Biblica® Open Lao Contemporary Version
ເອຊາຢາ 66
ການພິພາກສາ ແລະ ຄວາມຫວັງ
ພຣະເຈົ້າຢາເວໄດ້ກ່າວວ່າ:
“ສະຫວັນເປັນບັນລັງຂອງເຮົາ,
ແລະ ແຜ່ນດິນໂລກກໍເປັນບ່ອນຮອງຕີນຂອງເຮົາ.
ເຈົ້າຈະສ້າງວິຫານໃຫ້ເຮົາຢູ່ບ່ອນໃດ?
ສະຖານທີ່ພັກຜ່ອນຂອງເຮົາຈະຢູ່ໃສ?
ບໍ່ແມ່ນມືຂອງເຮົາ ທີ່ໄດ້ສ້າງສິ່ງເຫລົ່ານີ້ທັງໝົດບໍ,
ແລະ ພວກມັນກໍມີຊີວິດຂຶ້ນມາ?”
ພຣະເຈົ້າຢາເວປະກາດດັ່ງນັ້ນ.
“ຄົນເຫລົ່ານີ້ຄືຜູ້ທີ່ເຮົາພໍໃຈ:
ຄືບັນດາຜູ້ທີ່ຖ່ອມໃຈ ແລະ ມີຈິດໃຈສຳນຶກຜິດຝ່າຍຈິດວິນຍານ,
ແລະ ໂຕສັ່ນເພາະຖ້ອຍຄຳຂອງເຮົາ.
ແຕ່ຜູ້ໃດກໍຕາມທີ່ຖວາຍງົວເປັນເຄື່ອງບູຊາ
ກໍເໝືອນຜູ້ທີ່ຂ້າຄົນ,
ແລະ ຜູ້ທີ່ຖວາຍລູກແກະ
ກໍເໝືອນຜູ້ທີ່ຫັກຄໍໝາ;
ຜູ້ໃດຖວາຍພືດພັນເປັນເມັດເປັນເຄື່ອງບູຊາ
ກໍເໝືອນຜູ້ທີ່ຖວາຍເລືອດໝູ,
ຜູ້ໃດເຜົາເຄື່ອງຫອມເພື່ອຄວາມສາມັກຄີທໍາ
ກໍເໝືອນຜູ້ທີ່ນະມັດສະການຮູບເຄົາລົບ.
ພວກເຂົາໄດ້ເລືອກວິທີຂອງພວກເຂົາເອງ,
ຈິດວິນຍານຂອງພວກເຂົາຍິນດີໃນສິ່ງທີ່ໜ້າກຽດຊັງຂອງຕົນ;
ດັ່ງນັ້ນ ເຮົາຈຶ່ງເລືອກທີ່ຈະປະຕິບັດຕໍ່ພວກເຂົາຢ່າງຮຸນແຮງ
ແລະ ນຳສິ່ງທີ່ພວກເຂົາຢ້ານກົວມາຍັງພວກເຂົາ.
ເພາະເມື່ອເຮົາຮ້ອງ, ບໍ່ມີຜູ້ໃດຕອບ,
ເມື່ອເຮົາເວົ້າ, ບໍ່ມີຜູ້ໃດຮັບຟັງ.
ພວກເຂົາເຮັດຊົ່ວຕໍ່ໃນສາຍຕາຂອງເຮົາ
ແລະ ເລືອກເຮັດສິ່ງທີ່ເຮົາບໍ່ພໍໃຈ”.
ຈົ່ງຟັງຖ້ອຍຄຳຂອງພຣະເຈົ້າຢາເວ,
ເຈົ້າຜູ້ໂຕສັ່ນເພາະຖ້ອຍຄຳຂອງພຣະອົງ:
“ພີ່ນ້ອງຂອງເຈົ້າເອງທີ່ກຽດຊັງເຈົ້າ,
ແລະ ຂັບໄລ່ເຈົ້າຍ້ອນຊື່ຂອງເຮົາ, ໄດ້ເວົ້າວ່າ,
‘ຂໍໃຫ້ສະຫງ່າລາສີຈົ່ງມີແດ່ພຣະເຈົ້າຢາເວ,
ຂໍໃຫ້ພວກເຮົາເຫັນຄວາມຊື່ນຊົມຍິນດີຂອງເຈົ້າ!’
ແຕ່ພວກເຂົາຈະຕ້ອງອັບອາຍຂາຍໜ້າ.
ຈົ່ງຟັງສຽງອຶກກະທຶກຈາກເມືອງນັ້ນ!
ຈົ່ງຟັງສຽງຈາກວິຫານນັ້ນ!
ມັນເປັນສຽງຂອງພຣະເຈົ້າຢາເວ
ທີ່ຕອບສະໜອງບັນດາສັດຕູຂອງພຣະອົງຢ່າງເໝາະສົມ.
“ກ່ອນທີ່ນາງຍັງບໍ່ເຈັບທ້ອງ,
ນາງກໍເກີດລູກ;
ຍັງບໍ່ທັນເຈັບປວດ,
ນາງກໍໃຫ້ກຳເນີດລູກຊາຍ.
