Biblica® Open Lao Contemporary Version
ໂຮເສອາ 10
ອິດສະຣາເອນເປັນເຄືອອະງຸ່ນທີ່ແຜ່ງ່າ;
ພວກເຂົາເກີດຜົນເພື່ອຕົນເອງ.
ເມື່ອຜົນຍິ່ງດົກ,
ພວກເຂົາກໍຍິ່ງສ້າງແທ່ນບູຊາເພີ່ມຂຶ້ນ;
ເມື່ອດິນແດນຂອງພວກເຂົາຮຸ່ງເຮືອງຂຶ້ນ,
ພວກເຂົາກໍຕົບແຕ່ງຫີນສັກສິດ.
ຈິດໃຈຂອງພວກເຂົາເຕັມໄປດ້ວຍການຫລອກລວງ,
ແລະ ບັດນີ້ພວກເຂົາຕ້ອງໄດ້ຮັບໂທດ,
ພຣະອົງຈະພັງແທ່ນບູຊາຂອງພວກເຂົາ
ແລະ ທຳລາຍຫີນສັກສິດຂອງພວກເຂົາ.
ແລ້ວພວກເຂົາຈະເວົ້າວ່າ, “ພວກເຮົາບໍ່ມີກະສັດ
ເພາະພວກເຮົາບໍ່ໄດ້ຢຳເກງພຣະເຈົ້າຢາເວ.
ແຕ່ເຖິງເຮົາມີກະສັດ,
ເພິ່ນຈະເຮັດຫຍັງໃຫ້ພວກເຮົາໄດ້?”
ພວກເຂົາສັນຍາໄວ້ຫລວງຫລາຍ
ເຮັດຂໍ້ຕົກລົງ
ແລະ ສາບານບໍ່ຈິງ;
ເຫດສະນັ້ນ ການຟ້ອງຄະດີຈຶ່ງງອກງາມ
ເໝືອນສັດຕູພືດທີ່ເປັນພິດໃນທົ່ງນາທີ່ໄຖແລ້ວ.
ປະຊາຊົນທີ່ອາໄສຢູ່ໃນຊາມາເຣຍ
ຢ້ານຮູບປັ້ນລູກງົວຢູ່ທີ່ເບັດເອນ.1
ຄົນຂອງພະນັ້ນຈະຄ່ຳຄວນເຖິງມັນ,
ປະໂລຫິດຜູ້ຫລົງໄຫລມັນກໍເຊັ່ນກັນ,
ແລະ ບັນດາຜູ້ທີ່ຊື່ນຊົມໃນຄວາມສະຫງ່າຂອງພະນັ້ນກໍເປັນໄປດ້ວຍ,
ເພາະມັນຈະຖືກເນລະເທດອອກໄປ.
ມັນຈະຖືກນຳໄປທີ່ອັດຊີເຣຍ
ເປັນເຄື່ອງບັນນາການແກ່ກະສັດຜູ້ຍິ່ງໃຫຍ່.
ເອຟຣາອິມຈະອັບອາຍຂາຍໜ້າ;
ອິດສະຣາເອນຈະອັບອາຍເປັນຍ້ອນຮູບເຄົາລົບ2 ເຊິ່ງເຮັດດ້ວຍໄມ້ຂອງພວກເຂົາ.
ຊາມາເຣຍ ແລະ ກະສັດຂອງມັນຈະສູນຫາຍໄປ,
ເໝືອນເສດໄມ້ທີ່ຢູ່ເທິງໜ້ານ້ຳ.
ສະຖານທີ່ແຫ່ງຄວາມຊົ່ວຮ້າຍ3 ເຊິ່ງຢູ່ເທິງທີ່ສູງຂອງອິດສະຣາເອນຈະຖືກທຳລາຍ
ມັນເປັນບາບຂອງອິດສະຣາເອນ.
ພືດໜາມຈະງອກຂຶ້ນ
ປົກຄຸມແທ່ນບູຊາຂອງພວກເຂົາ.
ແລ້ວພວກເຂົາກໍຈະກ່າວແກ່ເນີນພູທັງຫລາຍວ່າ, “ຈົ່ງປົກຄຸມພວກເຮົາໄວ້!”
ແລະ ບອກໂນນພູທັງຫລາຍວ່າ, “ຈົ່ງລົ້ມມາທັບພວກເຮົາ!”
