Biblica® Open Lao Contemporary Version
ເອຊາຢາ 14
ພຣະເຈົ້າຢາເວຈະໃຫ້ຄວາມເມດຕາຕໍ່ຢາໂຄບ;
ພຣະອົງຈະເລືອກອິດສະຣາເອນໄວ້ອີກຄັ້ງ
ແລະ ຈະໃຫ້ພວກເຂົາຕັ້ງຖິ່ນຖານໃນດິນແດນຂອງພວກເຂົາເອງ.
ຄົນຕ່າງຊາດຈະຢູ່ຮ່ວມກັບພວກເຂົາ
ແລະ ຮ່ວມກັນກັບເຊື້ອສາຍຂອງຢາໂຄບ.
ຊົນຊາດຕ່າງໆຈະຍອມຮັບພວກເຂົາ
ແລະ ນຳພວກເຂົາກັບຄືນມາສູ່ດິນແດນຂອງພວກເຂົາເອງ.
ແລະ ອິດສະຣາເອນຈະຄອບຄອງຊົນຊາດຕ່າງໆ
ແລະ ເຮັດໃຫ້ພວກເຂົາເປັນຜູ້ຮັບໃຊ້ຊາຍ ແລະ ຍິງໃນດິນແດນຂອງພຣະເຈົ້າຢາເວ.
ພວກຜູ້ທີ່ຈັບອິດສະຣາເອນເປັນຊະເລີຍຈະເປັນຊະເລີຍຂອງອິດສະຣາເອນ
ແລະ ອິດສະຣາເອນຈະປົກຄອງພວກທີ່ກົດຂີ່ພວກເຂົາ.
ໃນມື້ທີພຣະເຈົ້າຢາເວໃຫ້ພວກເຈົ້າພົ້ນຈາກຄວາມທຸກທໍລະມານ ແລະ ຄວາມວຸ້ນວາຍຂອງພວກເຈົ້າ ແລະ ຈາກການຖືກບັງຄັບໃຫ້ພວກເຈົ້າເຮັດວຽກຢ່າງໜັກໜ່ວງ, ພວກເຈົ້າຈະເວົ້າເຢາະເຢີ້ຍຕໍ່ກະສັດແຫ່ງບາບີໂລນວ່າ:
ຜູ້ທີ່ກົດຂີ່ມາເຖິງຈຸດຈົບໄດ້ແນວໃດ!
ຄວາມຮ້ອນຮົນຂອງລາວໝົດໄປໄດ້ແນວໃດ!
ພຣະເຈົ້າຢາເວໄດ້ຫັກໄມ້ແສ້ຂອງຄົນຊົ່ວຮ້າຍ,
ຫັກໄມ້ຄ້ອນເທົ້າຂອງພວກຜູ້ປົກຄອງ,
ທີ່ໂຈມຕີປະຊາຊົນທັງຫລາຍດ້ວຍຄວາມໃຈຮ້າຍ
ຢ່າງບໍ່ຢຸດເຊົາ,
ແລະ ເອົາຊະນະຊົນຊາດຕ່າງໆ
ດ້ວຍການໂຈມຕີຢ່າງໂຫດຮ້າຍ.
ດິນແດນທັງໝົດກໍຢຸດພັກ ແລະ ສະຫງົບສຸກ;
ພວກເຂົາກໍເປັ່ງສຽງຮ້ອງເພງ.
ແມ່ນແຕ່ຕົ້ນສົນຕ່າງໆ ແລະ ຕົ້ນໄມ້ສີດາແຫ່ງເລບານອນ
ກໍຊົມຊື່ນຍິນດີ ແລະ ເວົ້າວ່າ,
“ບັດນີ້ ເຈົ້າໄດ້ຕົກຕ່ຳລົງແລ້ວ,
ບໍ່ມີຜູ້ໃດຕັດພວກເຮົາລົງ”.
ແດນມໍລະນາເບື້ອງລຸ່ມທັງໝົດກໍລຸກຂຶ້ນ
ເພື່ອຕ້ອນຮັບການມາຂອງເຈົ້າ;
ມັນປຸກວິນຍານຂອງຜູ້ທີ່ຈາກໄປຂຶ້ນມາເພື່ອທັກທາຍເຈົ້າ
ຄື ທຸກຄົນທີ່ເຄີຍເປັນຜູ້ນຳໃນໂລກ;
ມັນເຮັດໃຫ້ບັນດາກະສັດລຸກຂຶ້ນມາຈາກບັນລັງຂອງພວກເຂົາ.
ຄື ທຸກຄົນທີ່ເຄີຍເປັນກະສັດປົກຄອງເໜືອຊົນຊາດຕ່າງໆ.
ພວກເຂົາທັງໝົດຈະຮ້ອງອອກມາ,
ພວກເຂົາຈະເວົ້າກັບເຈົ້າວ່າ,
“ບັດນີ້ເຈົ້າກໍໄດ້ກາຍເປັນຄົນອ່ອນແອຄືກັນກັບພວກເຮົາ;
ເຈົ້າໄດ້ກາຍເປັນເໝືອນພວກເຮົາ”.