ຜູ້ໃດເຄີຍໄດ້ຍິນເລື່ອງແບບນີ້?
ຜູ້ໃດເຄີຍເຫັນເລື່ອງເຊັ່ນນີ້?
ປະເທດໜຶ່ງຈະຖືກກຳເນີດຂຶ້ນພາຍໃນມື້ດຽວ
ຫລື ຊົນຊາດໜຶ່ງຈະເກີດຂຶ້ນພາຍໃນຄາວດຽວໄດ້ບໍ?
ເຖິງປານນັ້ນ ຊີໂອນເຈັບທ້ອງບໍ່ດົນ
ແລ້ວ ນາງກໍເກີດລູກອອກມາ.
ເຮົານຳມາຮອດກຳນົດເກີດແລ້ວ
ຈະບໍ່ປ່ອຍໃຫ້ເກີດອອກມາໄດ້ບໍ?”
ພຣະເຈົ້າຢາເວກ່າວດັ່ງນັ້ນ.
“ເຮົາປິດມົດລູກໄວ້
ເມື່ອເຮົານຳມາຮອດເວລາເກີດບໍ?”
ພຣະເຈົ້າຂອງເຈົ້າກ່າວດັ່ງນັ້ນ.
“ຈົ່ງຊື່ນຊົມຍິນດີກັບເຢຣູຊາເລັມ ແລະ ຈົ່ງຍິນດີກັບນາງ,
ພວກເຈົ້າທັງໝົດທີ່ຮັກນາງ;
ຈົ່ງຊື່ນຊົມຍິນດີຢ່າງຍິ່ງຮ່ວມກັບນາງ,
ພວກເຈົ້າທຸກຄົນທີ່ໄວ້ທຸກໃຫ້ນາງ.
ເພາະພວກເຈົ້າຈະລ້ຽງດູ ແລະ ພໍໃຈ
ໃນອ້ອມເອິກທີ່ເລົ້າໂລມຂອງນາງ;
ພວກເຈົ້າຈະດື່ມຢ່າງເລິກຊຶ້ງ
ແລະ ຍິນດີໃນຄວາມອຸດົມສົມບູນອັນລົ້ນເຫລືອຂອງນາງ”.
ເພາະພຣະເຈົ້າຢາເວກ່າວວ່າ:
“ເຮົາຈະເພີ່ມສັນຕິສຸກໃຫ້ນາງດັ່ງແມ່ນ້ຳ;
ແລະ ເພີ່ມເຕີມຄວາມຮັ່ງມີຂອງບັນດາປະຊາຊາດໃຫ້ເໝືອນແມ່ນໍ້າທີ່ຍິ່ງໃຫຍ່.
ເຈົ້າຈະຖືກລ້ຽງດູ ແລະ ໂອບອຸ້ມໃນອ້ອມແຂນຂອງນາງ
ແລະ ຖືກກ່ອມຢູ່ເທິງຕັກຂອງນາງ.
ເຮົາຈະເລົ້າໂລມເຈົ້າ
ດັ່ງແມ່ເລົ້າໂລມລູກ;
ແລະ ເຈົ້າຈະໄດ້ຮັບການໜູນໃຈໃນເຢຣູຊາເລັມ”.
ເມື່ອເຈົ້າເຫັນສິ່ງນີ້, ຈິດໃຈຂອງເຈົ້າຈະຍິນດີ
ແລະ ເຈົ້າຈະຈະເລີນງອກງາມເໝືອນຕົ້ນຫຍ້າ;
ມືຂອງພຣະເຈົ້າຢາເວຈະເປັນທີ່ຮູ້ຈັກແກ່ຜູ້ຮັບໃຊ້ຂອງພຣະອົງ,
ແຕ່ຄວາມໂກດຮ້າຍຈະສະແດງແກ່ສັດຕູຂອງພຣະອົງ.
ເບິ່ງແມ, ພຣະເຈົ້າຢາເວກຳລັງມາດ້ວຍໄຟ,
ແລະ ລົດຮົບຂອງພຣະອົງເປັນດັ່ງພະຍຸໝູນ;
ພຣະອົງຈະນໍາຄວາມໃຈຮ້າຍລົງມາຢ່າງຮຸນແຮງ,
ແລະ ການສັ່ງສອນອັນຮ້ອນແຮງດ້ວຍແປວໄຟ.
ເພາະພຣະເຈົ້າຢາເວຈະພິພາກສາລົງໂທດມະນຸດທຸກຄົນ
ດ້ວຍໄຟ ແລະ ດ້ວຍດາບຂອງພຣະອົງ,
ຄົນເປັນຈຳນວນຫລາຍຈະຖືກພຣະເຈົ້າຢາເວປະຫານ.