“ອິດສະຣາເອນ, ພວກເຈົ້າໄດ້ເຮັດບາບມາຕັ້ງແຕ່ສະໄໝຂອງກີເບອາ,
ແລະ ພວກເຈົ້າຍັງເຮັດຢູ່ແບບນັ້ນຕະຫລອດມາ.4
ສົງຄາມບໍ່ໄດ້ຫລິ້ນງານຄົນເຮັດຊົ່ວ
ໃນກີເບອາບໍ?
ເມື່ອເຮົາເຫັນດີ, ເຮົາຈະລົງໂທດພວກເຂົາ;
ຊົນຊາດທັງຫລາຍຈະຮວມໂຕກັນຕໍ່ສູ້ພວກເຂົາ
ຄຸມຂັງພວກເຂົາເພາະບາບຊ້ອນບາບຂອງພວກເຂົາ.
ເອຟຣາອິມເປັນງົວສາວທີ່ຝຶກຝົນແລ້ວ
ມັນມັກນວດເຂົ້າ;
ດັ່ງນັ້ນ ເຮົາຈະວາງແອກ
ເທິງຄໍອັນສວຍງາມຂອງມັນ.
ເຮົາຈະຂັບເຄື່ອນເອຟຣາອິມ,
ຢູດາຕ້ອງລາກຄັນໄຖ,
ແລະ ຢາໂຄບຕ້ອງໄຖຄາດດິນ.
ຈົ່ງຫວ່ານຄວາມຊອບທຳເພື່ອພວກເຈົ້າເອງ,
ຈົ່ງເກັບກ່ຽວຜົນແຫ່ງຄວາມຮັກໝັ້ນຄົງ,
ຈົ່ງໄຖຄາດດິນທີ່ຍັງແຂງກະດ້າງຂອງພວກເຈົ້າ;
ເພາະເຖິງເວລາທີ່ຈະສະແຫວງຫາພຣະເຈົ້າຢາເວ,
ຈົນກວ່າພຣະອົງຈະກັບມາ
ແລະ ເທຄວາມຊອບທຳລົງເທິງພວກເຈົ້າໝາຍສາຍຝົນ.
ແຕ່ພວກເຈົ້າກັບປຸກຄວາມຊົ່ວຊ້າ,
ພວກເຈົ້າເກັບກ່ຽວຄວາມອະທຳ,
ພວກເຈົ້າກິນຜົນແຫ່ງການຫລອກລວງ.
ເພາະພວກເຈົ້າເພິ່ງກຳລັງຕົນເອງ
ແລະ ພວກເຈົ້າເພິ່ງນັກຮົບທັງຫລາຍຂອງພວກເຈົ້າ,
ສຽງໂຫ່ຮ້ອງຂອງສົງຄາມຈະດັງຂຶ້ນສູ້ຄົນຂອງພວກເຈົ້າ,
ດັ່ງນັ້ນ ປ້ອມປ້ອງກັນທັງຫລາຍຂອງພວກເຈົ້າຈະຖືກທຳລາຍ
ເມື່ອແມ່ທັງຫລາຍກັບລູກຂອງນາງຈະຖືກຈັບຟາດທີ່ພື້ນ.
ກໍຈະເປັນເໝືອນຢ່າງທີ່ຊານມານໄດ້ທໍາລາຍລ້າງເມືອງເບັດອາກເບັນໃນຍາມຮົບ,
ເບັດເອນ, ມັນຈະເກີດຂຶ້ນກັບພວກເຈົ້າຢ່າງນັ້ນເໝືອນກັນ,
ເພາະພວກເຈົ້າຊົ່ວຮ້າຍຫລາຍ.
ເມື່ອວັນນັ້ນມາເຖິງ,
ກະສັດແຫ່ງອິດສະຣາເອນຈະຖືກທຳລາຍຢ່າງໝົດສິ້ນ.
Source notes (4)
- Footnote ແປວ່າ ເຮືອນແຫ່ງຄວາມຊົ່ວຮ້າຍ (ແທນທີ່ຈະເອີ້ນວ່າ ເບັດເອນ ເຊິ່ງແປວ່າ ວິຫານຂອງພຣະເຈົ້າ)
- Footnote ຫລື ທີ່ປຶກສາຂອງພວກເຂົາ
- Footnote ພາສາເຮັບເຣີວ່າ ອາເວນ ໝາຍເຖິງ ເບັດອາເວນ (ຊື່ໃນທາງເສື່ອມເສຍຂອງເບັດເອນ)
- Footnote ຫລື ແລະ ເຈົ້າກໍຢືນຕົວຢູ່ຢ່າງນັ້ນເລື່ອຍມາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.