Biblica® Open Lao Contemporary Version
ເອຊາຢາ 2
ພູເຂົາຂອງພຣະເຈົ້າຢາເວ
(ມກ 4:1-3)
ນີ້ຄືສິ່ງທີ່ເອຊາຢາລູກຊາຍຂອງອາໂມດເຫັນນິມິດກ່ຽວກັບຢູດາຍ ແລະ ເຢຣູຊາເລັມ:
ໃນວັນສຸດທ້າຍ
ພູເຂົາທີ່ວິຫານຂອງພຣະເຈົ້າຢາເວຕັ້ງຢູ່ຈະໄດ້ຮັບການສະຖາປະນາຂຶ້ນ
ໃຫ້ເປັນພູເຂົາທີ່ສູງທີ່ສຸດເໜືອພູເຂົາທັງຫລາຍ;
ວິຫານຈະໄດ້ຮັບການຍົກຂຶ້ນເໜືອບັນດາເນີນພູທັງຫລາຍ,
ແລະ ຊົນຊາດທັງໝົດຈະຫລັ່ງໄຫລໄປທີ່ນັ້ນ.
ປະຊາຊາດທັງຫລາຍຈະມາ ແລະ ກ່າວວ່າ,
“ຈົ່ງມາ, ໃຫ້ພວກເຮົາຂຶ້ນໄປເທິງພູເຂົາຂອງພຣະເຈົ້າຢາເວ,
ໄປທີ່ວິຫານຂອງພຣະເຈົ້າຂອງຢາໂຄບ.
ພຣະອົງຈະສອນວິຖີທາງຂອງພຣະອົງໃຫ້ພວກເຮົາ,
ເພື່ອພວກເຮົາຈະເດີນໃນວິຖີທາງຂອງພຣະອົງ”.
ກົດບັນຍັດຈະອອກມາຈາກຊີໂອນ,
ຖ້ອຍຄຳຂອງພຣະເຈົ້າຢາເວຈະອອກມາຈາກເຢຣູຊາເລັ.
ພຣະອົງຈະຕັດສິນຄວາມລະຫວ່າງຊົນຊາດທັງຫລາຍ
ແລະ ຈະຢຸດຕິກໍລະນີຜິດພາດຕ່າງໆໃຫ້ປະຊາຊົນທັງຫລາຍ.
ພວກເຂົາຈະຕີດາບໃຫ້ເປັນໝາກກະສົບໄຖ
ແລະ ຕີຫອກໃຫ້ເປັນມີດຕັດຕົ້ນໄມ້.
ຊົນຊາດຈະບໍ່ຍົກດາບຂຶ້ນຕໍ່ສູ້ຊົນຊາດອື່ນ,
ທັງຈະບໍ່ມີການຝຶກສູ້ຮົບອີກຕໍ່ໄປ.
ຈົ່ງມາ, ເຊື້ອສາຍຂອງຢາໂຄບ,
ໃຫ້ພວກເຮົາເດີນໃນແສງສະຫວ່າງຂອງພຣະເຈົ້າຢາເວ.
ວັນແຫ່ງພຣະເຈົ້າຢາເວ
ພຣະອົງ, ພຣະເຈົ້າຢາເວ, ໄດ້ປະຖິ້ມປະຊາຊົນຂອງພຣະອົງ,
ຄືເຊື້ອສາຍຂອງຢາໂຄບ.
ພວກເຂົາເຕັມໄປດ້ວຍຄວາມເຊື່ອເລື່ອງໂຊກຊະຕາຈາກຕາເວັນອອກ;
ພວກເຂົາທໍານວາຍໂຊກຊະຕາຄືຊາວຟີລິດສະຕິນ
ແລະ ຍອມຮັບປະເພນີຂອງຄົນທີ່ບໍ່ນັບຖືພຣະເຈົ້າ.
ດິນແດນຂອງພວກເຂົາເຕັມໄປດ້ວຍເງິນ ແລະ ຄໍາ;
ຊັບສົມບັດຂອງພວກເຂົາບໍ່ມີທີ່ສິ້ນສຸດ.
ດິນແດນຂອງພວກເຂົາເຕັມໄປດ້ວຍມ້າ;
ລົດຣົບຂອງພວກເຂົາບໍ່ມີທີ່ສິ້ນສຸດ.
ດິນແດນຂອງພວກເຂົາເຕັມໄປດ້ວຍຮູບເຄົາລົບ;
ພວກເຂົາກົ້ມກາບສິ່ງທີ່ໂຕເອງສ້າງຂຶ້ນ,
ສິ່ງທີ່ເຮັດຂຶ້ນດ້ວຍມືຂອງພວກເຂົາ.
ດັ່ງນັ້ນມະນຸດຈະຖືກເຮັດໃຫ້ຕົກຕ່ຳລົງ
ແລະ ທຸກຄົນໄດ້ຖ່ອມຕົວລົງ
ຢ່າອະໄພໃຫ້ພວກເຂົາ1.