“ຄົນທັງຫລາຍທີ່ອຸທິດຕົນ ແລະ ຊຳລະຕົນໃຫ້ບໍລິສຸດເພື່ອທີ່ຈະເຂົ້າໄປໃນສວນ, ຕິດຕາມຜູ້ໜຶ່ງທີ່ຢູ່ທ່າມກາງຜູ້ທີ່ກິນຊີ້ນໝູ, ຊີ້ນໜູ ແລະ ສິ່ງໜ້າກຽດຊັງຕ່າງໆ ຄົນເຫລົ່ານັ້ນຈະພົບຈຸດຈົບໄປນໍາກັນ”, ພຣະເຈົ້າຢາເວປະກາດດັ່ງນັ້ນ.
“ຍ້ອນການກະທໍາ ແລະ ສິ່ງທີ່ພວກເຂົາວາງແຜນໄວ້, ເຮົາກຳລັງຈະມາ ແລະ ຮວບຮວມຊົນທຸກຊາດ ແລະ ທຸກພາສາ, ແລະ ພວກເຂົາຈະມາ ແລະ ເຫັນສະຫງ່າລາສີຂອງເຮົາ.
“ເຮົາຈະກຳນົດໝາຍສຳຄັນໃນທ່າມກາງພວກເຂົາ, ແລະ ເຮົາຈະສົ່ງບາງຄົນໃນບັນດາຜູ້ລອດຊີວິດໄປຍັງຊົນຊາດຕ່າງໆ ໄປທີ່ຕາກຊິດ, ໄປຫາຊາວລີເບຍ ແລະ ຊາວລີເດຍ (ຜູ້ເປັນນັກທະນູທີ່ມີຊື່ສຽງ), ໄປທີ່ຕູບານ ແລະ ກະເຣເຕ ແລະ ໄປທີ່ເກາະແກ້ງອັນໄກທີ່ບໍ່ເຄີຍໄດ້ຍິນຊື່ສຽງ ຫລື ເຫັນສະຫງ່າລາສີຂອງເຮົາ. ພວກເຂົາຈະປະກາດສະຫງ່າລາສີຂອງເຮົາທ່າມກາງຊົນຊາດຕ່າງໆ. ແລະ ພວກເຂົາຈະນຳພີ່ນ້ອງທັງໝົດຂອງພວກເຈົ້າ, ຈາກທຸກຊົນຊາດ, ມາທີ່ພູເຂົາສັກສິດຂອງເຮົາໃນເຢຣູຊາເລັມ ເພື່ອເປັນເຄື່ອງບູຊາແດ່ພຣະເຈົ້າຢາເວ ບາງຄົນນັ່ງມາເທິງຫລັງມ້າ ບາງຄົນນັ່ງໃນລົດຮົບ, ແລະ ກວຽນ ແລະ ບາງຄົນນັ່ງມາເທິງຫລັງລໍຫລັງອູດ”, ພຣະເຈົ້າຢາເວກ່າວດັ່ງນັ້ນ. “ພວກເຂົາຈະພາພີ່ນ້ອງທັງປວງຂອງພວກເຈົ້າມາ, ເໝືອນຊາວອິດສະຣາເອນນຳພືດຜົນເປັນເມັດມາຖວາຍ, ໃນວິຫານຂອງພຣະເຈົ້າຢາເວ ໂດຍໃສ່ພາຊະນະທີ່ຊໍາລະສະອາດແລ້ວ. ແລະ ເຮົາຈະເລືອກບາງຄົນທີ່ກັບມາໃຫ້ເປັນປະໂລຫິດ ແລະ ຄົນເລວີ”, ພຣະເຈົ້າຢາເວກ່າວດັ່ງນັ້ນ.
ພຣະເຈົ້າຢາເວປະກາດວ່າ, “ຟ້າສະຫວັນໃໝ່ ແລະ ແຜ່ນດິນໂລກໃໝ່ທີ່ເຮົາສ້າງຂຶ້ນຈະດໍາລົງຢູ່ຕໍ່ໜ້າເຮົາສັນໃດ, ຊື່ຂອງເຈົ້າ ແລະ ລູກຫລານຂອງເຈົ້າຈະດໍາລົງຢູ່ສັນນັ້ນ. ຈາກເດືອນອອກໃໝ່ຫາເດືອນໃໝ່ ແລະ ຈາກວັນຊະບາໂຕໜຶ່ງຫາອີກວັນຊະບາໂຕໜຶ່ງ, ມະນຸດທຸກຊາດຈະມາ ແລະ ກົ້ມກາບຕໍ່ໜ້າເຮົາ”, ພຣະເຈົ້າຢາເວກ່າວດັ່ງນັ້ນ. “ແລະພວກເຂົາຈະອອກໄປເບິ່ງຊາກສົບຂອງບັນດາຜູ້ທີ່ກະບົດຕໍ່ເຮົາ; ເພາະໜອນຂອງຄົນເຫລົ່ານັ້ນຈະບໍ່ມີວັນຕາຍ, ທັງໄຟຂອງພວກເຂົາຈະບໍ່ມີວັນດັບ, ແລະ ພວກເຂົາຈະເປັນທີ່ໜ້າລັງກຽດແກ່ມວນມະນຸດຊາດທັງໝົດ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.