Biblica® Open Lao Contemporary Version
ເອຊາຢາ 29
ວິບັດແກ່ເມືອງດາວິດ
ວິບັດແກ່ເຈົ້າ, ອາຣີເອນ, ອາຣີເອນ,
ນະຄອນທີ່ດາວິດຕັ້ງຂຶ້ນ!
ປີຕໍ່ປີ
ແລະ ໃຫ້ວົງຈອນແຫ່ງເທດສະການຂອງເຈົ້າດໍາເນີນໄປ.
ແຕ່ເຮົາຈະລ້ອມເມືອງອາຣີເອນໄວ້;
ເມືອງນັ້ນຈະທຸກໂສກ ແລະ ຄ່ຳຄວນ,
ມັນຈະເປັນເໝືອນເຕົາໄຟແທ່ນບູຊາ1 ສຳລັບເຮົາ.
ເຮົາຈະຕັ້ງຄ້າຍອ້ອມຮອບຕໍ່ສູ້ເຈົ້າທຸກດ້ານ;
ເຮົາຈະສ້າງປ້ອມອ້ອມຮອບເຈົ້າ
ແລະ ຈະປິດລ້ອມນະຄອນນີ້ໄວ້ຕໍ່ສູ້ກັບເຈົ້າ.
ເມື່ອຕົກຕ່ຳລົງແລ້ວ, ເຈົ້າຈະເວົ້າຂຶ້ນຈາກພື້ນດິນ;
ຄຳເວົ້າຂອງເຈົ້າຈະດັ່ງອອກມາຈາກຂີ້ຝຸ່ນ.
ສຽງຂອງເຈົ້າຈະເປັນດັ່ງສຽງຜີດັ່ງຂຶ້ນມາຈາກພື້ນໂລກ;
ສຽງເວົ້າຂອງເຈົ້າຈະຊິ່ມອອກມາຈາກຂີ້ຝຸ່ນ.
ແຕ່ສັດຕູທັງຫລາຍຂອງເຈົ້າຈະກາຍເປັນເໝືອນຂີ້ຝຸ່ນລະອຽດ,
ກຸ່ມຄົນໂຫດຮ້າຍຈະເປັນເໝືອນແກບປິວໄປກັບລົມ.
ໃນທັນທີທັນໃດ, ໃນພິບຕາດຽວ,
ພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່ຈະມາ
ດ້ວຍສຽງຟ້າຮ້ອງ, ແຜ່ນດິນໄຫວ ແລະ ສຽງດັງອັນໃຫຍ່.
ມາດ້ວຍລົມພະຍຸ ແລະ ສຽງແກ ແລະ ແປວໄຟເຜົາຜານ.
ດັ່ງນັ້ນ ບັນດາຊົນຊາດທັງໝົດທີ່ລວມໂຕກັນມາຕໍ່ສູ້ອາຣີເອນ,
ມາໂຈມຕີອາຣີເອນ ແລະ ປ້ອມປ້ອງກັນຂອງນາງ ແລະ ລ້ອມນາງໄວ້,
ຈະເປັນດັ່ງມັນເປັນຄວາມເໝືອນ,
ເໝືອນນິມິດໃນຕອນກາງຄືນ
ເໝືອນຄົນຫິວຝັນວ່າໄດ້ກິນ,
ແຕ່ເມື່ອຕື່ນຂຶ້ນມາກໍຍັງຫິວຢູ່;
ເໝືອນຄົນກະຫາຍນ້ຳຝັນວ່າໄດ້ດື່ມ,
ແຕ່ພໍຕື່ນຂຶ້ນມາກໍຍັງໝົດແຮງ ແລະ ຍັງຫິວກະຫາຍຢູ່
ສະນັ້ນ ບັນດາປະຊາຊາດທັງໝົດ
ທີ່ລວມໂຕກັນມາຕໍ່ສູ້ພູເຂົາຊີໂອນ ກໍຈະເປັນເຊັ່ນນີ້.
