Biblica® Open Lao Contemporary Version
ເອຊາຢາ 42
ຜູ້ຮັບໃຊ້ຂອງພຣະເຈົ້າຢາເວ
“ນີ້ຄືຜູ້ຮັບໃຊ້ຂອງເຮົາ, ທີ່ເຮົາເຝົ້າເບິ່ງແຍງ,
ຜູ້ທີ່ເຮົາໄດ້ເລືອກໄວ້ ທີ່ເຮົາຊົມຊື່ນ;
ເຮົາຈະເອົາວິນຍານຂອງເຮົາລົງໃສ່ໃນລາວ,
ແລະ ລາວຈະນຳຄວາມຍຸຕິທຳໄປເຖິງຊົນຊາດຕ່າງໆ.
ລາວຈະບໍ່ໂຫ່ຮ້ອງ ຫລື ສົ່ງສຽງຮ້ອງ,
ຫລື ບໍ່ເປັ່ງສຽງຂອງລາວຕາມຖະໜົນ.
ຕົ້ນອໍ້ຊ້ຳແລ້ວ ລາວຈະບໍ່ຫັກ,
ແລະ ໄສ້ຕະກຽງທີ່ກໍາລັງຈະມອດ ລາວຈະບໍ່ດັບ.
ລາວຈະນຳຄວາມຍຸຕິທຳມາຢ່າງສັດຊື່;
ລາວຈະບໍ່ສະດຸດ ຫລື ທໍ້ຖອຍ
ຈົນກວ່າລາວຈະໄດ້ຕັ້ງຄວາມຍຸຕິທຳຂຶ້ນໃນໂລກ.
ໝູ່ເກາະຈະຝາກຄວາມຫວັງໄວ້ທີ່ຄຳສັ່ງສອນຂອງລາວ”.
ນີ້ຄືສິ່ງທີ່ພຣະເຈົ້າ ພຣະເຈົ້າຢາເວກ່າວ
ພຣະອົງຜູ້ສ້າງຟ້າສະຫວັນ ແລະ ກາງມັນອອກ,
ຜູ້ທີ່ແຜ່ແຜ່ນດິນໂລກອອກໄປພ້ອມກັບສັບພະສິ່ງທີ່ເກີດຈາກໂລກ,
ຜູ້ໃຫ້ລົມຫາຍໃຈແກ່ມະນຸດ,
ແລະ ໃຫ້ຊີວິດແກ່ທຸກຄົນທີ່ເດີນໃນໂລກ:
“ເຮົາ, ພຣະເຈົ້າຢາເວ, ໄດ້ເອີ້ນເຈົ້າມາດ້ວຍຄວາມຊອບທຳ;
ເຮົາຈະຈັບມືເຈົ້າໄວ້.
ເຮົາຈະຄຸ້ມຄອງເຈົ້າ ແລະ ເຮັດໃຫ້ເຈົ້າ
ເປັນຄຳໝັ້ນສັນຍາສຳລັບບັນດາປະຊາຊາດ
ແລະ ເປັນແສງສະຫວ່າງແກ່ບັນດາຄົນຕ່າງຊາດ,
ໃຫ້ເປີດຕາຂອງຄົນຕາບອດ,
ເພື່ອປົດປ່ອຍຊະເລີຍໃຫ້ເປັນອິດສະຫລະຈາກຄຸກ
ແລະ ປົດປ່ອຍຜູ້ທີ່ນັ່ງຢູ່ໃນຄວາມມືດອອກຈາກບ່ອນຄຸມຂັງ.
“ເຮົາຄືພຣະເຈົ້າຢາເວ; ນັ້ນແມ່ນນາມຊື່ຂອງເຮົາ!
ເຮົາຈະບໍ່ຍົກສະຫງ່າລາສີຂອງເຮົາໃຫ້ຄົນອື່ນ
ຫລື ຄຳສັນລະເສີນຍົກຍ້ອງຂອງເຮົາ ເຮົາຈະບໍ່ໃຫ້ແກ່ຮູບເຄົາລົບຕ່າງໆ.
