Biblica® Open Lao Contemporary Version
ເອຊາຢາ 27
ການກອບກູ້ອິດສະຣາເອນ
ໃນວັນນັ້ນ,
ພຣະເຈົ້າຢາເວຈະໃຊ້ດາບ ອັນຍິ່ງໃຫຍ່
ໂຫດຮ້າຍ ແລະ ມີອານຸພາບລົງໂທດເລວີອາທັນ
ພະຍານາກທີ່ເລືອໄປຢ່າງວ່ອງໄວ,
ງູໃຫຍ່ທີ່ຂົດໂຕຢູ່;
ພຣະອົງຈະຂ້າສັດຮ້າຍໂຕໃຫຍ່ໃນທະເລ.
ໃນວັນນັ້ນ
“ຈົ່ງຮ້ອງເພງກ່ຽວກັບສວນອະງຸ່ນທີ່ມີໝາກຫລາຍດັ່ງນີ້ວ່າ:
ເຮົາ, ຜູ້ເປັນພຣະເຈົ້າຢາເວ, ເບິ່ງແຍງສວນນັ້ນ;
ເຮົາຫົດນ້ຳໃຫ້ຕະຫລອດເວລາ.
ເຮົາເຝົ້າເບິ່ງທັງເວັນທັງຄືນ
ດັ່ງນັ້ນ ບໍ່ມີຜູ້ໃດມາທໍາລາຍມັນໄດ້.
ເຮົາບໍ່ໃຈຮ້າຍ.
ແຕ່ຖ້າມີໜາມໃຫຍ່ນ້ອຍອອກມາໃຫ້ເຫັນ!
ເຮົາຈະໄປຕໍ່ສູ້ກັບມັນ;
ເຮົາຈະເຜົາພວກມັນຖິ້ມ.
ຫລື ບໍ່ກໍໃຫ້ພວກມັນມາຫາເຮົາເພື່ອລີ້ໄພ;
ໃຫ້ພວກເຂົາມາເຈລະຈາສັນຕິພາບກັບເຮົາ,
ແມ່ນແລ້ວ, ໃຫ້ພວກເຂົາມາເຈລະຈາສັນຕິພາບກັບເຮົາ”.
ໃນພາຍພາກໜ້າຢາໂຄບຈະຢັ່ງຮາກ,
ອິດສະຣາເອນຈະແຕກໜໍ່ ແລະ ເບັ່ງບານ
ແລະ ເຕີມເຕັມໂລກດ້ວຍໝາກຜົນຂອງພວກເຂົາ.
ພຣະເຈົ້າຢາເວລົງໂທດອິດສະຣາເອນ
ດັ່ງທີ່ໄດ້ລົງໂທດສັດຕູຂອງພວກເຂົາບໍ?
ອິດສະຣາເອນຖືກຂ້າ
ດັ່ງຄົນທີ່ໄດ້ຂ້າອິດສະຣາເອນບໍ?
ພຣະອົງໄດ້ລົງໂທດອິດສະຣາເອນດ້ວຍສົງຄາມ1 ແລະການເນລະເທດ
ພຣະອົງໄດ້ຂັບໄລ່ພວກເຂົາອອກໄປດ້ວຍຄວາມຮ້ອນຮົນ
ດັ່ງມື້ທີ່ລົມຕາເວັນອອກພັດ.
ດ້ວຍເຫດນີ້, ຄວາມຜິດຂອງຢາໂຄບຈະໄດ້ຮັບການອະໄພໄປ,
ແລະ ນີ້ຈະເປັນການກຳຈັດບາບຂອງລາວຢ່າງເດັດຂາດ:
ພຣະອົງເຮັດໃຫ້ຫີນແທ່ນບູຊາ
ເປັນເໝືອນຫີນທີ່ຖືກບົດລະອຽດ,
ບໍ່ມີເສົາເຈົ້າແມ່ອາເຊຣາ2 ຫລືແທ່ນເຄື່ອງຫອມ
ເຫລືອຢູ່ອີກເລີຍ.
ເມືອງທີ່ມີປ້ອມປ້ອງກັນກໍຕັ້ງຢູ່ຢ່າງໂດດດ່ຽວ,
ຖືກຖິ້ມຮ້າງວ່າງເປົ່າເໝືອນຖິ່ນແຫ້ງແລ້ງກັນດານ;
ງົວກິນຫຍ້າຢູ່ທີ່ນັ້ນ,
ພວກມັນນອນຢູ່ທີ່ນັ້ນ;
ພວກມັນຫຍໍ້າງ່າໄມ້ຈົນກຽ້ງ.
ເມື່ອງ່າໄມ້ແຫ້ງ, ມັນກໍຫັກ
ແລະ ພວກແມ່ຍິງກໍມາເກັບໄປເຮັດຟືນ.
ເພາະຊົນຊາດນີ້ບໍ່ມີຄວາມເຂົ້າໃຈ;
ສະນັ້ນພຣະຜູ້ສ້າງຂອງພວກເຂົາຈຶ່ງບໍ່ເມດຕາພວກເຂົາ,
ແລະ ພຣະຜູ້ສ້າງຂອງພວກເຂົາບໍ່ສະແດງຄວາມພໍໃຈຕໍ່ພວກເຂົາ.
ໃນວັນນັ້ນພຣະເຈົ້າຢາເວຈະຝັດເອົາເຂົ້າຕັ້ງແຕ່ແມ່ນ້ຳເອີຟຣັດຮອດແມ່ນ້ຳແຫ່ງເອຢິບ, ແລະ ຊົນຊາດອິດສະຣາເອນ, ພວກເຈົ້າ, ຈະຖືກຮວບຮວມມາເທື່ອລະຄົນ. ແລະ ໃນວັນນັ້ນຈະມີການເປົ່າແກໃຫຍ່, ຫລາຍຄົນທີ່ກຳລັງຈະຈິບຫາຍໃນອັດຊີເຣຍ ແລະ ຜູ້ທີ່ຖືກເນລະເທດໄປເອຢິບຈະກັບມານະມັດສະການພຣະເຈົ້າຢາເວເທິງພູເຂົາສັກສິດໃນເຢຣູຊາເລັມ.
Source notes (2)
- Footnote ໃນພາສາເຮັບເຣີຄຳນີ້ມີຄວາມຫມາຍບໍ່ຊັດເຈນ
- Footnote ຄື ສັນຍາລັກຂອງເຈົ້າແມ່ອາເຊຣາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.