ຈົ່ງຕົກໃຈ ແລະ ປະຫລາດໃຈ,
ທໍາທ່າຕາບອດ ແລະ ເບິ່ງບໍ່ເຫັນສິ່ງໃດ;
ຈົ່ງເມົາ, ແຕ່ບໍ່ແມ່ນເພາະເຫລົ້າອະງຸ່ນ,
ເຊໄປມາ, ແຕ່ບໍ່ແມ່ນເພາະເບຍ.
ພຣະເຈົ້າຢາເວນຳການຫລັບສະໜິດມາເໜືອເຈົ້າ:
ພຣະອົງປິດຕາຂອງເຈົ້າ (ຄືຜູ້ທຳນວາຍ);
ພຣະອົງໄດ້ຄຸມຫົວຂອງເຈົ້າ (ຄືຜູ້ທຳນວາຍ).
ນິມິດທັງໝົດນີ້ບໍ່ມີສິ່ງໃດເລີຍສຳລັບເຈົ້ານອກຈາກເປັນຖ້ອຍຄຳທີ່ຖືກປະທັບຕາໄວ້ໃນໜັງສືມ້ວນ. ແລະ ຖ້າເຈົ້າຍື່ນໜັງສືມ້ວນໃຫ້ຄົນທີ່ອ່ານອອກ, ແລະ ບອກວ່າ, “ຊ່ວຍອ່ານໃຫ້ແດ່,” ພວກເຂົາກໍຈະຕອບວ່າ, “ຂ້ອຍອ່ານບໍ່ໄດ້; ມັນຖືກປະທັບຕາໄວ້”. ຫລື ຖ້າເຈົ້າຍື່ນໜັງສືໃຫ້ຄົນທີ່ອ່ານບໍ່ອອກ, ແລະ ບອກວ່າ, “ຊ່ວຍອ່ານໃຫ້ແດ່”, ພວກເຂົາກໍຈະຕອບວ່າ, “ຂ້ອຍບໍ່ຮູ້ຈັກອ່ານ”.
ອົງພຣະຜູ້ເປັນເຈົ້າກ່າວວ່າ:
“ປະຊາຊົນເຫລົ່ານີ້ເຂົ້າມາໃກ້ເຮົາແຕ່ປາກຂອງພວກເຂົາ
ແລະ ໃຫ້ກຽດເຮົາດ້ວຍຮີບສົບຂອງພວກເຂົາເທົ່ານັ້ນ,
ແຕ່ໃຈຂອງພວກເຂົາຫ່າງໄກຈາກເຮົາ.
ພວກເຂົານະມັດສະການເຮົາ
ຕາມກົດເກນທີ່ມະນຸດສອນກັນມາເທົ່ານັ້ນ.2
ເຫດສະນັ້ນ ເຮົາຈະເຮັດໃຫ້ປະຊາຊົນເຫລົ່ານີ້ສະດຸ້ງຕື່ນອີກຄັ້ງ
ດ້ວຍການອັດສະຈັນຊ້ອນການອັດສະຈັນ;
ສະຕິປັນຍາຂອງຄົນມີປັນຍາຈະພິນາດຈິບຫາຍ,
ຄວາມສະຫລາດຂອງຄົນສະຫລາດຈະຫາຍໄປ”.
ວິບັດແກ່ຄົນເຫລົ່ານັ້ນທີ່ໄປຍັງບ່ອນເລິກ
ເພື່ອເຊື່ອງແຜນການຂອງຕົນໄວ້ຈາກພຣະເຈົ້າຢາເວ,
ຜູ້ທີ່ເຮັດວຽກຂອງຕົນໃນບ່ອນມືດ ແລະ ຄິດວ່າ,
“ຜູ້ໃດຈະເຫັນພວກເຮົາ? ຜູ້ໃດຈະຮູ້ໄດ້?”
ເຈົ້າເຮັດໃຫ້ສິ່ງຕ່າງໆປີ້ນກັບດ້ານ,
ຄືກັບວ່າຊ່າງປັ້ນໝໍ້ເປັນດິນໜຽວ!
ຄືດິນໜຽວທີ່ຖືກປັ້ນຈະເວົ້າກັບຜູ້ທີ່ເປັນຊ່າງປັ້ນວ່າ!
“ທ່ານບໍ່ໄດ້ສ້າງຂ້ອຍ”?
