ເອຊາຢາ 4

1ໃນ​ວັນ​ນັ້ນ​ຍິງ​ເຈັດ​ຄົນ​ຈະ​ເອົາ​ຜູ້ຊາຍ​ຄົນ​ດຽວ

ແລະ ເວົ້າ​ວ່າ,

“ພວກເຮົາ​ຈະ​ຫາ​ອາຫານ​ກິນ​ເອງ

ແລະ ຈັດ​ຕຽມ​ເຄື່ອງນຸ່ງ​ສຳລັບ​ພວກເຮົາ​ເອງ;

ຂໍ​ແຕ່​ໃຫ້​ພວກເຮົາ​ໃຊ້​ນາມສະກຸນ​ຂອງ​ເຈົ້າ​ເທົ່າ​ນັ້ນ.

ເພື່ອ​ຊ່ວຍ​ລົບລ້າງ​ຄວາມ​ອັບອາຍ​ໃຫ້​ພວກເຮົາ​ດ້ວຍ!”

ກິ່ງ​ຂອງ​ພຣະເຈົ້າ​ຢາເວ

2ໃນ​ວັນ​ນັ້ນ ກິ່ງ1​ຂອງ​ພຣະເຈົ້າ​ຢາເວ​ຈະ​ງາມ ແລະ ເຕັມ​ດ້ວຍ​ສະຫງ່າລາສີ, ຜົນ​ແຫ່ງ​ດິນແດນ​ນັ້ນ​ຈະ​ເປັນ​ສະຫງ່າລາສີ ແລະ ຄວາມ​ພາກພູມໃຈ​ຂອງ​ຊາວ​ອິດສະຣາເອນ​ທີ່​ເຫລືອ. 3ບັນດາ​ຄົນ​ທີ່​ເຫລືອ​ຢູ່​ໃນ​ຊີໂອນ, ຄື​ຜູ້​ທີ່​ຢູ່​ໃນ​ເຢຣູຊາເລັມ, ຈະ​ຖືກ​ເອີ້ນ​ວ່າ​ຜູ້​ບໍລິສຸດ, ຄື​ທຸກຄົນ​ທີ່​ມີ​ຊື່​ບັນທຶກ​ຢູ່​ໃນ​ທະບຽນ​ພົນລະເມືອງ​ເຢຣູຊາເລັມ. 4ອົງພຣະຜູ້ເປັນເຈົ້າ​ຈະ​ຊຳລະ​ມົນທິນ​ຂອງ​ພວກ​ແມ່ຍິງ​ຊີໂອນ; ພຣະອົງ​ຈະ​ຊຳລະ​ຮອຍ​ເລືອດ​ຈາກ​ເຢຣູຊາເລັມ​ໂດຍ​ວິນຍານ2 ແຫ່ງ​ໄຟ ແລະ ການ​ພິພາກສາ. 5ຈາກນັ້ນ​ພຣະເຈົ້າ​ຢາເວ​ຈະ​ສ້າງ​ກຸ່ມ​ເມກ​ຄວັນ​ໃນ​ຍາມ​ກາງເວັນ ແລະ ເເປວ​ໄຟ​ລຸກ​ໃຫຍ່​ໃນ​ຍາມ​ກາງຄືນ​ເໜືອ​ພູເຂົາ​ຊີໂອນ ແລະ ເໜືອ​ບັນດາ​ຜູ້​ທີ່​ຊຸມນຸມກັນ​ຢູ່​ທີ່ນັ້ນ; ເໜືອ​ສິ່ງ​ທັງໝົດ​ເຫລົ່ານັ້ນ​ຄື​ສະຫງ່າລາສີ​ຂອງ​ພຣະເຈົ້າ​ຈະ​ເປັນ​ເພດານ​ຟ້າ. 6ມັນ​ຈະ​ເປັນ​ບ່ອນ​ລີ້ໄພ ແລະ ຮົ່ມ​ເງົາ​ບັງ​ຄວາມ​ຮ້ອນ​ເອົ້າ​ໃນ​ຍາມ​ກາງເວັນ ແລະ ເປັນ​ບ່ອນ​ປົກປ້ອງ ແລະ ບ່ອນ​ລີ້ໄພ​ຈາກ​ພະຍຸ ແລະ ຝົນ.