Biblica® Open Lao Contemporary Version
ເອຊາຢາ 15
ຄຳທຳນວາຍຕໍ່ສູ້ໂມອາບ
(ຢມຢ 48:29-36)
ຄໍາທໍານວາຍຕໍ່ສູ້ໂມອາບມີດັ່ງນີ້:
ນະຄອນອາຣະໃນໂມອາບໄດ້ຖືກທຳລາຍ,
ຈິບຫາຍໃນຄືນດຽວ!
ນະຄອນກີຣະໃນໂມອາບໄດ້ຖືກທຳລາຍ,
ຈິບຫາຍໃນຄືນດຽວ!
ຊາວດີໂບນຂຶ້ນໄປຍັງວິຫານ,
ຂຶ້ນໄປເທິງບ່ອນສູງທັງຫລາຍເພື່ອຮ້ອງໄຫ້;
ໂມອາບໄວ້ອາໄລໃຫ້ເນໂບ ແລະ ເມເດບາ.
ທຸກຄົນໄດ້ແຖຫົວ
ແລະ ທຸກຄົນໄດ້ແຖໜວດເຄົາ.
ຕາມຖະໜົນ ພວກເຂົາໃສ່ຜ້າກະສອບເຂົ້າ;
ເທິງຫລັງຄາ ແລະ ຕາມເດີ່ນສາທາລະນະ
ພວກເຂົາທັງໝົດຮ້ອງຄ່ຳຄວນ,
ແລະ ໝອບລົງຮ້ອງໄຫ້.
ຊາວເຮັດຊະໂບນ ແລະ ເອເລອາເລສົ່ງສຽງຮ້ອງໄຫ້,
ສຽງຮ້ອງໄຫ້ຂອງພວກເຂົາໄດ້ຍິນໄກຮອດຢາຮາດ.
ເຫດສະນັ້ນ ນັກຮົບຂອງໂມອາບຈຶ່ງຮ້ອງໄຫ້ອອກມາ,
ແລະ ຫົວໃຈກໍອ່ອນແຮງ.
ຫົວໃຈຂອງເຮົາຮ້ອງໄຫ້ໃຫ້ກັບໂມອາບ;
ຜູ້ລີ້ໄພຂອງນາງໜີໄປໄກຮອດໂຊອາ,
ໄກຮອດເອັກລາດເຊລິດຊີຢາ.
ພວກເຂົາຂຶ້ນໄປຕາມທາງສູ່ລູຮິດ,
ທັງໄປທັງຮ້ອງໄຫ້;
ພວກເຂົາຄ່ຳຄວນກ່ຽວກັບຄວາມຈິບຫາຍຂອງຕົນ.
ໄປຕະຫລອດທາງສູ່ໂຮໂຣນາອິມ
ຫ້ວຍນ້ຳນິມຣິມໄດ້ແຫ້ງ
ແລະ ຫຍ້າກໍຫ່ຽວແຫ້ງ;
ພືດພັນກໍໝົດໄປ
ແລະ ບໍ່ມີສິ່ງຂຽວອັນໃດເຫລືອຢູ່.
ດັ່ງນັ້ນ ຊັບສິນທີ່ພວກເຂົາຫາມາໄດ້ ແລະ ເກັບສະສົມໄວ້
ພວກເຂົາກໍແບກຂ້າມຫ້ວຍນໍ້າຂອງຮ່ອມພູແຫ່ງຕົ້ນປໍປາໄປ.
ສຽງຮ້ອງຂອງພວກເຂົາດັ່ງກ້ອງໄປຕະຫລອດຊາຍແດນໂມອາບ;
ສຽງຄວນຄາງຂອງພວກເຂົາໄປໄກຮອດເອັກລາອີມ,
ສຽງຄ່ຳຄວນຮ້ອງໄຫ້ດັ່ງໄປຮອດເບເອເຣລີມ.
ຫ້ວຍນ້ຳດີໂບນ1 ເຕັມໄປດ້ວຍເລືອດ,
ແຕ່ເຮົາຍັງຈະສືບຕໍ່ນໍາສິ່ງຕ່າງໆມາສູ່ດີໂບນອີກ
ສິງໂຕໜຶ່ງຈະຕາມລ່າຜູ້ລີ້ໄພຊາວໂມອາບ
ແລະ ໄລ່ລ່າຜູ້ທີ່ຍັງເຫລືອຢູ່ໃນດິນແດນ.
Source notes (1)
- Footnote ສຳເນົາ LXX. ບາງສະບັບ ແລະ ສະບັບ LXX. ແລະ Vulg. ວ່າ ດີໂບນ ທັງສອງແຫ່ງໃນຂໍ້ນີ້
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.