Biblica® Open Lao Contemporary Version
ເອຊາຢາ 65
ການພິພາກສາ ແລະ ຄວາມພົ້ນ
“ເຮົາສະແດງຕົນເອງແກ່ບັນດາຜູ້ທີ່ບໍ່ໄດ້ເອີ້ນຫາເຮົາ;
ບັນດາຜູ້ທີ່ບໍ່ໄດ້ສະແຫວງຫາເຮົາກໍພົບເຮົາ.
ຊົນຊາດທີ່ບໍ່ໄດ້ຮ້ອງຫາຊື່ຂອງເຮົາ,
ເຮົາກໍກ່າວກັບພວກເຂົາວ່າ, ‘ເຮົາຢູ່ບ່ອນນີ້, ເຮົາຢູ່ບ່ອນນີ້’.
ຕະຫລອດວັນເຮົາໄດ້ຍື່ນມືອອກ
ໃຫ້ແກ່ຊົນຊາດທີ່ດື້ດ້ານ,
ທີ່ດຳເນີນຕາມວິຖີທາງອັນບໍ່ດີບໍ່ງາມ,
ເຮັດຕາມຄວາມຄິດຈິນຕະນາການຂອງໂຕເອງ
ຄືຊົນຊາດທີ່ຍົວະໃຫ້ເຮົາໂກດຮ້າຍ
ຢູ່ຕໍ່ໜ້າເຮົາ,
ພວກເຂົາຖວາຍເຄື່ອງບູຊາຕາມສວນຕ່າງໆ
ແລະ ເຜົາເຄື່ອງຫອມເທິງແທ່ນບູຊາທີ່ເຮັດດ້ວຍດິນຈີ່;
ພວກເຂົານັ່ງຕາມຂຸມຝັງສົບ
ແລະ ເຝົ້າຢູ່ລັບໆຕະຫລອດຄືນ;
ພວກເຂົາກິນຊີ້ນໝູ,
ແລະ ໃນໝໍຂອງພວກເຂົານັ້ນມີນ້ຳແກງຊີ້ນສັດທີ່ເປັນມົນທິນຢູ່;
ຄົນຜູ້ກ່າວວ່າ, ‘ຈົ່ງຫລີກໄປ; ຢ່າເຂົ້າມາໃກ້ຂ້ອຍ,
ເພາະຂ້ອຍບໍລິສຸດກວ່າເຈົ້າ!’
ຄົນເຊັ່ນນີ້ເປັນດັ່ງຄວັນໃນດັງຂອງເຮົາ,
ເປັນໄຟທີ່ລຸກໄໝ້ຕະຫລອດໄປ.
“ເບິ່ງແມ, ມີຂຽນໄວ້ຕໍ່ໜ້າເຮົາສະເໝີວ່າ:
ເຮົາຈະບໍ່ມິດງຽບ ແຕ່ຈະຕອບແທນເຕັມທີ່;
ເຮົາຈະຕອບສະໜອງພວກເຂົາຢ່າງເຕັມຂະໜາດ
ທັງບາບຂອງພວກເຂົາ ແລະ ບາບຂອງບັນພະບຸລຸດຂອງພວກເຂົາ”,
ພຣະເຈົ້າຢາເວກ່າວດັ່ງນັ້ນ.
“ເພາະພວກເຂົາໄດ້ເຜົາເຄື່ອງບູຊາເທິງພູເຂົາທັງຫລາຍ
ແລະ ດູໝິ່ນເຮົາເທິງເນີນພູທັງຫລາຍ,
ເຮົາຈະຕອບສະໜອງພວກເຂົາຢ່າງເຕັມທີ່
ຍ້ອນການກະທໍາດັ້ງເດີມຂອງພວກເຂົາ”.
ພຣະເຈົ້າຢາເວກ່າວວ່າ:
“ເໝືອນຍັງມີນ້ຳໝາກອະງຸ່ນເຫລືອຢູ່ໃນພວງອະງຸ່ນ
ແລະ ມີປະຊາຊົນເວົ້າວ່າ, ‘ຢ່າທຳລາຍມັນຖິ້ມ,
ມັນຍັງມີດີຢູ່’,
ດັ່ງນັ້ນ ເຮົາກໍຈະເຮັດແບບນັ້ນເພື່ອຜູ້ຮັບໃຊ້ຂອງເຮົາ;
ເຮົາຈະບໍ່ທຳລາຍພວກເຂົາໝົດ.