ຄວາມຈອງຫອງທັງໝົດຂອງເຈົ້າໄດ້ນໍາລົງໄປສູ່ຂຸມຝັງສົບ,
ພ້ອມທັງສຽງພິນຂອງເຈົ້າ;
ໜອນຈະກະຈາຍໄປທົ່ວຕົວຂອງເຈົ້າ
ແລະ ໜອນປົກຄຸມໂຕຂອງເຈົ້າ.
ໂອ ດາວຮຸ່ງອາລຸນ, ລູກແຫ່ງຮຸ່ງອາລຸນ,
ເຈົ້າໄດ້ຕົກລົງມາຈາກຟ້າສະຫວັນແລ້ວນໍ!
ຄັ້ງໜຶ່ງເຈົ້າເຄີຍເຮັດໃຫ້ບັນດາຊົນຊາດຕ່າງໆຕົກຕ່ຳລົງ,
ແຕ່ບັດນີ້ເຈົ້າຖືກໂຍນຖິ້ມລົງມາສູ່ແຜ່ນດິນໂລກແລ້ວ!
ເຈົ້າໄດ້ເວົ້າຢູ່ໃນໃຈຂອງເຈົ້າວ່າ,
“ຂ້ອຍຈະຂຶ້ນໄປສະຫວັນ;
ຂ້ອຍຈະຕັ້ງບັນລັງຂອງຂ້ອຍຂຶ້ນ
ເໜືອດວງດາວຕ່າງໆຂອງພຣະເຈົ້າ;
ຂ້ອຍຈະຂຶ້ນນັ່ງເທິງບັນລັງເໜືອພູເຂົາແຫ່ງການຊຸມນຸມ,
ເທິງຍອດສູງສຸດຂອງພູເຂົາສັກສິດ.1
ຂ້ອຍຈະຂຶ້ນໄປເທິງເໜືອເມກ;
ຂ້ອຍຈະເຮັດໃຫ້ຕົນເອງເປັນເໝືອນອົງຜູ້ສູງສຸດ”.
ແຕ່ເຈົ້າຖືກນຳລົງມາສູ່ແດນມໍລະນາ,
ລົງມາສູ່ຂຸມເລິກທີ່ສຸດ.
ບັນດາຜູ້ທີ່ເຫັນເຈົ້າກໍແນມເບິ່ງເຈົ້າ,
ພວກເຂົາຄິດເຖິງຊະຕາກໍາຂອງເຈົ້າວ່າ:
“ຄົນນີ້ບໍທີ່ສັ່ນແຜ່ນດິນໂລກ
ແລະ ເຮັດໃຫ້ອານາຈັກຕ່າງໆສັ່ນສະທ້ານ?
ຄົນຜູ້ທີ່ເຮັດໃຫ້ໂລກເປັນຖິ່ນແຫ້ງແລ້ງກັນດານ,
ຜູ້ທີ່ທຳລາຍເມືອງຕ່າງໆ
ແລະ ບໍ່ຍອມປ່ອຍຊະເລີຍທັງຫລາຍຂອງຕົນກັບຄືນເມືອບ້ານ?”.
ບັນດາກະສັດທັງໝົດຂອງຊົນຊາດຕ່າງໆນອນຢູ່ໃນຂຸມຝັງສົບ,
ແຕ່ລະຄົນນອນຢູ່ໃນຂຸມຂອງຕົນ.
ແຕ່ເຈົ້າຈະຖືກໄລ່ອອກມາຈາກຂຸມຝັງສົບຂອງເຈົ້າ
ເໝືອນດັ່ງຫງ່າໄມ້ຫັກ;
ເຈົ້າຈະຖືກຖົມດ້ວຍຊາກສົບຂອງຄົນທີ່ຖືກຂ້າ,
ລວມກັນກັບຜູ້ທີ່ໄດ້ຕາຍໄປຍ້ອນຄົມດາບ,
ພວກຜູ້ທີ່ໂຍນລົງໄປສູ່ພື້ນຫີນຂຸມເລິກ.
ເໝືອນດັ່ງຊາກສົບທີ່ຖືກຢຽບຢໍ່າ,
ເຈົ້າຈະບໍ່ໄດ້ຖືກຝັງສົບໄວ້ຮ່ວມກັນກັບພວກເຂົາ,
ເພາະເຈົ້າໄດ້ທຳລາຍລ້າງດິນແດນຂອງເຈົ້າ
ແລະ ຂ້າປະຊາຊົນຂອງເຈົ້າ.
ຢ່າໃຫ້ລູກຫລານຂອງຄົນຊົ່ວຮ້າຍ
ຖືກກ່າວເຖິງອີກ.
ຈົ່ງຕຽມບ່ອນສຳລັບການຂ້າພວກລູກຂອງລາວ;
ເພາະບາບຂອງບັນພະບຸລຸດຂອງພວກເຂົາ;
ພວກເຂົາຈະບໍ່ໄດ້ຂຶ້ນມາຄອບຄອງດິນແດນນັ້ນ
ແລະ ປົກຄຸມໂລກດ້ວຍເມືອງຕ່າງໆຂອງພວກເຂົາ.
ພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່ປະກາດວ່າ,
“ເຮົາຈະລຸກຂຶ້ນມາຕໍ່ສູ້ພວກເຂົາ.
ເຮົາຈະຕັດຊື່ຄົນທີ່ເຫລືອຢູ່,
ທັງລູກຫລານ ແລະ ເຊື້ອສາຍອອກຈາກບາບີໂລນ”,
ພຣະເຈົ້າຢາເວປະກາດດັ່ງນັ້ນ.
“ເຮົາຈະປ່ຽນບາບີໂລນໃຫ້ກາຍເປັນບ່ອນຢູ່ຂອງນົກເຄົ້າ
ແລະໃຫ້ເປັນໜອງບຶງ;
ເຮົາຈະກວາດດິນແດນນີ້ດ້ວຍຟອຍແຫ່ງການທໍາລາຍ”.
ພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່ປະກາດດັ່ງນັ້ນ.
ຄຳທຳນວາຍຕໍ່ສູ້ອັດຊີເຣຍ
ພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່ໄດ້ສາບານໄວ້ວ່າ,
“ແນ່ນອນ, ເຮົາວາງແຜນໄວ້ຢ່າງໃດ, ມັນຈະເປັນຢ່າງນັ້ນແນ່ນອນ,
ແລະ ເຮົາປະສົງຢ່າງໃດ, ມັນຈະເກີດຂຶ້ນຕາມນັ້ນ.
ເຮົາຈະບົດກອງທັບອັດຊີເຣຍໃນດິນແດນຂອງເຮົາ;
ເຮົາຈະຢຽບພວກເຂົາລົງທີ່ພູເຂົາຂອງເຮົາ.
ແອກຂອງພວກເຂົາຈະຖືກຍົກອອກໄປຈາກປະຊາຊົນຂອງເຮົາ,
ແລະ ພາລະໜັກຂອງພວກເຂົາຈະຖືກກໍາຈັດອອກໄປຈາກບ່າຂອງພວກເຂົາ”.
ນີ້ແມ່ນແຜນການທີ່ກຳນົດໄວ້ສຳລັບຄົນທັງໂລກ;
ນີ້ຄືມືທີ່ຢຽດອອກເໜືອຊົນຊາດທັງໝົດ.
ເພາະພຣະເຈົ້າຢາເວອົງຜູ້ມີລິດອໍານາດຍິ່ງໃຫຍ່ໄດ້ກຳນົດໄວ້, ແລະ ຜູ້ໃດຈະເຮັດໃຫ້ພຣະອົງປ່ຽນໃຈໄດ້?
ມືຂອງພຣະອົງໄດ້ຢຽດອອກ, ແລະ ຜູ້ໃດຈະເຮັດໃຫ້ພຣະອົງຫົດມືກັບໄປ?
ຄຳທຳນວາຍຕໍ່ສູ້ຟີລິດສະຕິນ
ໃນປີທີ່ກະສັດອາຮາດຕາຍ ມີຄໍາສັ່ງຈາກພຣະເຈົ້າດັ່ງນີ້ວ່າ:
ຊາວຟີລິດສະຕິນທັງໝົດ, ຢ່າຍິນດີ,
ວ່າໄມ້ຄ້ອນທີ່ຕີເຈົ້ານັ້ນຫັກແລ້ວ;
ຈາກຮາກເຫງົ້າຂອງງູໂຕນັ້ນຈະເກີດງູພິດ,
ເປັນງູເຫົ່າພິດຮ້າຍທີ່ຈອບກັດ.
ຜູ້ທຸກຍາກທີ່ສຸດຈະພົບທົ່ງຫຍ້າ,
ແລະ ຄົນຂັດສົນຈະນອນລົງຢ່າງປອດໄພ.
ແຕ່ເຮົາຈະທຳລາຍຮາກຂອງເຈົ້າດ້ວຍການກັນດານອາຫານ;
ມັນຈະຜານຊີວິດພວກເຈົ້າທີ່ເຫລືອ.
ປະຕູເມືອງ, ຈົ່ງຮ້ອງໄຫ້! ນະຄອນເຈົ້າ, ຈົ່ງຄ່ຳຄວນ!
ຊາວຟີລິດສະຕິນທັງໝົດ! ຈົ່ງຢ້ານກົວ!
ຄວັນຂຶ້ນມາຈາກທິດເໜືອ,
ແລະ ບໍ່ມີຜູ້ໃດຫລົງເຂົ້າມາໃນແຖວນັ້ນຈັກຄົນ.
ຈະຕອບຄະນະທູດ
ຂອງຊົນຊາດນັ້ນວ່າແນວໃດ?
“ພຣະເຈົ້າຢາເວໄດ້ຕັ້ງຊີໂອນໄວ້,
ແລະ ຄົນທີ່ທຸກລຳບາກໃນເມືອງນັ້ນຈະພົບບ່ອນລີ້ໄພ”.
Source notes (1)
- Footnote ຫລື ທາງທິດເໜືອ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.