Biblica® Open Lao Contemporary Version
ເອຊາຢາ 52
ຕື່ນຂຶ້ນ, ຕື່ນຂຶ້ນ, ຊີໂອນ,
ຈົ່ງສວມກຳລັງ!
ເຢຣູຊາເລັມ, ນະຄອນບໍລິສຸດ.
ຈົ່ງສວມເຄື່ອງນຸ່ງອັນສະຫງ່າລາສີຂອງເຈົ້າ,
ຜູ້ທີ່ບໍ່ໄດ້ຮັບພິທີຕັດ ແລະ ຜູ້ທີ່ມີມົນທິນ
ຈະບໍ່ເຂົ້າມາໃນເຈົ້າອີກ.
ຈົ່ງສັ່ນຂີ້ຝຸ່ນອອກໄປ;
ຈົ່ງລຸກຂຶ້ນ, ນັ່ງເທິງບັນລັງ, ນະຄອນເຢຣູຊາເລັມ.
ຈົ່ງປົດປ່ອຍຕົນເອງອອກຈາກໂສ້ທີ່ລ່າມຄໍຂອງເຈົ້າ,
ລູກສາວແຫ່ງຊີໂອນ, ຜູ້ຕົກເປັນຊະເລີຍ.
ເພາະພຣະເຈົ້າຢາເວກ່າວວ່າ:
“ເຈົ້າຖືກຂາຍໂດຍບໍ່ມີລາຄາ,
ແລະ ເຈົ້າກໍຈະໄດ້ຮັບການໄຖ່ຄືນມາໂດຍບໍ່ຕ້ອງຈ່າຍເງິນ”.
ເພາະພຣະເຈົ້າຢາເວ ອົງເຈົ້ານາຍກ່າວວ່າ:
“ທໍາອິດປະຊາຊົນຂອງເຮົາລົງໄປອາໄສຢູ່ເອຢິບ;
ບັດນີ້, ອັດຊີເຣຍໄດ້ກົດຂີ່ຂົ່ມເຫັງພວກເຂົາ”.
ພຣະເຈົ້າຢາເວປະກາດວ່າ. “ແລະ ບັດນີ້ເຮົາມີຫຍັງຢູ່ນີ້?”
“ເພາະປະຊາຊົນຂອງເຮົາຖືກຈັບໂຕໄປໂດຍບໍ່ມີປະໂຫຍດ,
ແລະ ຜູ້ປົກຄອງພວກເຂົາກໍເຢາະເຍີ້ຍ”,
ພຣະເຈົ້າຢາເວປະກາດດັ່ງນັ້ນ.
“ຕະຫລອດທັງວັນ
ນາມຂອງເຮົາຖືກໝິ່ນປະມາດຕະຫລອດເວລາ.
ເຫດສະນັ້ນ ປະຊາຊົນຂອງເຮົາຈະຮູ້ຈັກຊື່ຂອງເຮົາ;
ເຫດສະນັ້ນ ໃນມື້ນັ້ນພວກເຂົາຈະຮູ້ວ່າ
ເຮົາເອງເປັນຜູ້ບອກໄວ້ລ່ວງໜ້າ.
ແມ່ນແລ້ວ, ມັນຄືເຮົາເອງ”.
ຕີນຂອງຜູ້ທີ່ນຳຂ່າວດີມາເທິງພູເຂົາ
ກໍງົດງາມຫລາຍ,
ຜູ້ປະກາດສັນຕິສຸກ,
ຜູ້ນໍາຂ່າວດີມາ,
ຜູ້ປະກາດຄວາມພົ້ນ,
ຜູ້ເວົ້າກັບຊີໂອນວ່າ,
“ພຣະເຈົ້າຂອງເຈົ້າປົກຄອງ!”
ຈົ່ງຟັງ! ພວກຍາມຂອງເຈົ້າສົ່ງສຽງຮ້ອງ;
ພວກເຂົາຮ່ວມກັນໂຫ່ຮ້ອງດ້ວຍຄວາມຊື່ນຊົມຍິນດີ.