ເຮົາຈະນຳລູກຫລານຈາກຢາໂຄບ,
ແລະ ຈາກຢູດາອອກມາຄືຜູ້ທີ່ຈະຄອບຄອງພູເຂົາຕ່າງໆຂອງເຮົາ;
ປະຊາຊົນທີ່ເຮົາເລືອກຈະໄດ້ຮັບພວກມັນເປັນມໍລະດົກ,
ແລະ ຜູ້ຮັບໃຊ້ຂອງເຮົາຈະອາໄສຢູ່ທີ່ນັ້ນ.
ທົ່ງຫຍ້າຊາໂຣນຈະເປັນທົ່ງຫຍ້າສຳລັບຝູງແກະ
ແລະ ຮ່ອມພູອາໂຄຈະເປັນບ່ອນພັກສຳລັບຝູງສັດ,
ເພື່ອປະຊາຊົນຂອງເຮົາທີ່ສະແຫວງຫາເຮົາ.
“ແຕ່ສຳລັບພວກເຈົ້າທີ່ປະຖິ້ມພຣະເຈົ້າຢາເວ
ແລະ ລືມພູເຂົາສັກສິດຂອງເຮົາ,
ຜູ້ກາງໂຕະໃຫ້ພະແຫ່ງໂຊກລາບ
ແລະ ຕື່ມເຫລົ້າອະງຸ່ນປະສົມໃຫ້ພະແຫ່ງຊາຕາກໍາ,
ເຮົາຈະກຳນົດຄົມດາບໃຫ້ເປັນຊາຕາກຳຂອງພວກເຈົ້າ,
ແລະ ພວກເຈົ້າທັງໝົດຈະກົ້ມລົງຮັບການຂ້າ;
ເພາະເຮົາໄດ້ຮ້ອງແຕ່ເຈົ້າກໍບໍ່ຕອບ,
ເຮົາເວົ້າແຕ່ເຈົ້າບໍ່ຟັງ.
ເຈົ້າເຮັດຊົ່ວໃນສາຍຕາຂອງເຮົາ
ແລະ ເລືອກເຮັດສິ່ງທີ່ເຮົາບໍ່ພໍໃຈ”.
ສະນັ້ນ ພຣະເຈົ້າຢາເວ ອົງເຈົ້ານາຍກ່າວວ່າ:
“ຜູ້ຮັບໃຊ້ຂອງເຮົາຈະກິນ,
ແຕ່ເຈົ້າຈະອຶດຫິວ;
ຜູ້ຮັບໃຊ້ຂອງເຮົາຈະດື່ມ,
ແຕ່ເຈົ້າຈະກະຫາຍ
ຜູ້ຮັບໃຊ້ຂອງເຮົາຈະຊື່ນຊົມຍິນດີ,
ແຕ່ເຈົ້າຈະຕ້ອງອັບອາຍຂາຍໜ້າ.
ຜູ້ຮັບໃຊ້ຂອງເຮົາຈະຮ້ອງເພງ
ດ້ວຍຈິດໃຈທີ່ຊື່ນຊົມຍິນດີ,
ແຕ່ເຈົ້າຈະຮ້ອງອອກມາ
ດ້ວຍຄວາມທຸກທໍລະມານໃຈ
ແລະ ຮ້ອງໄຫ້ດ້ວຍຫົວໃຈທີ່ແຕກສະຫລາຍ.
ເຈົ້າຈະເຫລືອໄວ້ແຕ່ຊື່
ເປັນຄຳສາບແຊ່ງໃນບັນດາຜູ້ທີ່ຖືກເລືອກຂອງເຮົາ;
ພຣະເຈົ້າຢາເວ ອົງເຈົ້ານາຍຈະຂ້າເຈົ້າ,
ສ່ວນຜູ້ຮັບໃຊ້ຂອງພຣະອົງ ພຣະອົງຈະໃຫ້ຊື່ອື່ນແກ່ພວກເຂົາ.
ຜູ້ໃດຈະກ່າວອວຍພອນໃນດິນແດນນັ້ນ
ກໍຈະກ່າວໂດຍອ້າງເຖິງພຣະເຈົ້າແຫ່ງຄວາມຈິງ;
ຜູ້ໃດຈະກ່າວສາບານໃນດິນແດນນັ້ນ
ກໍຈະສາບານໂດຍອ້າງເຖິງພຣະເຈົ້າແຫ່ງຄວາມຈິງ.
ເພາະຄວາມທຸກລຳບາກໃນອະດີດຈະຖືກລືມ
ແລະ ຖືກເຊື່ອງໄວ້ຈາກສາຍຕາຂອງເຮົາ.
