Biblica® Open Lao Contemporary Version
ເອຊາຢາ 21
ຄຳທຳນວາຍຕໍ່ສູ້ບາບີໂລນ
ຄໍາທໍານວາຍຕໍ່ສູ້ຖິ່ນແຫ້ງແລ້ງກັນດານຕາມແຄມທະເລ1:
ເໝືອນດັ່ງລົມບ້າໝູທີ່ພັດຜ່ານດິນແດນທາງພາກໃຕ້,
ຜູ້ຮຸກຮານມາຈາກຖິ່ນແຫ້ງແລ້ງກັນດານ,
ຈາກດິນແດນທີ່ໜ້າຢ້ານກົວ.
ນິມິດອັນໜ້າຢ້ານກົວໄດ້ຖືກສໍາແດງແກ່ຂ້າພະເຈົ້າຄື:
ຜູ້ທໍລະຍົດຫັກຫລັງ, ໂຈນປຸ້ນເອົາສິ່ງຂອງໄປ.
ເອລາມ, ບຸກໂຈມຕີມີເດຍ, ເຂົ້າລ້ອມເມືອງ!
ເຮົາຈະຢຸດຕິສຽງຄວນຄາງທັງໝົດທີ່ມັນເຮັດໃຫ້ເກີດຂຶ້ນ.
ຕອນນີ້ ຮ່າງກາຍຂອງຂ້າພະເຈົ້າກໍເຕັມໄປດ້ວຍຄວາມເຈັບປວດ,
ຄວາມເຈັບປວດໂຈມຕີຂ້າພະເຈົ້າ, ດັ່ງຄວາມເຈັບປວດຂອງແມ່ຍິງທີ່ກຳລັງເກີດລູກ;
ຂ້າພະເຈົ້າສັບສົນໃນສິ່ງທີ່ໄດ້ຍິນ,
ຂ້າພະເຈົ້າສັບສົນໃນສິ່ງທີ່ໄດ້ເຫັນ.
ຫົວໃຈຂອງຂ້າພະເຈົ້າເຕັ້ນແຮງ,
ຄວາມຢ້ານເຮັດໃຫ້ຂ້າພະເຈົ້າສັ່ນ;
ຕອນກາງຄືນທີ່ຂ້າພະເຈົ້າເຝົ້າລໍຄອຍ
ໄດ້ກາຍເປັນຄວາມຢ້ານສໍາລັບຂ້າພະເຈົ້າ.
ພວກເຂົາຕັ້ງໂຕະ,
ພວກເຂົາຍົກພົມມາປູ,
ພວກເຂົາກິນ, ພວກເຂົາດື່ມ!
ນາຍທະຫານທັງຫລາຍ, ຈົ່ງລຸກຂຶ້ນ,
ເອົານ້ຳມັນທາໂລ່!
ອົງພຣະຜູ້ເປັນເຈົ້າກ່າວກັບຂ້າພະເຈົ້າວ່າ:
“ຈົ່ງໄປ, ຈັດວາງຍາມໄວ້
ແລະ ໃຫ້ລາວລາຍງານສິ່ງທີ່ລາວເຫັນ.
ເມື່ອລາວເຫັນລົດຮົບ ກັບ
ຝູງມ້າ,
ບັນດາຄົນທີ່ຂີ່ລໍ
ຫລື ຄົນຂີ່ອູດເຄື່ອນເຂົ້າມາ,
ໃຫ້ລາວຕື່ນໂຕ,
ແລະ ລະມັດລະວັງ”.
ແລ້ວຍາມ2 ຮ້ອງບອກວ່າ,
“ອົງພຣະຜູ້ເປັນເຈົ້າຂອງຂ້ານ້ອຍ, ວັນຕໍ່ວັນ, ຂ້ານ້ອຍຢືນເຝົ້າຍາມທີ່ປ້ອມນີ້;
ທຸກຄືນຂ້ານ້ອຍຢູ່ໃນປ້ອມຂອງຂ້ານ້ອຍ.
