເລີດ ແລະ ການກະທຳຂອງພຣະອົງກໍຍິ່ງໃຫຍ່. ທຸກວິຖີທາງຂອງມະນຸດກໍປາກົດແຈ້ງຕໍ່ຕາຂອງພຣະອົງ, ພຣະອົງໃຫ້ບຳເໜັດທຸກຄົນຕາມການປະພຶດ ແລະ ການກະທຳຂອງພວກເຂົາຢ່າງເໝາະສົມ. ພຣະອົງສໍາແດງໝາຍສຳຄັນຕ່າງໆ ແລະ ການອັດສະຈັນຕ່າງໆໃນເອຢິບ ແລະ ຍັງໄດ້ສືບຕໍ່ເຮັດກັບພວກເຂົາມາຈົນເຖິງທຸກວັນນີ້ທັງໃນອິດສະຣາເອນ ແລະ ທ່າມກາງມວນມະນຸດທັງປວງ, ແລ້ວກໍໄດ້ເຮັດໃຫ້ຊື່ສຽງຂອງພຣະອົງນັ້ນຍັງຄົງຖືກຊ່າລືຢູ່. ພຣະອົງນຳປະຊາຊົນອິດສະຣາເອນອອກມາຈາກເອຢິບດ້ວຍໝາຍສຳຄັນ ແລະ ການອັດສະຈັນຕ່າງໆ, ດ້ວຍມືອັນມີລິດອໍານາດຍິ່ງໃຫຍ່ ແລະ ແຂນຂອງພຣະອົງທີ່ໄດ້ຢຽດອອກມາ, ແລະ ດ້ວຍຄວາມຢ້ານກົວອັນໃຫຍ່ຫລວງ. ພຣະອົງໄດ້ມອບດິນແດນນີ້ແກ່ອິດສະຣາເອນຕາມທີ່ພຣະອົງໄດ້ສັນຍາໄວ້ກັບບັນພະບຸລຸດຂອງພວກເຂົາ, ເຊິ່ງເປັນດິນແດນທີ່ອຸດົມສົມບູນໄປດ້ວຍນ້ຳນົມ ແລະ ນ້ຳເຜິ້ງ. ພວກເຂົາໄດ້ເຂົ້າໄປ ແລະ ໄດ້ຄອບຄອງດິນແດນນີ້, ແຕ່ພວກເຂົາບໍ່ໄດ້ເຊື່ອຟັງພຣະອົງ ຫລື ບໍ່ໄດ້ປະຕິບັດຕາມກົດບັນຍັດຂອງພຣະອົງ; ພວກເຂົາບໍ່ໄດ້ຕາມສິ່ງທີ່ພຣະອົງໄດ້ສັ່ງພວກເຂົາໃຫ້ພວກເຂົາເຮັດ. ສະນັ້ນ ພຣະອົງຈຶ່ງໄດ້ນຳໄພພິບັດທັງໝົດນີ້ມາສູ່ພວກເຂົາ.
“ເບິ່ງແມ, ເຄື່ອງປິດລ້ອມຖືກສ້າງຂຶ້ນເພື່ອຢຶດນະຄອນນີ້. ຍ້ອນສົງຄາມ, ການອຶດຢາກອາຫານ ແລະ ໂລກລະບາດ, ນະຄອນຈະຖືກມອບໄວ້ໃນມືຂອງຊາວບາບີໂລນທີ່ກຳລັງໂຈມຕີມັນ. ສິ່ງນີ້ໄດ້ເກີດຕາມທີ່ພຣະອົງໄດ້ກ່າວໄວ້, ດັ່ງທີ່ພຣະອົງເຫັນຢູ່ຂະນະນີ້. ແລະ ເຖິງແມ່ນວ່ານະຄອນຈະຖືກມອບໄວ້ໃນມືຂອງຊາວບາບີໂລນແລ້ວກໍຕາມ, ພຣະອົງເປັນພຣະເຈົ້າຢາເວ ອົງເຈົ້ານາຍກ່າວກັບຂ້ານ້ອຍວ່າ, ‘ຈົ່ງຊື້ທົ່ງນາດ້ວຍເງິນນັ້ນ ແລະ ດໍາເນີນການຕາມນັ້ນຕໍ່ໜ້າພະຍານທັງຫລາຍ’ ”.
ແລ້ວຖ້ອຍຄໍາຂອງພຣະເຈົ້າຢາເວໄດ້ມາເຖິງເຢເຣມີຢາວ່າ: “ເຮົາແມ່ນພຣະເຈົ້າຢາເວ ພຣະເຈົ້າຂອງມວນມະນຸດທັງປວງ, ມີສິ່ງໃດຍາກເກີນໄປສຳລັບເຮົາບໍ? ເຫດສະນັ້ນ ພຣະເຈົ້າຢາເວກ່າວວ່າ: ເຮົາກຳລັງຈະມອບນະຄອນນີ້ໄວ້ໃນມືຂອງຊາວບາບີໂລນ ແລະ ໃນມືຂອງກະສັດເນບູກາດເນັດຊາແຫ່ງບາບີໂລນ, ເຊິ່ງຈະເອົາຊະນະນະຄອນນີ້. ຊາວບາບີໂລນຜູ້ທີ່ກໍາລັງມາໂຈມຕີນະຄອນນີ້ຈະເຂົ້າມາ ແລະ ຈູດນະຄອນນີ້; ພວກເຂົາຈະເຜົາເມືອງພ້ອມທັງເຮືອນຂອງປະຊາຊົນທີ່ໄດ້ຍົວະຄວາມໂກດຮ້າຍຂອງເຮົາໂດຍການເຜົາເຄື່ອງຫອມໃຫ້ແກ່ພະບາອານຢູ່ເທິງຫລັງຄາ ແລະ ໂດຍການເທເຄື່ອງດື່ມຖວາຍບູຊາໃຫ້ບັນດາພະອື່ນ.
