ເອຊາຢາ 18

ຄຳ​ທຳນວາຍ​ຕໍ່ສູ້​ກູເຊ

1ວິບັດ​ແກ່​ດິນແດນ​ຕັກແຕນ1

ລຽບ​ຕາມ​ແມ່ນ້ຳ​ຂອງ​ກູເຊ,2

2ທີ່​ສົ່ງ​ທູດ​ມາ​ທາງ​ທະເລ

ໂດຍ​ເຮືອ​ທີ່​ເຮັດ​ດ້ວຍ​ຕົ້ນອໍ້​ເທິງ​ໜ້າ​ນໍ້າ.

ຈົ່ງ​ໄປ, ຜູ້​ສົ່ງ​ຂ່າວ​ທີ່​ວ່ອງໄວ,

ຈົ່ງ​ໄປ​ຫາ​ຊົນຊາດ​ທີ່​ໂຕ​ສູງ ແລະ ຜິວ​ກ້ຽງ,

ເຊິ່ງ​ເປັນ​ທີ່​ໜ້າ​ຢຳເກງ​ທັງ​ໃກ້ ແລະ ໄກ,

ຊົນຊາດ​ທີ່​ຫົວແຂງ ແລະ ມີ​ສຳນຽງ​ພາສາ​ແປກໆ,

ທີ່​ດິນແດນ​ຂອງ​ພວກເຂົາ​ຖືກ​ແບ່ງ​ແຍກ​ດ້ວຍ​ແມ່ນ້ຳ.

3ປະຊາຊົນ​ທັງໝົດ​ໃນ​ໂລກ,

ທຸກຄົນ​ທີ່​ມີ​ຊີວິດ​ຢູ່​ໃນ​ໂລກ,

ເມື່ອ​ທຸງ​ຜືນ​ໜຶ່ງ​ຖືກ​ຍົກ​ຂຶ້ນ​ເໜືອ​ພູເຂົາ​ທັງຫລາຍ,

ພວກເຈົ້າ​ຈະ​ໄດ້​ເຫັນ​ມັນ,

ແລະ ເມື່ອ​ສຽງ​ແກ​ດັ່ງ​ຂຶ້ນ,

ພວກເຈົ້າ​ຈະ​ໄດ້​ຍິນ​ມັນ.

4ນີ້​ແມ່ນ​ສິ່ງ​ທີ່​ພຣະເຈົ້າ​ຢາເວ​ກ່າວ​ກັບ​ຂ້າພະເຈົ້າ​ວ່າ:

“ເຮົາ​ຈະ​ຫງຽບ​ຢູ່ ແລະ ເບິ່ງ​ຈາກ​ບ່ອນ​ຢູ່​ຂອງ​ເຮົາ,

ເໝືອນ​ຄວາມ​ຮ້ອນ​ມິບ​ມັບ​ໃນ​ແສງແດດ,

ເໝືອນ​ເມກ​ນໍ້າຄ້າງ​ກາງ​ແດດ​ໃນ​ລະດູ​ເກັບກ່ຽວ”.

5ເພາະ​ກ່ອນ​ການ​ເກັບກ່ຽວ, ເມື່ອ​ດອກ​ບານ​ໝົດ​ລ່ວງ​ໄປ​ແລ້ວ

ແລະ ດອກ​ກາຍເປັນ​ໝາກ​ອະງຸ່ນ​ສຸກ,

ພຣະອົງ​ຈະ​ລິ​ຂະແໜງ​ນັ້ນ​ດ້ວຍ​ມີດ,

ແລະ ຕັດ​ກິ່ງ​ກ້ານ​ຖິ້ມ.

6ພວກເຂົາ​ທັງໝົດ​ຈະ​ຖືກ​ຖິ້ມ​ໄວ້​ເທິງ​ພູເຂົາ​ໃຫ້​ນົກ​ລ່າ​ເຫຍື່ອ

ແລະ ໃຫ້​ສັດປ່າ​ທັງຫລາຍ;

ຝູງນົກ​ຈະ​ເຈາະ​ກິນ​ຊາກສົບ​ຕະຫລອດ​ລະດູ​ຮ້ອນ,

ແລະ ສັດປ່າ​ຈະ​ກິນ​ຊາກສົບ​ຕະຫລອດ​ລະດູ​ໜາວ.

7ໃນ​ເວລາ​ນັ້ນ​ຈະ​ມີ​ຂອງຂັວນ​ມາ​ຖວາຍ​ພຣະເຈົ້າ​ຢາເວ ຜູ້​ມີ​ລິດ​ອໍານາດ​ຍິ່ງໃຫຍ່

ພວກເຂົາ​ເປັນ​ຊົນຊາດ​ທີ່​ໂຕ​ສູງ ແລະ ຜິວ​ກ້ຽງ,

ເຊິ່ງ​ເປັນ​ທີ່​ໜ້າ​ຢຳເກງ​ທັງ​ໃກ້ ແລະ ໄກ,

ຈາກ​ຊົນຊາດ​ທີ່​ຫົວແຂງ ແລະ ມີ​ສຳນຽງ​ພາສາ​ແປກໆ,

ເຊິ່ງ​ດິນແດນ​ຂອງ​ພວກເຂົາ​ຖືກ​ແບ່ງ​ແຍກ​ດ້ວຍ​ແມ່ນ້ຳ

ພວກເຂົາ​ຈະ​ນຳ​ຂອງຂັວນ​ມາ​ຖວາຍ​ທີ່​ພູເຂົາ​ຊີໂອນ, ຄື​ສະຖານທີ່​ແຫ່ງ​ນາມ​ຂອງ​ພຣະເຈົ້າ​ຢາເວ ຜູ້​ມີ​ລິດ​ອໍານາດ​ຍິ່ງໃຫຍ່.