Biblica® Open Lao Contemporary Version
ເອຊາຢາ 51
ຄວາມພົ້ນນິລັນດອນສຳລັບຊີໂອນ
“ຈົ່ງຟັງເຮົາ, ພວກເຈົ້າຜູ້ສະແຫວງຫາຄວາມຊອບທຳ
ແລະ ຜູ້ສະແຫວງຫາພຣະເຈົ້າຢາເວ:
ຈົ່ງເບິ່ງສີລາທີ່ເຈົ້າຕັດອອກມາ
ແລະ ເບິ່ງບໍ່ຫີນທີ່ເຈົ້າຖືກຂຸດອອກມາ;
ຈົ່ງເບິ່ງອັບຣາຮາມ, ບັນພະບຸລຸດຂອງເຈົ້າ,
ແລະ ຊາຣາ, ຜູ້ເກີດເຈົ້າ.
ເມື່ອເຮົາເອີ້ນລາວ ມີລາວພຽງຄົນດຽວ,
ແລະ ເຮົາກໍອວຍພອນລາວ ແລະ ເຮັດໃຫ້ລາວມີຈຳນວນຫລາຍ.
ພຣະເຈົ້າຢາເວຈະເລົ້າໂລມໃຈຊີໂອນຢ່າງແນ່ນອນ
ແລະ ຈະແນມເບິ່ງຊາກຫັກພັງທັງໝົດຂອງຊີໂອນດ້ວຍຄວາມເມດຕາ;
ພຣະອົງຈະເຮັດໃຫ້ທະເລຊາຍຂອງຊີໂອນເປັນເໝືອນສວນເອເດນ,
ບ່ອນຖິ້ມຮ້າງຂອງນາງເປັນເໝືອນອຸທິຍານຂອງພຣະເຈົ້າຢາເວ.
ທີ່ນັ້ນຈະມີຄວາມຊື່ນຊົມຍິນດີ
ມີການຂອບພຣະຄຸນພຣະເຈົ້າ ແລະ ສຽງຮ້ອງເພງ.
“ຈົ່ງຟັງເຮົາ, ປະຊາຊົນຂອງເຮົາ;
ຈົ່ງຟັງເຮົາ, ຊົນຊາດຂອງເຮົາ;
ກົດບັນຍັດຈະອອກມາຈາກເຮົາ;
ຄວາມຍຸຕິທຳຂອງເຮົາຈະເປັນແສງສະຫວ່າງແກ່ຊົນຊາດຕ່າງໆ:
ຄວາມຊອບທຳຂອງເຮົາເຂົ້າມາໃກ້ຢ່າງວ່ອງໄວ,
ຄວາມພົ້ນຂອງເຮົາກຳລັງມາ,
ແຂນຂອງເຮົາຈະນຳຄວາມຍຸຕິທຳມາໃຫ້ຊົນຊາດຕ່າງໆ.
ເກາະແກ້ງຕ່າງໆຈະແນມເບິ່ງເຮົາ
ແລະ ລໍຖ້າແຂນຂອງເຮົາດ້ວຍຄວາມຫວັງ.
ຈົ່ງເງີຍໜ້າຂຶ້ນເບິ່ງຟ້າສະຫວັນ,
ແລະ ເບິ່ງໂລກເບື້ອງລຸ່ມ;
ຟ້າສະຫວັນຈະລັບຫາຍໄປເໝືອນຄວັນໄຟ,
ໂລກຈະເປັນເໝືອນເຄື່ອງນຸ່ງເກົ່າທີ່ຂາດໄປ
ແລະ ຄົນໃນໂລກຈະຕາຍໄປເໝືອນດັ່ງແມງໄມ້.
ແຕ່ຄວາມພົ້ນຂອງເຮົາຈະດຳລົງຢູ່ຕະຫລອດໄປ.
ຄວາມຊອບທຳຂອງເຮົາຈະບໍ່ສິ້ນສຸດ.
“ຈົ່ງຟັງເຮົາ, ພວກເຈົ້າຜູ້ຮູ້ວ່າແມ່ນຫຍັງຄືຄວາມຖືກຕ້ອງ,
ຊົນຊາດທີ່ຖືຮັກສາກົດບັນຍັດຂອງເຮົາໄວ້ໃນໃຈ:
ຢ່າຢ້ານການຕຳໜິຕິຕຽນຂອງມະນຸດ
ຫລື ຢ່າຫວັ່ນໄຫວໄປກັບຄຳໝິ່ນປະໝາດຂອງພວກເຂົາ.
