Biblica® Open Lao Contemporary Version
ເອຊາຢາ 41
ພຣະຜູ້ຊ່ວຍໃຫ້ພົ້ນຂອງອິດສະຣາເອນ
“ເກາະທັງຫລາຍ, ຈົ່ງງຽບ ແລະ ຟັງເຮົາ!
ໃຫ້ຊົນຊາດທັງຫລາຍໄດ້ຟື້ນກຳລັງຂຶ້ນໃໝ່!
ໃຫ້ພວກເຂົາກ້າວອອກມາຂ້າງໜ້ານີ້ ແລະ ເວົ້າ;
ໃຫ້ພວກເຮົາມາພົບກັນໃນບ່ອນພິພາກສາ.
“ຜູ້ໃດນໍໄດ້ປຸກບຸກຄົນໜຶ່ງຈາກທິດຕາເວັນອອກ,
ເອີ້ນລາວໃຫ້ມາຮັບໃຊ້ດ້ວຍຄວາມຊອບທຳ?
ພຣະອົງມອບຊົນຊາດຕ່າງໆແກ່ລາວ.
ແລະ ປາບບັນດາກະສັດຕໍ່ໜ້າລາວ.
ພຣະອົງໃຊ້ດາບຂອງພຣະອົງປ່ຽນກະສັດເຫລົ່ານັ້ນເປັນຂີ້ຝຸ່ນດິນ,
ຄັນທະນູຂອງລາວເຮັດໃຫ້ກະສັດເຫລົ່ານັ້ນເປັນດັ່ງແກບປິວໄປ.
ລາວໄລ່ຕາມຄົນເຫລົ່ານັ້ນໄປ ແລະ ເດີນໄປຢ່າງປອດໄພ,
ຕາມເສັ້ນທາງທີ່ລາວບໍ່ເຄີຍທຽວມາກ່ອນ.
ຜູ້ໃດເປັນຜູ້ເຮັດແບບນີ້ ແລະ ເຮັດຈົນສຳເລັດ,
ຄືຜູ້ທີ່ເອີ້ນຄົນໃນຊົ່ວອາຍຸຕ່າງໆມາຕັ້ງແຕ່ຕົ້ນ?
ເຮົາ, ພຣະເຈົ້າຢາເວ ເປັນຜູ້ທໍາອິດ
ແລະ ເປັນຜູ້ສຸດທ້າຍ ເຮົາຄືຜູ້ນັ້ນ”.
ເກາະທັງຫລາຍເຫັນແລ້ວກໍຢ້ານກົວ;
ທີ່ສຸດປາຍແຜ່ນດິນໂລກສັ່ນສະທ້ານ.
ພວກເຂົາເຂົ້າມາໃກ້ ແລະ ອອກມາຂ້າງໜ້າ;
ພວກເຂົາຊ່ວຍເຫລືອກັນ
ແລະ ເວົ້າແກ່ຜູ້ຮ່ວມງານຂອງຕົນວ່າ, “ຈົ່ງເຂັ້ມແຂງ!”
ຊ່າງໂລຫະໃຫ້ກຳລັງໃຈຊ່າງຄໍາ,
ແລະ ຜູ້ໃຊ້ຄ້ອນເຮັດໃຫ້ລຽບ
ກໍໃຫ້ກຳລັງໃຈຜູ້ຕີ.
ພວກເຂົາເວົ້າເຖິງວຽກງານການເຊື່ອມວ່າ, “ດີ”
ອີກຄົນໜຶ່ງເອົາຕະປູຕອກຮູບເຄົາລົບເພື່ອມັນຈະບໍ່ລົ້ມລົງ.
“ສ່ວນເຈົ້າ, ອິດສະຣາເອນ, ຜູ້ຮັບໃຊ້ຂອງເຮົາ,
ຢາໂຄບຜູ້ທີ່ເຮົາໄດ້ເລືອກໄວ້,
ເຈົ້າຜູ້ເປັນລູກຫລານຂອງອັບຣາຮາມສະຫາຍຂອງເຮົາ,
ເຮົາໄດ້ພາເຈົ້າມາຈາກສຸດປາຍແຜ່ນດິນໂລກ,
ເຮົາໄດ້ເອີ້ນເຈົ້າມາຈາກມູມໄກທີ່ສຸດ.
ເຮົາເວົ້າວ່າ, ‘ເຈົ້າເປັນຜູ້ຮັບໃຊ້ຂອງເຮົາ’;
ເຮົາໄດ້ເລືອກເຈົ້າ ແລະ ບໍ່ເຄີຍປະຖິ້ມເຈົ້າ.
ດັ່ງນັ້ນ ຢ່າຢ້ານເລີຍ, ເພາະເຮົາຢູ່ກັບເຈົ້າ;
ຢ່າຕົກໃຈ, ເພາະເຮົາເປັນພຣະເຈົ້າຂອງເຈົ້າ.
