Biblica® Open Lao Contemporary Version
ເອຊາຢາ 28
ວິບັດແກ່ຜູ້ນໍາເອຟຣາອິມ ແລະ ຢູດາຍ
ວິບັດແກ່ມົງກຸດນັ້ນ, ຄວາມອວດອົ່ງຂອງພວກຄົນຂີ້ເມົາແຫ່ງເອຟຣາອິມ,
ວິບັດແກ່ດອກໄມ້ທີ່ກໍາລັງຫ່ຽວແຫ້ງລົງ, ແກ່ຄວາມງາມອັນສະຫງ່າລາສີ,
ທີ່ປະດັບຢູ່ເທິງຫົວຂອງຮ່ອມພູອັນອຸດົມສົມບູນ
ວິບັດແກ່ເມືອງແຫ່ງນັ້ນ, ຄວາມອວດອົ່ງຂອງພວກເຂົາຕົກຕ່ຳລົງເພາະເຫລົ້າອະງຸ່ນ!
ເບິ່ງແມ, ອົງພຣະຜູ້ເປັນເຈົ້າມີຜູ້ໜຶ່ງທີ່ມີອຳນາດ ແລະ ເຂັ້ມແຂງ.
ດັ່ງພະຍຸໝາກເຫັບ ແລະ ພະຍຸລົມແຮງ,
ດັ່ງຫ່າຝົນ ແລະ ນ້ຳຖ້ວມລົ້ນ,
ພຣະອົງຈະໂຍນພວກເຂົາລົງກັບພື້ນຢ່າງແຮງ.
ມົງກຸດນັ້ນ, ຄວາມອວດອົ່ງຂອງຄົນເມົາເຫລົ້າແຫ່ງເອຟຣາອິມ,
ຈະຖືກຢຽບຢ່ຳລົງໃຕ້ພື້ນຕີນ.
ດອກໄມ້ອັນຫ່ຽວແຫ້ງ, ຄວາມງາມອັນສະຫງ່າລາສີ,
ທີ່ປະດັບຢູ່ເທິງຫົວຂອງຮ່ອມພູອັນອຸດົມສົມບູນ,
ຈະເປັນເໝືອນໝາກເດື່ອສຸກກ່ອນລະດູເກັບກ່ຽວ
ທັນທີທີ່ມີຜູ້ພົບເຫັນກໍຈັບ
ແລະ ກືນກິນເຂົ້າໄປ.
ໃນວັນນັ້ນພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່
ຈະເປັນມົງກຸດອັນສະຫງ່າລາສີ,
ເປັນມົງກຸດດອກໄມ້ທີ່ງົດງາມ
ສຳລັບຊົນຊາດທີ່ເຫລືອຢູ່ຂອງພຣະອົງ.
ພຣະອົງຈະເປັນວິນຍານແຫ່ງຄວາມຍຸຕິທຳ
ແກ່ຜູ້ທີ່ນັ່ງຕັດສິນ,
ເປັນແຫລ່ງແຫ່ງກໍາລັງ
ແກ່ຜູ້ຫັນສົງຄາມໄປຈາກປະຕູເມືອງ.
ແລະ ຄົນເຫລົ່ານີ້ໂຊເຊເພາະເຫລົ້າອະງຸ່ນ;
ແລະ ມຶນເມົາເພາະເບຍ:
ພວກປະໂລຫິດ ແລະ ຜູ້ທຳນວາຍກໍໂຊເຊເພາະເຫລົ້າອະງຸ່ນ
ແລະ ມຶນເມົາເພາະເບຍ;
ພວກເຂົາມຶນເມົາເພາະເບຍ,
ພວກເຂົາເຊໄປມາເມື່ອເຫັນນິມິດ,
ພວກເຂົາເຕະສະດຸດລົ້ມເມື່ອຕັດສິນ.
ໂຕະທຸກໜ່ວຍເຕັມໄປດ້ວຍຮາກ
ແລະ ບໍ່ມີຈຸດໃດທີ່ບໍ່ເປື້ອນ.
“ຜູ້ໃດທີ່ລາວພະຍາຍາມສັ່ງສອນ?
ລາວກຳລັງອະທິບາຍຂໍ້ຄວາມຂອງລາວໃຫ້ຜູ້ໃດຟັງ?
ໃຫ້ເດັກອົມມືທີ່ຫາກໍ່ເຊົານົມບໍ,
ໃຫ້ເດັກນ້ອຍທີ່ຫາກໍ່ເຊົາດູດນົມແມ່ບໍ?
ເພາະມັນຄື:
ເຮັດອັນນີ້, ເຮັດອັນນັ້ນ,
ກົດຂອງອັນນີ້, ກົດຂອງອັນນັ້ນ;1
ບ່ອນນີ້ໜ້ອຍໜຶ່ງ, ບ່ອນນັ້ນໜ້ອຍໜຶ່ງ”.
