Biblica® Open Lao Contemporary Version
ເອຊາຢາ 11
ກິ່ງຈາກເຢຊີ
ໜໍ່ໜຶ່ງຈະງອກຂຶ້ນມາຈາກຕໍຂອງເຢຊີ;
ກິ່ງໜຶ່ງຈະເກີດຜົນຈາກຮາກຂອງເພິ່ນ.
ພຣະວິນຍານຂອງພຣະເຈົ້າຢາເວຈະສະຖິດຢູ່ກັບເພິ່ນ
ຄືອົງພຣະວິນຍານແຫ່ງສະຕິປັນຍາ ແລະ ຄວາມເຂົ້າໃຈ,
ພຣະວິນຍານແຫ່ງທີ່ປຶກສາ ແລະ ລິດອໍານາດ,
ພຣະວິນຍານແຫ່ງຄວາມຮູ້ ແລະ ຄວາມຢຳເກງພຣະເຈົ້າຢາເວ
ແລະ ເພິ່ນຜູ້ນັ້ນຈະຍິນດີໃນການຢຳເກງພຣະເຈົ້າຢາເວ.
ເພິ່ນຈະບໍ່ພິພາກສາຕາມສິ່ງທີ່ເພິ່ນໄດ້ເຫັນພາຍນອກດ້ວຍຕາຂອງເພິ່ນ,
ຫລື ຕັດສິນໃຈຕາມສິ່ງທີ່ເພິ່ນໄດ້ຍິນດ້ວຍຫູຂອງເພິ່ນ;
ແຕ່ເພິ່ນຈະພິພາກສາຄົນຂັດສົນດ້ວຍຄວາມຊອບທຳ,
ແລະ ຕັດສິນຢ່າງຍຸຕິທຳເພື່ອຄົນທຸກຍາກໃນແຜ່ນດິນໂລກ.
ເພິ່ນຈະຕີໂລກດ້ວຍຄຳພິພາກສາຈາກປາກຂອງເພິ່ນ;
ເພິ່ນຈະຂ້າຄົນຊົ່ວດ້ວຍລົມຈາກປາກຂອງເພິ່ນ.
ຄວາມຊອບທຳຈະເປັນສາຍແອວຂອງເພິ່ນ
ແລະ ຄວາມສັດຊື່ຈະເປັນສາຍມັດແອວຂອງເພິ່ນ.
ໝາປ່າກັບລູກແກະຈະອາໄສຢູ່ນໍາກັນ,
ເສືອດາວຈະນອນຢູ່ຂ້າງລູກແບ້,
ລູກງົວອ້ວນພີກັບໂຕສິງ ແລະ ລູກອ່ອນຂອງສັດອື່ນໆຈະຢູ່ຮ່ວມກັນ;1
ແລະ ເດັກນ້ອຍຄົນໜຶ່ງຈະນຳພາພວກມັນ.
ງົວແມ່ຈະກິນຫຍ້າຢູ່ກັບໝີ,
ລູກຂອງພວກມັນທັງສອງຈະນອນນໍາກັນ,
ແລະ ໂຕສິງຈະກິນເຟືອງຄືງົວ.
ເດັກນ້ອຍຈະຫລິ້ນຢູ່ໃກ້ຮູງູເຫົ່າ,
ແລະ ເດັກນ້ອຍ ຈະຍື່ນມືເຂົ້າໄປໃນຮັງຂອງງູພິດ.
ພວກມັນຈະບໍ່ເຮັດຮ້າຍ ຫລື ທຳລາຍກັນ
ຕະຫລອດທົ່ວພູເຂົາສັກສິດຂອງເຮົາ,
ເພາະແຜ່ນດິນໂລກຈະເຕັມໄປດ້ວຍຄວາມຮູ້ເລື່ອງພຣະເຈົ້າຢາເວ
ດັ່ງນ້ຳປົກຄຸມທະເລ.
