Biblica® Open Lao Contemporary Version
ເອຊາຢາ 58
ການຖືສິນອົດອາຫານທີ່ແທ້ຈິງ
“ຈົ່ງຮ້ອງສຽງດັງ, ຢ່າກັ້ນສຽງໄວ້.
ຈົ່ງເປັ່ງສຽງໃຫ້ດັ່ງຂຶ້ນເໝືອນສຽງແກ.
ຈົ່ງປະກາດແກ່ປະຊາຊົນຂອງເຮົາເຖິງການກະບົດຂອງພວກເຂົາ
ແລະ ບອກເຊື້ອສາຍຂອງຢາໂຄບເຖິງບາບທັງຫລາຍຂອງພວກເຂົາ.
ພວກເຂົາຊອກຫາເຮົາວັນຕໍ່ວັນ;
ພວກເຂົາເຮັດຄືກະຕືລືລົ້ນຢາກຮູ້ຈັກທາງຂອງເຮົາ,
ເໝືອນກັບວ່າພວກເຂົາເປັນຊົນຊາດທີ່ເຮັດສິ່ງທີ່ຖືກຕ້ອງ
ແລະ ບໍ່ໄດ້ປະຖິ້ມຄຳສັ່ງຂອງພຣະເຈົ້າ.
ພວກເຂົາຂໍການຕັດສິນຢ່າງຍຸຕິທໍາຈາກເຮົາ
ແລະ ເຮັດຄືວ່າຢາກໃຫ້ພຣະເຈົ້າເຂົ້າມາໃກ້ພວກເຂົາ.
ພວກເຂົາເວົ້າວ່າ, ‘ເປັນຫຍັງພວກຂ້ານ້ອຍຕ້ອງຖືສິນອົດອາຫານ’,
‘ແລະ ພຣະອົງກໍບໍ່ໄດ້ເຫັນ?
ເປັນຫຍັງພວກຂ້ານ້ອຍຕ້ອງຖ່ອມຕົວລົງ,
ແລະ ເປັນຫຍັງພຣະອົງຍັງບໍ່ສັງເກດເຫັນ?’
“ເຖິງປານນັ້ນ ໃນມື້ທີເຈົ້າຖືສິນອົດອາຫານ, ເຈົ້າກໍຍັງເຮັດຕາມໃຈ
ແລະ ເອົາປຽບຄົນງານທຸກຄົນຂອງເຈົ້າ.
ການຖືສິນອົດອາຫານຂອງເຈົ້າຈົບລົງດ້ວຍການຜິດຖຽງກັນ ແລະ ການຕໍ່ສູ້,
ພວກເຈົ້າຕີກັນເອງດ້ວຍກໍາປັ້ນອັນໂຫດຮ້າຍ.
ພວກເຈົ້າບໍ່ສາມາດຖືສິນອົດອາຫານໄດ້ໃນແບບທີ່ພວກເຈົ້າເຮັດໃນມື້ນີ້.
ແລະ ຄາດຫວັງໃຫ້ສຽງອ້ອນວອນຂອງພວກເຈົ້າຂຶ້ນໄປເຖິງເບື້ອງເທິງໄດ້.
ນີ້ແມ່ນການຖືສິນອົດອາຫານທີ່ເຮົາເລືອກບໍ,
ເປັນພຽງໜຶ່ງມື້ທີ່ໃຫ້ມະນຸດຖ່ອມຕົວຂອງພວກເຂົາລົງບໍ?
ເປັນພຽງມື້ທີ່ໃຫ້ພວກເຂົາກົ້ມຫົວລົງເໝືອນດັ່ງຕົ້ນອໍ້
ແລະ ໃສ່ຜ້າກະສອບເຂົ້ານອນລົງໃນກອງຂີ້ເຖົ່າບໍ?
ນັ້ນຄືສິ່ງທີ່ພວກເຈົ້າເອີ້ນວ່າການຖືສິນອົດອາຫານບໍ?
ເປັນວັນທີ່ພຣະເຈົ້າຢາເວພໍໃຈບໍ?
“ການຖືສິນອົດອາຫານແບບນີ້ທີ່ເຮົາເລືອກໄວ້ບໍ່ແມ່ນບໍຄື:
ການແກ້ໂສ້ແຫ່ງຄວາມບໍ່ຍຸຕິທຳ
ປົດເຊືອກແອກອອກ,
ເພື່ອປົດປ່ອຍຜູ້ຖືກກົດຂີ່ຂົ່ມເຫັງໃຫ້ເປັນອິດສະຫລະ
ແລະ ຫັກແອກທຸກອັນບໍ່ແມ່ນບໍ?
ບໍ່ແມ່ນການແບ່ງປັນອາຫານຂອງພວກເຈົ້າແກ່ຜູ້ອຶດຫິວ
ແລະ ໃຫ້ບ່ອນພັກແກ່ຄົນທຸກຍາກພະເນຈອນບໍ?
