Biblica® Open Lao Contemporary Version
ເຢເຣມີຢາ 1
ຖ້ອຍຄຳຂອງເຢເຣມີຢາ ລູກຊາຍຂອງຮິນກີຢາ, ເຊິ່ງເປັນປະໂລຫິດຄົນໜຶ່ງຢູ່ທີ່ອານາທົດໃນເຂດແດນຂອງເບັນຢາມິນ. ຖ້ອຍຄຳຂອງພຣະເຈົ້າຢາເວໄດ້ມາເຖິງລາວໃນປີທີສິບສາມຂອງການປົກຄອງຂອງກະສັດໂຢສີຢາ ລູກຊາຍຂອງກະສັດອາໂມນແຫ່ງຢູດາຍ, ແລະ ຕະຫລອດການປົກຄອງຂອງເຢໂຮຍອາກິມ ລູກຊາຍຂອງກະສັດໂຢສີຢາແຫ່ງຢູດາຍ, ຈົນເຖິງເດືອນທີຫ້າຂອງປີທີສິບເອັດຂອງການປົກຄອງຂອງເຊເດກີຢາ ລູກຊາຍຂອງກະສັດໂຢສີຢາແຫ່ງຢູດາຍ, ເມື່ອປະຊາຊົນນະຄອນເຢຣູຊາເລັມໄດ້ຖືກຈັບໄປເປັນຊະເລີຍ.
ພຣະເຈົ້າເອີ້ນເຢເຣມີຢາ
ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ,
“ເຮົາຮູ້ຈັກເຈົ້າ,1 ກ່ອນທີ່ເຮົາໄດ້ປັ້ນເຈົ້າຢູ່ໃນທ້ອງ,
ກ່ອນເຈົ້າໄດ້ເກີດມາ ເຮົາໄດ້ແຍກເຈົ້າໄວ້ແລ້ວ;
ເຮົາໄດ້ແຕ່ງຕັ້ງເຈົ້າໃຫ້ເປັນຜູ້ທໍານວາຍແກ່ຊົນຊາດທັງຫລາຍ”.
ຂ້າພະເຈົ້າໄດ້ຕອບວ່າ, “ຂ້າແດ່ພຣະເຈົ້າຢາເວ ອົງເຈົ້ານາຍ, ຂ້ານ້ອຍບໍ່ຮູ້ວ່າຈະເວົ້າແນວໃດ; ຂ້ານ້ອຍຍັງໜຸ່ມເກີນໄປ”.
ແຕ່ພຣະເຈົ້າຢາເວໄດ້ກ່າວກັບຂ້າພະເຈົ້າວ່າ, “ຢ່າເວົ້າວ່າ, ‘ຂ້ານ້ອຍຍັງໜຸ່ມເກີນໄປ’. ເຈົ້າຕ້ອງໄປຫາທຸກຄົນທີ່ເຮົາສົ່ງເຈົ້າໄປ ແລະ ກ່າວສິ່ງທີ່ເຮົາສັ່ງເຈົ້າ. ຢ່າຢ້ານພວກເຂົາເລີຍ, ເພາະເຮົາຢູ່ກັບເຈົ້າ ແລະ ຈະຊ່ວຍກູ້ເຈົ້າ”, ພຣະເຈົ້າຢາເວປະກາດດັ່ງນີ້.
ແລ້ວພຣະເຈົ້າຢາເວກໍເດ່ມືອອກ ແລະ ແຕະທີ່ປາກຂອງຂ້າພະເຈົ້າ ແລະ ໄດ້ກ່າວກັບຂ້າພະເຈົ້າວ່າ, “ບັດນີ້ ເຮົາໄດ້ເອົາຖ້ອຍຄຳຂອງເຮົາໃສ່ໄວ້ໃນປາກຂອງເຈົ້າແລ້ວ. ເບິ່ງແມ, ວັນນີ້ເຮົາແຕ່ງຕັ້ງເຈົ້າໄວ້ເໜືອບັນດາປະຊາຊາດ ແລະ ອານາຈັກຕ່າງໆເພື່ອຖອນຮາກ ແລະ ພັງລົງ, ເພື່ອທຳລາຍ ແລະ ໂຄ່ນລົ້ມ, ເພື່ອກໍ່ສ້າງ ແລະ ປູກ”.
ຖ້ອຍຄໍາຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ, “ເຢເຣມີຢາ, ເຈົ້າເຫັນຫຍັງແດ່?”