ເມື່ອພຣະເຈົ້າຢາເວກັບມາຍັງຊີໂອນ,
ພວກເຂົາຈະເຫັນດ້ວຍຕາຂອງພວກເຂົາເອງ.
ຈົ່ງຮ່ວມກັນເປັ່ງສຽງຮ້ອງເພງດ້ວຍຄວາມຍິນດີ,
ຊາກຫັກພັງຂອງເຢຣູຊາເລັມ,
ເພາະພຣະເຈົ້າຢາເວໄດ້ເລົ້າໂລມໃຈປະຊາຊົນຂອງພຣະອົງ,
ພຣະອົງໄດ້ໄຖ່ນະຄອນເຢຣູຊາເລັມແລ້ວ.
ພຣະເຈົ້າຢາເວຈະວາງແຂນອັນບໍລິສຸດ
ຂອງພຣະອົງຕໍ່ໜ້າຕໍ່ຕາຊົນຊາດທັງຫລາຍ,
ແລະ ທົ່ວທັງໂລກຈະເຫັນ
ຄວາມພົ້ນແຫ່ງພຣະເຈົ້າຂອງພວກເຮົາ.
ຈົ່ງໄປ, ຈົ່ງໄປ, ຈົ່ງອອກຈາກທີ່ນັ້ນ!
ຢ່າແຕະຕ້ອງສິ່ງທີ່ເປັນມົນທິນ!
ຈົ່ງອອກມາຈາກບ່ອນນັ້ນ ແລະ ຮັກສາໂຕໃຫ້ບໍລິສຸດ,
ພວກເຈົ້າຜູ້ຖືສິ່ງຂອງທີ່ໃຊ້ໃນເຮືອນຂອງພຣະເຈົ້າຢາເວ.
ແຕ່ພວກເຈົ້າຈະບໍ່ຈາກໄປດ້ວຍຄວາມຟ້າວ
ຫລື ຕະເຫລີດອອກມາ:
ເພາະພຣະເຈົ້າຢາເວຈະນຳໜ້າເຈົ້າ,
ພຣະເຈົ້າແຫ່ງອິດສະຣາເອນຈະປ້ອງກັນດ້ານຫລັງໃຫ້ເຈົ້າ.
ການທົນທຸກ ແລະ ສະຫງ່າລາສີຂອງຜູ້ຮັບໃຊ້
ເບິ່ງແມ, ຜູ້ຮັບໃຊ້ຂອງເຮົາຈະກະທຳການຢ່າງສະຫລາດ;
ລາວຈະໄດ້ຮັບການຍົກຍ້ອງ ແລະ ໄດ້ຮັບການຍົກຂຶ້ນ ແລະ ໄດ້ຮັບການຍົກຂຶ້ນຢ່າງສູງສົ່ງ.
ຄົນເປັນຈຳນວນຫລາຍຕື່ນຕົກໃຈເພາະລາວ
ເພາະຮູບລັກສະນະຂອງລາວເສຍໂສມໄປຈົນບໍ່ມີຜູ້ໃດຄື
ແລະ ຮູບຮ່າງຂອງລາວກໍເສຍໄປຈົນເບິ່ງບໍ່ຄືມະນຸດ
ສະນັ້ນ ລາວກໍຈະເຮັດໃຫ້ຫລາຍຊົນຊາດຕົກໃຈ,
ແລະ ລາວຈະເຮັດໃຫ້ບັນດາກະສັດມິດງຽບ.
ເພາະພວກເຂົາຈະເຫັນສິ່ງທີ່ບໍ່ເຄີຍມີຜູ້ໃດບອກພວກເຂົາຈັກເທື່ອ,
ແລະ ຈະເຂົ້າໃຈສິ່ງທີ່ບໍ່ເຄີຍໄດ້ຍິນໄດ້ຟັງມາກ່ອນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.