ສະນັ້ນພຣະເຈົ້າຈະກ່າວກັບຊົນຊາດນີ້
ໂດຍໃຊ້ປາກຂອງຄົນຕ່າງຊາດ ແລະ ສຳນຽງພາສາແປກໆ,
ພຣະອົງກ່າວແກ່ພວກເຂົາວ່າ,
“ບ່ອນນີ້ຄືສະຖານທີ່ພັກຜ່ອນໃຫ້ຜູ້ທີ່ອິດເມື່ອຍຈົ່ງພັກຢູ່ທີ່ນີ້”;
ແລະ ກ່າວວ່າ “ທີ່ນີ້ເປັນບ່ອນພັກສະຫງົບ”
ແຕ່ພວກເຂົາຈະບໍ່ຟັງ.
ດັ່ງນັ້ນ, ຖ້ອຍຄຳຂອງພຣະເຈົ້າຢາເວສຳລັບພວກເຂົາຈຶ່ງກາຍເປັນດັ່ງນີ້:
ເຮັດອັນນີ້, ເຮັດອັນນັ້ນ,
ກົດຂອງອັນນີ້, ກົດຂອງອັນນັ້ນ;
ບ່ອນນີ້ໜ້ອຍໜຶ່ງ, ບ່ອນນັ້ນໜ້ອຍໜຶ່ງ
ດັ່ງນັ້ນ ເມື່ອພວກເຂົາໄປ ພວກເຂົາຈະລົ້ມຫງາຍຫລັງກັບມາ;
ພວກເຂົາຈະບາດເຈັບ ຕິດກັບດັກ ແລະ ຖືກຈັບ.
ເຫດສະນັ້ນ ຈົ່ງຟັງຖ້ອຍຄຳຂອງພຣະເຈົ້າຢາເວ, ພວກນັກເຢາະເຢີ້ຍ
ຜູ້ປົກຄອງຊົນຊາດນີ້ໃນເຢຣູຊາເລັມ.
ເຈົ້າອວດວ່າ, “ພວກເຮົາໄດ້ເຂົ້າຮ່ວມຄຳໝັ້ນສັນຍາດ້ວຍຄວາມຕາຍ,
ພວກເຮົາເຮັດຂໍ້ຕົກລົງກັບແດນມໍລະນາໄວ້ແລ້ວ.
ເມື່ອໄພພິບັດອັນຖ້ວມລົ້ນຜ່ານໄປ,
ມັນຈະບໍ່ສາມາດເຮັດຫຍັງໃຫ້ພວກເຮົາໄດ້,
ເພາະການຕົວະເປັນເກາະປ້ອງກັນຂອງພວກເຮົາ
ຄວາມບໍ່ຈິງ2 ເປັນບ່ອນລີ້ໄພຂອງພວກເຮົາ”.
ດັ່ງນັ້ນ ພຣະເຈົ້າຢາເວ ອົງເຈົ້ານາຍໄດ້ກ່າວດັ່ງນີ້ວ່າ:
“ເບິ່ງແມ, ເຮົາວາງຫີນກ້ອນໜຶ່ງໄວ້ໃນຊີໂອນ ເຊິ່ງທົດສອບແລ້ວ,
ເປັນຫີນເສົາເອກລ້ຳຄ່າ ເປັນຮາກຖານອັນໝັ້ນຄົງ
ຜູ້ທີ່ເພິ່ງພາຫີນນີ້;
ຈະບໍ່ມີວັນຕື່ນຕົກໃຈ.
ເຮົາຈະໃຊ້ຄວາມຍຸຕິທຳເປັນສາຍວັດແທກ
ໃຊ້ຄວາມຊອບທຳເປັນລູກດິ່ງ;
ໝາກເຫັບຈະກວາດລ້າງບ່ອນລີ້ໄພຂອງເຈົ້າ, ຄໍາເວົ້າຕົວະ,
ນ້ຳຈະຖ້ວມບ່ອນລີ້ຂອງເຈົ້າ.
ຄຳໝັ້ນສັນຍາທີ່ເຈົ້າເຮັດໄວ້ກັບຄວາມຕາຍຈະເປັນໂມຄະ;
ຂໍ້ຕົກລົງຂອງເຈົ້າກັບແດນມໍລະນາຈະບໍ່ຄົງຢູ່.
ເມື່ອໄພພິບັດອັນຖ້ວມລົ້ນຜ່ານໄປ,
ເຈົ້າຈະຖືກໂຄ່ນລົ້ມຍ້ອນສິ່ງນີ້.
ມັນມາຫລາຍເທົ່າໃດ ມັນກໍຊັດພາເຈົ້າໄປຫລາຍເທົ່ານັ້ນ;
ທຸກເຊົ້າທຸກແລງ, ທັງວັນທັງຄືນ
ມັນຈະກວາດຜ່ານໄປ”.
