Biblica® Open Lao Contemporary Version
ເຢເຣມີຢາ 21
ພຣະເຈົ້າບໍ່ຕອບຄໍາອ້ອນວອນຂໍຂອງເຊເດກີຢາ
ຖ້ອຍຄຳຂອງພຣະເຈົ້າຢາເວໄດ້ມາເຖິງເຢເຣມີຢາເມື່ອກະສັດເຊເດກີຢາໄດ້ສົ່ງປັດຊູ ລູກຊາຍຂອງມັນກີຢາ ແລະ ປະໂລຫິດເຊຟານີຢາລູກຊາຍຂອງມາອາເສອີຢາມາຫາເຢເຣມີຢາ ແລະ ພວກເຂົາໄດ້ເວົ້າວ່າ: “ບັດນີ້ ຈົ່ງຖາມພຣະເຈົ້າຢາເວເພື່ອພວກເຮົາ ເພາະກະສັດເນບູກາດເນັດຊາແຫ່ງບາບີໂລນ1ກໍາລັງໂຈມຕີພວກເຮົາ. ບາງທີພຣະເຈົ້າຢາເວຈະເຮັດການອັດສະຈັນເພື່ອພວກເຮົາເໝືອນດັ່ງໃນອະດີດ ເພື່ອວ່າເນບູກາດເນັດຊາຈະໄດ້ຖອນກອງທັບອອກໄປຈາກພວກເຮົາ”.
ແຕ່ເຢເຣມີຢາໄດ້ຕອບພວກເຂົາວ່າ, “ຈົ່ງໄປບອກເຊເດກີຢາວ່າ ‘ພຣະເຈົ້າຢາເວ, ພຣະເຈົ້າແຫ່ງອິດສະຣາເອນກ່າວດັ່ງນີ້ວ່າ: ເຮົາຈະຫັນອາວຸດສົງຄາມທີ່ຢູ່ໃນມືຂອງເຈົ້າຕໍ່ສູ້ເຈົ້າ, ເຊິ່ງເຈົ້າກໍາລັງໃຊ້ຕໍ່ສູ້ກັບກະສັດແຫ່ງບາບີໂລນ ແລະ ຊາວບາບີໂລນ2ທີ່ກຳລັງປິດລ້ອມເຈົ້າຢູ່ທາງນອກກໍາແພງນັ້ນ. ແລະ ເຮົາຈະຮວບຮວມພວກເຂົາເຂົ້າມາໃນນະຄອນນີ້. ເຮົາເອງຈະສູ້ຮົບກັບເຈົ້າດ້ວຍການຢຽດມືອອກ ແລະ ດ້ວຍແຂນອັນມີລິດອຳນາດໂດຍຄວາມໃຈຮ້າຍອັນຮຸນແຮງ ແລະ ໂດຍຄວາມໂກດຮ້າຍອັນໃຫຍ່ຂອງເຮົາ. ເຮົາຈະຂ້າບັນດາຄົນທີ່ອາໄສຢູ່ໃນນະຄອນນີ້ ທັງຄົນ ແລະ ສັດດ້ວຍ ແລະ ພວກເຂົາຈະຕາຍດ້ວຍໂລກລະບາດອັນໜ້າຢ້ານກົວ. ຫລັງຈາກນັ້ນ, ພຣະເຈົ້າຢາເວປະກາດວ່າ, ເຮົາຈະມອບກະສັດເຊເດກີຢາແຫ່ງຢູດາຍ, ບັນດາຂ້າລາຊະການຂອງລາວ ແລະ ປະຊາຊົນໃນນະຄອນນີ້ທີ່ລອດຈາກໂລກລະບາດ, ສົງຄາມ ແລະ ການອຶດຢາກອາຫານໄວ້ໃນມືກະສັດເນບູກາດເນັດຊາແຫ່ງບາບີໂລນ ແລະ ໃນມືບັນດາສັດຕູຂອງພວກເຂົາຜູ້ທີ່ຢາກຂ້າພວກເຂົາ. ເນບູກາດເນັດຊາຈະຂ້າພວກເຂົາ; ລາວຈະບໍ່ສະແດງຄວາມເມດຕາ, ຄວາມກະລຸນາ ຫລື ຄວາມສົງສານຕໍ່ພວກເຂົາ’.
