Biblica® Open Lao Contemporary Version
ເອຊາຢາ 8
ເອຊາຢາ ແລະ ລູກຊາຍຂອງເພິ່ນຄືໝາຍສໍາຄັນ
ພຣະເຈົ້າຢາເວກ່າວກັບຂ້າພະເຈົ້າວ່າ, “ຈົ່ງເອົາໜັງສືມ້ວນແຜ່ນໃຫຍ່ມາ ແລະ ໃຊ້ປາກກາທໍາມະດາຂຽນລົງໄປວ່າ: ‘ມາເຮີຊາລາຫັດບັສ’.1 ເພື່ອເຮົາຈະເອີ້ນປະໂລຫິດອູຣີຢາ ແລະ ເຊກາຣີຢາລູກຊາຍຂອງເຢເບເຣກີຢາໃຫ້ເປັນພະຍານທີ່ເຊື່ອຖືໄດ້ຂອງເຮົາ”. ແລ້ວຂ້າພະເຈົ້ານອນນໍາຜູ້ທຳນວາຍຍິງ, ນາງຈຶ່ງຖືພາ ແລະ ເກີດລູກຊາຍຄົນໜຶ່ງ. ແລະ ພຣະເຈົ້າຢາເວກ່າວກັບຂ້າພະເຈົ້າວ່າ, “ຈົ່ງຕັ້ງຊື່ລາວວ່າມາເຮີຊາລາຫັດບັສ. ກ່ອນທີ່ເດັກຄົນນັ້ນຈະຮູ້ຈັກເອີ້ນ ‘ພໍ່’ ຫລື ‘ແມ່’ ກະສັດອັດຊີເຣຍຈະປຸ້ນຊັບສົມບັດຂອງດາມັສກັດ ແລະ ຊາມາເຣຍໄປ ແລະ ຊັບສົມບັດຂອງຊາມາເຣຍຈະຖືກກະສັດອັດຊີເຣຍຢຶດໄປໝົດ”.
ພຣະເຈົ້າຢາເວກ່າວກັບຂ້າພະເຈົ້າອີກວ່າ:
“ເນື່ອງຈາກຊົນຊາດນີ້ໄດ້ປະຕິເສດ
ນ້ຳແຫ່ງຊີໂລອາທີ່ໄຫລ ແລະ
ໄປຊົມຊື່ນເຣຊິນ
ແລະ ລູກຊາຍຂອງເຣມາລີຢາ,
ເຫດສະນັ້ນ ອົງພຣະຜູ້ເປັນເຈົ້າຈະນໍາການຕໍ່ສູ້ມາເຖິງພວກເຂົາ
ດັ່ງກະແສນ້ຳອັນຍິ່ງໃຫຍ່ຂອງເອີຟຣັດ
ຄືກະສັດອັດຊີເຣຍພ້ອມດ້ວຍກອງທັບທັງໝົດຂອງລາວ.
ກະແສນ້ຳນັ້ນຈະຖ້ວມທຸກຊ່ອງທາງ,
ແລະ ໄຫລລົ້ນຕາຝັ່ງທັງໝົດຂອງມັນ
ແລະ ກວາດເຂົ້າມາໃນຢູດາຍ, ໄຫລວົນເໜືອດິນແດນນັ້ນ,
ໄຫລຜ່ານໄປ ແລະ ຖ້ວມເຖິງຄໍ.
ໂອ ເອມານູເອນ2!
ປີກທີ່ກາງອອກຈະປົກຄຸມເໜືອເຂດແດນຂອງເຈົ້າ!”
ປະຊາຊາດທັງຫລາຍ, ຈົ່ງໂຫ່ຮ້ອງອອກຮົບ, ແລະ ຈົ່ງແຕກໝຸ່ນ!
ຈົ່ງຟັງ, ດິນແດນທາງໄກທັງໝົດ.
ຈົ່ງຕຽມເຮັດເສິກ, ແລະ ຈົ່ງຖືກທໍາລາຍ!
ຈົ່ງຕຽມເຮັດເສິກ, ແລະ ຈົ່ງຖືກທໍາລາຍ!
ຈົ່ງວາງແຜນການຂອງເຈົ້າ, ແຕ່ມັນຈະຖືກຂັດຂວາງ;
ຈົ່ງສະເໜີແຜນຂອງເຈົ້າ, ແຕ່ມັນຈະບໍ່ສໍາເລັດ,
ເພາະພຣະເຈົ້າຢູ່ກັບພວກເຮົາ.3
ນີ້ແມ່ນສິ່ງທີ່ພຣະເຈົ້າຢາເວກ່າວກັບຂ້າພະເຈົ້າຢ່າງເຂັ້ມງວດ, ມືອັນເຂັ້ມແຂງຂອງພຣະອົງຢູ່ເໜືອຂ້ານ້ອຍ, ເຕືອນບໍ່ໃຫ້ດຳເນີນຕາມວິຖີຂອງປະຊາຊົນນີ້:
“ຢ່າເອີ້ນວ່າການສົມຮູ້ຮ່ວມຄິດ
ທຸກສິ່ງທີ່ປະຊາຊົນນີ້ເຮັດເອີ້ນວ່າການກະບົດ;
ຢ່າຢ້ານສິ່ງທີ່ພວກເຂົາຢ້ານ,4
ແລະ ຢ່າຢ້ານມັນ.
ພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່ຄືຜູ້ທີ່ເຈົ້າຈະຕ້ອງຖືວ່າບໍລິສຸດ,
ພຣະອົງຄືຜູ້ທີ່ເຈົ້າຈະຕ້ອງຢຳເກງ,
ພຣະອົງຄືຜູ້ທີ່ເຈົ້າຈະຕ້ອງຢ້ານ.
ພຣະອົງຈະເປັນສະຖານທີ່ບໍລິສຸດ;
ສຳລັບເຊື້ອສາຍທັງສອງຂອງອິດສະຣາເອນ ແລະ ຢູດາຍ
ພຣະອົງຈະເປັນກ້ອນຫີນທີ່ເຮັດໃຫ້ຄົນສະດຸດ.
ແລະ ເປັນສີລາທີ່ເຮັດໃຫ້ພວກເຂົາລົ້ມລົງ.
ແລະ ພຣະອົງຈະເປັນກັບດັກ
ແລະ ເປັນບ້ວງແຮ້ວສຳລັບຊາວເຢຣູຊາເລັມ.
ພວກເຂົາຫລາຍຄົນຈະສະດຸດ;
ພວກເຂົາຈະລົ້ມລົງ ແລະ ແຕກຫັກ,
ພວກເຂົາຈະຕິດແຮ້ວ ແລະ ຖືກຈັບໄປ”.
ຈົ່ງມັດຄຳພະຍານຄໍາເຕືອນນີ້ໄວ້
ແລະ ປະທັບຕາຄໍາແນະນໍາຂອງພຣະເຈົ້າທ່າມກາງສາວົກຂອງຂ້າພະເຈົ້າ,
ຂ້າພະເຈົ້າຈະລໍຄອຍພຣະເຈົ້າຢາເວ,
ຜູ້ເຊື່ອງໜ້າຈາກເຊື້ອສາຍຂອງຢາໂຄບ.
ຂ້າພະເຈົ້າຈະໄວ້ວາງໃຈໃນພຣະອົງ.
ຂ້າພະເຈົ້າຢູ່ນີ້, ແລະ ລູກທັງຫລາຍທີ່ພຣະເຈົ້າຢາເວໄດ້ໃຫ້ແກ່ຂ້າພະເຈົ້າກໍຢູ່ທີ່ນີ້ແລ້ວ. ພວກເຮົາຄືໝາຍສຳຄັນ ແລະ ການອັດສະຈັນໃນອິດສະຣາເອນຈາກພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່, ຜູ້ປະທັບເທິງພູເຂົາຊີໂອນ.
ຄວາມມືດກາຍເປັນຄວາມສະຫວ່າງ
ເມື່ອຄົນບອກໃຫ້ເຈົ້າໄປປຶກສາໝໍຜີ, ຜູ້ທີ່ຊິ່ມ ແລະ ຈົ່ມພຶມພໍາ, ປະຊາຊົນບໍ່ຄວນຖາມພຣະເຈົ້າຂອງຕົນບໍ? ເປັນຫຍັງຈຶ່ງໄປປຶກສາກັບຄົນຕາຍເພື່ອຄົນເປັນ? ຈົ່ງໄປຄົ້ນເບິ່ງກົດບັນຍັດ ແລະ ຄຳພະຍານ! ຖ້າຜູ້ໃດບໍ່ໄດ້ເວົ້າຕາມຖ້ອຍຄໍານີ້, ພວກເຂົາກໍບໍ່ໄດ້ມີແສງສະຫວ່າງແຫ່ງຮຸ່ງອາລຸນ. ພວກເຂົາຈະຊັດເຊພະເນຈອນໄປທົ່ວແຜ່ນດິນຢ່າງທຸກລຳບາກ ແລະ ອຶດຫິວ; ເມື່ອກັນດານອາຫານ, ພວກເຂົາຈະໃຈຮ້າຍ, ແລະ ເງີຍໜ້າຂຶ້ນຟ້າ, ປ້ອຍດ່າກະສັດ ແລະ ພຣະເຈົ້າຂອງຕົນ. ຈາກນັ້ນພວກເຂົາຈະເບິ່ງໄປທີ່ແຜ່ນດິນໂລກ ແລະ ພົບແຕ່ຄວາມທຸກລຳບາກ, ຄວາມມືດມົນ, ຄວາມໂສກເສົ້າ ແລະ ພວກເຂົາຈະຖືກຍູ້ເຂົ້າສູ່ຄວາມມືດ.
Source notes (4)
- Footnote ແປວ່າ ຮີບໄປຍັງຂອງທີ່ປຸ້ນມາໄດ້ ເຊັ່ນດຽວກັບຂໍ້ 3
- Footnote ແປວ່າ ພຣະເຈົ້າຢູ່ກັບເຮົາ
- Footnote ພາສາເຮັບເຣີວ່າ ອິມມານູເອນ
- Footnote ຫລື ທຸກເທື່ອທີ່ຊົນຊາດເຫລົ່ານີ້ຮຽກຫາສົນທີ່ສັນຍາ ຢ່າຮຽກຫາສົນທີ່ສັນຍາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.