ຈົ່ງເຂົ້າໄປໃນໂງ່ນຫີນທັງຫລາຍ, ເຊື່ອງໂຕຢູ່ໃນພື້ນດິນ
ໃຫ້ພົ້ນຈາກການປາກົດຕົວທີ່ໜ້າຢ້ານກົວຂອງພຣະເຈົ້າຢາເວ
ແລະ ຈາກຄວາມຍິ່ງໃຫຍ່ແຫ່ງພຣະບາລະມີຂອງພຣະອົງ!
ສາຍຕາຂອງຄົນຈອງຫອງຈະຖ່ອມຕົວລົງ
ແລະ ຄວາມຈອງຫອງຂອງມະນຸດຈະຕໍ່າລົງ;
ໃນວັນນັ້ນພຣະເຈົ້າຢາເວພຽງຜູ້ດຽວຈະຖືກຍົກຂຶ້ນ.
ພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່ໄດ້ຕຽມວັນນັ້ນໄວ້
ສຳລັບບັນດາຄົນຍິ່ງ ແລະ ຈອງຫອງ,
ສຳລັບທຸກສິ່ງທີ່ເປັນທີ່ຍົກຍ້ອງເທີດທູນ
(ແລະສິ່ງເຫລົ່ານັ້ນຈະຖ່ອມຕົວລົງ),
ສຳລັບຕົ້ນໄມ້ສີດາແຫ່ງເລບານອນ, ອັນສູງ ແລະ ສະຫງ່າງາມ,
ແລະ ສຳລັບບັນດາຕົ້ນໂອກແຫ່ງບາຊານ,
ສຳລັບພູເຂົາທີ່ສູງທັງໝົດ
ແລະ ເນີນພູສູງທັງໝົດ,
ສຳລັບຫໍຄອຍສູງສະຫງ່າທຸກແຫ່ງ
ແລະ ສຳລັບປ້ອມປ້ອງກັນອັນແຂງແຮງທຸກບ່ອນ,
ສຳລັບເຮືອຄ້າຂາຍ2 ທຸກລຳຂອງຕາກຊິດ
ແລະ ເຮືອທີ່ງົດງາມທັງໝົດ.
ຄວາມຍິ່ງອວດອົ່ງຈອງຫອງຂອງມະນຸດຈະຕົກຕ່ຳລົງ;
ຄວາມອວດອົ່ງທະນົງຕົວຂອງມະນຸດຈະຖ່ອມຕົວລົງ;
ໃນວັນນັ້ນພຣະເຈົ້າຢາເວພຽງຜູ້ດຽວຈະເປັນທີ່ຍົກຍ້ອງ,
ແລະ ຮູບເຄົາລົບຈະສູນຫາຍໄປ.
ຄົນທັງຫລາຍຈະໜີເຂົ້າໄປລີ້ຕາມຖ້ຳ
ຕາມໂງ່ນຫີນ ແລະ ໃນພື້ນດິນ
ໃຫ້ພົ້ນຈາກການມາປາກົດຕົວທີ່ໜ້າຢ້ານກົວຂອງພຣະເຈົ້າຢາເວ
ແລະ ຈາກຄວາມຍິ່ງໃຫຍ່ແຫ່ງພຣະບາລະມີຂອງພຣະອົງ!,
ເມື່ອພຣະອົງລຸກຂຶ້ນມາສັ່ນໂລກ.
ໃນວັນນັ້ນມະນຸດຈະຖິ້ມ
ຮູບເຄົາລົບເງິນ ແລະ ຄໍາ,
ທີ່ຕົນໄດ້ສ້າງຂຶ້ນເພື່ອນະມັດສະການນັ້ນ.
ໃຫ້ແກ່ໜູ ແລະ ເຈຍ.
ພວກເຂົາຈະໜີເຂົ້າໄປໃນຖໍ້າ
ແລະ ຢູ່ໃນໂງ່ນຫີນຕາມເນີນພູ
ໃຫ້ພົ້ນຈາກການປາກົດຕົວທີ່ໜ້າຢ້ານກົວຂອງພຣະເຈົ້າຢາເວ,
ແລະ ຈາກຄວາມຍິ່ງໃຫຍ່ແຫ່ງພຣະບາລະມີຂອງພຣະອົງ,
ເມື່ອພຣະອົງລຸກຂຶ້ນມາສັ່ນໂລກ.
ຈົ່ງຢຸດໄວ້ວາງໃຈໃນມະນຸດ,
ຜູ້ທີ່ມີແຕ່ລົມຫາຍໃຈຢູ່ໃນຮູດັງຂອງພວກເຂົາ.
ເປັນຫຍັງຈຶ່ງນັບຖືພວກເຂົາ?
Source notes (2)
- Footnote ຫລື ຢ່າຍົກພວກເຂົາຂຶ້ນເລີຍ
- Footnote ພາສາເຮັບເຣີວ່າ ເຮືອຂອງຕາຣະຊິດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.