ເຮົາຈະເຮັດໃຫ້ເຈົ້າເຂັ້ມແຂງຂຶ້ນ ແລະ ເຮົາຈະຊ່ວຍເຈົ້າ;
ເຮົາຈະຊູເຈົ້າໄວ້ດ້ວຍມືຂວາອັນຊອບທຳຂອງເຮົາ.
“ບັນດາຜູ້ທີ່ໃຈຮ້າຍເຈົ້າ
ຈະອັບອາຍຂາຍໜ້າ ແລະ ອັບອາຍຢ່າງແນ່ນອນ;
ຜູ້ທີ່ຕໍ່ຕ້ານເຈົ້າ
ຈະໄຮ້ຄ່າ ແລະ ພິນາດຈິບຫາຍໄປ.
ເຖິງແມ່ນວ່າເຈົ້າຈະຊອກຫາສັດຕູທັງຫລາຍຂອງເຈົ້າ,
ເຈົ້າກໍຈະບໍ່ພົບພວກເຂົາ.
ບັນດາຜູ້ທີ່ສູ້ຮົບກັບເຈົ້າ
ຈະບໍ່ມີຄຸນຄ່າຫຍັງໝົດ.
ເພາະເຮົາຄືພຣະເຈົ້າຢາເວ ພຣະເຈົ້າຂອງເຈົ້າ
ຜູ້ຈັບມືຂວາຂອງເຈົ້າໄວ້
ແລະ ບອກກັບເຈົ້າວ່າ, ຢ່າຢ້ານເລີຍ;
ເຮົາຈະຊ່ວຍເຈົ້າ.
ຢ່າຢ້ານເລີຍ, ເຈົ້າໜອນຢາໂຄບ,
ອິດສະຣາເອນນ້ອຍ,
ເພາະເຮົາເອງຈະຊ່ວຍເຈົ້າ” ພຣະເຈົ້າຢາເວປະກາດດັ່ງນັ້ນ,
ພຣະອົງເປັນອົງບໍລິສຸດແຫ່ງອິດສະຣາເອນພຣະຜູ້ໄຖ່ຂອງເຈົ້າ.
“ເບິ່ງແມ, ເຮົາຈະເຮັດໃຫ້ເຈົ້າເປັນດັ່ງໄມ້ຟາດເຂົ້າ,
ທີ່ໃໝ່ ແລະ ຄົມ ມີແຂ້ວຫລາຍເຫລັ້ມ.
ເຈົ້າຈະນວດ ແລະ ບຸກໂຈມຕີພູເຂົາຕ່າງໆ
ເຮັດໃຫ້ເນີນພູທັງຫລາຍເປັນເໝືອນແກບ.
ເຈົ້າຈະໂຍນພວກມັນ, ລົມຈະຫອບພວກມັນຂຶ້ນ,
ແລະ ພະຍຸຈະພັດພວກມັນກະຈາຍໄປ.
ສ່ວນເຈົ້າຈະຊື່ນຊົມຍິນດີໃນພຣະເຈົ້າຢາເວ
ແລະ ຖວາຍກຽດແກ່ອົງບໍລິສຸດແຫ່ງອິດສະຣາເອນ.
“ຄົນທຸກ ແລະ ຂັດສົນຊອກຫານ້ຳດື່ມ,
ແຕ່ບໍ່ມີເລີຍ;
ລິ້ນຂອງພວກເຂົາແຫ້ງດ້ວຍຄວາມກະຫາຍ.
ແຕ່ເຮົາ ພຣະເຈົ້າຢາເວ ຈະຕອບພວກເຂົາ;
ເຮົາ, ພຣະເຈົ້າແຫ່ງອິດສະຣາເອນ, ຈະບໍ່ປະຖິ້ມພວກເຂົາເລີຍ.
ເຮົາຈະເຮັດໃຫ້ແມ່ນ້ຳໄຫລເທິງພູເຂົາສູງທີ່ແຫ້ງແລ້ງ,
ແລະ ໃຫ້ມີນ້ຳພຸໃນຮ່ອມພູ.
ເຮົາຈະປ່ຽນຖິ່ນແຫ້ງແລ້ງກັນດານເປັນສະນ້ຳ,
ແລະ ປ່ຽນພື້ນດິນແຕກແຫງໃຫ້ກາຍເປັນນ້ຳພຸ.
ເຮົາຈະປູກຕົ້ນໄມ້ສີດາ ແລະ ຕົ້ນກະຖິນເທດ
ຕົ້ນໄມ້ຫອມ ແລະ ຕົ້ນໝາກກອກໃນທະເລຊາຍ.