ເບິ່ງແມ, ສິ່ງທີ່ເຮົາກ່າວໄວ້ຕັ້ງແຕ່ທຳອິດໄດ້ເກີດຂຶ້ນແລ້ວ,
ແລະ ເຮົາປະກາດສິ່ງໃໝ່ໆ;
ຕັ້ງແຕ່ສິ່ງເຫລົ່ານັ້ນຍັງບໍ່ເກີດຂຶ້ນ
ເຮົາກໍປະກາດສິ່ງເຫລົ່ານັ້ນແກ່ພວກເຈົ້າທັງຫລາຍ”.
ບົດເພງສັນລະເສີນພຣະເຈົ້າຢາເວ
ຈົ່ງຮ້ອງເພງບົດໃໝ່ຖວາຍແດ່ພຣະເຈົ້າຢາເວ,
ຄໍາສັນລະເສີນຂອງພຣະອົງຈາກສຸດປາຍແຜ່ນດິນໂລກ,
ເຈົ້າຜູ້ລົງໄປຍັງທະເລ ແລະ ທຸກສິ່ງທີ່ຢູ່ໃນທະເລ,
ເກາະແກ້ງທັງຫລາຍ ແລະ ທຸກຄົນທີ່ອາໄສຢູ່ໃນທີ່ນັ້ນ.
ໃຫ້ຖິ່ນແຫ້ງແລ້ງກັນດານ ແລະ ເມືອງຕ່າງໆເປັ່ງສຽງຂອງພວກມັນ;
ໃຫ້ຖິ່ນແຫ້ງແລ້ງທັງຫລາຍທີ່ຊາວເກດາອາໄສຢູ່ຈົ່ງຊື່ນບານ.
ໃຫ້ຊາວເສລາຮ້ອງເພງຢ່າງຊື່ນຊົມຍິນດີ;
ໃຫ້ພວກເຂົາໂຫ່ຮ້ອງຈາກຍອດພູເຂົາ.
ໃຫ້ພວກເຂົາຖວາຍສະຫງ່າລາສີແດ່ພຣະເຈົ້າຢາເວ
ແລະ ເປັ່ງສຽງສັນລະເສີນພຣະອົງໃນເກາະແກ້ງທັງຫລາຍ.
ພຣະເຈົ້າຢາເວ ຈະເຄື່ອນທັບມາຢ່າງຜູ້ຊະນະ,
ພຣະອົງຫ້າວຫັນດັ່ງນັກຮົບ;
ດ້ວຍສຽງໂຫ່ຮ້ອງພຣະອົງຈະເອົາໄຊໃນສະໜາມຮົບ
ແລະ ຊະນະພວກສັດຕູຂອງພຣະອົງ.
“ເຮົາໄດ້ມິດງຽບໄວ້ດົນນານແລ້ວ,
ເຮົາງຽບຢູ່ ແລະ ຫ້າມຕົນເອງໄວ້.
ແຕ່ບັດນີ້, ເຮົາຮ້ອງອອກມາດັ່ງຍິງເກີດລູກ,
ເຮົາຫາຍໃຈຖີ່ ແລະ ຫອບ.
ເຮົາຈະທຳລາຍພູເຂົາ ແລະ ໂນນພູຕ່າງໆ
ແລະ ເຮັດໃຫ້ພືດຜັກທັງໝົດຂອງມັນຫ່ຽວແຫ້ງ;
ເຮົາຈະເຮັດໃຫ້ແມ່ນ້ຳກາຍເປັນເກາະ
ແລະ ເຮັດໃຫ້ສະນ້ຳທັງຫລາຍແຫ້ງແລ້ງ.
ເຮົາຈະນຳຄົນຕາບອດໄປຕາມທາງທີ່ພວກເຂົາບໍ່ຮູ້ຈັກ,
ເຮົາຈະພາພວກເຂົາໄປຕາມເສັ້ນທາງທີ່ພວກເຂົາບໍ່ຄຸ້ນເຄີຍ;
ເຮົາຈະປ່ຽນຄວາມມືດໃຫ້ເປັນຄວາມສະຫວ່າງຕໍ່ໜ້າພວກເຂົາ
ແລະ ເຮັດບ່ອນຫລຸບບ່ອນໂນນໃຫ້ຮາບພຽງ.
ເຮົາຈະເຮັດສິ່ງເຫລົ່ານີ້
ເຮົາຈະບໍ່ປະຖິ້ມພວກເຂົາ.
