Biblica® Open Lao Contemporary Version
ເຢເຣມີຢາ 30
ການຟື້ນຟູອິດສະຣາເອນ
ຖ້ອຍຄໍາຈາກພຣະເຈົ້າຢາເວໄດ້ມາເຖິງເຢເຣມີຢາວ່າ: “ພຣະເຈົ້າຢາເວ, ພຣະເຈົ້າແຫ່ງອິດສະຣາເອນກ່າວວ່າ: ‘ຈົ່ງຂຽນທຸກຖ້ອຍຄໍາທີ່ເຮົາໄດ້ກ່າວກັບເຈົ້າໄວ້ໃນປຶ້ມເຫລັ້ມໜຶ່ງ’. ພຣະເຈົ້າຢາເວປະກາດວ່າ, ‘ເມື່ອເວລານັ້ນມາເຖິງ ເຮົາຈະນຳປະຊາຊົນອິດສະຣາເອນ ແລະ ຢູດາຍຂອງເຮົາກັບຄືນມາຈາກການເປັນຊະເລີຍ1 ແລະ ນຳພວກເຂົາກັບຄືນມາສູ່ດິນແດນທີ່ເຮົາໄດ້ມອບໃຫ້ບັນພະບຸລຸດຂອງພວກເຂົາຄອບຄອງ’ ພຣະເຈົ້າຢາເວກ່າວດັ່ງນີ້”.
ຖ້ອຍຄໍາເຫລົ່ານີ້ແມ່ນຖ້ອຍຄໍາທີ່ພຣະເຈົ້າຢາເວກ່າວກ່ຽວກັບອິດສະຣາເອນ ແລະ ຢູດາຍວ່າ ພຣະເຈົ້າຢາເວກ່າວວ່າ:
“ ‘ເຮົາໄດ້ຍິນສຽງຮ້ອງໄຫ້
ເປັນຄວາມຢ້ານກົວ, ບໍ່ແມ່ນສັນຕິສຸກ.
ຈົ່ງຖາມເບິ່ງວ່າ:
ຜູ້ຊາຍເກີດລູກໄດ້ບໍ?
ແລ້ວເປັນຫຍັງເຮົາຈຶ່ງເຫັນພວກຜູ້ຊາຍທີ່ແຂງແຮງທຸກຄົນ
ເອົາມືອູ້ມທ້ອງຂອງຕົນໄວ້ເໝືອນດັ່ງແມ່ຍິງກຳລັງເກີດລູກ?
ເປັນຫຍັງທຸກຄົນຈຶ່ງໜ້າຊີດຂາວເໝືອນຄົນຕາຍ?
ວັນນັ້ນຈະເປັນຕາໜ້າຢ້ານຫລາຍສໍ່າໃດ!
ບໍ່ມີວັນໃດຈະເປັນເໝືອນດັ່ງວັນນັ້ນ.
ມັນຈະເປັນເວລາແຫ່ງຄວາມຍາກລຳບາກສຳລັບຢາໂຄບ,
ແຕ່ລາວຈະໄດ້ຮັບການຊ່ວຍໃຫ້ພົ້ນຈາກວັນນັ້ນ’.
“ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່ປະກາດວ່າ,
‘ໃນວັນນັ້ນເຮົາຈະຫັກແອກອອກຈາກຄໍຂອງພວກເຂົາ
ແລະ ທໍາລາຍເຄື່ອງຜູກມັດຕ່າງໆຂອງພວກເຂົາ;
ພວກເຂົາຈະບໍ່ເປັນທາດຂອງຄົນຕ່າງຊາດອີກຕໍ່ໄປ.
ແຕ່ພວກເຂົາຈະຮັບໃຊ້ພຣະເຈົ້າຢາເວ ພຣະເຈົ້າຂອງພວກເຂົາ
ແລະ ຮັບໃຊ້ດາວິດກະສັດຂອງພວກເຂົາ,
ຜູ້ທີ່ເຮົາຈະຍົກຂຶ້ນເພື່ອພວກເຂົາ.
“ ‘ສະນັ້ນ ຢ່າຢ້ານ, ຢາໂຄບຜູ້ຮັບໃຊ້ຂອງເຮົາ;
ຢ່າຕົກໃຈ, ອິດສະຣາເອນ’
ພຣະເຈົ້າຢາເວປະກາດດັ່ງນີ້.