ເບິ່ງແມ, ມີຄົນໜຶ່ງນັ່ງລົດຮົບມາ
ໂດຍມີມ້າມາເປັນຝູງ.
ລາວຈຶ່ງຕອບກັບມາວ່າ:
‘ບາບີໂລນຫລົ້ມຈົມແລ້ວ, ຫລົ້ມຈົມແລ້ວ!
ຮູບເຄົາລົບທັງໝົດຂອງບາບີໂລນ
ແຕກກະຈັດກະຈາຍຢູ່ໜ້າດິນ!’ ”
ປະຊາຊົນຂອງຂ້າພະເຈົ້າຜູ້ຖືກບຸກໂຈມຕີໃນລານຟາດເຂົ້າ,
ຂ້າພະເຈົ້າຂໍບອກທ່ານເຖິງສິ່ງທີ່ຂ້າພະເຈົ້າໄດ້ຍິນ
ຈາກພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່,
ຈາກພຣະເຈົ້າແຫ່ງອິດສະຣາເອນ.
ຄຳທຳນວາຍຕໍ່ສູ້ເອໂດມ
ຄໍາທໍານວາຍຕໍ່ສູ້ເອໂດມ3:
ມີບາງຄົນເອີ້ນຂ້າພະເຈົ້າຈາກເສອີວ່າ,
“ຄົນຍາມ, ອີກດົນປານໃດຈຶ່ງຈະແຈ້ງ?
ຄົນຍາມ, ອີກດົນປານໃດຈຶ່ງຈະແຈ້ງ?”
ຍາມຕອບວ່າ,
“ເວລາເຊົ້າກຳລັງມາ, ແຕ່ກາງຄືນກໍຈະມາເໝືອນກັນ.
ຖ້າເຈົ້າຈະຖາມ, ກໍໃຫ້ຖາມມາ;
ແລ້ວກັບມາຖາມໃໝ່ອີກ”.
ຄຳທຳນວາຍຕໍ່ສູ້ອາຣະເບຍ
ຄໍາທໍານວາຍຕໍ່ສູ້ອາຣະເບຍ:
ພວກເຈົ້າບັນດາຂະບວນແຫ່ຂອງຊາວເດດານ,
ທີ່ຕັ້ງຄ້າຍພັກໃນປ່າດົງຂອງອາຣະເບຍ,
ຈົ່ງນຳນ້ຳມາໃຫ້ຜູ້ກະຫາຍ;
ພວກເຈົ້າຜູ້ທີ່ອາໄສຢູ່ເຕມາ,
ຈົ່ງນຳອາຫານມາໃຫ້ພວກອົບພະຍົບ.
ພວກເຂົາໜີຈາກດາບ,
ຈາກດາບທີ່ຖອດອອກຈາກຝັກ,
ໜີຈາກຄັນທະນູທີ່ກົ່ງຢູ່
ແລະ ຈາກຄວາມດຸເດືອດຂອງສົງຄາມ.
ນີ້ແມ່ນສິ່ງທີ່ອົງພຣະຜູ້ເປັນເຈົ້າກ່າວກັບຂ້າພະເຈົ້າວ່າ: “ພາຍໃນໜຶ່ງປີ, ຕາມປີຂອງສັນຍາວ່າຈ້າງແຮງງານນັ້ນ, ຄວາມຍິ່ງໃຫຍ່ທັງໝົດຂອງເກດາຈະຈົບລົງ. ຜູ້ລອດຊີວິດຈາກນັກຍິງທະນູ, ຄືນັກຮົບຂອງເກດາ, ຈະມີຢູ່ໜ້ອຍຄົນ”. ພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ໄດ້ກ່າວໄວ້.
Source notes (3)
- Footnote ພາສາເຮັບເຣີວ່າ ຖິ່ນແຫ້ງແລ້ງກັນດານໃກ້ທະເລ
- Footnote ສະບັບ MT. ວ່າ ໂຕສິງ
- Footnote ແປວ່າ ຄວາມງຽບ ຫລື ຄວາມນິ້ງສະຫງົບ ເປັນການຫລິ້ນຄຳກັບຄຳວ່າ ເອໂດມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.