ຟ້າສະຫວັນໃໝ່ ແລະ ແຜ່ນດິນໂລກໃໝ່
“ເບິ່ງແມ, ເຮົາຈະສ້າງຟ້າສະຫວັນໃໝ່
ແລະ ແຜ່ນດິນໂລກໃໝ່.
ຈະບໍ່ມີຜູ້ໃດຈົດຈຳ
ຫລື ລະນຶກເຖິງສິ່ງເກົ່າອີກຕໍ່ໄປ,
ແຕ່ຈົ່ງຊົມຊື່ນ ແລະ ຍິນດີຕະຫລອດໄປ
ໃນສິ່ງທີ່ເຮົາຈະສ້າງຂຶ້ນ.
ເພາະເຮົາຈະສ້າງນະຄອນເຢຣູຊາເລັມໃຫ້ເປັນຄວາມຍິນດີ
ແລະ ໃຫ້ຊາວເຢຣູຊາເລັມເປັນຄວາມຊື່ນຊົມຍິນດີ
ເຮົາຈະຊື່ນຊົມຍິນດີໃນນະຄອນເຢຣູຊາເລັມ
ແລະ ຊົມຊື່ນໃນປະຊາຊົນຂອງເຮົາ;
ທີ່ນັ້ນຈະບໍ່ມີສຽງຄ່ຳຄວນຮ້ອງໄຫ້
ໃຫ້ໄດ້ຍິນອີກຕໍ່ໄປ.
“ທີ່ນັ້ນຈະບໍ່ມີເດັກນ້ອຍທີ່ມີຊີວິດ
ຢູ່ພຽງສອງສາມວັນ,
ຫລື ຄົນແກ່ທີ່ຢູ່ບໍ່ຄົບອາຍຸ;
ຜູ້ໃດທີ່ຕາຍເມື່ອອາຍຸຮ້ອຍປີ
ຈະຖືວ່າຕາຍຕັ້ງແຕ່ຍັງໜຸ່ມ;
ສ່ວນຄົນທີ່ຕາຍຕັ້ງແຕ່ອາຍຸບໍ່ເຖິງຮ້ອຍປີ
ຈະຖືວ່າເປັນຄົນທີ່ຖືກສາບແຊ່ງ.
ຄົນທັງຫລາຍຈະສ້າງບ້ານ ແລະ ໄດ້ຢູ່ອາໄສ
ພວກເຂົາຈະປູກໝາກອະງຸ່ນ ແລະ ໄດ້ກິນຜົນຂອງມັນ.
ບໍ່ມີອີກແລ້ວທີ່ພວກເຂົາຈະສ້າງບ້ານແລ້ວມີຄົນອື່ນມາຢູ່ແທນ,
ຫລື ປູກພືດພັນແລ້ວຄົນອື່ນມາເກັບໄປກິນ.
ເພາະປະຊາຊົນຂອງເຮົາ
ຈະມີອາຍຸຢືນເໝືອນຕົ້ນໄມ້,
ຜູ້ທີ່ເຮົາເລືອກໄວ້ຈະໄດ້ຊົມຊື່ນຜົນງານ
ຈາກມືຂອງຕົນຍາວນານ.
ພວກເຂົາຈະບໍ່ເຮັດວຽກໂດຍບໍ່ມີປະໂຫຍດ,
ຫລື ເກີດລູກມາຮັບເຄາະກຳ;
ເພາະພວກເຂົາຈະເປັນປະຊາຊາດທີ່ພຣະເຈົ້າຢາເວອວຍພອນ,
ທັງພວກເຂົາ ແລະ ລູກຫລານຂອງພວກເຂົາ.
ກ່ອນທີ່ພວກເຂົາຈະຮ້ອງຫາ ເຮົາຈະຕອບ;
ຂະນະທີ່ພວກເຂົາເວົ້າຢູ່ ເຮົາຈະຟັງ.
ໝາປ່າ ແລະ ລູກແກະຈະຫາກິນຢູ່ນໍາກັນ,
ໂຕສິງຈະກິນເຟືອງເໝືອນງົວ,
ສ່ວນຝຸ່ນດິນຈະເປັນອາຫານຂອງງູ.
ສັດທັງຫລາຍຈະບໍ່ເຮັດອັນຕະລາຍ
ຫລື ຂ້າທຳລາຍກັນເທິງພູເຂົາສັກສິດຂອງເຮົາ”,
ພຣະເຈົ້າຢາເວກ່າວດັ່ງນັ້ນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.