Biblica® Open Lao Contemporary Version
ເອຊາຢາ 44
ອິດສະຣາເອນຜູ້ທີ່ຖືກເລືອກ
“ແຕ່ບັດນີ້ ຈົ່ງຟັງ, ຢາໂຄບ, ຜູ້ຮັບໃຊ້ຂອງເຮົາ,
ອິດສະຣາເອນ, ຜູ້ທີ່ເຮົາໄດ້ເລືອກໄວ້.
ພຣະເຈົ້າຢາເວກ່າວວ່າ
ພຣະອົງຜູ້ໄດ້ປັ້ນເຈົ້າ, ຜູ້ໄດ້ສ້າງເຈົ້າໄວ້ໃນມົດລູກ,
ແລະ ຜູ້ທີ່ຈະຊ່ວຍເຫລືອເຈົ້າກ່າວວ່າ:
ຢ່າຢ້ານເລີຍ, ຢາໂຄບ, ຜູ້ຮັບໃຊ້ຂອງເຮົາ,
ເຢຊູຣຸນ, ຜູ້ທີ່ເຮົາໄດ້ເລືອກໄວ້.
ເພາະເຮົາຈະເທນ້ຳລົງເທິງດິນທີ່ກະຫາຍ,
ແລະ ໃຫ້ມີແມ່ນ້ຳເທິງພື້ນດິນທີ່ແຫ້ງແລ້ງ;
ເຮົາຈະເທວິນຍານຂອງເຮົາລົງເໜືອເຊື້ອສາຍຂອງເຈົ້າ,
ແລະ ເທພອນຂອງເຮົາໃຫ້ລູກຫລານຂອງເຈົ້າ.
ພວກເຂົາຈະງອກງາມເໝືອນດັ່ງຫຍ້າໃນທົ່ງຫຍ້າ,
ເໝືອນດັ່ງຕົ້ນປໍປາແຄມແມ່ນ້ຳ.
ບາງຄົນຈະເວົ້າຂຶ້ນວ່າ, ‘ຂ້ອຍເປັນກຳມະສິດຂອງພຣະເຈົ້າຢາເວ’;
ຄົນອື່ນຈະເອີ້ນພວກເຂົາເອງຕາມຊື່ຂອງຢາໂຄບ;
ສ່ວນຄົນອື່ນໆຈະຂຽນໃສ່ມືຂອງຕົນວ່າ, ‘ເປັນຂອງພຣະເຈົ້າຢາເວ’,
ແລະ ຈະໃຊ້ຊື່ວ່າອິດສະຣາເອນ.
ພຣະເຈົ້າຢາເວ, ບໍ່ແມ່ນຮູບເຄົາລົບ
“ພຣະເຈົ້າຢາເວຜູ້ເປັນກະສັດ ແລະ ພຣະຜູ້ໄຖ່ຂອງອິດສະຣາເອນ,
ພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່ກ່າວດັ່ງນີ້ວ່າ:
ເຮົາເປັນຜູ້ຕົ້ນ ແລະ ຜູ້ປາຍ;
ນອກຈາກເຮົາແລ້ວບໍ່ມີພະອື່ນໃດ.
ມີຜູ້ໃດເປັນຄືເຮົາ? ໃຫ້ລາວປະກາດອອກມາ.
ໃຫ້ລາວປະກາດ ແລະ ຊີ້ແຈງຕໍ່ໜ້າເຮົາ
ວ່າເກີດຫຍັງຂຶ້ນແດ່ ນັບຕັ້ງແຕ່ເຮົາຕັ້ງປະຊາຊົນເກົ່າແກ່ຂອງເຮົາ,
ແລະ ຈະມີຫຍັງເກີດຂຶ້ນແດ່ໃນອະນາຄົດ
ໃຫ້ພວກເຂົາທຳນວາຍເຖິງສິ່ງທີ່ຈະເກີດຂຶ້ນ.
ຢ່າຢ້ານເລີຍ, ຢ່າສັ່ນສະທ້ານ.
