Biblica® Open Lao Contemporary Version
ເອຊາຢາ 23
ຄຳທຳນວາຍຕໍ່ສູ້ຕີເຣ
ຄໍາທໍານວາຍຕໍ່ສູ້ເມືອງຕີເຣມີດັ່ງນີ້:
ຈົ່ງຮ້ອງໄຫ້, ບັນດາເຮືອແຫ່ງຕາກຊິດ!
ເພາະຕີເຣຖືກທໍາລາຍແລ້ວ
ແລະ ບໍ່ເຫລືອບ້ານເຮືອນ ຫລື ທ່າເຮືອ.
ຈາກດິນແດນໄຊປຣັດ1
ຖ້ອຍຄໍາໄດ້ມາເຖິງພວກເຂົາແລ້ວ.
ຈົ່ງມິດງຽບ, ພວກເຈົ້າປະຊາຊົນຊາວເກາະ
ແລະ ບັນດາພໍ່ຄ້າແຫ່ງຊີໂດນ,
ຜູ້ຮັ່ງມີຈາກການເດີນເຮືອທາງທະເລ.
ເມັດເຂົ້າຈາກຊິໂຫລ
ເດີນທາງຂ້າມມະຫາສະຫມຸດມາ;
ການເກັບກ່ຽວຂອງແມ່ນ້ຳນິນ2 ເປັນລາຍໄດ້ຂອງຕີເຣ,
ແລະ ມັນໄດ້ກາຍເປັນຕະຫລາດຂອງບັນດາປະຊາຊາດ.
ຊີໂດນ, ຈົ່ງອັບອາຍ, ແລະ ເຈົ້າເປັນປ້ອມປ້ອງກັນທາງທະເລ,
ເພາະທະເລໄດ້ເວົ້າວ່າ:
“ເຮົາບໍ່ເຄີຍເຈັບທ້ອງ ແລະ ບໍ່ເຄີຍເກີດລູກ;
ທັງບໍ່ເຄີຍລ້ຽງດູລູກຊາຍລູກສາວ”.
ເມື່ອເອຢິບໄດ້ຍິນຂ່າວ,
ພວກເຂົາຈະທຸກໂສກຫລາຍຍ້ອນຂ່າວຈາກຕີເຣ.
ຈົ່ງຂ້າມໄປຕາກຊິດ;
ພວກເຈົ້າຊາວເກາະ, ຈົ່ງໂສກເສົ້າຮ້ອງໄຫ້.
ນີ້ບໍນະຄອນແຫ່ງຄວາມສະໜຸກສະໜານ,
ນະຄອນເກົ່າ, ນະຄອນແກ່,
ທີ່ຕີນພານາງໄປ
ຕັ້ງຖິ່ນຖານຢູ່ແດນໄກ?
ຜູ້ໃດວາງແຜນນີ້ຕໍ່ສູ້ຕີເຣ,
ຜູ້ທີ່ໃຫ້ມົງກຸດ,
ຜູ້ທີ່ພໍ່ຄ້າໄດ້ເປັນບັນດາເຈົ້າຊາຍ,
ຜູ້ທີ່ພໍ່ຄ້າມີກຽດຊື່ສຽງຢູ່ໃນໂລກ?
ຄືພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່ໄດ້ວາງແຜນການໄວ້,
ເພື່ອຫລຸດຄວາມອວດຕົວໃນຄວາມຈະເລີນຮຸ່ງເຮືອງທັງໝົດຂອງນາງລົງ
ແລະ ເຮັດໃຫ້ບັນດາຜູ້ທີ່ມີກຽດຊື່ສຽງຂອງໂລກຖ່ອມຕົວ.
ຈົ່ງໄຖພວນ3ດິນຂອງພວກເຈົ້າດັ່ງທີ່ພວກເຂົາເຮັດກັບດິນແຄມແມ່ນ້ຳນິນ,
ລູກສາວແຫ່ງຕາກຊິດ4,
ເພາະພວກເຈົ້າບໍ່ມີທ່າເຮືອອີກແລ້ວ.
ພຣະເຈົ້າຢາເວໄດ້ເດ່ມືຂອງພຣະອົງອອກເທິງທະເລ
ແລະ ເຮັດໃຫ້ອານາຈັກທັງຫລາຍສັ່ນຢ້ານ.
ພຣະອົງໄດ້ອອກຄໍາສັ່ງ
ໃຫ້ທໍາລາຍປ້ອມປ້ອງກັນຕ່າງໆຂອງໂຟນີເຊຍ5
ພຣະອົງກ່າວວ່າ, “ບໍ່ມີຄວາມສະໜຸກສະໜານອີກຕໍ່ໄປແລ້ວ,
ໂອ ລູກສາວພົມມະຈາລີແຫ່ງຊີໂດນ6, ທີ່ບັດນີ້ແຕກໝຸ່ນ!