ເພາະແມງໄມ້ຈະເຈາະກິນພວກເຂົາເໝືອນດັ່ງເຄື່ອງນຸ່ງ;
ໜອນຈະກັດກິນພວກເຂົາເໝືອນດັ່ງຂົນແກະ.
ແຕ່ຄວາມຊອບທຳຂອງເຮົາຈະດຳລົງຢູ່ຕະຫລອດໄປ,
ຄວາມພົ້ນຂອງເຮົາຈະດໍາລົງຢູ່ສືບໄປທຸກຊົ່ວອາຍຸຄົນ”.
ຈົ່ງລຸກຂຶ້ນ! ແຂນຂອງພຣະເຈົ້າຢາເວ,
ຈົ່ງຫົ່ມຕົວເອງດ້ວຍກຳລັງ!
ຈົ່ງຕື່ນຂຶ້ນ, ເໝືອນໃນອະດີດທີ່ຜ່ານມາ,
ເໝືອນຄົນລຸ້ນກ່ອນ.
ບໍ່ແມ່ນພຣະອົງບໍທີ່ຕັດຣາຮາບອອກເປັນຕ່ອນໆ,
ແລະ ແທງສັດຮ້າຍໂຕນັ້ນ?
ບໍ່ແມ່ນພຣະອົງບໍທີ່ເຮັດໃຫ້ທະເລແຫ້ງ?
ຄືເຮັດໃຫ້ມະຫາສະໝຸດອັນເລິກແຫ້ງໄປ,
ຜູ້ໄດ້ເຮັດທາງໄວ້ໃນທະເລເລິກ
ເພື່ອຜູ້ທີ່ພຣະອົງໄດ້ໄຖ່ໄວ້ຈະຂ້າມຟາກໄປໄດ້?
ບັນດາຜູ້ທີ່ພຣະເຈົ້າຢາເວໄດ້ໄຖ່ໄວ້ຈະກັບມາ.
ພວກເຂົາຈະຮ້ອງເພງເຂົ້າເມືອງຊີໂອນ;
ຄວາມສຸກນິລັນດອນເປັນມົງກຸດປະດັບຫົວຂອງພວກເຂົາ.
ຄວາມປິຕິ ແລະ ຄວາມຊື່ນຊົມຍິນດີຢ່າງເຕັມລົ້ນຈະປົກຄຸມພວກເຂົາ,
ຄວາມທຸກໂສກ ແລະ ການທໍ້ຖ້ອຍໃຈຈະໝົດໄປ.
“ເຮົາ, ເຮົານີ້ແຫລະ, ເປັນຜູ້ເລົ້າໂລມໃຈເຈົ້າ.
ເຈົ້າແມ່ນໃຜຈຶ່ງຢ້ານມະນຸດທໍາມະດາ,
ຢ້ານລູກຫລານຂອງມະນຸດທີ່ເປັນພຽງຕົ້ນຫຍ້າ,
ພວກເຈົ້າລືມພຣະເຈົ້າຢາເວພຣະຜູ້ສ້າງຂອງພວກເຈົ້າ,
ຜູ້ກາງຟ້າສະຫວັນອອກມາ
ແລະ ວາງຮາກຖານຂອງໂລກ,
ເປັນຫຍັງເຈົ້າຈຶ່ງມີຊີວິດຢູ່ທຸກມື້ດ້ວຍຄວາມຢ້ານ
ເພາະຄວາມໂກດຮ້າຍຂອງຜູ້ຂົ່ມເຫັງ,
ຜູ້ຫວັງທໍາລາຍ?
ຄວາມໂກດຮ້າຍຂອງຜູ້ຂົ່ມເຫັງຢູ່ໃສ?
ພວກນັກໂທດທີ່ຢ້ານກົວຈະໄດ້ຮັບການປົດປ່ອຍໃນໄວໆນີ້;
ພວກເຂົາຈະບໍ່ຕາຍໃນຄຸກຂອງພວກເຂົາ,
ແລະ ພວກເຂົາຈະບໍ່ຂາດອາຫານ,
ເພາະເຮົາຄືພຣະເຈົ້າຢາເວ ພຣະເຈົ້າຂອງພວກເຈົ້າ,
ຜູ້ປຸກທະເລເຮັດໃຫ້ຄຶກຄະນອງ
ພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່ຄືນາມຂອງພຣະອົງ.
