Biblica® Open Lao Contemporary Version
ເອຊາຢາ 46
ພະທັງຫລາຍຂອງບາບີໂລນ
ພະເບນກົ້ມລົງ, ພະເນໂບກໍກົ້ມລົງຕໍ່າ;
ຮູບເຄົາລົບທັງຫລາຍຂອງພວກເຂົາທີ່ບັນທຸກມາເທິງຫລັງສັດ.
ພະເຫລົ່ານັ້ນທີ່ຖືກແບກມານັ້ນໜັກຫລາຍ,
ເປັນພາລະແກ່ຜູ້ອິດເມື່ອຍ.
ພະເຫລົ່ານັ້ນກົ້ມລົງ ແລະ ໝອບລົງນໍາກັນ;
ຊ່ວຍແບ່ງເບົາພາລະຫຍັງບໍ່ໄດ້ເລີຍ,
ເພາະມັນເອງກໍຕົກເປັນຊະເລີຍຄືກັນ.
“ເຊື້ອສາຍຢາໂຄບ, ຈົ່ງຟັງເຮົາ,
ເຊື້ອສາຍອິດສະຣາເອນທັງໝົດທີ່ຍັງມີຊີວິດຢູ່,
ຜູ້ທີ່ເຮົາໄດ້ລ້ຽງດູມາຕັ້ງແຕ່ຢູ່ໃນທ້ອງ
ແລະ ເບິ່ງແຍງມາຕັ້ງແຕ່ເຈົ້າເກີດ.
ຈົນເຈົ້າເຂົ້າສູ່ໄວເຖົ້າແກ່ຜົມຫງອກ
ເຮົາຄືຜູ້ນັ້ນ, ຜູ້ທີ່ຈະປະຄັບປະຄອງເຈົ້າ.
ເຮົາໄດ້ສ້າງເຈົ້າ ແລະ ຈະເບິ່ງແຍງເຈົ້າ;
ເຮົາຈະອຸ້ມຊູ ແລະ ຊ່ວຍເຈົ້າໃຫ້ລອດພົ້ນ.
“ເຈົ້າຈະປຽບເຮົາ ແລະ ຖືວ່າເຮົາເທົ່າທຽມກັບໃຜ?
ເຈົ້າຈະຫາໃຜມາທຽບເຮົາໄດ້?
ມີຄົນເທຄຳອອກມາຈາກຖົງ
ແລະ ຊັ່ງເງິນເທິງຊິງ;
ພວກເຂົາຈ້າງຊ່າງຄໍາໃຫ້ເຮັດພະຂຶ້ນມາ,
ແລ້ວພວກເຂົາກົ້ມກາບນະມັດສະການຮູບເຄົາລົບນັ້ນ.
ພວກເຂົາຍົກມັນຂຶ້ນເທິງບ່າ ແລະ ແບກມັນໄປ;
ພວກເຂົາຕັ້ງມັນໄວ້ບ່ອນໃດ, ແລະ ມັນກໍຢູ່ບ່ອນນັ້ນ.
ເພາະມັນເໜັງຕິງບໍ່ໄດ້.
ເຖິງແມ່ນວ່າມີຄົນພາວັນນາອະທິຖານຂໍ, ມັນກໍບໍ່ສາມາດຕອບ;
ມັນບໍ່ສາມາດຊ່ວຍພວກເຂົາໃຫ້ພົ້ນຈາກບັນຫາໄດ້.
“ຈົ່ງຈົດຈຳຂໍ້ນີ້ໄວ້, ເກັບມັນໄວ້ໃນໃຈ,
ຈົ່ງຈື່ໄວ້, ເຈົ້າຜູ້ກະບົດທັງຫລາຍ.
ຈົ່ງຈົດຈຳສິ່ງເກົ່າຕ່າງໆ, ສິ່ງເຫລົ່ານັ້ນແຕ່ດົນນານມາແລ້ວ;
ເຮົາເປັນພຣະເຈົ້າ, ບໍ່ມີພະອື່ນໃດ;
ເຮົາເປັນພຣະເຈົ້າ, ບໍ່ມີໃຜຄືເຮົາ;
ເຮົາແຈ້ງເຖິງອະວະສານຕັ້ງແຕ່ຕອນທໍາອິດ,
ແຈ້ງສິ່ງທີ່ຈະເກີດຂຶ້ນຕັ້ງແຕ່ບູຮານ,
ເຮົາເວົ້າໄວ້ວ່າ, ແຜນການຂອງເຮົາຈະດໍາລົງຢູ່.
ແລະ ເຮົາຈະເຮັດທຸກສິ່ງຕາມທີ່ເຮົາມັກ.
ເຮົາເອີ້ນນົກລ່າເຫຍື່ອມາຈາກຕາເວັນອອກ;
ຊາຍຄົນໜຶ່ງຜູ້ເຮັດໃຫ້ລຸລ່ວງຕາມເປົ້າໝາຍຂອງເຮົາ, ຈະມາຈາກແດນໄກ.
ເຮົາເວົ້າສິ່ງໃດໄວ້, ເຮົາຈະເຮັດໃຫ້ເກີດຂຶ້ນ.
ເຮົາວາງແຜນການສິ່ງໃດໄວ້ ເຮົາຈະເຮັດຕາມແຜນການນັ້ນ.
ຈົ່ງຟັງເຮົາ, ເຈົ້າຄົນດື້ດ້ານ,
ຜູ້ຫ່າງໄກຈາກຄວາມຊອບທຳຂອງເຮົາ.
ເຮົານຳຄວາມຊອບທຳຂອງເຮົາເຂົ້າມາໃກ້ແລ້ວ,
ມັນບໍ່ໄດ້ຢູ່ໄກ;
ແລະ ຄວາມພົ້ນຂອງເຮົາຈະມາເຖິງໂດຍບໍ່ຫລ້າຊ້າ.
ເຮົາຈະໃຫ້ຄວາມພົ້ນຂອງເຮົາແກ່ຊີໂອນ,
ແລະ ຄວາມຮຸ່ງເຮືອງຂອງເຮົາແກ່ອິດສະຣາເອນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.