Biblica® Open Lao Contemporary Version
ເອຊາຢາ 13
ຄຳທຳນວາຍຕໍ່ສູ້ບາບີໂລນ
ຄໍາທໍານວາຍຕໍ່ສູ້ບາບີໂລນທີ່ເອຊາຢາລູກຊາຍຂອງອາໂມດໄດ້ເຫັນນິມິດມີຄື:
ຈົ່ງຍົກທຸງຂຶ້ນເທິງພູຫົວໂຫລ້ນ,
ຈົ່ງຮ້ອງໃສ່ພວກເຂົາ;
ຈົ່ງສົ່ງສັນຍານໃຫ້ພວກເຂົາ
ເຂົ້າມາທາງປະຕູຂອງບັນດາເຈົ້ານາຍ.
ເຮົາໄດ້ສັ່ງບັນດາຜູ້ທີ່ເຮົາໄດ້ຕຽມພ້ອມໄວ້ແລ້ວສໍາຫລັບການສູ້ຮົບ;
ເຮົາໄດ້ເອີ້ນປະຊຸມພວກທະຫານຂອງເຮົາເພື່ອຈັດການກັບຄວາມໂກດຮ້າຍຂອງເຮົາ
ຄືຜູ້ທີ່ຍິນດີໃນໄຊຊະນະຂອງເຮົາ.
ຈົ່ງຟັງ, ສຽງຢູ່ເທິງພູ,
ຄືສຽງຂອງຝູງຄົນທີ່ໜາແໜ້ນ!
ຈົ່ງຟັງ, ສຽງວຸ້ນວາຍທ່າມກາງອານາຈັກຕ່າງໆ,
ຄືສຽງຂອງບັນດາຊົນຊາດຕ່າງໆກໍາລັງຊຸມນຸມກັນ!
ພຣະເຈົ້າຢາເວຜູ້ມີລິດອໍານາດຍິ່ງໃຫຍ່
ໄດ້ຕຽມທະຫານມາເພື່ອສູ້ຮົບ.
ພວກເຂົາມາຈາກດິນແດນໄກ,
ຈາກສຸດຂອບຟ້າ
ຄືພຣະເຈົ້າຢາເວ ແລະ ອາວຸດແຫ່ງຄວາມໂກດຮ້າຍຂອງພຣະອົງ
ເພື່ອທຳລາຍປະເທດທັງໝົດ.
ຈົ່ງຮ້ອງໄຫ້, ເພາະວັນຂອງພຣະເຈົ້າຢາເວມາໃກ້ແລ້ວ;
ວັນນັ້ນຈະມາເຖິງເໝືອນດັ່ງຄວາມຈິບຫາຍຈາກອົງຜູ້ມີລິດອໍານາດຍິ່ງໃຫຍ່.
ດ້ວຍເຫດນີ້, ທຸກແຂນຈະອ່ອນຫລ່ອຍ,
ຫົວໃຈທຸກດວງຈະຫົດດ້ວຍຄວາມຢ້ານ.
ຄວາມຢ້ານກົວຈະໂຈມຕີພວກເຂົາ,
ຄວາມເຈັບປວດ ແລະ ທຸກທໍລະມານຈະເກາະຫຸ້ມພວກເຂົາ;
ພວກເຂົາບິດໂຕໄປມາດັ່ງແມ່ຍິງເຈັບທ້ອງໃກ້ຈະເກີດລູກ.
ພວກເຂົາຈະເບິ່ງໜ້າກັນ ແລະ ກັນດ້ວຍຄວາມຕົກໃຈ,
ສີໜ້າຂອງພວກເຂົາກໍແດງເຂັ້ມ.
ຈົ່ງເບິ່ງ, ວັນຂອງພຣະເຈົ້າຢາເວເຂົ້າມາໃກ້
ເປັນວັນແຫ່ງຄວາມໂຫດຮ້າຍ, ມາພ້ອມກັບຄວາມຄຽດ ແລະ ຄວາມໂກດຮ້າຍອັນຮຸນແຮງ
ເພື່ອເຮັດໃຫ້ດິນແດນນັ້ນຮ້າງເປົ່າ
ແລະ ທຳລາຍຄົນບາບທັງໝົດທີ່ຢູ່ທີ່ນັ້ນ.
ບັນດາດວງດາວເທິງຟ້າສະຫວັນ ແລະ ດາວທັງຫລາຍ
ຈະບໍ່ສ່ອງແສງ.
ຕາເວັນທີ່ກຳລັງຂຶ້ນຈະຖືກດັບ
ແລະ ເດືອນຈະບໍ່ສ່ອງແສງ.
ເຮົາຈະລົງໂທດໂລກເພາະຄວາມຊົ່ວຮ້າຍ,
ລົງໂທດຄົນຊົ່ວເພາະບາບຂອງພວກເຂົາ.