ໄຫຈະເວົ້າກັບຊ່າງປັ້ນວ່າ,
“ທ່ານບໍ່ຮູ້ສິ່ງໃດ”?
ໃນເວລາສັ້ນໆ, ເລບານອນຈະບໍ່ກັບກາຍເປັນທົ່ງອັນອຸດົມສົມບູນບໍ?
ແລະ ທົ່ງອັນອຸດົມສົມບູນຈະກາຍເປັນປ່າບໍ?
ໃນວັນນັ້ນຄົນຫູໜວກຈະໄດ້ຍິນຖ້ອຍຄຳໃນໜັງສືມ້ວນ,
ແລະ ຄົນຕາບອດ ແລະ ຢູ່ໃນຄວາມມືດ
ຕາຂອງຄົນຕາບອດຈະແນມເຫັນ.
ຜູ້ຖ່ອມໃຈຈະຊື່ນຊົມຍິນດີໃນພຣະເຈົ້າຢາເວອີກຄັ້ງ;
ຄົນຂັດສົນຈະຊື່ນຊົມໃນອົງບໍລິສຸດແຫ່ງອິດສະຣາເອນ.
ຄົນໂຫດຮ້າຍຈະໝົດໄປ,
ຄົນເຢາະເຢີ້ຍຈະສູນຫາຍໄປ,
ແລະ ທຸກຄົນທີ່ຈົດຈໍ່ຢູ່ທີ່ຄວາມຊົ່ວຮ້າຍຈະຖືກກໍາຈັດໃຫ້ໝົດໄປ
ຄືບັນດາຜູ້ໃສ່ຮ້າຍປ້າຍສີຄົນອື່ນ,
ຜູ້ວາງກັບດັກໄວ້ທຳຮ້າຍຜູ້ປົກປ້ອງຄວາມຍຸຕິທຳໃນສານ
ແລະ ຜູ້ທີ່ເປັນພະຍານບໍ່ຈິງເຮັດໃຫ້ຜູ້ບໍລິສຸດບໍ່ໄດ້ຮັບຄວາມຍຸຕິທຳ.
ເຫດສະນັ້ນ ນີ້ແມ່ນສິ່ງທີ່ພຣະເຈົ້າຢາເວ, ຜູ້ໄດ້ໄຖ່ອັບຣາຮາມ, ກ່າວກ່ຽວກັບເຊື້ອສາຍຂອງຢາໂຄບວ່າ:
“ຢາໂຄບຈະບໍ່ຕ້ອງອັບອາຍອີກຕໍ່ໄປ;
ໜ້າຂອງພວກເຂົາຈະບໍ່ຈືດອີກແລ້ວ.
ເມື່ອພວກເຂົາເຫັນຜົນງານຂອງເຮົາ,
ທີ່ເຮົາເຮັດທ່າມກາງພວກລູກຫລານຂອງພວກເຂົາ,
ພວກເຂົາຈະຮັກສານາມຂອງເຮົາໃຫ້ບໍລິສຸດ;
ພວກເຂົາຈະຍອມຮັບຮູ້ຄວາມບໍລິສຸດຂອງອົງບໍລິສຸດແຫ່ງຢາໂຄບ,
ແລະ ຈະຢືນສະຫງົບດ້ວຍຄວາມຢຳເກງພຣະເຈົ້າແຫ່ງອິດສະຣາເອນ.
ຜູ້ທີ່ໃຈດື້ດ້ານຈະໄດ້ຮັບຄວາມເຂົ້າໃຈ;
ຜູ້ທີ່ຈົ່ມຈະຍອມຮັບຄຳສອນ”.
Source notes (2)
- Footnote ຄຳພາສາເຮັບເຣີທີ່ມີຄວາມຫມາຍວ່າ ເຕົາໄຟແທ່ນບູຊາ ມີສຽງຄ້າຍຄຳພາສາເຮັບເຣີທີ່ມີຄວາມຫມາຍວ່າ ອາລີເອນ
- Footnote ສະບັບ LXX. ວ່າ ພວກເຂົານະມັດສະການເຮົາໂດຍເປົ່າປະໂຫຍດ ຄຳສອນຂອງເຂົາເປັນພຽງກົດເກນທີ່ມະນຸດສອນກັນມາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.