“ປະຊາຊົນອິດສະຣາເອນ ແລະ ຢູດາຍບໍ່ໄດ້ເຮັດສິ່ງໃດ ແຕ່ໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງເຮົາຕັ້ງແຕ່ພວກເຂົາຍັງໜຸ່ມ; ແທ້ຈິງແລ້ວ, ປະຊາຊົນອິດສະຣາເອນບໍ່ໄດ້ເຮັດສິ່ງໃດ ແຕ່ໄດ້ຍົວະຄວາມໃຈຮ້າຍຂອງເຮົາດ້ວຍສິ່ງທີ່ມືຂອງພວກເຂົາໄດ້ສ້າງຂຶ້ນມາ, ພຣະເຈົ້າຢາເວປະກາດດັ່ງນີ້. ຕັ້ງແຕ່ມື້ທີ່ເມືອງໄດ້ຖືກສ້າງຂຶ້ນຈົນເຖິງບັດນີ້ ເມືອງນີ້ໄດ້ຍົວະຄວາມໃຈຮ້າຍ ແລະ ຄວາມໂກດຮ້າຍຂອງເຮົາຈົນເຮົາຕ້ອງກຳຈັດເມືອງນີ້ໃຫ້ພົ້ນຈາກໜ້າຂອງເຮົາ. ປະຊາຊົນອິດສະຣາເອນ ແລະ ຢູດາຍ, ບໍ່ວ່າບັນດາກະສັດ, ຂ້າລາຊະການ, ພວກປະໂລຫິດ ພວກຜູ້ທຳນວາຍ ແລະ ປະຊາຊົນຢູດາຍ ແລະ ບັນດາຄົນທີ່ອາໄສໃນເຢຣູຊາເລັມໄດ້ຍົວະເຮົາໂດຍຄວາມຊົ່ວຮ້າຍທັງໝົດທີ່ພວກເຂົາໄດ້ເຮັດ. ພວກເຂົາໄດ້ປິ່ນຫລັງຂອງພວກເຂົາໃສ່ເຮົາ, ແລະ ບໍ່ໄດ້ຫັນໜ້າຂອງຕົນມາຫາເຮົາ; ເຖິງແມ່ນວ່າເຮົາໄດ້ສັ່ງສອນພວກເຂົາຫລາຍເທື່ອແລ້ວກໍຕາມ, ພວກເຂົາກໍບໍ່ຍອມຟັງ ຫລື ບໍ່ຍອມຮັບການຕີສອນ. ພວກເຂົາໄດ້ຕັ້ງຮູບເຄົາລົບອັນໜ້າລັງກຽດໃນວິຫານ ທີ່ມີນາມຂອງເຮົາ ແລະ ເຮັດໃຫ້ວິຫານນັ້ນເປັນມົນທິນ. ພວກເຂົາໄດ້ສ້າງບ່ອນກາບໄຫວ້ຢູ່ເທິງບ່ອນສູງຕ່າງໆສຳລັບພະບາອານໃນຮ່ອມພູຮິນໂນມ ເພື່ອຖວາຍບູຊາລູກຊາຍ ແລະ ລູກສາວຂອງພວກເຂົາແກ່ພະໂມເລັກ,3 ທັງທີ່ເຮົາບໍ່ເຄີຍໄດ້ສັ່ງ ຫລື ບໍ່ເຄີຍຢູ່ໃນຄວາມຄິດຂອງເຮົາເລີຍວ່າ, ພວກເຂົາຈະເຮັດສິ່ງທີ່ໜ້າລັງກຽດເຊັ່ນນັ້ນ ແລະ ເຮັດໃຫ້ຢູດາຍເຮັດບາບດ້ວຍ.