ເຮົາຈະປູກຕົ້ນສົນຊະນິດຕ່າງໆໄວ້ໃນຖິ່ນແຫ້ງແລ້ງກັນດານ,
ທັງຕົ້ນສົນ ແລະ ຕົ້ນແປກດ້ວຍ,
ເພື່ອຄົນທັງຫລາຍຈະເຫັນ ແລະ ຮູ້,
ຈະພິຈາລະນາ ແລະ ເຂົ້າໃຈ,
ວ່າມືຂອງພຣະເຈົ້າຢາເວ ໄດ້ເຮັດສິ່ງນີ້,
ອົງບໍລິສຸດແຫ່ງອິດສະຣາເອນໄດ້ສ້າງມັນຂຶ້ນ”.
ພຣະເຈົ້າຢາເວກ່າວວ່າ,
“ຈົ່ງສະເໜີຄະດີຂອງເຈົ້າ”.
ກະສັດຂອງຢາໂຄບກ່າວວ່າ.
“ຈົ່ງສະແດງຂໍ້ໂຕ້ແຍ້ງຂອງເຈົ້າມາ”,
“ຈົ່ງນຳບັນດາຮູບເຄົາລົບຂອງເຈົ້າ,
ເຂົ້າມາບອກພວກເຮົາ
ວ່າກຳລັງຈະເກີດຫຍັງຂຶ້ນ.
ຈົ່ງເລົ່າເຫດການໃນອະດີດ,
ເພື່ອພວກເຮົາຈະໄດ້ພິຈາລະນາ ແລະ ຮັບຮູ້ຈຸດຈົບ.
ຫລື ຈະເລົ່າໃຫ້ພວກເຮົາຟັງເຖິງສິ່ງທີ່ຈະເກີດຂຶ້ນ,
ຈົ່ງບອກພວກເຮົາມາວ່າອະນາຄົດຈະມີສິ່ງໃດແດ່,
ເພື່ອພວກເຮົາຈະຮູ້ວ່າພວກເຈົ້າແມ່ນພະທັງຫລາຍ.
ເຮັດຫຍັງຈັກຢ່າງແມ, ຈະດີ ຫລື ຊົ່ວກໍໄດ້,
ເພື່ອພວກເຮົາຈະໄດ້ທໍ້ຖ້ອຍ ແລະ ຢ້ານກົວ.
ແຕ່ພວກເຈົ້າບໍ່ມີຄ່າຫຍັງເລີຍ
ແລະ ຜົນງານຂອງພວກເຈົ້າກໍໄຮ້ຄ່າ;
ຜູ້ໃດກໍຕາມທີ່ເລືອກພວກເຈົ້າກໍໜ້າລັງກຽດ.
“ເຮົາໄດ້ເອີ້ນບຸກຄົນຜູ້ໜຶ່ງຈາກທາງທິດເໜືອ, ແລະ ລາວກໍມາ
ລາວມາຈາກບ່ອນທີ່ດວງຕາເວັນຂຶ້ນ ລາວຮ້ອງຫານາມຂອງເຮົາ.
ລາວຢຽບຢໍ່າບັນດາຜູ້ປົກຄອງດັ່ງຢຽບປູນ.
ລາວເປັນເໝືອນຊ່າງປັ້ນໝໍ້ຢຽບຢໍ່າດິນໜຽວ.
ຜູ້ໃດບອກເຖິງສິ່ງນີ້ໃຫ້ພວກເຮົາໄດ້ຮູ້ມາຕັ້ງແຕ່ຕົ້ນ,
ຫລື ບອກໄວ້ຕັ້ງແຕ່ທຳອິດ ພວກເຮົາຈຶ່ງເວົ້າໄດ້ວ່າ, ‘ລາວເວົ້າຖືກ’?
ບໍ່ມີຜູ້ໃດເວົ້າໄວ້,
ບໍ່ມີຜູ້ໃດແຈ້ງໄວ້ກ່ອນ,
ບໍ່ມີຜູ້ໃດໄດ້ຍິນສິ່ງໃດຈາກເຈົ້າເລີຍ.
ເຮົາເປັນຄົນທຳອິດທີ່ບອກຊີໂອນວ່າ, ‘ເບິ່ງແມ, ພວກເຂົາມາແລ້ວ!’
ເຮົາໃຫ້ຜູ້ນໍາຂ່າວດີມາໃຫ້ເຢຣູຊາເລັມ.
ເຮົາເບິ່ງແຕ່ບໍ່ມີຜູ້ໃດຈັກຄົນ
ບໍ່ມີແມ່ນແຕ່ຄົນດຽວໃນພວກເຂົາທີ່ຈະໃຫ້ຄຳປຶກສາ,
ບໍ່ມີຜູ້ໃດຕອບເມື່ອເຮົາຖາມພວກເຂົາ.
ເບິ່ງແມ, ພະທັງຫລາຍລ້ວນແຕ່ເປັນພະປອມ!
ການກະທໍາຂອງພວກເຂົາລ້ວນແຕ່ໄຮ້ຄ່າ;
ຮູບພະຕ່າງໆຂອງພວກເຂົາເປັນພຽງລົມ ແລະ ຄວາມສັບສົນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.