ສ່ວນບັນດາຜູ້ທີ່ວາງໃຈໃນຮູບເຄົາລົບ,
ຜູ້ທີ່ເວົ້າກັບຮູບເຄົາລົບວ່າ, ‘ທ່ານເປັນພະຂອງພວກເຮົາ’,
ເຮົາຈະເຮັດໃຫ້ພວກເຂົາຫັນກັບໄປຢ່າງໜ້າອັບອາຍທີ່ສຸດ.
ອິດສະຣາເອນຕາບອດ ແລະ ຫູໜວກ
“ຈົ່ງຟັງ, ພວກເຈົ້າຄົນຫູໜວກ;
ເບິ່ງແມ, ພວກເຈົ້າຄົນຕາບອດ ແລະ ຈົ່ງເບິ່ງເຫັນ!
ມີຜູ້ໃດຕາບອດນອກຈາກຜູ້ຮັບໃຊ້ຂອງເຮົາ,
ແລະ ມີຜູ້ໃດຫູໜວກຄືຜູ້ສົ່ງຂ່າວທີ່ເຮົາສົ່ງໄປ?
ຜູ້ໃດຕາບອດຄືຜູ້ທີ່ເຮັດຄໍາໝັ້ນສັນຍາກັບເຮົາ?
ຜູ້ໃດຕາບອດຄືຜູ້ຮັບໃຊ້ຂອງພຣະເຈົ້າຢາເວ?
ເຈົ້າໄດ້ເຫັນຫລາຍສິ່ງຫລາຍຢ່າງ, ແຕ່ເຈົ້າບໍ່ເອົາໃຈໃສ່;
ຫູເຈົ້າເປີດກວ້າງ, ແຕ່ບໍ່ໄດ້ຍິນສິ່ງໃດ”.
ພຣະເຈົ້າຢາເວພໍໃຈ
ທີ່ຈະເຮັດໃຫ້ກົດບັນຍັດຂອງພຣະອົງຍິ່ງໃຫຍ່ ແລະ ມີກຽດ
ເພື່ອເຫັນແກ່ຄວາມຊອບທຳຂອງພຣະອົງ.
ແຕ່ນີ້ແມ່ນປະຊາຊົນທີ່ຖືກປຸ້ນ ແລະ ຕົກເປັນຊະເລີຍ,
ພວກເຂົາທັງໝົດຕົກຢູ່ໃນຂຸມກັບດັກ
ຫລື ຫລົບລີ້ຢູ່ໃນຄຸກ.
ພວກເຂົາຖືກປຸ້ນ,
ໂດຍບໍ່ມີຜູ້ໃດຊ່ວຍພວກເຂົາ;
ພວກເຂົາຕົກເປັນຊະເລີຍ,
ໂດຍບໍ່ມີຜູ້ໃດເວົ້າວ່າ “ປ່ອຍພວກເຂົາກັບໄປ”.
ຜູ້ໃດໃນພວກເຈົ້າຈະຮັບຟັງເລື່ອງນີ້
ຫລື ເອົາໃຈໃສ່ກັບອະນາຄົດທີ່ຈະມາເຖິງ?
ຜູ້ໃດມອບຢາໂຄບໃຫ້ເປັນຊະເລີຍ,
ແລະ ໃຫ້ອິດສະຣາເອນຖືກປຸ້ນ?
ບໍ່ແມ່ນພຣະເຈົ້າຢາເວບໍ,
ຜູ້ທີ່ພວກເຮົາໄດ້ເຮັດບາບຕໍ່ສູ້ພຣະອົງ?
ເພາະພວກເຂົາບໍ່ໄດ້ເຮັດຕາມວິຖີທາງຂອງພຣະອົງ;
ພວກເຂົາບໍ່ເຊື່ອຟັງກົດບັນຍັດຂອງພຣະອົງ.
ດັ່ງນັ້ນພຣະອົງຈຶ່ງໄດ້ເທຄວາມໃຈຮ້າຍອັນຮຸນແຮງຂອງພຣະອົງລົງເທິງພວກເຂົາ,
ຄືສົງຄາມອັນຮຸນແຮງ,
ໃຫ້ພວກເຂົາຕົກຢູ່ໃນແປວໄຟ, ແຕ່ພວກເຂົາກໍຍັງບໍ່ເຂົ້າໃຈ;
ໄຟເຜົາຜານພວກເຂົາ, ແຕ່ພວກເຂົາກໍບໍ່ໄດ້ເອົາໃຈໃສ່.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.