Biblica® Open Lao Contemporary Version
ເອຊາຢາ 61
ປີແຫ່ງຄວາມເມດຕາຂອງພຣະເຈົ້າຢາເວ
ພຣະວິນຍານຂອງພຣະເຈົ້າຢາເວ ອົງເຈົ້ານາຍຢູ່ກັບຂ້ານ້ອຍ,
ເພາະພຣະເຈົ້າຢາເວໄດ້ເຈີມຂ້ານ້ອຍໄວ້
ໃຫ້ປະກາດຂ່າວດີແກ່ຜູ້ທຸກຍາກ.
ພຣະອົງໄດ້ໃຊ້ຂ້ານ້ອຍມາໜູນໃຈຜູ້ຊ້ຳໃຈ,
ໃຫ້ປະກາດອິດສະຫລະພາບແກ່ບັນດາຊະເລີຍ
ແລະ ປົດປ່ອຍນັກໂທດອອກຈາກຄວາມມືດ,
ໃຫ້ປະກາດປີແຫ່ງຄວາມເມດຕາຂອງພຣະເຈົ້າຢາເວ
ແລະ ວັນແຫ່ງການແກ້ແຄ້ນຂອງພຣະເຈົ້າຂອງພວກເຮົາ,
ໃຫ້ເລົ້າໂລມທຸກຄົນທີ່ໂສກເສົ້າຮ້ອງໄຫ້,
ແລະ ຈັດຕຽມສໍາລັບຜູ້ທີ່ໂສກເສົ້າໃນຊີໂອນ
ມອບມົງກຸດແຫ່ງຄວາມງາມ
ແທນຂີ້ເທົ່າ,
ມອບນ້ຳມັນແຫ່ງຄວາມຍິນດີ
ແທນການໄວ້ທຸກ,
ແລະ ເຄື່ອງນຸ່ງຫົ່ມແຫ່ງການສັນລະເສີນ
ແທນວິນຍານແຫ່ງຄວາມສິ້ນຫວັງ.
ພວກເຂົາຈະຖືກເອີ້ນວ່າຕົ້ນໂອກແຫ່ງຄວາມຊອບທຳ,
ເປັນຕົ້ນໄມ້ທີ່ພຣະເຈົ້າຢາເວໄດ້ປູກໄວ້
ເພື່ອສະແດງຄວາມຮຸ່ງເຮືອງຂອງພຣະອົງ.
ພວກເຂົາຈະສ້າງຊາກບູຮານທີ່ຫັກພັງຂຶ້ນໃໝ່
ແລະ ສ້າງສະຖານທີ່ຕ່າງໆທີ່ຖືກທຳລາຍເມື່ອດົນນານມາແລ້ວຂຶ້ນໃໝ່;
ພວກເຂົາຈະຟື້ນຟູເມືອງຫັກພັງທັງຫລາຍ
ທີ່ຖືກທຳລາຍມາຫລາຍຊົ່ວອາຍຸຄົນ.
ຄົນແປກໜ້າຈະລ້ຽງດູຝູງແກະຂອງເຈົ້າ;
ຄົນຕ່າງຊາດຈະເຮັດວຽກໃນທົ່ງນາ ແລະ ໃນສວນອະງຸ່ນຂອງເຈົ້າ.
ແລະ ເຈົ້າຈະເອີ້ນວ່າປະໂລຫິດຂອງພຣະເຈົ້າຢາເວ,
ເຈົ້າຈະໄດ້ຊື່ວ່າເປັນຜູ້ຮັບໃຊ້ຂອງພຣະເຈົ້າຂອງພວກເຮົາ.
ເຈົ້າຈະອິ່ມດ້ວຍຊັບສົມບັດຂອງຊົນຊາດຕ່າງໆ,
ແລະ ເຈົ້າຈະອວດຄວາມຍິ່ງໃຫຍ່ຂອງພວກເຂົາ.
ພວກເຈົ້າຈະໄດ້ຮັບສ່ວນແບ່ງເປັນສອງເທົ່າ,
ແທນຄວາມອັບອາຍຂອງພວກເຈົ້າ
ພວກເຈົ້າຈະຊື່ນຊົມຍິນດີໃນມໍລະດົກຂອງຕົນ.
ແທນຄວາມອັບອາຍຂາຍໜ້າ.
ເພາະສະນັ້ນ ພວກເຈົ້າຈະໄດ້ຮັບສ່ວນແບ່ງເປັນສອງເທົ່າໃນແຜ່ນດິນຂອງພວກເຈົ້າ,
ແລະ ຄວາມຊື່ນຊົມຍິນດີຕະຫລອດໄປຈະເປັນຂອງພວກເຈົ້າ.
“ເພາະເຮົາ, ພຣະເຈົ້າຢາເວ, ຮັກຄວາມຍຸຕິທຳ:
ເຮົາກຽດຊັງການປຸ້ນຈີ້ ແລະ ການເຮັດຜິດ.
ເຮົາຈະໃຫ້ບຳເໜັດຢ່າງສັດຊື່ແກ່ປະຊາຊົນຂອງເຮົາ
ແລະ ຈະເຮັດຄຳໝັ້ນສັນຍາຕະຫລອດໄປກັບພວກເຂົາ.
ເຊື້ອສາຍຂອງພວກເຂົາຈະເປັນທີ່ຮູ້ຈັກໃນທ່າມກາງຊົນຊາດຕ່າງໆ
ແລະ ລູກຫລານຂອງພວກເຂົາຈະເປັນທີ່ຮູ້ຈັກທ່າມກາງຊົນຊາດທັງຫລາຍ.
ທຸກຄົນທີ່ເຫັນພວກເຂົາຈະຮູ້ວ່າ
ພວກເຂົາເປັນປະຊາຊົນທີ່ພຣະເຈົ້າຢາເວໄດ້ອວຍພອນ”.
ຂ້ານ້ອຍຍິນດີໃນພຣະເຈົ້າຢາເວຫລາຍ;
ຈິດວິນຍານຂອງຂ້ານ້ອຍຊື່ນຊົມຍິນດີໃນພຣະເຈົ້າຂອງຂ້ານ້ອຍ.
ເພາະພຣະອົງໄດ້ຮົ່ມຂ້ານ້ອຍດ້ວຍເຄື່ອງນຸ່ງແຫ່ງຄວາມພົ້ນໃຫ້
ແລະ ໃຫ້ຂ້ານ້ອຍໃສ່ເສື້ອຄຸມແຫ່ງຄວາມຊອບທຳ,
ດັ່ງເຈົ້າບ່າວປະດັບຫົວຄືປະໂລຫິດ,
ແລະ ເໝືອນເຈົ້າສາວປະດັບກາຍດ້ວຍເພັດນິນຈິນດາ.
ເພາະພື້ນດິນເຮັດໃຫ້ພືດງອກຂຶ້ນມາ
ແລະ ສວນເຮັດໃຫ້ເມັດພັນງອກງາມໄດ້ສັນໃດ
ພຣະເຈົ້າຢາເວ ອົງເຈົ້ານາຍຈະໃຫ້ຄວາມຊອບທຳ ແລະ ການສັນລະເສີນ
ປາກົດຂຶ້ນຕໍ່ໜ້າທຸກຊົນຊາດສັນນັ້ນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.