ເຮົາໄດ້ໃສ່ຄໍາເວົ້າຂອງເຮົາໄວ້ໃນປາກຂອງເຈົ້າ
ແລະ ປົກປ້ອງຄຸ້ມຄອງເຈົ້າໄວ້ດ້ວຍຮົ່ມເງົາແຫ່ງມືຂອງເຮົາ
ເຮົາເປັນຜູ້ຕັ້ງຟ້າສະຫວັນໄວ້ໃນບ່ອນຂອງມັນ,
ເປັນຜູ້ວາງຮາກຖານຂອງໂລກ,
ແລະ ເປັນຜູ້ກ່າວກັບຊີໂອນວ່າ, ‘ເຈົ້າເປັນປະຊາຊົນຂອງເຮົາ’ ”.
ຈອກແຫ່ງຄວາມໂກດຮ້າຍຂອງພຣະເຈົ້າຢາເວ
ຕື່ນຂຶ້ນ, ຕື່ນຂຶ້ນ!
ຈົ່ງລຸກຂຶ້ນ, ນະຄອນເຢຣູຊາເລັມ,
ເຈົ້າຜູ້ໄດ້ດື່ມຈາກຈອກແຫ່ງຄວາມໂກດຮ້າຍຂອງພຣະເຈົ້າ,
ທີ່ຢູ່ໃນມືຂອງພຣະເຈົ້າຢາເວ,
ເຈົ້າດື່ມຈົນໝົດຈອກ
ທີ່ເຮັດໃຫ້ເຈົ້າໂຊເຊໄປມາ.
ລູກຊາຍທັງໝົດທີ່ນາງເກີດອອກມາ
ບໍ່ມີຈັກຄົນດຽວທີ່ຈະນຳທາງນາງ:
ລູກຊາຍທັງໝົດທີ່ນາງລ້ຽງດູມາ
ບໍ່ມີຈັກຄົນດຽວທີ່ຈະຈູງນາງໄປ.
ໄພພິບັດອັນໃຫຍ່ເກີດຂຶ້ນກັບເຈົ້າສອງເທົ່າ
ໃຜຈະສາມາດເລົ້າໂລມໃຈເຈົ້າໄດ້?
ຫາຍະນະ ແລະ ຄວາມຈິບຫາຍ ການກັນດານອາຫານ ແລະ ການສູ້ຮົບ
ໃຜຈະສາມາດໜູນໃຈເຈົ້າໄດ້?
ພວກລູກຂອງເຈົ້າເປັນລົມໄປແລ້ວ;
ພວກເຂົານອນຢູ່ທຸກແຈຂອງຖະໜົນທຸກເສັ້ນ,
ດັ່ງເຍືອງຕິດຢູ່ໃນຕາໜ່າງ.
ພວກເຂົາເຕັມໄປດ້ວຍຄວາມໂກດຮ້າຍຂອງພຣະເຈົ້າຢາເວ,
ແລະ ການຕຳໜິຈາກພຣະເຈົ້າຂອງເຈົ້າ.
ເຫດສະນັ້ນ ຈົ່ງຟັງສິ່ງນີ້, ເຈົ້າຜູ້ທຸກທໍລະມານ,
ຜູ້ມຶນເມົາແຕ່ບໍ່ແມ່ນດ້ວຍລິດເຫລົ້າອະງຸ່ນ.
ພຣະເຈົ້າຢາເວ ອົງເຈົ້ານາຍກ່າວວ່າ,
ພຣະເຈົ້າຂອງເຈົ້າ, ຜູ້ປ້ອງກັນປະຊາຊົນຂອງພຣະອົງກ່າວວ່າ:
“ເບິ່ງແມ, ເຮົາໄດ້ນຳຖ້ວຍທີ່ເຮັດໃຫ້ເຈົ້າໂຊເຊ
ອອກໄປຈາກມືຂອງເຈົ້າ;
ເຈົ້າຈະບໍ່ດື່ມຈາກຖ້ວຍນັ້ນ,
ຄືຖ້ວຍແຫ່ງໂກດຮ້າຍຂອງເຮົາອີກຕໍ່ໄປ.
ເຮົາຈະເອົາຖ້ວຍນັ້ນໃສ່ໃນມືຂອງບັນດາຜູ້ທີ່ທໍລະມານເຈົ້າ,
ຜູ້ກ່າວກັບເຈົ້າວ່າ,
‘ຈົ່ງນອນລົງເພື່ອພວກເຮົາຈະໄດ້ຢຽບຢໍ່າເຈົ້າ’.
ແລະ ເຈົ້າໄດ້ເຮັດໃຫ້ຫລັງຂອງເຈົ້າເປັນດັ່ງພື້ນດິນ,
ເໝືອນດັ່ງພື້ນຖະໜົນໃຫ້ຢຽບຢໍ່າ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.