“ພຣະອົງກໍາລັງກ່າວເຖິງນະຄອນນີ້ວ່າ, ‘ເຮົາຈະມອບມັນໄວ້ໃນມືຂອງກະສັດແຫ່ງບາບີໂລນດ້ວຍສົງຄາມ, ການອຶດຢາກອາຫານ ແລະ ໂລກລະບາດ’ ແຕ່ພຣະເຈົ້າຢາເວ, ພຣະເຈົ້າແຫ່ງອິດສະຣາເອນກ່າວວ່າ: ເຮົາຈະຮວບຮວມພວກເຂົາຈາກດິນແດນທັງໝົດຢ່າງແນ່ນອນ ບ່ອນທີ່ເຮົາຂັບໄລ່ພວກເຂົາໄປນັ້ນດ້ວຍຄວາມໃຈຮ້າຍ ແລະ ດ້ວຍຄວາມໂກດຮ້າຍອັນຮຸນແຮງຂອງເຮົາ; ເຮົາຈະນຳພວກເຂົາກັບຄືນມາບ່ອນນີ້ ແລະ ໃຫ້ພວກເຂົາອາໄສຢູ່ຢ່າງປອດໄພ. ພວກເຂົາຈະເປັນປະຊາຊົນຂອງເຮົາ ແລະ ເຮົາຈະເປັນພຣະເຈົ້າຂອງພວກເຂົາ. ເຮົາຈະເຮັດໃຫ້ພວກເຂົາເປັນນໍ້າໜຶ່ງໃຈດຽວກັນທາງຈິດໃຈ ແລະ ການກະທໍາ, ເພື່ອວ່າພວກເຂົາຈະຢຳເກງເຮົາຢູ່ສະເໝີ ແລະ ທັງໝົດນັ້ນກໍເພື່ອຄວາມຜາສຸກຂອງພວກເຂົາເອງ ແລະ ຂອງລູກຫລານຫລັງຈາກພວກເຂົາ. ເຮົາຈະເຮັດຄໍາໝັ້ນສັນຍານິລັນດອນກັບພວກເຂົາຄື: ເຮົາຈະບໍ່ຢຸດທີ່ຈະເຮັດສິ່ງທີ່ດີກັບພວກເຂົາ, ແລະ ເຮົາຈະດົນໃຈພວກເຂົາໃຫ້ຢຳເກງເຮົາ, ເພື່ອວ່າພວກເຂົາຈະບໍ່ຫັນໜີຈາກເຮົາອີກຈັກເທື່ອ. ເຮົາຈະຊົມຊື່ນຍິນດີໃນການເຮັດສິ່ງດີໃຫ້ກັບພວກເຂົາ ແລະ ຈະປູກພວກເຂົາໄວ້ໃນດິນແດນນີ້ດ້ວຍສຸດຈິດ, ສຸດໃຈຂອງເຮົາຢ່າງແນ່ນອນ.
“ພຣະເຈົ້າຢາເວກ່າວວ່າ: ດັ່ງທີ່ເຮົາໄດ້ນຳໄພພິບັດຮ້າຍແຮງທັງໝົດນີ້ມາສູ່ປະຊາຊົນນີ້ຢ່າງໃດ, ເຮົາກໍຈະໃຫ້ຄວາມຈະເລີນຮຸ່ງເຮືອງທັງໝົດນັ້ນທີ່ເຮົາໄດ້ສັນຍາໄວ້ກັບພວກເຂົາຢ່າງນັ້ນ. ຈະມີການຊື້ທົ່ງນາກັນອີກເທື່ອໜຶ່ງໃນດິນແດນແຫ່ງນີ້, ເຊິ່ງພວກເຈົ້າເວົ້າກັນວ່າ, ‘ດິນແດນນີ້ໄດ້ຖືກປະຖິ້ມໄວ້ໃຫ້ຮົກຮ້າງໂດຍບໍ່ມີຄົນ ຫລື ສັດອາໄສຢູ່, ເພາະມັນໄດ້ຖືກມອບໄວ້ໃນມືຂອງຊາວບາບີໂລນ’. ທົ່ງນາຈະມີການຊື້ດ້ວຍເງິນ, ແລະ ຈະມີການເຊັ່ນໃບສັນຍາ, ປະທັບຕາ ແລະ ມີຄົນເປັນພະຍານໃນເຂດແດນຂອງເບັນຢາມິນ, ໃນເມືອງຕ່າງໆ ແລະ ໃນບ້ານຕ່າງໆທີ່ຢູ່ອ້ອມເຢຣູຊາເລັມ, ໃນເມືອງຕ່າງໆຂອງຢູດາຍ ແລະ ໃນເມືອງຕ່າງໆຕາມເຂດເນີນພູ, ຕາມຕີນພູຕ່າງໆທາງພາກຕາເວັນຕົກ ແລະ ເນເກັບ, ເພາະເຮົາຈະເຮັດໃຫ້ພວກເຂົາຄືນສູ່ສະພາບເດີມ,4 ພຣະເຈົ້າຢາເວປະກາດດັ່ງນີ້”.
Source notes (4)
- Footnote ຫລື ຊາວຄານເດອາ ເຊັ່ນດຽວກັບຂໍ້ 5, 24, 25, 28, 29 ແລະ 43
- Footnote 1 ເຊເຂວ ຄືເງິນໜັກປະມານ 11,5 ກຣາມ ມີຄ່າເທົ່າກັບຄ່າແຮງສອງເດືອນ
- Footnote ຫລື ໃຫ້ລູກຊາຍລູກສາວຂອງເຂົາລຸຍໄຟ
- Footnote ຫລື ຈະນຳພວກເຂົາກັບມາຈາກການເປັນຊະເລີຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.