Biblica® Open Lao Contemporary Version
ເຢເຣມີຢາ 20
ເຢເຣມີຢາ ແລະ ປັດຊູ
ເມື່ອປະໂລຫິດປັດຊູລູກຊາຍຂອງອິມເມ, ເຊິ່ງເປັນຫົວໜ້າເຈົ້າໜ້າທີ່ໃນວິຫານຂອງພຣະເຈົ້າຢາເວໄດ້ຍິນເຢເຣມີຢາກຳລັງທໍານວາຍສິ່ງເຫລົ່ານີ້ຢູ່, ປັດຊູກໍໄດ້ທຸບຕີຜູ້ທໍານວາຍເຢເຣມີຢາ ແລະ ຈັບລາວລ່າມໂສ້ໄວ້ທີ່ປະຕູຊັ້ນເທິງຂອງເບັນຢາມິນໃນວິຫານຂອງພຣະເຈົ້າຢາເວ. ມື້ຕໍ່ມາ, ເມື່ອປັດຊູໄດ້ແກ້ໂສ້ລ່າມເຢເຣມີຢາ, ເຢເຣມີຢາໄດ້ເວົ້າກັບລາວວ່າ, “ຊື່ທີ່ພຣະເຈົ້າຢາເວຕັ້ງໃຫ້ເຈົ້າບໍ່ແມ່ນປັດຊູ, ແຕ່ແມ່ນຄວາມຢ້ານກົວຢູ່ທຸກດ້ານ1 ເພາະພຣະເຈົ້າຢາເວກ່າວວ່າ: ‘ເຮົາຈະເຮັດໃຫ້ເຈົ້າຢ້ານກົວຕໍ່ຕົນເອງ ແລະ ຕໍ່ໝູ່ເພື່ອນທັງໝົດຂອງເຈົ້າ; ເຈົ້າຈະເຫັນພວກເຂົາລົ້ມລົງຕາຍດ້ວຍດາບຂອງບັນດາສັດຕູຂອງພວກເຂົາດ້ວຍຕາຂອງເຈົ້າເອງ. ເຮົາຈະມອບປະຊາຊົນຢູດາຍທັງໝົດໄວ້ໃນມືຂອງກະສັດແຫ່ງບາບີໂລນ, ຜູ້ທີ່ຈະຈັບພວກເຂົາໄປທີ່ບາບີໂລນ ຫລື ຂ້າພວກເຂົາຖິ້ມເສຍ. ເຮົາຈະມອບຊັບສົມບັດທັງໝົດຂອງນະຄອນນີ້ໄວ້ໃນມືຂອງສັດຕູຂອງພວກເຂົາຄື ຜົນລະປູກ, ສິ່ງຂອງທີ່ມີຄ່າ ແລະ ຊັບສົມບັດທັງໝົດຂອງບັນດາກະສັດແຫ່ງຢູດາຍ. ບັນດາສັດຕູຈະປຸ້ນເອົາສິ່ງຂອງທັງໝົດເຫລົ່ານີ້ ແລະ ເອົາໄປທີ່ບາບີໂລນ. ສ່ວນເຈົ້າ, ປັດຊູ ແລະ ທຸກຄົນທີ່ອາໄສຢູ່ໃນເຮືອນຂອງເຈົ້າຈະຕ້ອງໄປເປັນຊະເລີຍທີ່ບາບີໂລນ, ເຈົ້າຈະຕາຍ ແລະ ຈະຖືກຝັງໄວ້ຢູ່ທີ່ນັ້ນ, ເຈົ້າ ແລະ ໝູ່ເພື່ອນຂອງເຈົ້າທີ່ໄດ້ທໍານວາຍຕົວະ’ ”.
ຄໍາຈົ່ມທຸກຂອງເຢເຣມີຢາ
ຂ້າແດ່ພຣະເຈົ້າຢາເວ, ພຣະອົງໄດ້ຫລອກລວງຂ້ານ້ອຍ ແລະ ຂ້ານ້ອຍກໍຖືກຫລອກລວງແລ້ວ;
ພຣະອົງໄດ້ເອົາຊະນະຂ້ານ້ອຍ ແລະ ມີກຳລັງເໜືອກວ່າຂ້ານ້ອຍ.
ຂ້ານ້ອຍຖືກຫົວຂວັນໃສ່ຕະຫລອດວັນ
ທຸກຄົນກໍເຢາະເຢີ້ຍຂ້ານ້ອຍ.
ເມື່ອໃດກໍຕາມທີ່ຂ້ານ້ອຍເວົ້າ, ຂ້ານ້ອຍກໍຮ້ອງໄຫ້
ເພາະການປະກາດຄວາມຮຸນແຮງ ແລະ ຄວາມພິນາດ.
ສະນັ້ນຖ້ອຍຄໍາຂອງພຣະເຈົ້າຢາເວໄດ້ນໍາ
ການດູຖູກ ແລະ ການຕຳໜິມາສູ່ຂ້ານ້ອຍຕະຫລອດວັນ.
ແຕ່ຖ້າຂ້ານ້ອຍເວົ້າວ່າ, “ຂ້ານ້ອຍຈະບໍ່ກ່າວເຖິງຖ້ອຍຄໍາຂອງພຣະອົງ
ຫລື ບໍ່ເວົ້າອັນໃດໃນນາມຂອງພຣະອົງ”,
ຖ້ອຍຄໍາຂອງພຣະອົງທີ່ຢູ່ໃນຈິດໃຈຂອງຂ້ານ້ອຍກໍເປັນດັ່ງໄຟ,
ເປັນໄຟເກັບໄວ້ໃນກະດູກຂອງຂ້ານ້ອຍ.
