Biblica® Open Lao Contemporary Version
ເອຊາຢາ 26
ບົດເພງແຫ່ງການສັນລະເສີນ
ໃນວັນນັ້ນທົ່ວແດນຢູດາຍຈະຮ້ອງເພງບົດນີ້ວ່າ:
ພວກເຮົາມີເມືອງທີ່ເຂັ້ມແຂງເມືອງໜຶ່ງ;
ພຣະເຈົ້າເຮັດໃຫ້ຄວາມພົ້ນ
ເປັນກຳແພງ ແລະ ປ້ອມປ້ອງກັນຂອງມັນ.
ຈົ່ງເປີດປະຕູ
ເພື່ອຊົນຊາດທີ່ຊອບທຳຈະເຂົ້າໄປ,
ຄືຊົນຊາດທີ່ຮັກສາຄວາມເຊື່ອໄວ້,
ພຣະອົງຈະຮັກສາສັນຕິສຸກທີ່ສົມບູນໄວ້
ແກ່ບັນດາຜູ້ທີ່ມີຈິດໃຈໝັ້ນຄົງ,
ເພາະພວກເຂົາໄວ້ວາງໃຈໃນພຣະອົງ.
ຈົ່ງໄວ້ວາງໃຈພຣະເຈົ້າຢາເວຕະຫລອດໄປ,
ເພາະພຣະເຈົ້າຢາເວ, ພຣະເຈົ້າຢາເວເອງເປັນສີລາຕະຫລອດໄປເປັນນິດ.
ພຣະອົງເຮັດໃຫ້ຄົນທີ່ຢູ່ສູງຕົກຕ່ຳລົງ,
ພຣະອົງດຶງເມືອງທີ່ອວດອົ່ງລົງມາ;
ພຣະອົງເຮັດໃຫ້ມັນຕໍ່າພຽງດິນ
ແລະ ໂຍນມັນລົງມາສູ່ຂີ້ຝຸ່ນດິນ.
ຕີນຂອງຜູ້ທຸກຍາກ
ແລະ ຜູ້ຖືກຂົ່ມເຫັງ,
ກໍຢຽບຢ່ຳມັນ.
ຫົນທາງຂອງຄົນຊອບທຳຮາບພຽງ;
ຂ້າແດ່ອົງຜູ້ຊອບທໍາ, ພຣະອົງເຮັດໃຫ້ທາງຂອງຄົນຊອບທຳຮາບກ້ຽງດີ.
ແມ່ນແລ້ວ, ພຣະເຈົ້າຢາເວ, ພວກຂ້ານ້ອຍລໍຄອຍພຣະອົງ,
ໂດຍດຳເນີນຢູ່ໃນທາງແຫ່ງກົດບັນຍັດຂອງພຣະອົງ;1
ນາມຊື່ ແລະ ຊື່ສຽງຂອງພຣະອົງ
ເປັນຄວາມປາຖະໜາໃນໃຈຂອງພວກຂ້ານ້ອຍ.
ໃນຕອນກາງຄືນຈິດວິນຍານຂອງຂ້ານ້ອຍປາຖະໜາພຣະອົງ;
ໃນຕອນເຊົ້າຈິດວິນຍານຂອງຂ້ານ້ອຍກະຫາຍຫາພຣະອົງ.
ເມື່ອການຕັດສິນຂອງພຣະອົງມາເຖິງໂລກ,
ຄົນທັງຫລາຍໃນໂລກຈຶ່ງໄດ້ຮຽນຮູ້ຄວາມຊອບທຳ.
ແຕ່ເມື່ອພຣະຄຸນໄດ້ສໍາແດງແກ່ຄົນຊົ່ວຮ້າຍ,
ພວກເຂົາກໍບໍ່ໄດ້ຮຽນຮູ້ຄວາມຊອບທຳ;
ແມ່ນແຕ່ໃນດິນແດນແຫ່ງຄວາມທ່ຽງທຳ ພວກເຂົາກໍຍັງເຮັດຊົ່ວຕໍ່ໄປ
ແລະ ບໍ່ຄຳນຶງເຖິງຄວາມຍິ່ງໃຫຍ່ຂອງພຣະເຈົ້າຢາເວ.
ຂ້າແດ່ພຣະເຈົ້າຢາເວ, ມືຂອງພຣະອົງຖືກຍົກຂຶ້ນສູງ,
ແຕ່ພວກເຂົາບໍ່ເຫັນ.
ຂໍໃຫ້ພວກເຂົາເຫັນໃຈອັນກະຕືລືລົ້ນຂອງພຣະອົງທີ່ມີຕໍ່ປະຊາຊົນຂອງພຣະອົງ ແລ້ວພວກເຂົາຈະໄດ້ລະອາຍ;
ຂໍໃຫ້ໄຟທີ່ຕຽມໄວ້ສຳລັບບັນດາສັດຕູຂອງພຣະອົງເຜົາຜານພວກເຂົາ.
ຂ້າແດ່ພຣະເຈົ້າຢາເວ, ພຣະອົງໃຫ້ສັນຕິສຸກແກ່ພວກຂ້ານ້ອຍ;
ສິ່ງສາລະພັດທີ່ພວກຂ້ານ້ອຍໄດ້ເຮັດສຳເລັດ ພຣະອົງເປັນຜູ້ເຮັດໃຫ້ພວກຂ້ານ້ອຍ.