ເຮົາບໍ່ໄດ້ປະກາດເລື່ອງນີ້ ແລະ ທຳນວາຍໄວ້ຕັ້ງແຕ່ດົນນານມາແລ້ວບໍ?
ເຈົ້າເປັນພະຍານຂອງເຮົາ. ມີພຣະເຈົ້າອົງອື່ນນອກຈາກເຮົາບໍ?
ບໍ່ມີເລີຍ, ບໍ່ມີພະສີລາອື່ນໃດອີກ; ເຮົາບໍ່ຮູ້ຈັກແມ່ນແຕ່ອົງດຽວ”.
ທຸກຄົນທີ່ເຮັດຮູບເຄົາລົບກໍບໍ່ມີຄ່າ,
ສິ່ງຕ່າງໆທີ່ພວກເຂົາເທີດທູນກໍບໍ່ມີປະໂຫຍດ.
ບັນດາຜູ້ທີ່ເວົ້າແທນພວກເຂົາກໍຕາບອດ;
ພວກເຂົາໂງ່ຈ້າ, ແລະ ເປັນຄວາມອັບອາຍຂອງພວກເຂົາເອງ.
ຜູ້ໃດປັ້ນຮູບເຄົາລົບ ແລະ ຫລໍ່ຮູບເຄົາລົບ,
ທີ່ບໍ່ເປັນປະໂຫຍດຫຍັງແກ່ຕົນ?
ປະຊາຊົນທີ່ເຮັດສິ່ງນັ້ນຈະຕ້ອງອັບອາຍ;
ຊ່າງຝີມືກໍເປັນພຽງມະນຸດ.
ໃຫ້ພວກເຂົາທຸກຄົນມາຊຸມນຸມກັນ ແລະ ຢືນຢູ່ບ່ອນຂອງພວກເຂົາ;
ພວກເຂົາຈະຖືກເຮັດໃຫ້ຕົກລົງໄປໃນຄວາມຢ້ານ ແລະ ຄວາມອັບອາຍ.
ຊ່າງເຫລັກເອົາເຄື່ອງມື
ມາຫລອມຮູບເຄົາລົບໃນເຕົາຖ່ານ;
ລາວໃຊ້ຄ້ອນຕີແຕ່ງຮູບເຄົາລົບ,
ລາວທຸບສຸດກຳລັງແຂນຂອງລາວ.
ລາວຫິວ ແລະ ໝົດແຮງ;
ລາວບໍ່ໄດ້ດື່ມນ້ຳ ແລະ ອິດເມື່ອຍ.
ຊ່າງໄມ້ດຶງເຊືອກວັດແທກ
ແລະ ເຮັດໂຄງຮ່າງດ້ວຍສໍຂາວ;
ລາວໃຊ້ກົບ
ເອົາສໍໝາຍມັນໄວ້
ລາວແກະສະລັກໃຫ້ເປັນຮູບຄົນ,
ມີລັກສະນະງາມຄົບຖ້ວນຄືມະນຸດ,
ເພື່ອໃຫ້ຢູ່ໃນສະຖານບູຊາ.
ລາວຕັດຕົ້ນໄມ້ສີດາລົງ,
ຫລື ບາງຄັ້ງກໍໃຊ້ໄມ້ສົນເທດ ຫລື ຕົ້ນໂອກ
ລາວປ່ອຍໃຫ້ມັນໃຫຍ່ຂຶ້ນທ່າມກາງຕົ້ນໄມ້ໃນປ່າ,
ຫລື ປູກຕົ້ນແປກ, ແລະ ຝົນເຮັດໃຫ້ມັນເຕີບໃຫຍ່ຂຶ້ນ.
ມັນຖືກໃຊ້ເປັນເຊື້ອໄຟໃຫ້ຄົນເຜົາ;
ບາງສ່ວນລາວກໍໃຊ້ຝີງໄຟ
ລາວຈູດໄຟປິ້ງເຂົ້າຈີ່.
ແຕ່ລາວກໍຍັງເອົາມາຕົກແຕ່ງເປັນພະ ແລະ ນະມັດສະການມັນ;
ລາວສ້າງໃຫ້ເປັນຮູບເຄົາລົບ ແລະ ກົ້ມກາບມັນ.
