Biblica® Open Lao Contemporary Version
ເອຊາຢາ 54
ສະຫງ່າລາສີໃນອະນາຄົດຂອງຊີໂອນ
“ຈົ່ງຮ້ອງເພງ, ຍິງໝັນ,
ເຈົ້າຜູ້ບໍ່ເຄີຍເກີດລູກ;
ຈົ່ງເປັ່ງສຽງຮ້ອງເພງ, ແລະ ຈົ່ງໂຫ່ຮ້ອງຍິນດີ,
ເຈົ້າຜູ້ບໍ່ເຄີຍເຈັບທ້ອງເກີດລູກ;
ເພາະລູກຂອງຍິງທີ່ໂດດດ່ຽວ
ກໍຍັງມີຫລາຍກວ່າລູກຂອງຍິງຜູ້ມີຜົວ”,
ພຣະເຈົ້າຢາເວກ່າວດັ່ງນັ້ນ.
“ຈົ່ງຂະຫຍາຍບ່ອນກາງເຕັນຂອງເຈົ້າ,
ກາງຜ້າເຕັນອອກໃຫ້ກວ້າງ,
ຢ່າດຶງໄວ້;
ຈົ່ງຕໍ່ເຊືອກເຕັນ
ແລະ ຕອກຫລັກເຕັນໃຫ້ໝັ້ນຄົງ.
ເພາະເຈົ້າຈະຂະຫຍາຍອອກໄປທັງດ້ານຊ້າຍ ແລະ ຂວາ;
ເຊື້ອສາຍຂອງເຈົ້າຈະຢຶດກຳມະສິດຂອງຊົນຊາດຕ່າງໆ
ແລະ ຕັ້ງຖິ່ນຖານໃນເມືອງຮ້າງຕ່າງໆຂອງພວກເຂົາ.
“ຢ່າຢ້ານ; ເຈົ້າຈະບໍ່ຖືກອັບອາຍ.
ຢ່າຢ້ານຄວາມອັບອາຍ; ເຈົ້າຈະບໍ່ຖືກອັບອາຍ.
ເຈົ້າຈະລືມຄວາມອັບອາຍໃນໄວໜຸ່ມ
ແລະ ບໍ່ຈົດຈຳຄຳຕໍານິເລື່ອງຄວາມເປັນໝ້າຍຂອງເຈົ້າອີກ.
ເພາະພຣະຜູ້ສ້າງຂອງເຈົ້າເປັນຜົວຂອງເຈົ້າ
ຊື່ຂອງພຣະອົງຄື ພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່
ອົງບໍລິສຸດແຫ່ງອິດສະຣາເອນຄືພຣະຜູ້ໄຖ່ຂອງເຈົ້າ;
ເພິ່ນຈະຖືກເອີ້ນວ່າພຣະເຈົ້າແຫ່ງແຜ່ນດິນໂລກທັງໝົດ.
ພຣະເຈົ້າຢາເວ ຈະເອີ້ນເຈົ້າກັບມາ
ດັ່ງເຈົ້າເປັນເມຍທີ່ຖືກປະຖິ້ມ ແລະ ເປັນທຸກຝ່າຍຈິດວິນຍານ
ເປັນເມຍທີ່ແຕ່ງງານຕັ້ງແຕ່ຍັງໜຸ່ມ,
ພຽງເພື່ອຈະຖືກປະຖິ້ມ”, ພຣະເຈົ້າຂອງເຈົ້າກ່າວດັ່ງນັ້ນ.
“ເຮົາໄດ້ປະຖິ້ມເຈົ້າໄລຍະໜຶ່ງ,
ແຕ່ດ້ວຍຄວາມເມດຕາຢ່າງເລິກຊຶ້ງ ເຮົາຈະນໍາເຈົ້າກັບຄືນມາ.
ໃນຊົ່ວຂະນະໜຶ່ງຂອງຄວາມໂກດຮ້າຍ
ເຮົາເຊື່ອງໜ້າໜີໄປຈາກເຈົ້າ,
ແຕ່ດ້ວຍຄວາມກະລຸນານິລັນດອນ
ເຮົາຈະເມດຕາເຈົ້າ,
ພຣະເຈົ້າຢາເວ ພຣະຜູ້ໄຖ່ຂອງເຈົ້າກ່າວໄວ້ດັ່ງນັ້ນ.
