Biblica® Open Lao Contemporary Version
ໂຮເສອາ 5
ຄຳພິພາກສາອິດສະຣາເອນ
“ບັນດາປະໂລຫິດ, ຈົ່ງຟັງ!
ປະຊາຊົນອິດສະຣາເອນ, ຈົ່ງຕັ້ງໃຈຟັງ!
ເຊື້ອສາຍຂອງກະສັດ, ຈົ່ງຟັງ!
ນີ້ແມ່ນຄຳພິພາກສາທີ່ມີມາເຖິງພວກເຈົ້າດັ່ງນີ້:
ພວກເຈົ້າເປັນກັບດັກທີ່ເມືອງມີຊະປາ,
ເປັນຕາໜ່າງທີ່ຄຶງໄວ້ຢູ່ເທິງພູເຂົາຕາໂບ.
ບັນດາກະບົດຂ້າຄົນຫລວງຫລາຍ.
ເຮົາຈະລົງໂທດພວກເຂົາທຸກຄົນ.
ເຮົາຮູ້ເລື່ອງຂອງເອຟຣາອິມທຸກຢ່າງ;
ອິດສະຣາເອນບໍ່ໄດ້ຖືກເຊື່ອງໄວ້ຈາກເຮົາ.
ເອຟຣາອິມ, ບັດນີ້ເຈົ້າໄດ້ຫັນໄປເປັນໂສເພນີ;
ອິດສະຣາເອນກໍເສື່ອມໂຊມລົງ.
“ການກະທຳຂອງພວກເຂົາບໍ່ຍອມປ່ອຍພວກເຂົາ
ໃຫ້ກັບມາຫາພຣະເຈົ້າຂອງພວກເຂົາ.
ວິນຍານແຫ່ງການເປັນໂສເພນີຢູ່ໃນຫົວໃຈຂອງພວກເຂົາ;
ພວກເຂົາບໍ່ຍອມຮັບພຣະເຈົ້າຢາເວ.
ຄວາມຈອງຫອງຂອງອິດສະຣາເອນເປັນຫລັກຖານຜູກມັດພວກເຂົາ;
ຊົນຊາດອິດສະຣາເອນ, ແມ່ນແຕ່ເອຟຣາອິມເອງກໍສະດຸດລົ້ມລົງໃນບາບ;
ຢູດາກໍລົ້ມລົງໄປກັບພວກເຂົາດ້ວຍ.
ເມື່ອພວກເຂົານຳຝູງແບ້, ຝູງແກະ ແລະ ຝູງງົວຂອງພວກເຂົາ
ມາສະແຫວງຫາພຣະເຈົ້າຢາເວ,
ພວກເຂົາກໍຈະບໍ່ພົບພຣະອົງ;
ພຣະອົງໄດ້ຖອນຕົວອອກຈາກພວກເຂົາແລ້ວ.
ພວກເຂົາບໍ່ສັດຊື່ຕໍ່ພຣະເຈົ້າຢາເວ;
ພວກເຂົາໃຫ້ກຳເນີດລູກນອກສົມລົດ.
ເມື່ອພວກເຂົາສະຫລອງເທດສະການເດືອນຂຶ້ນໃໝ່ໜຶ່ງຄ່ຳຂອງພວກເຂົາ,
ພຣະອົງຈະທຳລາຍທົ່ງນາຂອງພວກເຂົາ.
“ຈົ່ງເປົ່າແກໃນກີເບອາ,
ຈົ່ງເປົ່າເຂົາສັດໃນຣາມາ.
ຈົ່ງໂຫ່ຮ້ອງເໝືອນອອກຮົບໃນເບັດເອນເອເວນ,1
ເບັນຢາມິນ, ຈົ່ງນຳໜ້າໄປ.
ໃນວັນພິພາກສາ
ເອຟຣາອິມຈະຖືກຖິ້ມຮ້າງ.
ເຮົາປະກາດສິ່ງທີ່ແນ່ນອນ
ທ່າມກາງເຜົ່າຕ່າງໆຂອງອິດສະຣາເອນ.
ບັນດາຜູ້ນຳຂອງຢູດາ
ເປັນເໝືອນຄົນທີ່ຍົກຍ້າຍຫລັກຫີນກັ້ນເຂດແດນ.
ເຮົາຈະເທຄວາມໂກດຮ້າຍຂອງເຮົາເໜືອພວກເຂົາ
ດັ່ງກະແສນ້ຳຖ້ວມ.
ເອຟຣາອິມຖືກກົດຂີ່ຂົ່ມເຫັງ,
ແລະ ຖືກຢຽບຢ່ຳລົງໂທດ,
ແຕ່ກໍຍັງຕັ້ງໃຈຕິດຕາມບັນດາຮູບເຄົາລົບ.2
ເຮົາເປັນເໝືອນແມງໄມ້ກັດກິນເອຟຣາອິມ,
ແລະ ເປັນເໝືອນຄວາມເປື່ອຍເນົ່າຂອງເຜົ່າຢູດາ.
“ເມື່ອເອຟຣາອິມເຫັນຄວາມເຈັບປ່ວຍຂອງຕົນ,
ແລະ ຢູດາກໍເຫັນບາດແຜຂອງຕົນ,
ຫລັງຈາກນັ້ນ ເອຟຣາອິມກໍຫັນໄປຫາອັດຊີເຣຍ,
ແລະ ສົ່ງຄົນໄປຫາກະສັດຜູ້ຍິ່ງໃຫຍ່ເພື່ອຂໍຄວາມຊ່ວຍເຫລືອ.
ແຕ່ເພິ່ນບໍ່ສາມາດຮັກສາພວກເຈົ້າໃຫ້ຫາຍໄດ້,
ບໍ່ສາມາດຮັກສາບາດແຜຂອງພວກເຈົ້າໄດ້ເລີຍ.
ເພາະເຮົາຈະເປັນເໝືອນໂຕສິງສຳລັບເອຟຣາອິມ,
ເປັນເໝືອນພະຍາສິງສຳລັບຢູດາ.
ເຮົາຈະຈີກພວກເຂົາເປັນຕ່ອນໆ ແລະ ກໍຈາກໄປ;
ເຮົາຈະຄາບພວກເຂົາໄປ ແລະ ບໍ່ມີຜູ້ໃດຊ່ວຍພວກເຂົາໄດ້.
ຫລັງຈາກນັ້ນ ເຮົາຈະກັບໄປທີ່ບ່ອນຂອງເຮົາ
ຈົນກວ່າພວກເຂົາຈະຍອມຮັບຜິດ
ແລ້ວພວກເຂົາກໍຈະສະແຫວງຫາໜ້າຂອງເຮົາ
ໃນຄວາມທຸກຍາກຂອງພວກເຂົາ
ພວກເຂົາຈະສະແຫວງຫາເຮົາຢ່າງຈິງຈັງ”
Source notes (2)
- Footnote ແປວ່າ ເຮືອນແຫ່ງຄວາມຊົ່ວຮ້າຍ (ແທນທີ່ຈະເອີ້ນວ່າ ເບັດເອນ ເຊິ່ງແປວ່າ ວິຫານຂອງພຣະເຈົ້າ)
- Footnote ໃນພາສາເຮັບເຣີຄຳນີ້ມີຄວາມຫມາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.