ລາວໃຊ້ໄມ້ເຄິ່ງໜຶ່ງດັງໄຟ;
ທີ່ເຫລືອນັ້ນລາວໃຊ້ເພື່ອແຕ່ງອາຫານຂອງລາວ,
ລາວໃຊ້ປີ້ງຊີ້ນ ແລະ ກິນຈົນອິ່ມ,
ລາວຍັງໃຊ້ດັງໄຟຝີງ ແລະ ເວົ້າວ່າ
“ເອີ! ຂ້ອຍອຸ່ນດີ; ຂ້ອຍເຫັນໄຟແລ້ວ”.
ສ່ວນທີ່ເຫລືອລາວໃຊ້ເຮັດພະ, ເປັນຮູບເຄົາລົບຂອງລາວ;
ແລ້ວລາວກໍກົ້ມລົງກາບນະມັດສະການມັນ.
ລາວອະທິຖານຕໍ່ມັນ ແລະ ເວົ້າວ່າ,
“ຂໍຊ່ວຍລູກແດ່! ພະເຈົ້າຂອງລູກ!”
ພວກເຂົາບໍ່ຮູ້ຫຍັງເລີຍ, ພວກເຂົາບໍ່ເຂົ້າໃຈສິ່ງໃດ;
ຕາຂອງພວກເຂົາຖືກປິດຈຶ່ງເບິ່ງບໍ່ເຫັນ,
ໃຈຂອງພວກເຂົາກໍຖືກບັງພວກເຂົາຈຶ່ງບໍ່ສາມາດເຂົ້າໃຈ.
ບໍ່ມີຜູ້ໃດຢຸດຄິດ,
ບໍ່ມີຜູ້ໃດມີຄວາມຮູ້ ຫລື ຄວາມເຂົ້າໃຈທີ່ຈະເວົ້າ,
“ເຮົາໃຊ້ໄມ້ເຄິ່ງໜຶ່ງເຮັດຟືນ;
ເຮົາປິ້ງເຂົ້າຈີ່ເທິງຖ່ານໄມ້,
ເຮົາປິ້ງຊີ້ນ ແລະ ເຮົາກິນ.
ເຮົາຈະເອົາໄມ້ສ່ວນທີ່ເຫລືອມາເຮັດສິ່ງທີ່ໜ້າລັງກຽດບໍ?
ເຮົາຄວນທີ່ຈະກົ້ມກາບລົງຕໍ່ໜ້າທ່ອນໄມ້ບໍ?”
ລາວລ້ຽງຊີບດ້ວຍຂີ້ເຖົ່າ; ໃຈທີ່ຫລອກລວງເຮັດໃຫ້ລາວຫລົງໄປ;
ລາວບໍ່ອາດຊ່ວຍເຫລືອໂຕເອງ, ຫລື ເວົ້າວ່າ,
“ສິ່ງທີ່ຢູ່ໃນມືຂວາຂອງເຮົານີ້ເປັນສິ່ງທີ່ຫລອກລວງແມ່ນບໍ?”
“ຢາໂຄບ, ຈົ່ງຈົດຈຳສິ່ງເຫລົ່ານີ້,
ອິດສະຣາເອນ, ເພາະເຈົ້າເປັນຜູ້ຮັບໃຊ້ຂອງເຮົາ.
ເຮົາໄດ້ສ້າງເຈົ້າມາ, ເຈົ້າເປັນຜູ້ຮັບໃຊ້ຂອງເຮົາ;
ອິດສະຣາເອນ, ເຮົາຈະບໍ່ລືມເຈົ້າ.
ເຮົາໄດ້ກວາດລ້າງການບໍ່ເຊື່ອຟັງຂອງເຈົ້າອອກໄປເໝືອນເມກ,
ໄດ້ລຶບລ້າງບາບຂອງເຈົ້າເໝືອນດັ່ງໝອກຍາມເຊົ້າ.
ຈົ່ງກັບມາຫາເຮົາ,
ເພາະເຮົາໄດ້ໄຖ່ເຈົ້າແລ້ວ”.