‘ເຮົາຈະຊ່ວຍພວກເຈົ້າອອກຈາກບ່ອນທີ່ຢູ່ໄກຢ່າງແນ່ນອນ,
ຈະຊ່ວຍເຊື້ອສາຍຂອງພວກເຈົ້າຈາກດິນແດນທີ່ພວກເຂົາເປັນຊະເລີຍ.
ຢາໂຄບຈະມີຄວາມສະຫງົບສຸກ ແລະ ປອດໄພອີກ
ແລະ ຈະບໍ່ມີຜູ້ໃດຈະເຮັດໃຫ້ລາວຢ້ານກົວ.
ເຮົາຢູ່ກັບພວກເຈົ້າ ແລະ ຈະຊ່ວຍພວກເຈົ້າ’,
ພຣະເຈົ້າຢາເວປະກາດດັ່ງນີ້.
‘ເຖິງແມ່ນວ່າເຮົາຈະທຳລາຍທຸກຊົນຊາດຈົນໝົດສິ້ນ
ທີ່ເຮົາເຮັດໃຫ້ພວກເຈົ້າກະຈັດກະຈາຍໄປນັ້ນ,
ແຕ່ເຮົາຈະບໍ່ທຳລາຍພວກເຈົ້າໃຫ້ໝົດສິ້ນ.
ເຮົາຈະຕີສອນພວກເຈົ້າ ຕາມເຫັນສົມຄວນເທົ່ານັ້ນ;
ເຮົາຈະບໍ່ປ່ອຍພວກເຈົ້າໄປໂດຍບໍ່ໄດ້ຖືກລົງໂທດ’.
“ພຣະເຈົ້າຢາເວກ່າວວ່າ:
“ ‘ບາດແຜຂອງພວກເຈົ້າປິ່ນປົວບໍ່ຫາຍດີ,
ຄວາມເຈັບປວດຂອງພວກເຈົ້າເກີນທີ່ຈະຮັກສາໃຫ້ຫາຍດີໄດ້,
ບໍ່ມີຜູ້ໃດທີ່ຈະແກ້ຄະດີຂອງພວກເຈົ້າ
ບໍ່ມີວິທີຮັກສາຄວາມເຈັບປວດຂອງພວກເຈົ້າ,
ບໍ່ມີການປິ່ນປົວໃຫ້ພວກເຈົ້າ.
ພັນທະມິດທັງໝົດຂອງພວກເຈົ້າກໍໄດ້ລືມພວກເຈົ້າໄປແລ້ວ.
ພວກເຂົາບໍ່ສົນໃຈນໍາພວກເຈົ້າ.
ເຮົາໄດ້ໂຈມຕີພວກເຈົ້າເໝືອນເປັນສັດຕູກັນ
ແລະ ໄດ້ລົງໂທດພວກເຈົ້າເໝືອນດັ່ງຄົນໂຫດຮ້າຍ,
ເພາະຄວາມຜິດຂອງພວກເຈົ້າກໍໃຫຍ່ຫລວງ
ແລະ ຄວາມບາບຂອງພວກເຈົ້າກໍມີຫລວງຫລາຍ.
ເປັນຫຍັງພວກເຈົ້າຈຶ່ງຮ້ອງໄຫ້ເພາະບາດແຜຂອງພວກເຈົ້າ,
ຄວາມເຈັບປວດຂອງພວກເຈົ້າທີ່ບໍ່ໄດ້ຮັບການປິ່ນປົວບໍ?
ເພາະຄວາມຜິດຂອງພວກເຈົ້າກໍໃຫຍ່ຫລວງ ແລະ ຄວາມບາບກໍມີຫລວງຫລາຍ.
ເຮົາຈຶ່ງໄດ້ເຮັດສິ່ງເຫລົ່ານີ້ແກ່ພວກເຈົ້າ.
“ ‘ແຕ່ທຸກຄົນທີ່ທໍາລາຍພວກເຈົ້າກໍຈະຖືກທໍາລາຍ;
ບັນດາສັດຕູທັງໝົດຂອງພວກເຈົ້າຈະໄປເປັນຊະເລີຍ.
ບັນດາຄົນທີ່ປຸ້ນເຈົ້າກໍຈະຖືກປຸ້ນ;
ທຸກຄົນທີ່ເຮັດໃຫ້ພວກເຈົ້າເຊື່ອມເສຍເຮົາກໍຈະໃຫ້ເຮັດເຊື່ອມເສຍ.