ໃນວັນນັ້ນຮາກຂອງເຢຊີຈະຕັ້ງເດັ່ນຄືທຸງສຳລັບປະຊາຊົນ; ຊາດຕ່າງໆຈະລວມຕົວກັນມາຫາເພິ່ນ, ແລະ ທີ່ສະຖິດຂອງເພິ່ນຈະສະຫງ່າງາມ. ໃນວັນນັ້ນອົງພຣະຜູ້ເປັນເຈົ້າຈະຍື່ນມືອອກເປັນຄັ້ງທີສອງ ເພື່ອຮັບປະຊາຊົນຂອງພຣະອົງທີ່ເຫລືອຢູ່ນັ້ນກັບມາຈາກອັດຊີເຣຍ, ເອຢິບເທິງ2 ແລະ ເອຢິບລຸມ, ຈາກກູເຊ,3 ເອລາມ, ບາບີໂລນ,4 ຈາກຮາມັດ ແລະ ຈາກໝູ່ເກາະຕ່າງໆແຄມຝັ່ງທະເລເມດີເຕຣາເນ.
ພຣະອົງຈະຍົກທຸງຂຶ້ນເພື່ອຊົນຊາດທັງຫລາຍ
ແລະ ຮວບຮວມຊະເລີຍອິດສະຣາເອນ;
ພຣະອົງຈະເຮັດໃຫ້ຊົນຊາດຢູດາຍທີ່ກະຈັດກະຈາຍໄປ
ກັບຄືນມາຈາກສີ່ມູມໂລກ.
ຄວາມອິດສາຂອງເອຟຣາອິມຈະໝົດໄປ,
ແລະ ສັດຕູທັງຫລາຍ5 ຂອງຢູດາຍຈະຖືກທໍາລາຍ;
ເອຟຣາອິມຈະເຊົາອິດສາຢູດາຍ,
ແລະ ຢູດາຍເຊົາເປັນສັດຕູກັບເອຟຣາອິມ.
ພວກເຂົາຈະໄລ່ຕີລົງມາຕາມເນີນພູຂອງຟີລິດສະຕິນທາງຟາກຕາເວັນຕົກ;
ພວກເຂົາຈະຮ່ວມກັນປຸ້ນປະຊາຊົນນັ້ນໄປທາງຕາເວັນອອກ.
ພວກເຂົາຈະຊະນະເອໂດມ ແລະ ໂມອາບ,
ຊາວອຳໂມນຈະຍອມຢູ່ໃຕ້ອຳນາດຂອງພວກເຂົາ.
ພຣະເຈົ້າຢາເວຈະເຮັດໃຫ້ນ້ຳທະເລ
ໃນອ່າວຂອງເອຢິບແຫ້ງ;
ພຣະອົງຈະໂບກມືເໜືອ
ແມ່ນ້ຳເອີຟຣັດດ້ວຍກະແສລົມແຮງກ້າ.
ພຣະອົງຈະແຍກມັນອອກເປັນແມ່ນ້ຳເຈັດສາຍ
ເພື່ອໃຜກໍຕາມຈະສາມາດຍ່າງຂ້າມໄປໄດ້ດ້ວຍເກີບ.
ຈະມີທາງຫລວງສຳລັບຄົນທີ່ເຫລືອຢູ່ຂອງພຣະອົງ
ທີ່ລອດມາຈາກອັດຊີເຣຍ,
ດັ່ງທີ່ມີທາງຫລວງສຳລັບອິດສະຣາເອນ
ເມື່ອພວກເຂົາອອກມາຈາກເອຢິບ.
Source notes (5)
- Footnote ສະບັບ ເຊັບຕູອາຈິນ ວ່າ ລູກງົວກັບໂຕສິງຈະກິນຢູ່ນຳກັນ
- Footnote ພາສາເຮັບເຣີວ່າ ເມືອງປັດໂລດ
- Footnote ຄື ຕອນເທິງຂອງແມ່ນ້ຳນິນ
- Footnote ພາສາເຮັບເຣີວ່າ ຊີນາ
- Footnote ຫລື ຄວາມເປັນປໍລະປັກ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.