ຟ້າສະຫວັນ, ເຈົ້າຈົ່ງຮ້ອງເພງດ້ວຍຄວາມຍິນດີ, ເພາະພຣະເຈົ້າຢາເວໄດ້ເຮັດສິ່ງນີ້;
ແຜ່ນດິນໂລກເບື້ອງລຸ່ມ, ຈົ່ງໂຫ່ຮ້ອງສຽງດັງ.
ພູເຂົາທັງຫລາຍ, ຈົ່ງຮ້ອງເພງ,
ປ່າໄມ້ທັງຫລາຍ ແລະ ຕົ້ນໄມ້ທັງໝົດ,
ເພາະພຣະເຈົ້າຢາເວໄດ້ໄຖ່ຢາໂຄບແລ້ວ,
ພຣະອົງໄດ້ສະແດງສະຫງ່າລາສີໃນອິດສະຣາເອນ.
ເຢຣູຊາເລັມຈະມີຜູ້ຢູ່ອາໄສ
“ພຣະເຈົ້າຢາເວພຣະຜູ້ໄຖ່ຂອງເຈົ້າ,
ຜູ້ໄດ້ປັ້ນເຈົ້າໃນມົດລູກແມ່ກ່າວດັ່ງນີ້ວ່າ:
ເຮົາຄືພຣະເຈົ້າຢາເວ
ຜູ້ສ້າງສັບພະທຸກສິ່ງ,
ຜູ້ກາງຟ້າສະຫວັນອອກມາ,
ຜູ້ກາງແຜ່ນດິນໂລກອອກ,
ຜູ້ໄດ້ທຳລາຍໝາຍສຳຄັນຂອງຜູ້ທຳນວາຍປອມ
ແລະ ເຮັດໃຫ້ຜູ້ທໍານວາຍກາຍເປັນຄົນໂງ່ຈ້າ,
ຜູ້ໄດ້ຂວໍ້າຄວາມຮູ້ຂອງຄົນສະຫລາດ
ແລະ ໄດ້ປ່ຽນມັນເປັນສິ່ງໄຮ້ປະໂຫຍດ,
ຜູ້ປະຕິບັດຕາມຖ້ອຍຄຳຂອງຜູ້ຮັບໃຊ້ຂອງພຣະອົງ
ແລະ ເຮັດໃຫ້ຄໍາທໍານວາຍຕ່າງໆຂອງຜູ້ສົ່ງຂ່າວຂອງພຣະອົງກາຍເປັນຈິງ,
ຜູ້ກ່າວເຖິງເຢຣູຊາເລັມວ່າ, ‘ຈະມີຜູ້ອາໄສຢູ່’,
ກ່າວເຖິງເມືອງຕ່າງໆຂອງຢູດາຍວ່າ, ‘ພວກມັນຈະຖືກສ້າງຂຶ້ນໃໝ່’,
ແລະ ກ່າວເຖິງຫາຍະນະຂອງພວກມັນວ່າ, ‘ເຮົາຈະຟື້ນຟູພວກມັນຂຶ້ນໃໝ່’,
ຜູ້ກ່າວກັບນ້ຳເລິກວ່າ, ‘ຈົ່ງແຫ້ງໄປ,
ແລະ ເຮົາຈະເຮັດໃຫ້ແມ່ນໍ້າທັງຫລາຍຂອງເຈົ້າເຫືອດແຫ້ງ’,
ຜູ້ກ່າວເຖິງໄຊຣັດວ່າ, ‘ລາວເປັນຄົນລ້ຽງແກະຂອງເຮົາ
ແລະ ຈະເຮັດທຸກສິ່ງໃຫ້ສຳເລັດຕາມທີ່ເຮົາພໍໃຈ;
ລາວຈະກ່າວເຖິງເຢຣູຊາເລັມວ່າ, “ໃຫ້ສ້າງເຢຣູຊາເລັມຂຶ້ນໃໝ່”,
ແລະ ກ່າວເຖິງວິຫານວ່າ, “ໃຫ້ວາງຮາກຖານຂອງວິຫານ” ’.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.