ເພາະເຮົາຈະຟື້ນຟູພວກເຈົ້າໃຫ້ມີສຸຂະພາບທີ່ດີ
ແລະ ປິ່ນປົວບາດແຜຂອງພວກເຈົ້າ,’ ພຣະເຈົ້າຢາເວປະກາດດັ່ງນີ້,
‘ເພາະພວກເຈົ້າໄດ້ຖືກເອີ້ນວ່າ “ຄົນເສດເຫລືອ”
ຊີໂອນທີ່ບໍ່ມີຜູ້ໃດສົນໃຈ’.
“ພຣະເຈົ້າຢາເວກ່າວວ່າ:
“ ‘ເຮົາຈະຟື້ນຟູຄວາມຮັ່ງມີຂອງເຕັນຂອງຢາໂຄບ
ແລະ ໃຫ້ຄວາມເມດຕາຕໍ່ບ່ອນຢູ່ຂອງລາວ;
ນະຄອນຈະຖືກສ້າງຂຶ້ນໃໝ່ຢູ່ເທິງຊາກຫັກເພພັງຂອງມັນ
ແລະ ວັງຈະຕັ້ງຂຶ້ນໃນບ່ອນທີ່ເໝາະສົມຂອງມັນ.
ຈະມີບົດເພງໂມທະນາຂອບພຣະຄຸນພຣະເຈົ້າມາຈາກພວກເຂົາ
ແລະ ມີສຽງແຫ່ງຄວາມຊື່ນຊົມຍິນດີ.
ເຮົາຈະເພີ່ມຈຳນວນຄົນຂອງພວກເຂົາ
ແລະ ພວກເຂົາຈະບໍ່ຫລຸດລົງ;
ເຮົາຈະນຳກຽດມາສູ່ພວກເຂົາ
ແລະ ພວກເຂົາຈະບໍ່ຖືກໝິ່ນປະໝາດ.
ລູກຫລານຂອງພວກເຂົາຈະເປັນເໝືອນດັ່ງແຕ່ກ່ອນ
ແລະ ຊຸມຊົນຂອງພວກເຂົາຈະຖືກຕັ້ງໄວ້ຕໍ່ໜ້າເຮົາ
ເຮົາຈະລົງໂທດທຸກຄົນທີ່ກົດຂີ່ພວກເຂົາ.
ຜູ້ນໍາຂອງພວກເຂົາຈະເປັນຄົນໜຶ່ງໃນພວກເຂົາ;
ຜູ້ປົກຄອງຂອງພວກເຂົາກໍຈະເກີດຂຶ້ນມາຈາກທ່າມກາງພວກເຂົາ.
ເຮົາຈະນຳລາວເຂົ້າມາໃກ້ ແລະ ລາວຈະໃກ້ຊິດກັບເຮົາ
ເພາະມີຜູ້ໃດແດ່ທີ່ຈະອຸທິດຕົນເອງ
ເພື່ອໃກ້ຊິດກັບເຮົາ?’
ພຣະເຈົ້າຢາເວປະກາດດັ່ງນີ້.
‘ດັ່ງນັ້ນ ພວກເຈົ້າຈະເປັນປະຊາຊົນຂອງເຮົາ
ແລະ ເຮົາຈະເປັນພຣະເຈົ້າຂອງພວກເຈົ້າ’ ”.
ເບິ່ງແມ, ພາຍຸແຫ່ງພຣະເຈົ້າຢາເວ
ຈະເກີດຂຶ້ນໃນຄວາມໂກດຮ້າຍນັ້ນ,
ເປັນລົມພະຍຸໝຸນພັດລົງມາ
ໃສ່ຫົວຂອງບັນດາຄົນຊົ່ວຮ້າຍ.
ຄວາມໃຈຮ້າຍຂອງພຣະເຈົ້າຢາເວຈະບໍ່ກັບຄືນມາ
ຈົນກວ່າພຣະອົງຈະໃຫ້ສຳເລັດ
ຕາມຄວາມປະສົງຂອງພຣະອົງ.
ໃນວັນນັ້ນມາເຖິງ
ເຈົ້າຈະເຂົ້າໃຈສິ່ງນີ້ຢ່າງຊັດເຈນ.
Source notes (1)
- Footnote ຫລື ຈະເຮັດໃຫ້ອິດສະຣາເອນ ແລະ ຢູດາປະຊາຊົນຂອງເຮົາກັບສູ່ສະພາບດີດັ່ງເດີມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.