ເຮົາຈະຢຸດຕິຄວາມຈອງຫອງຂອງຄົນອວດຕົວ
ແລະ ຈະເຮັດໃຫ້ຄວາມອວດຕົວຂອງຄົນໂຫດຮ້າຍຕ່ຳລົງ.
ເຮົາຈະເຮັດໃຫ້ມະນຸດຫາຍາກຫລາຍກວ່າຄຳບໍລິສຸດ,
ຫາຍາກຫລາຍກວ່າຄຳຂອງເມືອງໂອຟີ.
ດັ່ງນັ້ນ ເຮົາຈະເຮັດໃຫ້ຟ້າສະຫວັນສັ່ນສະເທື່ອນ;
ແລະ ໂລກຈະກະເດັນໄປຈາກທີ່ຕັ້ງຂອງມັນ
ໂດຍຄວາມໂກດຮ້າຍຂອງພຣະເຈົ້າຢາເວຜູ້ມີລິດອໍານາດຍິ່ງໃຫຍ່,
ໃນວັນແຫ່ງຄວາມໃຈຮ້າຍອັນຮຸນແຮງຂອງພຣະອົງ.
ແຕ່ລະຄົນຈະຫັນກັບໄປຫາພີ່ນ້ອງຮ່ວມຊາດ,
ຈະໜີກັບໄປບ້ານເກີດເມືອງນອນ.
ດັ່ງກວາງທີ່ຖືກລ່າ,
ດັ່ງແກະທີ່ບໍ່ມີຄົນລ້ຽງ,
ຜູ້ໃດທີ່ຖືກຈັບເປັນຊະເລີຍຈະຖືກແທງທະລຸ;
ທຸກຄົນທີ່ຖືກຈັບໄດ້ຈະລົ້ມຕາຍດ້ວຍດາບ.
ລູກນ້ອຍຂອງພວກເຂົາຈະຖືກຟາດຈົນເປັນຕ່ອນ ຕໍ່ໜ້າຕໍ່ຕາຂອງພວກເຂົາ;
ບ້ານເຮືອນຂອງພວກເຂົາຈະຖືກປຸ້ນ ແລະ ເມຍຂອງພວກເຂົາຈະຖືກຂົ່ມຂືນ.
ຈົ່ງເບິ່ງ, ເຮົາຈະເຮັດໃຫ້ຊາວເມເດັດ,
ຜູ້ບໍ່ສົນໃຈເງິນ ແລະ ບໍ່ເອົາໃຈໃສ່ຄໍາ
ມາຕໍ່ສູ້ກັບພວກເຂົາ.
ທະນູຂອງພວກເຂົາຈະຂ້າພວກຊາຍໜຸ່ມ;
ພວກເຂົາຈະບໍ່ປານີລູກນ້ອຍ,
ຫລື ເມດຕາສົງສານພວກເດັກນ້ອຍ.
ບາບີໂລນ ອັນຍະມະນີແຫ່ງອານາຈັກທັງຫລາຍ,
ສັກສີ ແລະ ຄວາມພາກພູມໃຈຂອງຊາວບາບີໂລນ,1
ຈະຖືກພຣະເຈົ້າໂຄ່ນລົ້ມ
ເໝືອນເມືອງໂຊໂດມ ແລະ ໂກໂມຣາ.
ດິນແດນຈະບໍ່ມີຜູ້ໃດມາຕັ້ງຖິ່ນຖານອີກຕໍ່ໄປ
ຫລື ບໍ່ມີຜູ້ໃດມາອາໄສຢູ່ຕະຫລອດທຸກຊົ່ວອາຍຸຄົນ;
ບໍ່ຄົນອາຣັບມາຕັ້ງເຕັນ,
ບໍ່ມີຄົນລ້ຽງແກະພາຝູງແກະມາພັກອີກ.
ແຕ່ສັດໃນທະເລຊາຍຈະນອນຢູ່ທີ່ນັ້ນ,
ບ້ານເຮືອນທັງຫລາຍຈະເຕັມໄປດ້ວຍໝາໄນ
ນົກເຄົ້າແມວຈະອາໄສຢູ່ທີ່ນັ້ນ,
ແລະ ທີ່ນັ້ນແບ້ປ່າຈະໂດດເຕັ້ນໄປມາ.
ບັນດາໝາປ່າໄຮຍີນາຈະອາໄສຢູ່ໃນປ້ອມປ້ອງກັນ,
ໝາໄນຢູ່ໃນວັງອັນງົດງາມ.
ກຳນົດເວລາຂອງມັນໃກ້ເຂົ້າມາແລ້ວ,
ແລະ ບໍ່ມີການຢືດເວລາຕໍ່ໄປອີກ.
Source notes (1)
- Footnote ຫລື ຊາວຄານເດອາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.