Biblica® Open Lao Contemporary Version
ໂຮເສອາ 6
ອິດສະຣາເອນບໍ່ກັບໃຈ
“ຈົ່ງມາ, ໃຫ້ພວກເຮົາກັບມາຫາພຣະເຈົ້າຢາເວ.
ເຖິງແມ່ນວ່າພຣະອົງໄດ້ຈີກພວກເຮົາເປັນຕ່ອນໆ
ແຕ່ພຣະອົງຈະຮັກສາພວກເຮົາ;
ເຖິງແມ່ນວ່າພຣະອົງໄດ້ເຮັດໃຫ້ພວກເຮົາບາດເຈັບ
ແຕ່ພຣະອົງຈະພັນບາດແຜໃຫ້ພວກເຮົາ.
ຫລັງຈາກສອງວັນ ພຣະອົງຈະຟື້ນຟູພວກເຮົາ;
ໃນວັນທີສາມ ພຣະອົງຈະໃຫ້ພວກເຮົາກັບສູ່ສະພາບດີ,
ເພື່ອພວກເຮົາຈະມີຊີວິດຢູ່ຕໍ່ໜ້າພຣະອົງ.
ໃຫ້ພວກເຮົາຍອມຮັບຮູ້ພຣະເຈົ້າຢາເວ.
ໃຫ້ພວກເຮົາບາກບັ່ນຕໍ່ໄປເພື່ອຮູ້ຈັກພຣະອົງ.
ເມື່ອຕາເວັນຂຶ້ນຈາກຟ້າສັນໃດ,
ພຣະອົງກໍຈະມາປາກົດພຣະອົງເອງສັນນັ້ນ;
ພຣະອົງຈະມາຫາພວກເຮົາເໝືອນຝົນໃນລະດູໜາວ
ເໝືອນຝົນໃນລະດູໃບໄມ້ປົ່ງທີ່ຫົດຜືນແຜ່ນດິນ”.
“ເອຟຣາອິມ, ເຮົາຈະເຮັດຫຍັງໃຫ້ເຈົ້າໄດ້?
ຢູດາ, ເຮົາຈະເຮັດຫຍັງກັບເຈົ້າດີ?
ຄວາມຮັກຂອງພວກເຈົ້າເໝືອນໝອກທີ່ບາງໃນຍາມເຊົ້າ,
ເໝືອນນ້ຳຄ້າງຍາມອາລຸນວັນໃໝ່ທີ່ເຫືອດຫາຍໄປ.
ເຫດສະນັ້ນ ເຮົາຈະມາຕັດພວກເຈົ້າເປັນຕ່ອນໆດ້ວຍຜູ້ທຳນວາຍຂອງເຮົາ,
ເຮົາຈະຂ້າພວກເຈົ້າດ້ວຍຖ້ອຍຄຳຈາກປາກຂອງເຮົາ
ຫລັງຈາກນັ້ນ ຄຳພິພາກສາຂອງເຮົາກໍຈະຈູ່ໂຈມເຂົ້າໃສ່ພວກເຈົ້າດັ່ງດວງຕາເວັນ.1
ເພາະເຮົາປະສົງຄວາມເມດຕາ, ບໍ່ແມ່ນເຄື່ອງບູຊາ,
ແລະ ເຮົາຕ້ອງການໃຫ້ພວກເຈົ້າຮູ້ຈັກເຮົາຜູ້ເປັນພຣະເຈົ້າຫລາຍກວ່າຕ້ອງການເຄື່ອງບູຊາ.
ພວກເຂົາໄດ້ທຳລາຍຄຳໝັ້ນສັນຍາຄືກັນກັບອາດາມ;2
ທີ່ນັ້ນ ພວກເຂົາບໍ່ສັດຊື່ຕໍ່ເຮົາ.
ກີເລອາດເປັນເມືອງຂອງຄົນຊົ່ວ,
ເປື້ອນໄປດ້ວຍຮອຍຕີນແຫ່ງເລືອດ.
ໂຈນດັກຖ້າປຸ້ນຄົນສັນໃດ,
ບັນດາປະໂລຫິດກໍເຮັດເຊັ່ນດຽວກັນສັນນັ້ນ;
ພວກເຂົາຂ້າຄົນເທິງເສັ້ນທາງໄປຊີເຄມ,
ສືບຕໍ່ເຮັດຊົ່ວຢ່າງໜ້າອັບອາຍ.
ຂ້າພະເຈົ້າໄດ້ເຫັນສິ່ງທີ່ຊົ່ວຮ້າຍສິ່ງໜຶ່ງ ໃນບ້ານຂອງອິດສະຣາເອນ:
ທີ່ນັ້ນ ເອຟຣາອິມຍອມປ່ອຍໂຕເປັນໂສເພນີ,
ແລະ ອິດສະຣາເອນໄດ້ເຮັດໂຕໃຫ້ເປັນມົນທິນ.
“ສ່ວນເຈົ້າ, ຢູດາ,
ເວລາແຫ່ງການເກັບກ່ຽວກໍຖືກກຳນົດໄວ້ແລ້ວ.
“ເມື່ອໃດກໍຕາມທີ່ເຮົາຈະຮື້ຟື້ນຄວາມຮຸ່ງເຮືອງຂອງປະຊາຊົນຂອງເຮົາ,
Source notes (2)
- Footnote ພາສາເຮັບເຣີ ວັກນີ້ມີຄວາມໝາຍບໍ່ຊັດເຈນ
- Footnote ຫລື ເຊັ່ນດຽວກັບທີ່ເມືອງອາດາມ ຫລື ເຊັ່ນດຽວກັບມະນຸດທັງຫລາຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.