“ຂຶ້ນໄປແມ, ຈົ່ງຂ້າມໄປໄຊປຣັດ;7
ແມ່ນແຕ່ທີ່ນັ້ນເຈົ້າກໍບໍ່ໄດ້ພັກສະຫງົບ”.
ຈົ່ງເບິ່ງດິນແດນຂອງຊາວບາບີໂລນ8,
ຊົນຊາດນີ້ບັດນີ້ບໍ່ມີບັນຊີເລີຍ!
ປະຊາຊົນອັດຊີເຣຍໄດ້ເຮັດ
ໃຫ້ມັນກາຍເປັນບ່ອນຢູ່ຂອງສັດປ່າ;
ພວກເຂົາໄດ້ຍົກປ້ອມປ້ອງກັນຂຶ້ນ,
ພວກເຂົາໄດ້ທໍາລາຍປ້ອມປ້ອງກັນ,
ແລະ ເຮັດໃຫ້ມັນກາຍເປັນຊາກເພພັງ.
ຈົ່ງຮ້ອງໄຫ້, ພວກເຈົ້າເຮືອແຫ່ງຕາກຊິດ;
ປ້ອມປ້ອງກັນຂອງພວກເຈົ້າຖືກທຳລາຍແລ້ວ!
ໃນເວລານັ້ນຜູ້ຄົນຈະລືມຕີເຣໄປເຈັດສິບປີ, ເປັນໄລ່ຍະເວລາແຫ່ງຊີວິດຂອງກະສັດຜູ້ໜຶ່ງ. ແຕ່ໃນຕອນທ້າຍຂອງໄລຍະເຈັດສິບປີນັ້ນ ຕີເຣຈະເປັນດັ່ງເນື້ອເພງຂອງຍິງໂສເພນີທີ່ວ່າ:
“ໂອ ຍິງໂສເພນີທີ່ຖືກລືມ,
ຈົ່ງຈັບພິນຂຶ້ນມາ, ແລ້ວຍ່າງໄປທົ່ວເມືອງ,
ຫລິ້ນພິນໃຫ້ມ່ວນ, ຈົ່ງຮ້ອງຫລາຍເພງ;
ເພື່ອຄົນຈະຈື່ເຈົ້າໄດ້”.
ຕອນທ້າຍໄລຍະເວລາເຈັດສິບປີ, ພຣະເຈົ້າຢາເວຈະສັງເກດເຫັນຕີເຣ. ນາງຈະກັບມາມີຄົນຈ້າງ. ນາງກັບກາຍເປັນໂສເພນີ ແລະ ຈະຕິດຕໍ່ຄ້າຂາຍກັບອານາຈັກທັງຫລາຍຂອງໂລກ. ແຕ່ຜົນກຳໄລ ແລະ ລາຍໄດ້ຂອງຕີເຣຈະຖືກຈັດໄວ້ເພື່ອຖວາຍແກ່ພຣະເຈົ້າຢາເວ; ພວກເຂົາຈະບໍ່ເກັບ ຫລື ສະສົມໄວ້ເອງ. ແຕ່ຈະມອບຜົນກຳໄລຂອງນາງແກ່ຜູ້ທີ່ໃຊ້ຊີວິດຕໍ່ໜ້າພຣະເຈົ້າຢາເວ, ເພື່ອຄົນເຫລົ່ານັ້ນຈະມີອາຫານອຸດົມສົມບູນ ແລະ ມີເຄື່ອງນຸ່ງດີໆ.
Source notes (8)
- Footnote ພາສາເຮັບເຣີວ່າ ກິດຕິມ
- Footnote ສະບັບໜັງສືມ້ວນທະເລຕາຍວ່າ ຊີໂດນ ຜູ້ຂ້າມທະເລມາ ກອງເຮືອຂອງເຈົ້າ 3 ຢູ່ເທິງຫ້ວງສະໝຸດ ເມັດເຂົ້າຂອງຊິໂຫລ ຜົນຜະລິດຂອງແມ່ນ້ຳນິນ
- Footnote ສະບັບ MT. ວ່າ ຈົ່ງໄປທົ່ວ
- Footnote ຄື ເມືອງຕາຣະຊິດ ຫລື ຊາວຕີເຣ
- Footnote ພາສາເຮັບເຣີວ່າ ການາອານ
- Footnote ຄື ຊາວຊີໂດນ
- Footnote ພາສາເຮັບເຣີວ່າ ຄິດທິມ
- Footnote ຫລື ຄານເດອາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.