Biblica® Open Lao Contemporary Version
ເຢເຣມີຢາ 14
ໄພແຫ້ງແລ້ງ, ຄວາມອຶດຢາກອາຫານ ແລະ ສົງຄາມ
ຖ້ອຍຄຳຂອງພຣະເຈົ້າຢາເວໄດ້ມາເຖິງເຢເຣມີຢາກ່ຽວກັບໄພແຫ້ງແລ້ງວ່າ:
“ຢູດາຍ ຈົ່ງໄວ້ທຸກ
ເມືອງຕ່າງໆຂອງນາງກໍອ່ອນກໍາລັງລົງ
ເມືອງເຫລົ່ານັ້ນຮ້ອງໄຫ້ຄໍ່າຄວນໃຫ້ກັບດິນແດນ
ແລະ ມີສຽງຮ້ອງດັງຂຶ້ນມາຈາກເຢຣູຊາເລັມ.
ບັນດາຂ້າລາຊະການສົ່ງຄົນຮັບໃຊ້ອອກໄປຊອກຫານ້ຳ;
ພວກເຂົາໄປທີ່ອ່າງນໍ້າ
ແຕ່ກໍບໍ່ມີນ້ຳ.
ພວກເຂົາຖືໄຫເປົ່າຂອງຕົນກັບຄືນມາ;
ຢ່າງທໍ້ຖອຍໃຈ ແລະ ໝົດຫວັງ
ພວກເຂົາຄຸມຫົວຂອງຕົນເອງໄວ້.
ພື້ນດິນກໍແຕກແຫງ
ເພາະບໍ່ມີຝົນຕົກລົງມາໃສ່ດິນ;
ພວກຊາວນາທໍ້ຖອຍໃຈ
ແລະ ພວກເຂົາຄຸມຫົວຕົນເອງໄວ້.
ແມ່ນແຕ່ກວາງແມ່ຢູ່ທີ່ທົ່ງຫຍ້າ
ກໍປະຖິ້ມລູກຂອງມັນທີ່ຫາກໍເກີດ
ເພາະບໍ່ມີຫຍ້າ.
ລໍປ່າຢືນຢູ່ເທິງເນີນພູສູງ
ແລະ ຫາຍໃຈຫອບເໝືອນດັ່ງຝູງໝາໄນ;
ຕາຂອງພວກມັນມືດມົວ
ເພາະບໍ່ມີອາຫານກິນ”.
ເຖິງແມ່ນວ່າການບາບຂອງພວກຂ້ານ້ອຍທັງຫລາຍເປັນພະຍານຕໍ່ສູ້ພວກຂ້ານ້ອຍ,
ຂ້າແດ່ພຣະເຈົ້າຢາເວ, ຂໍໂຜດຊ່ວຍເພື່ອເຫັນແກ່ນາມຂອງພຣະອົງ.
ເພາະພວກຂ້ານ້ອຍໄດ້ກະບົດຢູ່ເລື້ອຍໆ;
ພວກຂ້ານ້ອຍໄດ້ເຮັດບາບຕໍ່ພຣະອົງ.
ພະອົງເປັນຄວາມຫວັງຂອງອິດສະຣາເອນ,
ພຣະອົງເປັນພຣະຜູ້ໄຖ່ໃຫ້ພົ້ນໃນຍາມເດືອດຮ້ອນ
ເປັນຫຍັງພຣະອົງຈຶ່ງເປັນດັ່ງຄົນແປກໜ້າໃນດິນແດນນີ້,
ເປັນດັ່ງນັກເດີນທາງທີ່ແວ່ມາພັກພຽງຄືນດຽວເທົ່ານັ້ນ?
ເປັນຫຍັງພຣະອົງເປັນດັ່ງຄົນທີ່ຫລອນມາ,
ເປັນຫຍັງພຣະອົງເປັນດັ່ງນັກຮົບທີ່ໝົດກໍາລັງຈະຊ່ວຍ?
ຂ້າແດ່ພຣະເຈົ້າຢາເວ, ພຣະອົງຢູ່ທ່າມກາງພວກຂ້ານ້ອຍ,
ແລະ ພວກຂ້ານ້ອຍປະກາດນາມຂອງພຣະອົງ;
ຂໍໂຜດຢ່າປະຖິ້ມພວກຂ້ານ້ອຍ!