“ນອກຈາກນີ້, ຈົ່ງບອກປະຊາຊົນວ່າ ‘ພຣະເຈົ້າຢາເວກ່າວດັ່ງນີ້ວ່າ: ເບິ່ງແມ, ເຮົາກໍາລັງວາງທາງແຫ່ງຊີວິດ ແລະ ທາງແຫ່ງຄວາມຕາຍຢູ່ຕໍ່ໜ້າພວກເຈົ້າ. ຜູ້ໃດທີ່ອາໄສຢູ່ໃນນະຄອນນີ້ຈະຕາຍໃນສົງຄາມ, ການອຶດຢາກອາຫານ ແລະ ໂລກລະບາດ. ແຕ່ຜູ້ໃດທີ່ອອກໄປ ແລະ ຍອມຈໍານົນຕໍ່ຊາວບາບີໂລນທີ່ກໍາລັງປິດລ້ອມພວກເຈົ້າກໍຈະມີຊີວິດຢູ່; ພວກເຂົາຈະໜີໄປໂດຍທີ່ຍັງມີຊີວິດຢູ່. ພຣະເຈົ້າຢາເວປະກາດວ່າ, ເຮົາໄດ້ຕັ້ງໃຈທີ່ຈະທໍາລາຍນະຄອນນີ້ ແລະ ບໍ່ແມ່ນເຮັດສິ່ງທີ່ດີ. ນະຄອນນີ້ຈະຖືກມອບໄວ້ໃນມືຂອງກະສັດແຫ່ງບາບີໂລນ ແລະ ລາວຈະທໍາລາຍມັນດ້ວຍໄຟ’.
“ຫລາຍກວ່ານັ້ນ, ຈົ່ງກ່າວກັບເຊື້ອວົງຂອງຢູດາຍວ່າ, ‘ຈົ່ງຟັງຖ້ອຍຄໍາຂອງພຣະເຈົ້າຢາເວ. ເຊື້ອວົງຂອງດາວິດ, ພຣະເຈົ້າຢາເວກ່າວດັ່ງນີ້ວ່າ:
“ ‘ຈົ່ງປົກຄອງຢ່າງຄວາມຍຸຕິທຳໃນແຕ່ລະວັນ;
ຈົ່ງຊ່ວຍເຫລືອຄົນທີ່ໄດ້ຖືກປຸ້ນ
ຈາກມືຂອງຜູ້ທີ່ກົດຂີ່,
ບໍ່ດັ່ງນັ້ນ ຄວາມໂກດຮ້າຍຂອງເຮົາຈະລຸກຂຶ້ນ ແລະ ເຜົາເໝືອນໄຟ.
ລຸກໄໝ້ໂດຍບໍ່ມີຜູ້ໃດດັບມັນໄດ້
ຍ້ອນຄວາມຊົ່ວທີ່ພວກເຈົ້າໄດ້ເຮັດ.
ເຢຣູຊາເລັມ, ເຮົາເປັນສັດຕູກັບເຈົ້າ,
ຜູ້ທີ່ອາໄສຢູ່ເໜືອຮ່ອມພູນີ້
ຢູ່ເທິງທົ່ງພຽງຫີນ,
ພຣະເຈົ້າຢາເວປະກາດວ່າ:
ເຈົ້າຜູ້ທີ່ເວົ້າວ່າ, “ຜູ້ໃດຈະມາສູ້ພວກເຮົາໄດ້?
ຜູ້ໃດຈະເຂົ້າມາບ່ອນລີ້ໄພຂອງພວກເຮົາໄດ້?”
ເຮົາເອງຈະລົງໂທດເຈົ້າໃຫ້ສົມກັບຄວາມປະພຶດຂອງເຈົ້າ,
ພຣະເຈົ້າຢາເວປະກາດດັ່ງນີ້.
ເຮົາຈະຈູດໄຟໃນປ່າຂອງເຈົ້າ
ເພື່ອຈະເຜົາທຸກສິ່ງທຸກຢ່າງທີ່ຢູ່ອ້ອມເຈົ້າ’ ”.
Source notes (2)
- Footnote ພາສາເຮັບເຣີວ່າ ເນບູຄັດເລດຊາ, ເປັນອີກຮູບໜຶ່ງຂອງ ເນບູກາດເນັດຊາ ພົບເລື້ອຍໆໃນພຣະທຳເຢເຣມີຢາ ແລະ ພຣະທຳເອເຊກຽນ
- Footnote ຫລື ຊາວຄານເດອາ ເຊັ່ນດຽວກັບຂໍ້ 9
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.