Biblica® Open Lao Contemporary Version
ເອຊາຢາ 50
ບາບຂອງອິດສະຣາເອນ ແລະ ການເຊື່ອຟັງຂອງຜູ້ຮັບໃຊ້
ພຣະເຈົ້າຢາເວກ່າວວ່າ:
“ໜັງສືຢ່າຮ້າງຂອງແມ່ເຈົ້າ
ທີ່ເຮົາໄດ້ໄລ່ນາງໄປຢູ່ໃສ?
ຫລື ເຮົາຂາຍເຈົ້າໄປ
ໃຫ້ເຈົ້າໜີ້ຄົນໃດ?
ເຈົ້າຖືກຂາຍໄປເພາະຄວາມບາບຂອງເຈົ້າ;
ແມ່ຂອງເຈົ້າຖືກໄລ່ອອກໄປເພາະການລ່ວງລະເມີດຂອງເຈົ້າ.
ເມື່ອເຮົາມາຮອດ, ເປັນຫຍັງຈຶ່ງບໍ່ມີຜູ້ໃດຈັກຄົນ?
ເມື່ອເຮົາເອີ້ນ, ເປັນຫຍັງຈຶ່ງບໍ່ມີຜູ້ໃດຕອບ?
ແຂນຂອງເຮົາສັ້ນເກີນກວ່າທີ່ຈະໄຖ່ເຈົ້າບໍ?
ເຮົາຂາດກຳລັງທີ່ຈະຊ່ວຍເຈົ້າໃຫ້ພົ້ນບໍ?
ເຮົາສັ່ງພຽງຄຳດຽວ ທະເລກໍແຫ້ງ,
ເຮົາເຮັດໃຫ້ແມ່ນ້ຳກາຍເປັນຖິ່ນແຫ້ງແລ້ງກັນດານ;
ປາຂອງພວກເຂົາເນົ່າເໝັນເພາະຂາດນ້ຳ
ແລະ ຕາຍເພາະຄວາມກະຫາຍ.
ເຮົາເອົາຄວາມມືດຫຸ້ມຫໍ່ຟ້າສະຫວັນ
ແລະ ເຮັດຜ້າກະສອບປົກມັນໄວ້”.
ພຣະເຈົ້າຢາເວ ອົງເຈົ້ານາຍ ໃຫ້ລີ້ນທີ່ໄດ້ຮັບການເຟິກເປັນຢ່າງດີແລ້ວແກ່ຂ້ານ້ອຍ,
ເພື່ອໃຫ້ຮູ້ຈັກຖ້ອຍຄຳທີ່ຊ່ວຍຄ້ຳຊູຜູ້ອ່ອນແຮງ.
ທຸກໆເຊົ້າພຣະອົງໄດ້ປຸກຂ້ານ້ອຍ,
ປຸກຫູຂອງຂ້ານ້ອຍໃຫ້ຟັງດັ່ງຜູ້ທີ່ພຣະອົງໄດ້ສອນ.
ພຣະເຈົ້າຢາເວ ອົງເຈົ້ານາຍ ໄດ້ເປີດຫູຂອງຂ້ານ້ອຍ;
ແລະ ຂ້ານ້ອຍບໍ່ໄດ້ກະບົດ,
ຫລື ຫັນໜີ.
ຂ້ານ້ອຍຍອມແບຫລັງໃຫ້ແກ່ຜູ້ທີ່ຕີຂ້ານ້ອຍ.
ແລະ ປິ່ນແກ້ມໃຫ້ແກ່ຜູ້ທີ່ດຶງເຄົາຂອງຂ້ານ້ອຍ;
ຂ້ານ້ອຍບໍ່ໄດ້ເຊື່ອງໜ້າໜີ
ຈາກຜູ້ທີ່ເຢາະເຍີ້ຍ ແລະ ຖົ່ມນ້ຳລາຍໃສ່.
ເພາະພຣະເຈົ້າຢາເວ ອົງເຈົ້ານາຍໄດ້ຊ່ວຍຂ້ານ້ອຍ,
ຂ້ານ້ອຍຈະບໍ່ອັບອາຍ.
ເຫດສະນັ້ນ ຂ້ານ້ອຍຈຶ່ງເຮັດໜ້າຄືຫີນເຫລັກໄຟ,
ແລະ ຮູ້ວ່າຕົນເອງຈະບໍ່ຕ້ອງອັບອາຍ.
ພຣະອົງຜູ້ຕັດສິນວ່າຂ້ານ້ອຍເປັນຝ່າຍຖືກນັ້ນຢູ່ໃກ້.
ແລ້ວຜູ້ໃດຈະມາຟ້ອງຂ້ານ້ອຍ?
ໃຫ້ພວກເຮົາມາຊ້ອງໜ້າກັນ!
ໃຜເປັນຜູ້ຟ້ອງຂອງຂ້ານ້ອຍ?
ໃຫ້ລາວມາຊ້ອງໜ້າກັບຂ້ານ້ອຍ!
ພຣະເຈົ້າຢາເວ ອົງເຈົ້ານາຍຄືຜູ້ຊ່ວຍຂ້ານ້ອຍ.
ຜູ້ໃດກ່າວໂທດຂ້ານ້ອຍ?
ພວກເຂົາຈະເກົ່າໄປເໝືອນດັ່ງເຄື່ອງນຸ່ງ
ແລະ ຖືກແມງໄມ້ກິນໝົດ.
ຜູ້ໃດໃນທ່າມກາງພວກເຈົ້າທີ່ຢຳເກງພຣະເຈົ້າຢາເວ
ແລະ ເຊື່ອຟັງຖ້ອຍຄຳຜູ້ຮັບໃຊ້ຂອງພຣະອົງ?
ໃຫ້ຜູ້ທີ່ດຳເນີນໃນຄວາມມືດ,
ຜູ້ທີ່ບໍ່ມີແສງສະຫວ່າງ,
ຈົ່ງໄວ້ວາງໃຈໃນນາມຂອງພຣະເຈົ້າຢາເວ
ແລະ ເພິ່ງພາພຣະເຈົ້າຂອງຕົນ.
ແຕ່ບັດນີ້, ພວກເຈົ້າທຸກຄົນທີ່ຈູດໄຟ
ແລະ ຈັດຕຽມທວນໄຟໃຫ້ໂຕເອງ,
ຈົ່ງດໍາເນີນຢູ່ໃນແສງສະຫວ່າງຈາກໄຟຂອງເຈົ້າ
ແລະ ຈາກທວນໄຟທີ່ເຈົ້າຈູດຂຶ້ນ.
ສິ່ງທີ່ເຈົ້າຈະໄດ້ຮັບຈາກມືຂອງເຮົາ
ຄືເຈົ້າຈະນອນລົງໃນຄວາມທຸກທໍລະມານ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.