ພຣະເຈົ້າຢາເວກ່າວກ່ຽວກັບຊົນຊາດນີ້ວ່າ:
“ພວກເຂົາມັກເລາະໄປມາຫລາຍ;
ພວກເຂົາບໍ່ຢັບຍັ້ງຕີນຂອງຕົນ;
ສະນັ້ນ ພຣະເຈົ້າຢາເວຈຶ່ງບໍ່ຍອມຮັບພວກເຂົາ;
ບັດນີ້ ພຣະອົງຈະລະນຶກເຖິງຄວາມຊົ່ວຮ້າຍຂອງພວກເຂົາ
ແລະ ລົງໂທດພວກເຂົາເພາະບາບທັງຫລາຍຂອງພວກເຂົາ”.
ແລ້ວພຣະເຈົ້າຢາເວໄດ້ກ່າວກັບຂ້າພະເຈົ້າວ່າ, “ຢ່າອະທິຖານເພື່ອຄວາມຢູ່ເຢັນເປັນສຸກຂອງປະຊາຊົນເຫລົ່ານີ້. ເຖິງແມ່ນວ່າພວກເຂົາຖືສິນອົດອາຫານ, ເຮົາຈະບໍ່ຟັງການຮ້ອງໄຫ້ຂອງພວກເຂົາ; ແມ່ນແຕ່ພວກເຂົາຖວາຍເຄື່ອງເຜົາບູຊາ ແລະ ເຄື່ອງບູຊາທີ່ເປັນເມັດພືດ, ເຮົາກໍຈະບໍ່ຍອມຮັບສິ່ງເຫລົ່ານັ້ນ. ແຕ່ເຮົາຈະທຳລາຍພວກເຂົາດ້ວຍສົງຄາມ, ການອຶດຢາກອາຫານ ແລະ ໂລກລະບາດ”.
ແຕ່ຂ້າພະເຈົ້າໄດ້ເວົ້າວ່າ “ວິບັດແລ້ວ, ຂ້າແດ່ພຣະເຈົ້າຢາເວ ອົງເຈົ້ານາຍ! ບັນດາຜູ້ທໍານວາຍກໍຍັງກໍາລັງບອກພວກເຂົາວ່າ, ‘ເຈົ້າຈະບໍ່ເຫັນສົງຄາມ ຫລື ທົນທຸກກັບການອຶດຢາກອາຫານ. ແທ້ຈິງແລ້ວ, ເຮົາຈະໃຫ້ສັນຕິສຸກທີ່ໝັ້ນຄົງແກ່ພວກເຈົ້າໃນສະຖານທີ່ນີ້’ ”.
ແລ້ວພຣະເຈົ້າຢາເວໄດ້ກ່າວກັບຂ້າພະເຈົ້າວ່າ, “ບັນດາຜູ້ທໍານວາຍກໍາລັງທໍານວາຍຕົວະໃນນາມຂອງເຮົາ. ເຮົາບໍ່ໄດ້ສົ່ງພວກເຂົາໄປ ຫລື ບໍ່ໄດ້ແຕ່ງຕັ້ງ ຫລື ບໍ່ໄດ້ກ່າວກັບພວກເຂົາ. ພວກເຂົາກໍາລັງທໍານວາຍໃຫ້ເຈົ້າດ້ວຍນິມິດປອມ, ທໍານວາຍໂຊກຊາຕາ, ການກາບໄຫວ້ຮູບເຄົາລົບ1 ແລະ ເຫັນພາບຫລອນໃນຄວາມຄິດຂອງຕົນ. ເຫດສະນັ້ນ ພຣະເຈົ້າຢາເວກ່າວກ່ຽວກັບບັນດາພວກຜູ້ທໍານວາຍທີ່ກໍາລັງທໍານວາຍໃນນາມຂອງເຮົາວ່າ: ເຮົາບໍ່ໄດ້ສົ່ງພວກເຂົາໄປ, ແຕ່ພວກເຂົາກໍາລັງເວົ້າວ່າ, ‘ຈະບໍ່ມີສົງຄາມ ຫລື ການອຶດຢາກອາຫານມາແຕະຕ້ອງດິນແດນນີ້’. ບັນດາຜູ້ທໍານວາຍນັ້ນແຫລະຈະຕາຍດ້ວຍສົງຄາມ ແລະ ການອຶດຢາກອາຫານ. ສ່ວນປະຊາຊົນຜູ້ທີ່ຟັງຄໍາທໍານວາຍຂອງພວກເຂົາຈະຖືກໂຍນອອກໄປຕາມຖະໜົນຂອງເຢຣູຊາເລັມຍ້ອນສົງຄາມ ແລະ ການອຶດຢາກອາຫານ. ຈະບໍ່ມີຜູ້ໃດມາຝັງຊາກສົບພວກເຂົາຢູ່ທີ່ນັ້ນ, ລວມທັງເມຍ, ລູກຊາຍ, ລູກສາວຂອງພວກເຂົາ. ເຮົາຈະເທໄພພິບັດລົງມາສູ່ພວກເຂົາຕາມທີ່ພວກເຂົາສົມຄວນໄດ້ຮັບ.