ການເຂົ້າໃຈຂໍ້ຄວາມນີ້
ຈະນໍາຄວາມຢ້ານກົວອັນໃຫຍ່ມາ.
ຕຽງກໍສັ້ນເກີນກວ່າຈະຢຽດໂຕນອນ,
ຜ້າຫົ່ມກໍນ້ອຍເກີນກວ່າຈະຫົ່ມໂຕໄດ້.
ພຣະເຈົ້າຢາເວຈະລຸກຂຶ້ນດັ່ງທີ່ພຣະອົງໄດ້ເຮັດທີ່ພູເຂົາເປຣາຊີມ,
ພຣະອົງຈະປຸກພຣະອົງເອງຂຶ້ນດັ່ງຢູ່ໃນຮ່ອມພູກີເບໂອນ
ເພື່ອທໍາງານຂອງພຣະອົງ, ຄືວຽກງານທີ່ແປກປະຫລາດຂອງພຣະອົງ,
ແລະ ປະຕິບັດພາລະກິດຂອງພຣະອົງ, ຄືພາລະກິດຕ່າງດ້າວຂອງພຣະອົງ.
ຈົ່ງຢຸດການເຢາະເຢີ້ຍຂອງເຈົ້າດຽວນີ້,
ຫລື ຈະໃຫ້ໂສ້ຂອງເຈົ້າໜັກຂຶ້ນອີກ;
ອົງພຣະຜູ້ເປັນເຈົ້າ, ພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່, ໄດ້ກ່າວກັບຂ້າພະເຈົ້າ
ເຖິງການທໍາລາຍທີ່ກຳນົດໄວ້ແລ້ວສຳລັບດິນແດນທັງໝົດ.
ຈົ່ງຟັງ ແລະ ໄດ້ຍິນສຽງຂອງຂ້າພະເຈົ້າ;
ຈົ່ງຕັ້ງໃຈຟັງສິ່ງທີ່ຂ້າພະເຈົ້າຈະເວົ້າ.
ເມື່ອຊາວນາໄຖດິນເພື່ອປູກຝັງ, ລາວໄຖໄປເລື້ອຍໆບໍ?
ລາວຈະສືບຕໍ່ໄຖຄາດ ແລະ ພວນດິນຕະຫລອດໄປບໍ?
ເມື່ອລາວປັບໜ້າດິນສຳເລັດແລ້ວ
ລາວບໍ່ຫວ່ານຜັກຊີ ແລະ ຂີ້ໝິ້ນ ບໍ?
ລາວບໍ່ປູກເຂົ້າຫວີດໃສ່ບ່ອນຂອງມັນບໍ,
ເຂົ້າບາເລໃສ່ໜານຂອງມັນບໍ,
ແລະ ປູກເຂົ້າສະແປນໃນທົ່ງນາຂອງມັນບໍ?
ພຣະເຈົ້າຂອງລາວແນະນໍາລາວ
ແລະ ສອນລາວໃຫ້ຮູ້ວິທີທີ່ຖືກຕ້ອງ.
ຜັກຊີບໍ່ໄດ້ໃຊ້ແປ້ນນວດເອົາເມັດມັນ,
ແລະ ຫົວຂີ້ໝິ້ນບໍ່ໄດ້ບົດດ້ວຍລໍ້ບົດ;
ຜັກຊີເອົາເມັດອອກໂດຍໃຊ້ໄມ້,
ແລະ ເອົາຂີ້ໝິ້ນໂດຍໃຊ້ໄມ້ຂຸດ.
ເມັດເຂົ້າຕ້ອງໂມ້ເພື່ອໃຊ້ເຮັດເຂົ້າຈີ່;
ແຕ່ຄົນຈະບໍ່ໄດ້ໂມ້ເມັດເຂົ້າຕະຫລອດໄປ.
ລໍ້ນວດເຂົ້າອາດຈະທັບມັນໄດ້,
ແຕ່ກໍບໍ່ໄດ້ອາໄສມ້າບົດເມັດເຂົ້າ.
ທັງໝົດນີ້ມາຈາກພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່,
ແຜນການຂອງພຣະອົງອັດສະຈັນ,
ສະຕິປັນຍາຂອງພຣະອົງນັ້ນປະເສີດ.
Source notes (2)
- Footnote ໃນພາສາເຮັບເຣີຂໍ້ຄວາມຕອນນີ້ເປັນສຽງທີ່ບໍ່ມີຄວາມຫມາຍ ຄົງຈະລໍ້ລຽນສຽງຂອງຜູ້ທຳນວາຍ ເຊັ່ນດຽວກັບຂໍ້ 13
- Footnote ຫລື ພະເທັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.