ຂ້າພະເຈົ້າໄດ້ຕອບວ່າ, “ຂ້ານ້ອຍເຫັນງ່າຂອງຕົ້ນອັນມອນ”,
ພຣະເຈົ້າຢາເວໄດ້ກ່າວກັບຂ້າພະເຈົ້າວ່າ, “ເຈົ້າໄດ້ເຫັນຢ່າງຖືກຕ້ອງແລ້ວ, ເພາະເຮົາກຳລັງເຝົ້າເບິ່ງ2ໃຫ້ຖ້ອຍຄໍາຂອງເຮົາສໍາເລັດເປັນຈິງ”.
ຖ້ອຍຄໍາຂອງພຣະເຈົ້າຢາເວໄດ້ມາເຖິງຂ້າພະເຈົ້າອີກວ່າ: “ເຈົ້າເຫັນຫຍັງແດ່?”
ຂ້າພະເຈົ້າໄດ້ຕອບວ່າ, “ຂ້ານ້ອຍເຫັນໝໍ້ໜ່ວຍໜຶ່ງທີ່ກຳລັງຟົດຢູ່, ປາກໝໍ້ປິ່ນມາຫາພວກເຮົາຈາກທາງທິດເໜືອ”.
ພຣະເຈົ້າຢາເວໄດ້ກ່າວກັບຂ້າພະເຈົ້າວ່າ, “ໄພພິບັດຈາກທາງທິດເໜືອຈະຖືກເທລົງມາໃສ່ທຸກຄົນທີ່ອາໄສຢູ່ໃນດິນແດນນີ້. ເຮົາກຳລັງຈະເອີ້ນປະຊາຊົນທັງໝົດຂອງອານາຈັກເໜືອມາ”, ພຣະເຈົ້າຢາເວປະກາດດັ່ງນີ້.
“ບັນດາກະສັດຂອງພວກເຂົາຈະມາ ແລະ ຕັ້ງບັນລັງຂອງພວກຕົນຂຶ້ນ
ທີ່ທາງເຂົ້າປະຕູເມືອງທັງຫລາຍຂອງເຢຣູຊາເລັມ;
ພວກເຂົາຈະມາຕໍ່ສູ້ກຳແພງເມືອງທັງໝົດທີ່ອ້ອມນະຄອນເຢຣູຊາເລັມ
ແລະ ຕໍ່ສູ້ເມືອງທັງໝົດຂອງຢູດາຍ.
ເຮົາຈະປະກາດການພິພາກສາຂອງເຮົາຕໍ່ປະຊາຊົນຂອງເຮົາ
ຍ້ອນຄວາມຊົ່ວຮ້າຍຂອງພວກເຂົາທີ່ໄດ້ປະຖິ້ມເຮົາ,
ໂດຍການເຜົາເຄື່ອງຫອມຖວາຍແກ່ບັນດາພະອື່ນ
ແລະ ໂດຍການນະມັດສະການສິ່ງທີ່ມືຂອງພວກເຂົາໄດ້ສ້າງຂຶ້ນມາ.
“ຈົ່ງຕຽມຕົວໃຫ້ພ້ອມ! ລຸກຢືນຂຶ້ນ ແລະ ເວົ້າກັບພວກເຂົາຕາມສິ່ງທີ່ເຮົາສັ່ງເຈົ້າ. ຢ່າຢ້ານພວກເຂົາເລີຍ, ບໍ່ດັ່ງນັ້ນເຮົາຈະເຮັດໃຫ້ເຈົ້າຢ້ານເມື່ອຢູ່ຕໍ່ໜ້າພວກເຂົາ. ບັດນີ້ເຮົາໄດ້ເຮັດໃຫ້ເຈົ້າເປັນດັ່ງເມືອງທີ່ມີປ້ອມປ້ອງກັນ, ມີເສົາເຫລັກ ແລະ ກຳແພງທອງສຳລິດທີ່ຢືນຕ້ານທານທົ່ວດິນແດນຄືບັນດາກະສັດແຫ່ງຢູດາຍ, ບັນດາຂ້າລາຊະການ, ບັນດາປະໂລຫິດ ແລະ ປະຊາຊົນທັງໝົດໃນດິນແດນຂອງຢູດາຍ. ພວກເຂົາຈະຕໍ່ສູ້ເຈົ້າ ແຕ່ຈະບໍ່ຊະນະເຈົ້າ, ເພາະເຮົາຢູ່ກັບເຈົ້າ ແລະ ຈະຊ່ວຍກອບກູ້ເຈົ້າ,” ພຣະເຈົ້າຢາເວປະກາດດັ່ງນີ້.
Source notes (2)
- Footnote ຫລື ເລືອກ
- Footnote ເປັນການຫລິ້ນຄຳພາສາເຮັບເຣີທີ່ມີສຽງໃກ້ຄຽງກັນຄືຕົ້ນໝາກອັນມອນໃນຂໍ້ 11 ແລະ ເຝົ້າເບິ່ງ ໃນຂໍ້ 12
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.