ແລະ ຂ້ານ້ອຍອິດເມື່ອຍທີ່ຈະເກັບມັນໄວ້;
ທີ່ຈິງແລ້ວ, ຂ້ານ້ອຍເກັບມັນໄວ້ບໍ່ໄດ້.
ຂ້ານ້ອຍໄດ້ຍິນຫລາຍຄົນຊີ່ມໃສ່ກັນວ່າ,
“ມີຄວາມຢ້ານຢູ່ທຸກດ້ານ!
ຈົ່ງລາຍງານລາວ! ລາຍງານລາວໃຫ້ຮູ້!”
ໝູ່ເພື່ອນຂອງຂ້ານ້ອຍທັງໝົດ
ກໍກໍາລັງລໍຖ້າໃຫ້ຂ້ານ້ອຍລົ້ມ, ພວກເຂົາກໍາລັງເວົ້າວ່າ,
“ບາງທີລາວອາດຈະຖືກຫລອກລວງ;
ແລ້ວເຮົາຈະຊະນະລາວ
ແລະ ພວກເຮົາແກ້ແຄ້ນລາວໄດ້”.
ແຕ່ພຣະເຈົ້າຢາເວຢູ່ກັບຂ້ານ້ອຍເປັນເໝືອນນັກຮົບຜູ້ຍິ່ງໃຫຍ່;
ສະນັ້ນ ພວກທີ່ກົດຂີ່ຂົ່ມເຫັງຂ້ານ້ອຍຈະສະດຸດລົ້ມ ແລະ ຈະບໍ່ຊະນະ.
ພວກເຂົາຈະລົ້ມເຫລວ ແລະ ຈະຖືກອັບອາຍຂາຍໜ້າຢ່າງແນ່ນອນ;
ກຽດຂອງພວກເຂົາຈະເສື່ອມສູນຕະຫລອດໄປ.
ຂ້າແດ່ພຣະເຈົ້າຢາເວ ຜູ້ມີລິດອໍານາດຍິ່ງໃຫຍ່, ພຣະອົງຜູ້ທີ່ກວດສອບຢ່າງຊອບທຳ
ແລະ ພິສູດເບິ່ງຈິດໃຈ ແລະ ຄວາມຄິດ,
ໃຫ້ຂ້ານ້ອຍເຫັນການແກ້ແຄ້ນຂອງພຣະອົງຕໍ່ພວກເຂົາ,
ເພາະຂ້ານ້ອຍໄດ້ມອບຄະດີຂອງຂ້ານ້ອຍໄວ້ກັບພຣະອົງແລ້ວ.
ຈົ່ງຮ້ອງເພງຖວາຍແກ່ພຣະເຈົ້າຢາເວ!
ຈົ່ງສັນລະເສີນພຣະເຈົ້າຢາເວ!
ພຣະອົງກອບກູ້ຊີວິດຂອງຄົນຂັດສົນ
ຈາກມືຂອງຄົນຊົ່ວຮ້າຍ.
ໂຜດສາບແຊ່ງມື້ທີຂ້າພະເຈົ້າໄດ້ເກີດມາ!
ຂໍຢ່າໃຫ້ມື້ທີ່ແມ່ຂອງຂ້ານ້ອຍເກີດຂ້ານ້ອຍມານັ້ນໄດ້ຮັບພອນ!
ຂໍສາບແຊ່ງຄົນທີ່ນຳຂ່າວໄປບອກພໍ່ຂອງຂ້ານ້ອຍ,
ຄົນທີ່ເຮັດໃຫ້ລາວດີໃຈຫລາຍ, ລາວກໍາລັງບອກວ່າ,
“ເຈົ້າໄດ້ລູກຊາຍແລ້ວ!”
ຂໍໃຫ້ຄົນນັ້ນເປັນເໝືອນເມືອງຕ່າງໆ
ທີ່ພຣະເຈົ້າຢາເວທໍາລາຍໂດຍບໍ່ມີຄວາມເມດຕາສົງສານ.
ຂໍໃຫ້ລາວໄດ້ຍິນສຽງຮ້ອງໄຫ້ໃນຕອນເຊົ້າ,
ສຽງໂຫ່ຮ້ອງສູ້ຮົບໃນຕອນທ່ຽງຄືນ.
ເພາະລາວໄດ້ບໍ່ຂ້າຂ້ານ້ອຍຕັ້ງແຕ່ຢູ່ໃນມົດລູກ.
ໃຫ້ທ້ອງຂອງແມ່ຂ້ານ້ອຍເປັນຂຸມຝັງສົບຂອງຂ້ານ້ອຍ,
ໃຫ້ທ້ອງຂອງນາງໃຫຍ່ຢູ່ແບບນັ້ນຕະຫລອດໄປ.
ເປັນຫຍັງຂ້ານ້ອຍຈຶ່ງອອກມາຈາກທ້ອງແມ່
ເພື່ອເຫັນຄວາມເດືອດຮ້ອນ ແລະ ຄວາມໂສກເສົ້າ
ແລະ ເພື່ອໃຫ້ຂ້ານ້ອຍຈົບຊີວິດລົງດ້ວຍຄວາມອັບອາຍ?
Source notes (1)
- Footnote ແປວ່າ ຄວາມຢ້ານກົວທຸກ /ຮອບດ້ານ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.