ຂ້າແດ່ພຣະເຈົ້າຢາເວ ພຣະເຈົ້າຂອງພວກຂ້ານ້ອຍ, ມີເຈົ້ານາຍຫລາຍຄົນເຄີຍປົກຄອງພວກຂ້ານ້ອຍນອກຈາກພຣະອົງ,
ແຕ່ພວກຂ້ານ້ອຍໃຫ້ກຽດນາມຂອງພຣະອົງເທົ່ານັ້ນ.
ບັດນີ້ພວກເຂົາຕາຍແລ້ວ, ພວກເຂົາບໍ່ມີຊີວິດຢູ່ອີກຕໍ່ໄປ;
ວິນຍານຂອງພວກເຂົາທີ່ຈາກໄປບໍ່ໄດ້ກັບມາອີກ.
ພຣະອົງໄດ້ລົງໂທດ ແລະ ນຳພວກເຂົາໄປສູ່ຄວາມຈິບຫາຍ;
ພຣະອົງກວາດທຸກຢ່າງທີ່ເປັນອະນຸສອນຂອງພວກເຂົາ.
ຂ້າແດ່ພຣະເຈົ້າຢາເວ, ພຣະອົງໄດ້ເພີ່ມປະຊາກອນ,
ພຣະອົງໄດ້ຂະຫຍາຍປະເທດຊາດ.
ພຣະອົງໄດ້ຮັບກຽດຕິຍົດສໍາລັບພຣະອົງເອງ;
ພຣະອົງໄດ້ຂະຫຍາຍເຂດແດນທັງໝົດຂອງແຜ່ນດິນ.
ຂ້າແດ່ພຣະເຈົ້າຢາເວ, ພວກເຂົາມາຫາພຣະອົງໃນຍາມທຸກລຳບາກຂອງພວກເຂົາ;
ເມື່ອພຣະອົງຕີສັ່ງສອນພວກເຂົາ,
ພວກເຂົາກໍທຸກຈົນເກືອບອະທິຖານບໍ່ອອກ.2
ດັ່ງຜູ້ຍິງຖືພາໃກ້ຈະເກີດລູກ
ບິດຄີງ ແລະ ຮ້ອງໄຫ້ດ້ວຍຄວາມເຈັບປວດຂອງນາງ,
ຂ້າແດ່ພຣະເຈົ້າຢາເວ, ພວກຂ້ານ້ອຍກໍເປັນແບບນັ້ນຕໍ່ໜ້າພຣະອົງ.
ພວກຂ້ານ້ອຍເຈັບທ້ອງທໍລະມານດ້ວຍຄວາມເຈັບປວດ,
ແຕ່ກໍເບັ່ງແຕ່ລົມອອກມາ.
ພວກຂ້ານ້ອຍບໍ່ໄດ້ນຳຄວາມພົ້ນມາສູ່ໂລກ,
ແລະ ບໍ່ໄດ້ໃຫ້ກຳເນີດມວນມະນຸດ.
ແຕ່ຜູ້ທີ່ເປັນຂອງພຣະອົງ, ພຣະເຈົ້າຢາເວ; ແມ່ນວ່າຕາຍແລ້ວກໍຈະຍັງມີຊີວິດຢູ່;
ຮ່າງກາຍຂອງພວກເຂົາຈະລຸກຂຶ້ນມາ
ໃຫ້ຜູ້ທີ່ນອນຢູ່ໃນຂີ້ຝຸ່ນດິນ
ລຸກຂຶ້ນ ແລະ ໂຫ່ຮ້ອງດ້ວຍຄວາມຍິນດີ
ນ້ຳຄ້າງສຳລັບພວກເຈົ້າເໝືອນນ້ຳຄ້າງຍາມເຊົ້າ;
ໂລກຈະໃຫ້ຊີວິດແກ່ຜູ້ທີ່ຕາຍໄປແລ້ວ.
ຈົ່ງໄປ, ປະຊາຊົນຂອງເຮົາ, ຈົ່ງເຂົ້າໄປໃນຫ້ອງທັງຫລາຍຂອງພວກເຈົ້າ
ແລະ ປິດປະຕູດ້ານຫລັງຂອງພວກເຈົ້າ;
ເຊື່ອງໂຕຢູ່ຈັກໄລຍະໜຶ່ງ
ຈົນກວ່າຄວາມໂກດຮ້າຍຂອງພຣະອົງຜ່ານພົ້ນໄປ.
ເບິ່ງແມ, ພຣະເຈົ້າຢາເວກຳລັງອອກມາຈາກບ່ອນທີ່ພຣະອົງສະຖິດຢູ່
ເພື່ອລົງໂທດປະຊາຊົນໃນໂລກເພາະບາບຂອງພວກເຂົາ.
ໂລກຈະເປີດເຜີຍເລືອດທີ່ໄຫລນອງ;
ແລະ ຈະບໍ່ເຊື່ອງຜູ້ທີ່ຖືກຂ້າໄວ້ອີກຕໍ່ໄປ.
Source notes (2)
- Footnote ຫລື ການພິພາກສາ
- Footnote ໃນພາສາເຮັບເຣີຂໍ້ຄວາມນີ້ມີຄວາມຫມາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.