ເມື່ອພວກເຈົ້າເຫັນຄົນເປືອຍກາຍ, ຈົ່ງເອົາເຄື່ອງນຸ່ງຫົ່ມໃຫ້ພວກເຂົາ,
ແລະ ຢ່າຫັນໜີໄປຈາກເລືອດ ແລະ ເນື້ອຂອງພວກເຈົ້າເອງ?
ແລ້ວຄວາມສະຫວ່າງຂອງເຈົ້າຈະສ່ອງແຈ້ງດັ່ງຕາເວັນຂຶ້ນ,
ແລະ ການຮັກສາຂອງເຈົ້າກໍຈະປາກົດຂຶ້ນຢ່າງວ່ອງໄວ;
ດັ່ງນັ້ນ ຄວາມຊອບທຳຂອງເຈົ້າຈະນຳໜ້າເຈົ້າ,
ແລະ ສະຫງ່າລາສີຂອງພຣະເຈົ້າຢາເວຈະປົກປ້ອງດ້ານຫລັງຂອງເຈົ້າ.
ຫລັງຈາກນັ້ນ ເຈົ້າຈະຮ້ອງຫາ, ແລະ ພຣະເຈົ້າຢາເວຈະຕອບ;
ເຈົ້າຈະຮ້ອງຂໍຄວາມຊ່ວຍເຫລືອ, ແລະ ພຣະອົງຈະກ່າວວ່າ: ເຮົາຢູ່ບ່ອນນີ້.
“ຖ້າເຈົ້າກຳຈັດແອກຂອງການກົດຂີ່ຂົ່ມເຫັງ,
ດ້ວຍການໃຊ້ນິ້ວຊີ້ ແລະ ຄຳເວົ້າໃນທາງຊົ່ວຮ້າຍ,
ແລະ ຖ້າເຈົ້າອຸທິດຕົນເພື່ອຜູ້ອຶດຫິວ
ແລະ ໃຫ້ຜູ້ຖືກກົດຂີ່ຂົ່ມເຫັງທີ່ຂັດສົນໄດ້ອິ່ມໃຈ,
ຈາກນັ້ນ ຄວາມສະຫວ່າງຂອງເຈົ້າຈະສ່ອງຂຶ້ນມາໃນຄວາມມືດ,
ແລະ ກາງຄືນຂອງເຈົ້າຈະກາຍເປັນກາງເວັນ.
ພຣະເຈົ້າຢາເວຈະນຳພາເຈົ້າຕະຫລອດໄປ;
ພຣະອົງຈະຕອບສະໜອງຄວາມຕ້ອງການຂອງເຈົ້າໃນດິນແດນທີ່ຕາເວັນແຜດເຜົາ
ພຣະອົງຈະເຮັດໃຫ້ຮ່າງກາຍຂອງເຈົ້າແຂງແຮງຂຶ້ນ.
ເຈົ້າຈະເປັນເໝືອນສວນທີ່ໄດ້ຮັບການຫົດນ້ຳຢ່າງດີ,
ເໝືອນນ້ຳພຸທີ່ມີນ້ຳໄຫລຢູ່ຕະຫລອດ.
ປະຊາຊົນຂອງເຈົ້າຈະສ້າງຊາກຫັກພັງບູຮານຂຶ້ນໃໝ່
ແລະ ຈະຟື້ນຟູຮາກຖານສະໄໝເກົ່າ;
ເຈົ້າຈະຖືກເອີ້ນວ່າຜູ້ສ້ອມແປງກຳແພງທີ່ເພພັງ,
ຜູ້ແປງຖະໜົນຫົນທາງ ແລະ ບ້ານເຮືອນຂຶ້ນໃໝ່.
“ຖ້າເຈົ້າຮັກສາຕົນບໍ່ລະເມີດວັນຊະບາໂຕ
ແລະ ບໍ່ເຮັດຕາມໃຈໃນວັນບໍລິສຸດຂອງເຮົາ,
ຖ້າເຈົ້າເອີ້ນວັນຊະບາໂຕວ່າວັນຍິນດີ
ແລະ ເອີ້ນວັນບໍລິສຸດຂອງພຣະເຈົ້າຢາເວວ່າວັນອັນມີກຽດ,
ແລະ ຖ້າເຈົ້າໃຫ້ກຽດວັນນີ້ໂດຍບໍ່ເຮັດຫຍັງຕາມໃຈ
ແລະ ບໍ່ເຮັດຕາມຄວາມພໍໃຈຂອງຕົນເອງ ຫລື ເວົ້າແຕ່ເລື່ອງບໍ່ມີປະໂຫຍດ,
ຈາກນັ້ນ ເຈົ້າຈະພົບຄວາມຍິນດີໃນພຣະເຈົ້າຢາເວ,
ແລະ ເຮົາຈະໃຫ້ເຈົ້າຂຶ້ນຂີ່ຢ່າງມີໄຊເທິງບ່ອນສູງຂອງແຜ່ນດິນ
ແລະ ເຮົາຈະລ້ຽງເຈົ້າດ້ວຍມໍລະດົກຂອງຢາໂຄບພໍ່ຂອງເຈົ້າ”.
ປາກຂອງພຣະເຈົ້າຢາເວໄດ້ກ່າວໄວ້ດັ່ງນັ້ນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.