“ສຳລັບເຮົາແລ້ວເລື່ອງນີ້ເປັນຄືສະໄໝໂນອາ,
ເຮົາສັນຍາໄວ້ວ່າຈະບໍ່ໃຫ້ນ້ຳຂອງໂນອາຖ້ວມໂລກອີກ.
ບັດນີ້ເຮົາກໍສັນຍາວ່າຈະບໍ່ໂກດຮ້າຍ
ແລະ ບໍ່ຕຳໜິເຈົ້າອີກ.
ແມ່ນວ່າພູເຂົາຈະສັ່ນສະເທືອນ
ແລະ ເນີນພູຖືກເຄື່ອນຍ້າຍໄປ,
ແຕ່ຄວາມຮັກໝັ້ນຄົງທີ່ເຮົາມີຕໍ່ເຈົ້າຈະບໍ່ສັ່ນຄອນ
ຫລື ຄຳໝັ້ນສັນຍາແຫ່ງສັນຕິສຸກຂອງເຮົາຈະບໍ່ປ່ຽນໄປ”,
ພຣະເຈົ້າຢາເວ, ຜູ້ເມດຕາເຈົ້າກ່າວໄວ້ດັ່ງນັ້ນ.
“ນະຄອນທີ່ທົນທຸກ, ຖືກພະຍຸທໍາລາຍ ແລະ ບໍ່ໄດ້ຮັບການເລົ້າໂລມ,
ເຮົາຈະສ້າງເຈົ້າຂຶ້ນໃໝ່ດ້ວຍແກ້ວໄພທູນ,
ຮາກຖານຂອງເຈົ້າຄືຫີນປະເສີດ.
ເຮົາຈະສ້າງຫໍຄອຍຂອງເຈົ້າດ້ວຍທັບທິມ,
ປະຕູຂອງເຈົ້າເຮັດຈາກແກ້ວເຈຍລະໄນ,
ແລະ ກຳແພງທັງໝົດເຮັດຈາກຫີນລ້ຳຄ່າ.
ລູກທຸກຄົນຂອງເຈົ້າຈະຮັບການສອນຈາກພຣະເຈົ້າຢາເວ,
ພວກເຂົາຈະມີສັນຕິສຸກອັນຍິ່ງໃຫຍ່.
ເຈົ້າຈະໄດ້ຮັບການສະຖາປະນາຂຶ້ນໃນຄວາມຊອບທຳ:
ການກົດຂີ່ຂົ່ມເຫັງຈະຫ່າງໄກຈາກເຈົ້າ;
ເຈົ້າຈະບໍ່ຕ້ອງຢ້ານສິ່ງໃດ.
ຄວາມຢ້ານຈະຖືກກຳຈັດໄປໄກ;
ມັນຈະບໍ່ມາໃກ້ເຈົ້າ.
ຖ້າມີຜູ້ໃດໂຈມຕີເຈົ້າ, ມັນຈະບໍ່ແມ່ນເຮົາ;
ຜູ້ທີ່ໂຈມຕີເຈົ້າຈະຍອມຍອມຈໍານົນຕໍ່ເຈົ້າ.
“ເບິ່ງແມ, ເຮົາເອງເປັນຜູ້ສ້າງຊ່າງເຫລັກ
ຜູ້ພັດຖ່ານໃຫ້ລຸກເປັນໄຟ
ແລະ ຜະລິດອາວຸດທີ່ເໝາະສົມກັບວຽກງານຂອງມັນ.
ແລະ ເຮົາເອງທີ່ສ້າງຜູ້ທຳລາຍເພື່ອສ້າງຄວາມຈິບຫາຍ;
ບໍ່ມີອາວຸດອັນໃດທີ່ຕໍ່ສູ້ເຈົ້າແລ້ວເອົາຊະນະເຈົ້າໄດ້,
ແລະ ເຈົ້າຈະມີຄໍາຕອບແກ່ທຸກລີ້ນທີ່ກ່າວຟ້ອງເຈົ້າ.
ນີ້ຄືມໍລະດົກຂອງບັນດາຜູ້ຮັບໃຊ້ຂອງພຣະເຈົ້າຢາເວ,
ແລະ ເປັນການພິສູດຢືນຢັນຈາກເຮົາວ່າພວກເຂົາບໍ່ຜິດ”,
ພຣະເຈົ້າຢາເວປະກາດດັ່ງນັ້ນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.