Biblica® Open Lao Contemporary Version
ເອຊາຢາ 48
ອິດສະຣາເອນຜູ້ດື້ດ້ານ
“ຈົ່ງຟັງສິ່ງນີ້, ເຊື້ອສາຍຂອງຢາໂຄບ,
ເຈົ້າຜູ້ໄດ້ຖືກເອີ້ນຕາມຊື່ຂອງອິດສະຣາເອນ
ແລະ ສືບເຊື້ອສາຍຈາກຢູດາ,
ເຈົ້າຜູ້ສາບານໃນນາມຂອງພຣະເຈົ້າຢາເວ
ແລະ ອ້ອນວອນຫາພຣະເຈົ້າແຫ່ງອິດສະຣາເອນ
ແຕ່ບໍ່ແມ່ນດ້ວຍຄວາມຈິງ ຫລື ຄວາມຊອບທຳ
ເຈົ້າຜູ້ອ້າງຕົນວ່າເປັນພົນລະເມືອງຂອງນະຄອນສັກສິດ
ແລະ ອ້າງວ່າເພິ່ງໃນພຣະເຈົ້າແຫ່ງອິດສະຣາເອນ
ຜູ້ມີຊື່ວ່າພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່:
ເຮົາໄດ້ກ່າວເຖິງສິ່ງເກົ່າໄວ້ລ່ວງໜ້າດົນນານມາແລ້ວ,
ປາກຂອງເຮົາໄດ້ປະກາດເຖິງສິ່ງເຫລົ່ານັ້ນ ແລະ ເຮົາໄດ້ບອກໃຫ້ຮູ້ເຫດການເຫລົ່ານັ້ນ;
ຈາກນັ້ນ ເຮົາກໍເຮັດຕາມທັນທີ, ແລະ ພວກມັນກໍເປັນໄປຕາມນັ້ນ.
ເພາະເຮົາຮູ້ວ່າເຈົ້າດື້ດ້ານຫົວແຂງສໍ່າໃດ;
ກ້າມຊີ້ນຄໍຂອງເຈົ້າເປັນເຫລັກ
ໜ້າຜາກຂອງເຈົ້າຄືທອງສຳລິດ.
ເຫດສະນັ້ນ ເຮົາຈຶ່ງບອກສິ່ງເຫລົ່ານີ້ແກ່ເຈົ້າໄວ້ລ່ວງໜ້າດົນນານມາແລ້ວ;
ກ່ອນທີ່ມັນຈະເກີດຂຶ້ນ ເຮົາກໍໄດ້ແຈ້ງເຈົ້າແລ້ວ
ເພື່ອເຈົ້າຈະບໍ່ສາມາດເວົ້າໄດ້ວ່າ,
‘ຮູບເຄົາລົບຂອງຂ້ານ້ອຍເຮັດສິ່ງເຫລົ່ານີ້;
ພະໄມ້ ແລະ ພະໂລຫະຂອງຂ້ານ້ອຍເຮັດໃຫ້ເກີດຂຶ້ນ’.
ເຈົ້າເຄີຍໄດ້ຍິນເຖິງສິ່ງເຫລົ່ານີ້ມາແລ້ວ; ຈົ່ງວິເຄາະເບິ່ງໃຫ້ຖີ່ຖ້ວນ
ເຈົ້າຈະບໍ່ຍອມຮັບບໍ?
“ນັບຈາກນີ້ໄປ ເຮົາຈະບອກສິ່ງໃໝ່ໆ,
ຄືສິ່ງເລິກລັບທີ່ເຈົ້າບໍ່ຮູ້ນັ້ນແກ່ເຈົ້າ.
ເປັນສິ່ງທີ່ຖືກສ້າງຂຶ້ນໃນປັດຈຸບັນນີ້, ແລະ ບໍ່ແມ່ນດົນມາແລ້ວ;
ກ່ອນໜ້ານີ້ ເຈົ້າບໍ່ເຄີຍໄດ້ຍິນມາກ່ອນ.
ເຈົ້າຈຶ່ງບໍ່ສາມາດເວົ້າໄດ້ວ່າ,
‘ເຮົາຮູ້ແລ້ວ’.
ເຈົ້າບໍ່ເຄີຍໄດ້ຍິນ ຫລື ເຂົ້າໃຈ;
ແຕ່ເດີມມາຫູຂອງເຈົ້າບໍ່ໄດ້ເປີດອອກ.
ເຮົາຮູ້ດີວ່າເຈົ້າທໍລະຍົດເທົ່າໃດ;
ເຈົ້າໄດ້ຊື່ວ່າກະບົດມາຕັ້ງແຕ່ເກີດ.
ເພາະເຫັນແກ່ນາມຂອງເຮົາ ເຮົາຈຶ່ງອົດກັ້ນຄວາມໂກດຮ້າຍໄວ້;
ເພາະເຫັນແກ່ສັນລະເສີນຂອງເຮົາ ເຮົາຈຶ່ງຢັບຢັ້ງຄວາມໂກດຮ້າຍໄວ້,
ເພື່ອຈະບໍ່ໄດ້ທໍາລາຍພວກເຈົ້າຈົນໝົດ.
ເບິ່ງແມ ເຮົາໄດ້ທົດສອບເຈົ້າ, ເຖິງວ່າບໍ່ແມ່ນຄືຫລອມເງິນ;
ເຮົາໄດ້ທົດສອບເຈົ້າໃນເຕົາຫລອມແຫ່ງຄວາມທຸກລະທົມ.
ເພາະເຫັນແກ່ເຮົາເອງ, ເຮົາຈຶ່ງເຮັດການນີ້, ເພາະເຫັນແກ່ເຮົາເອງ.
