Biblica® Open Lao Contemporary Version
ເອຊາຢາ 6
ພຣະເຈົ້າມອບໝາຍໜ້າທີ່ໃຫ້ເອຊາຢາ
ໃນປີທີ່ກະສັດອຸດຊີຢາໄດ້ຕາຍໄປ, ຂ້າພະເຈົ້າໄດ້ເຫັນອົງພຣະຜູ້ເປັນເຈົ້າຜູ້ສູງສົ່ງ ແລະ ເປັນທີ່ເທີດທູນນັ່ງເທິງບັນລັງ ແລະ ປາຍເສື້ອຄຸມຂອງພຣະອົງປົກຄຸມທົ່ວວິຫານ. ເໜືອພຣະອົງມີເສຣາຟິມ, ແຕ່ລະຕົນມີຫົກປີກ: ສອງປີກປົກໜ້າ, ສອງປີກປົກຕີນ ແລະ ອີກສອງປີກໃຊ້ບິນໄປມາ. ແລະ ເສຣາຟິມເຫລົ່ານີ້ຕ່າງຮ້ອງໃສ່ກັນວ່າ:
“ບໍລິສຸດ ບໍລິສຸດ ບໍລິສຸດ ຄືພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່;
ທົ່ວໂລກເຕັມໄປດ້ວຍສະຫງ່າລາສີຂອງພຣະອົງ”.
ສຽງເທວະດາເຫລົ່ານີ້ເຮັດໃຫ້ເສົາປະຕູ ແລະ ຮາກຖານປະຕູສັ່ນສະເທືອນ ແລະ ມີຄວັນປົກຄຸມທົ່ວວິຫານ.
ຂ້າພະເຈົ້າຈຶ່ງຮ້ອງວ່າ. “ວິບັດແກ່ຂ້າພະເຈົ້າ! ຂ້າພະເຈົ້າຈິບຫາຍແລ້ວ! ເພາະຂ້າພະເຈົ້າເປັນຄົນທີ່ຮິມສົບບໍ່ສະອາດ ແລະ ໃຊ້ຊີວິດໃນທ່າມກາງຊົນຊາດທີ່ມີຮິມສົບບໍ່ສະອາດ ແລະ ຕາຂອງຂ້າພະເຈົ້າໄດ້ເຫັນກະສັດຄືພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່”.
ຈາກນັ້ນເສຣາຟິມຕົນໜຶ່ງບິນມາຫາຂ້າພະເຈົ້າ ໂດຍມີຖ່ານໄຟແດງລຸກຢູ່ໃນມືຂອງເທວະດານັ້ນ, ເຊິ່ງເທວະດາໄດ້ໃຊ້ເຫລັກຄີບມາຈາກແທ່ນບູຊາ. ເທວະດານັ້ນໃຊ້ຖ່ານໄຟແຕະຮິມສົບຂອງຂ້າພະເຈົ້າ ແລະ ເວົ້າວ່າ, “ເບິ່ງແມ, ຖ່ານໄຟນີ້ແຕະຮິມສົບຂອງເຈົ້າແລ້ວ; ຄວາມຜິດຂອງເຈົ້າໄດ້ຖືກເອົາໄປ ແລະ ບາບຂອງເຈົ້າໄດ້ຮັບການອະໄພແລ້ວ”.
ແລ້ວຂ້າພະເຈົ້າໄດ້ຍິນສຽງຂອງອົງພຣະຜູ້ເປັນເຈົ້າກ່າວວ່າ, “ເຮົາຈະສົ່ງຜູ້ໃດໄປ? ແລະ ຜູ້ໃດຈະໄປເພື່ອເຮົາ?”
ຂ້າພະເຈົ້າຕອບວ່າ, “ຂ້ານ້ອຍຢູ່ທີ່ນີ້. ຂໍສົ່ງຂ້ານ້ອຍໄປ!”
ພຣະອົງກ່າວວ່າ, “ຈົ່ງໄປ ແລະ ບອກປະຊາຊົນນີ້ວ່າ:
“ ‘ຈົ່ງຟັງ, ແຕ່ຈະບໍ່ເຂົ້າໃຈ:
ຈົ່ງເບິ່ງ, ແຕ່ຈະບໍ່ມີມື້ເຫັນ’.
ຈົ່ງເຮັດໃຫ້ຈິດໃຈຂອງປະຊາຊົນນີ້ດື້ດ້ານໄປ;
ເຮັດໃຫ້ຫູຂອງພວກເຂົາໜວກ
ແລະ ປິດຕາຂອງພວກເຂົາ.1
ບໍ່ດັ່ງນັ້ນພວກເຂົາຈະໄດ້ເຫັນດ້ວຍຕາຂອງພວກເຂົາ.
ໄດ້ຍິນດ້ວຍຫູຂອງພວກເຂົາ,
ເຂົ້າໃຈດ້ວຍຈິດໃຈຂອງພວກເຂົາ,
ແລະ ຫັນກັບມາ ແລະ ໄດ້ຮັບການຮັກສາໃຫ້ຫາຍ”.
ຂ້າພະເຈົ້າຕອບວ່າ, “ຂ້າແດ່ ອົງພຣະຜູ້ເປັນເຈົ້າອີກດົນປານໃດ?”
ແລ້ວພຣະອົງຕອບວ່າ:
“ຈົນກວ່ານະຄອນຕ່າງໆຢູ່ໃນສະພາບຫັກພັງ
ແລະ ບໍ່ມີຄົນອາໄສຢູ່,
ຈົນກວ່າບ້ານເຮືອນທັງຫລາຍຖືກຖິ້ມຮ້າງ
ແລະ ທົ່ງນາຖືກທຳລາຍ ແລະ ເສຍຫາຍ,
ຈົນກວ່າພຣະເຈົ້າຢາເວໄດ້ສົ່ງທຸກຄົນໜີໄປໄກ
ແລະ ແຜ່ນດິນຖືກຖິ້ມຮ້າງໝົດ.
ແລະ ເຖິງແມ່ນວ່າຈະເຫລືອຄົນໜຶ່ງໃນສິບຢູ່ໃນດິນແດນ,
ມັນກໍຍັງຮ້າງເປົ່າ.
ແຕ່ເຊັ່ນດຽວກັບຕົ້ນເທເຣບິນ ແລະ ຕົ້ນໂອກ
ເມື່ອພວກມັນຖືກຕັດຍັງເຫລືອແຕ່ຕໍສັນໃດ,
ຕໍໃນດິນແດນນັ້ນຈະເປັນເມັດພັນບໍລິສຸດທີ່ຈະງອກຂຶ້ນອີກຄັ້ງສັນນັ້ນ”.
Source notes (1)
- Footnote ສະບັບ LXX. ວ່າ ‘ເຈົ້າຈະຟັງແລ້ວຟັງເລົ່າແຕ່ຈະບໍ່ມີມື້ເຂົ້າໃຈ ເຈົ້າຈະເບິ່ງແລ້ວເບິ່ງເລົ່າແຕ່ຈະບໍ່ມີມື້ເຫັນ’. 10ຈິດໃຈຂອງຊົນຊາດນີ້ດື້ດ້ານໄປ ພວກເຂົາແທບຈະບໍ່ອ່ຽງຫູຟັງ ແລະ ພວກເຂົາໄດ້ປິດຕາຕົນເອງເສຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.