Biblica® Open Lao Contemporary Version
ເອຊາຢາ 55
ຄຳເຊື້ອເຊີນບັນດາຜູ້ກະຫາຍ
“ມາ, ເຊີນທຸກຄົນທີ່ກະຫາຍ
ມາດື່ມນ້ຳ;
ແລະ ຜູ້ທີ່ບໍ່ມີເງິນ,
ຈົ່ງມາ, ຊື້ ແລະ ກິນ!
ຈົ່ງມາ, ມາຊື້ເຫລົ້າອະງຸ່ນ ແລະ ນ້ຳນົມ
ໂດຍບໍ່ເສຍເງິນ ແລະ ບໍ່ເສຍຄ່າ.
ເປັນຫຍັງເຈົ້າຈຶ່ງໃຊ້ຈ່າຍເງິນໄປກັບສິ່ງທີ່ບໍ່ແມ່ນອາຫານ,
ແລະ ລົງແຮງເຮັດສິ່ງທີ່ບໍ່ເຮັດໃຫ້ອິ່ມໃຈ?
ຈົ່ງຟັງ, ຈົ່ງຟັງເຮົາ ແລະ ກິນຂອງດີ,
ແລະ ເຈົ້າຈະຍິນດີໃນອາຫານລົດຊາດເລີດທີ່ສຸດ.
ຈົ່ງງ່ຽງຫູ ແລະ ມາຫາເຮົາ;
ຈົ່ງຟັງ, ເພື່ອເຈົ້າຈະມີຊີວິດຢູ່.
ເຮົາຈະເຮັດຄຳໝັ້ນສັນຍາຕະຫລອດໄປກັບເຈົ້າ,
ດ້ວຍຄວາມຮັກສັດຊື່ທີ່ເຮົາສັນຍາໄວ້ກັບດາວິດ.
ເບິ່ງແມ, ເຮົາໄດ້ເຮັດໃຫ້ລາວເປັນພະຍານແກ່ຊົນຊາດຕ່າງໆ,
ເປັນຜູ້ນຳ ແລະ ຜູ້ບັນຊາການປະຊາຊົນທັງຫລາຍ.
ແນ່ນອນເຈົ້າຈະເອີ້ນຊົນຊາດທີ່ເຈົ້າບໍ່ຮູ້ຈັກມາຊຸມນຸມ,
ແລະ ຊົນຊາດຕ່າງໆທີ່ບໍ່ຮູ້ຈັກເຈົ້າຈະແລ່ນມາຫາເຈົ້າ,
ເພາະພຣະເຈົ້າຢາເວ ພຣະເຈົ້າຂອງເຈົ້າ,
ອົງບໍລິສຸດແຫ່ງອິດສະຣາເອນ,
ໄດ້ໃຫ້ສະຫງ່າລາສີແກ່ເຈົ້າ”.
ຈົ່ງສະແຫວງຫາພຣະເຈົ້າຢາເວ ໃນຂະນະທີ່ຈະພົບພຣະອົງໄດ້;
ຈົ່ງຮ້ອງຫາພຣະອົງໃນຂະນະທີ່ພຣະອົງຍັງຢູ່ໃກ້.
ໃຫ້ຄົນຊົ່ວຮ້າຍປະຖິ້ມວິຖີທາງຂອງຕົນ
ແລະ ໃຫ້ຄົນຊົ່ວປະຖິ້ມຄວາມຄິດຂອງຕົນ.
ໃຫ້ພວກເຂົາຫັນກັບມາຫາພຣະເຈົ້າຢາເວ, ແລະ ພຣະອົງຈະເມດຕາພວກເຂົາ,
ໃຫ້ພວກເຂົາຫັນກັບມາຫາພຣະເຈົ້າຂອງເຮົາ, ເພາະພຣະອົງຈະໃຫ້ອະໄພໂດຍບໍ່ຄິດມູນຄ່າ.
“ເພາະຄວາມຄິດຂອງເຮົາບໍ່ແມ່ນຄວາມຄິດຂອງເຈົ້າ,
ຫລື ວິຖີທາງຂອງເຈົ້າກໍບໍ່ຄືວິຖີທາງຂອງເຮົາ”.
ພຣະເຈົ້າຢາເວປະກາດດັ່ງນັ້ນ.
“ຟ້າສະຫວັນສູງກວ່າແຜ່ນດິນໂລກສັນໃດ,
ວິຖີຂອງເຮົາກໍສູງກວ່າທາງຂອງເຈົ້າ
ແລະ ຄວາມຄິດຂອງເຮົາກໍສູງກວ່າຄວາມຄິດຂອງເຈົ້າສັນນັ້ນ.
ດັ່ງຝົນ ແລະ ຫິມະ
ທີ່ລົງມາຈາກຟ້າສະຫວັນ,
ແລະ ບໍ່ກັບຄືນໄປສະຫວັນ
ຈົນກວ່າຈະເຮັດໃຫ້ແຜ່ນດິນໂລກຊຸ່ມເຢັນ,
ແລະ ເຮັດໃຫ້ພືດພັນແຕກໝໍ່ງອກງາມ
ເພື່ອໃຫ້ມັນເກີດເມັດສຳລັບຜູ້ຫວ່ານ ແລະ ອາຫານສຳລັບຜູ້ກິນ,
ຖ້ອຍຄຳທີ່ອອກຈາກປາກຂອງເຮົາກໍເປັນດັ່ງນັ້ນ:
ມັນຈະບໍ່ກັບຄືນມາຫາເຮົາໂດຍສູນເປົ່າ,
ແຕ່ຈະສຳເລັດຜົນຕາມທີ່ເຮົາປາຖະໜາ
ແລະ ສຳເລັດຕາມເປົ້າໝາຍທີ່ເຮົາຕັ້ງໄວ້.
ເຈົ້າຈະອອກໄປດ້ວຍຄວາມຊື່ນຊົມຍິນດີ
ແລະ ຖືກນຳອອກໄປດ້ວຍສັນຕິສຸກ;
ພູເຂົາ ແລະ ເນີນພູ
ຈະເປັ່ງສຽງຮ້ອງເພງຕໍ່ໜ້າເຈົ້າ,
ບັນດາຕົ້ນໄມ້ໃນທົ່ງນາ
ຈະຕົບມື.
ຕົ້ນສົນຈະງອກຂຶ້ນແທນຕົ້ນໜາມ,
ຕົ້ນໄມ້ຫອມຈະງອກຂຶ້ນແທນກໍໜາມ.
ສິ່ງນີ້ຈະເປັນທີ່ເຊີດຊູພຣະເຈົ້າຢາເວ,
ເປັນໝາຍສຳຄັນນິລັນດອນທີ່
ຈະບໍ່ຖືກທຳລາຍ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.