“ຈົ່ງບອກສິ່ງນີ້ກັບພວກເຂົາວ່າ:
“ ‘ຂໍໃຫ້ນ້ຳຕາຂອງຂ້ານ້ອຍຫລັ່ງໄຫລ
ບໍ່ຢຸດບໍ່ເຊົາທັງເວັນທັງຄືນ;
ເພາະລູກສາວພົມມະຈາລີຂອງຂ້ານ້ອຍຄື ປະຊາຊົນຂອງຂ້ານ້ອຍ
ໄດ້ທົນທຸກດ້ວຍບາດແຜອັນສາຫັດ,
ຖືກຍ່ອງຈົນບວມຊໍ້າ.
ຖ້າຂ້ານ້ອຍອອກໄປທີ່ທົ່ງນາ
ຂ້ານ້ອຍກໍເຫັນຊາກສົບບັນດາຜູ້ທີ່ຖືກຂ້າດ້ວຍດາບ;
ຖ້າຂ້ານ້ອຍເຂົ້າໄປໃນເມືອງ,
ຂ້ານ້ອຍກໍເຫັນສົບຂອງເຍື່ອການອຶດຢາກອາຫານ.
ທັງຜູ້ທໍານວາຍ ແລະ ປະໂລຫິດ
ໄດ້ໄປທີ່ດິນແດນທີ່ພວກເຂົາບໍ່ຮູ້ຈັກ’ ”.
ພຣະອົງໄດ້ປະຖິ້ມຢູດາຍຈົນໝົດສິ້ນແລ້ວບໍ?
ພຣະອົງດູໝິ່ນຊີໂອນແລ້ວບໍ?
ເປັນຫຍັງພຣະອົງຈຶ່ງໄດ້ທໍລະມານພວກຂ້ານ້ອຍ
ຈົນພວກເຮົາບໍ່ສາມາດປິ່ນປົວໃຫ້ຫາຍດີໄດ້?
ພວກຂ້ານ້ອຍຫວັງຢາກມີສັນຕິສຸກ
ແຕ່ບໍ່ມີສິ່ງທີ່ດີອັນໃດໄດ້ເກີດຂຶ້ນ,
ຫວັງຈະໄດ້ຮັບການຮັກສາ
ແຕ່ມີພຽງຄວາມຢ້ານກົວເທົ່ານັ້ນ.
ຂ້າແດ່ພຣະເຈົ້າຢາເວ, ພວກຂ້ານ້ອຍຍອມຮັບເຖິງຄວາມຊົ່ວຮ້າຍທັງຫລາຍຂອງຕົນ,
ແລະ ຄວາມຜິດຂອງບັນພະບຸລຸດຂອງພວກຂ້ານ້ອຍ;
ພວກຂ້ານ້ອຍໄດ້ເຮັດບາບຕໍ່ພຣະອົງຢ່າງແທ້ຈິງ.
ເພື່ອເຫັນແກ່ນາມຂອງພຣະອົງ ຂໍຢ່າດູໝິ່ນພວກຂ້ານ້ອຍ;
ຂໍຢ່າໃຫ້ບັນລັງອັນສະຫງ່າລາສີຂອງພຣະອົງເສື່ອມເສຍ.
ຂໍໂຜດລະນຶກເຖິງຄໍາໝັ້ນສັນຍາຂອງພຣະອົງທີ່ມີຕໍ່ພວກຂ້ານ້ອຍ.
ແລະ ຢ່າຍົກເລີກຄໍາໝັ້ນສັນຍານັ້ນ.
ມີຮູບເຄົາລົບອັນໄຮ້ຄ່າຕົນໃດຂອງບັນດາຊົນຊາດທີ່ເຮັດໃຫ້ຝົນຕົກລົງມາໄດ້ບໍ?
ຫລື ເຮັດໃຫ້ທ້ອງຟ້າຖອກເທຝົນລົງມາເອງໄດ້ບໍ?
ບໍ່, ແຕ່ແມ່ນພຣະອົງ, ພຣະເຈົ້າຢາເວ ພຣະເຈົ້າຂອງພວກຂ້ານ້ອຍ,
ເຫດສະນັ້ນ ຄວາມຫວັງຂອງພວກຂ້ານ້ອຍຈຶ່ງຢູ່ໃນພຣະອົງ,
ເພາະພຣະອົງເປັນຜູ້ທີ່ກະທໍາສິ່ງທັງໝົດເຫລົ່ານີ້.
Source notes (1)
- Footnote ຫລື ນິມິດປອມ, ຄຳທຳນວາຍອັນບໍ່ມີປະໂຫຍດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.