Biblica® Open Lao Contemporary Version
ໂຮເສອາ 14
ການກັບໃຈໃໝ່ທີ່ນຳພຣະພອນມາ
ອິດສະຣາເອນ, ຈົ່ງຫັນກັບມາຫາພຣະເຈົ້າຢາເວ ພຣະເຈົ້າຂອງພວກເຈົ້າ.
ທີ່ພວກເຈົ້າຫລົ້ມຈົມລົງກໍເພາະບາບທັງຫລາຍຂອງພວກເຈົ້າ!
ຈົ່ງນຳຄຳອ້ອນວອນມາດ້ວຍ
ແລະ ກັບມາຫາພຣະເຈົ້າຢາເວ.
ຈົ່ງເວົ້າຕໍ່ພຣະອົງວ່າ:
“ຂໍໂຜດອະໄພບາບທັງໝົດຂອງພວກຂ້ານ້ອຍ
ແລະ ຂໍໂຜດຮັບພວກຂ້ານ້ອຍໄວ້ດ້ວຍພຣະຄຸນ,
ເພື່ອພວກຂ້ານ້ອຍຈະຖວາຍຄຳສັນລະເສີນຈາກຮີມສົບຂອງພວກຂ້ານ້ອຍ.1
ອັດຊີເຣຍບໍ່ອາດຊ່ວຍພວກຂ້ານ້ອຍໄດ້;
ພວກຂ້ານ້ອຍຈະບໍ່ເພິ່ງມ້າຮົບ.
ຈະບໍ່ເອີ້ນສິ່ງທີ່ມືຂອງພວກຂ້ານ້ອຍສ້າງຂຶ້ນນັ້ນວ່າ,
‘ພຣະເຈົ້າຂອງພວກຂ້ານ້ອຍ’ ອີກຕໍ່ໄປ,
ເພາະລູກກຳພ້າພໍ່ຈະພົບຄວາມເມດຕາໃນພຣະອົງ”.
“ເຮົາຈະຮັກສາຄວາມດື້ດ້ານຂອງພວກເຂົາ
ແລະ ຈະຮັກພວກເຂົາຢ່າງເຕັມທີ່,
ເພາະເຮົາເຊົາໃຈຮ້າຍພວກເຂົາແລ້ວ.
ເຮົາຈະເປັນເໝືອນນ້ຳຄ້າງສໍາລັບອິດສະຣາເອນ;
ພວກເຂົາຈະເບັ່ງບານດັ່ງດອກລີລາ.
ພວກເຂົາຈະຢັ່ງຮາກລົງ
ເໝືອນຕົ້ນໄມ້ສີດາແຫ່ງເລບານອນ
ໜໍ່ອ່ອນຂອງພວກເຂົາຈະເຕີບໃຫຍ່ຂຶ້ນ.
ພວກເຂົາຈະງົດງາມຮຸ່ງເຮືອງດັ່ງຕົ້ນໝາກກອກ,
ແລະ ສົ່ງກິ່ນຫອມດັ່ງຕົ້ນໄມ້ສີດາແຫ່ງເລບານອນ.
ຄົນທັງຫລາຍຈະເພິ່ງພາໃນຮົ່ມຂອງພວກເຂົາອີກ;
ພວກເຂົາຈະເລີນງອກງາມດັ່ງເມັດພືດ,
ຈະເບັ່ງບານດັ່ງເຄືອອະງຸ່ນ
ຊື່ສຽງຊ່າລືເໝືອນເຫລົ້າອະງຸ່ນຈາກເລບານອນ.
ເອຟຣາອິມ, ເຮົາ2ຈະຕ້ອງເຮັດຫຍັງອີກກັບບັນດາຮູບເຄົາລົບ?
ເຮົາຈະຕອບພວກເຂົາ ແລະ ຫ່ວງໃຍເບິ່ງແຍງພວກເຂົາ.
ເຮົາເປັນເໝືອນຕົ້ນແປກຂຽວອຸ່ມທຸ່ມ;
ເຈົ້າຈະມີຜົນງອກງາມເພາະເຮົາ”.
ຜູ້ໃດສະຫລາດ? ໃຫ້ຜູ້ນັ້ນເຂົ້າໃຈສິ່ງເຫລົ່ານີ້
ຜູ້ໃດມີວິຈາລະນະຍານ? ຜູ້ນັ້ນຈະເຂົ້າໃຈ
ວິຖີທາງຂອງພຣະເຈົ້າຢາເວລ້ວນແຕ່ຖືກຕ້ອງ;
ຜູ້ຊອບທຳດຳເນີນໃນວິຖີທາງເຫລົ່ານີ້,
ແຕ່ຜູ້ກະບົດຕໍ່ພຣະເຈົ້າກໍສະດຸດຢູ່ໃນທາງຂອງພຣະອົງ.
Source notes (2)
- Footnote ຫລື ຖວາຍປາກຂອງພວກຂ້ານ້ອຍແທນງົວທີ່ໃຊ້ເປັນເຄື່ອງບູຊາ
- Footnote ຫລື ເອຟຣາອິມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.