ເຮົາຈະປ່ອຍໃຫ້ໂຕເອງເສຍຊື່ໄດ້ແນວໃດ?
ເຮົາຈະບໍ່ຍົກສະຫງ່າລາສີຂອງເຮົາໃຫ້ຜູ້ອື່ນ?
ເຕົາແຫ່ງຄວາມທົນທຸກ
“ຢາໂຄບ, ຈົ່ງຟັງເຮົາ,
ອິດສະຣາເອນ, ຜູ້ທີ່ເຮົາໄດ້ເອີ້ນມາ:
ເຮົາຄືຜູ້ນັ້ນ;
ເຮົາຄືຜູ້ທໍາອິດ ແລະ ຜູ້ສຸດທ້າຍ.
ມືຂອງເຮົາເອງທີ່ໄດ້ວາງຮາກຖານຂອງໂລກ,
ແລະ ມືຂວາຂອງເຮົາກາງຟ້າສະຫວັນອອກມາ;
ເມື່ອເຮົາເອີ້ນພວກມັນ,
ພວກມັນກໍມາຊຸມນຸມກັນ.
“ພວກເຈົ້າທຸກຄົນ, ຈົ່ງມາຊຸມນຸມກັນ, ແລະ ຈົ່ງຟັງ:
ຮູບເຄົາລົບຕົນໃດໄດ້ທຳນວາຍສິ່ງເຫລົ່ານີ້ໄວ້?
ພັນທະມິດທີ່ພຣະເຈົ້າຢາເວໄດ້ເລືອກໄວ້
ຈະເຮັດໃຫ້ເປົ້າໝາຍຂອງພຣະອົງຕໍ່ສູ້ບາບີໂລນສຳເລັດ;
ແຂນຂອງພຣະອົງຈະລົງໂທດຊາວບາບີໂລນ.
ເຮົາ, ເຮົາເອງ, ໄດ້ກ່າວໄວ້ວ່າ;
ແມ່ນແລ້ວ, ເຮົາໄດ້ເອີ້ນລາວ.
ເຮົາຈະນຳລາວມາ,
ແລະ ລາວຈະເຮັດພັນທະກິດຂອງລາວສຳເລັດ.
“ຈົ່ງເຂົ້າມາໃກ້ເຮົາ ແລະ ຟັງສິ່ງນີ້:
“ນັບຕັ້ງແຕ່ທຳອິດທີ່ເຮົາກ່າວໄວ້ ເຮົາບໍ່ໄດ້ເວົ້າແບບລັບໆ;
ເຮົາຢູ່ທີ່ນັ້ນແລ້ວຕັ້ງແຕ່ເວລາທີ່ມັນໄດ້ເກີດຂຶ້ນ”.
ແລະ ບັດນີ້ພຣະເຈົ້າຢາເວ ອົງເຈົ້ານາຍ
ໄດ້ໃຊ້ຂ້າພະເຈົ້າມາດ້ວຍພຣະວິນຍານຂອງພຣະອົງ.
ພຣະເຈົ້າຢາເວ ພຣະຜູ້ໄຖ່ຂອງເຈົ້າ,
ອົງບໍລິສຸດແຫ່ງອິດສະຣາເອນກ່າວວ່າ:
“ເຮົາຄືພຣະເຈົ້າຢາເວ ພຣະເຈົ້າຂອງເຈົ້າ,
ຜູ້ສອນເຈົ້າວ່າອັນໃດດີທີ່ສຸດສຳລັບເຈົ້າ,
ຜູ້ນຳເຈົ້າໄປຕາມທາງທີ່ເຈົ້າຄວນໄປ.
ຖ້າພຽງແຕ່ເຈົ້າເອົາໃຈໃສ່ໃນຄຳສັ່ງຂອງເຮົາ,
ຕອນນີ້ເຈົ້າກໍມີສັນຕິສຸກຫລັ່ງໄຫລດັ່ງແມ່ນ້ຳ,
ຄວາມເປັນຢູ່ທີ່ດີດັ່ງຄື້ນໃນທະເລ.
ລູກຫລານຂອງເຈົ້າຈະເປັນເໝືອນເມັດດິນຊາຍ,
ລູກຫລານຂອງເຈົ້າຈະເປັນເໝືອນເມັດເຂົ້ານັບບໍ່ຖ້ວນ;
ຊື່ຂອງພວກເຂົາຈະບໍ່ຖືກຕັດອອກ
ຫລື ຖືກທຳລາຍຕໍ່ໜ້າເຮົາ”.
ຈົ່ງອອກຈາກບາບີໂລນ,
ຈົ່ງໜີອອກຈາກຊາວບາບີໂລນ!
ຈົ່ງປະກາດແບບນີ້ດ້ວຍສຽງໂຫ່ຮ້ອງຍິນດີ.
ຈົ່ງປະກາດມັນ.
ຈົ່ງແຈ້ງໄປເຖິງທີ່ສຸດປາຍແຜ່ນດິນໂລກວ່າ;
“ພຣະເຈົ້າຢາເວໄດ້ໄຖ່ຢາໂຄບຜູ້ຮັບໃຊ້ຂອງພຣະອົງແລ້ວ”.
ພວກເຂົາບໍ່ກະຫາຍເມື່ອພຣະອົງນຳພວກເຂົາຜ່ານທະເລຊາຍ;
ພຣະອົງໄດ້ເຮັດໃຫ້ນ້ຳໄຫລອອກຈາກສີລາເພື່ອພວກເຂົາ;
ພຣະອົງຍະສີລາ
ແລະ ນ້ຳກໍໄຫລອອກມາ.
ພຣະເຈົ້າຢາເວກ່າວວ່າ, “ບໍ່ມີສັນຕິສຸກສຳລັບຄົນຊົ່ວ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.