Biblica® Open Lao Contemporary Version
ເຮັບເຣີ 3
ພຣະເຢຊູເຈົ້າຍິ່ງໃຫຍ່ກວ່າໂມເຊ
ເຫດສະນັ້ນ ພີ່ນ້ອງຜູ້ບໍລິສຸດທັງຫລາຍ, ຜູ້ຮ່ວມໃນການເອີ້ນຈາກສະຫວັນ, ຈົ່ງໃຫ້ຄວາມຄິດຂອງພວກເຈົ້າຈົດຈໍ່ຢູ່ທີ່ພຣະເຢຊູເຈົ້າ, ຜູ້ທີ່ພວກເຮົາຍອມຮັບວ່າເປັນອັກຄະສາວົກ ແລະ ເປັນມະຫາປະໂລຫິດຂອງພວກເຮົາ. ພຣະອົງສັດຊື່ຕໍ່ພຣະເຈົ້າຜູ້ແຕ່ງຕັ້ງພຣະອົງ ເໝືອນດັ່ງທີ່ໂມເຊສັດຊື່ໃນທຸກເລື່ອງກ່ຽວກັບຄົວເຮືອນຂອງພຣະເຈົ້າ ເປັນທີ່ຮູ້ຈັກແລ້ວວ່າພຣະເຢຊູເຈົ້າສົມຄວນໄດ້ຮັບກຽດຫລາຍກວ່າໂມເຊ ເໝືອນດັ່ງຜູ້ທີ່ສ້າງເຮືອນກໍມີກຽດຫລາຍກວ່າເຮືອນນັ້ນ. ເພາະເຮືອນທຸກຫລັງຍ່ອມມີຜູ້ສ້າງ ແລະ ພຣະເຈົ້າເປັນຜູ້ສ້າງທຸກສິ່ງ. “ໂມເຊໄດ້ສັດຊື່ໃນຖານະຜູ້ຮັບໃຊ້ໃນທຸກເລື່ອງກ່ຽວກັບຄົວເຮືອນຂອງພຣະເຈົ້າ,”1 ເປັນພະຍານເຖິງສິ່ງທີ່ພຣະເຈົ້າຈະກ່າວໃນພາຍໜ້າ. ສ່ວນພຣະຄຣິດເຈົ້າສັດຊື່ໃນຖານະພຣະບຸດຜູ້ຄອບຄອງຄົວເຮືອນຂອງພຣະເຈົ້າ. ແລະ ພວກເຮົາທັງຫລາຍກໍຄືເຮືອນຂອງພຣະອົງ ຖ້າຫາກພວກເຮົາຢຶດໝັ້ນໃນຄວາມໝັ້ນໃຈ ແລະ ຄວາມຫວັງທີ່ພວກເຮົາພາກພູມໃຈຢູ່ນັ້ນ.
ການຕັກເຕືອນເລື່ອງຄວາມບໍ່ເຊື່ອ
ດັ່ງນັ້ນ, ຕາມທີ່ພຣະວິນຍານບໍລິສຸດເຈົ້າກ່າວໄວ້ວ່າ:
“ວັນນີ້, ຖ້າພວກເຈົ້າທັງຫລາຍໄດ້ຍິນສຽງຂອງພຣະອົງ,
ຢ່າເຮັດໃຫ້ໃຈຂອງພວກເຈົ້າແຂງກະດ້າງ
ເໝືອນດັ່ງທີ່ພວກເຈົ້າໄດ້ກະທຳໃນການກະບົດ,
ໃນຊ່ວງເວລາຂອງການທົດລອງໃນຖິ່ນແຫ້ງແລ້ງກັນດານ,
ເຊິ່ງເປັນບ່ອນທີ່ບັນພະບຸລຸດຂອງພວກເຈົ້າໄດ້ທົດລອງ ແລະ ພິສູດເຮົາ,
ເຖິງແມ່ນວ່າເປັນເວລາສີ່ສິບປີທີ່ພວກເຂົາໄດ້ເຫັນສິ່ງທີ່ເຮົາໄດ້ກະທຳ.
ດ້ວຍເຫດນີ້ ເຮົາຈຶ່ງໂກດຮ້າຍຄົນໃນສະໄໝນັ້ນ,
ແລະ ເຮົາໄດ້ກ່າວວ່າ, ‘ໃຈຂອງພວກເຂົາຫລົງຜິດຢູ່ສະເໝີ
ແລະ ພວກເຂົາບໍ່ຮູ້ຈັກວິທີທາງຂອງເຮົາ’
ດັ່ງນັ້ນ ເຮົາຈຶ່ງປະກາດເທິງຄຳສາບານດ້ວຍຄວາມໂກດຮ້າຍຂອງເຮົາວ່າ,
‘ພວກເຂົາຈະບໍ່ມີວັນໄດ້ເຂົ້າສູ່ການພັກສະຫງົບຂອງເຮົາ’ ”.2
ພີ່ນ້ອງທັງຫລາຍຈົ່ງລະວັງໃຫ້ດີ, ເພື່ອຈະບໍ່ມີຈັກຄົນໃນພວກເຈົ້າມີໃຈບາບ ບໍ່ເຊື່ອແລ້ວຫັນໜີໄປຈາກພຣະເຈົ້າຜູ້ມີຊີວິດຢູ່. ຈົ່ງໜູນໃຈກັນແລະກັນທຸກໆວັນຕາບໃດທີ່ຍັງເອີ້ນວ່າ “ວັນນີ້” ເພື່ອວ່າຈະບໍ່ມີຜູ້ໃດໃນພວກເຈົ້າດື້ດ້ານເພາະການຫລອກລວງຂອງບາບ. ພວກເຮົາໄດ້ມາມີສ່ວນຮ່ວມໃນພຣະຄຣິດເຈົ້າ ຖ້າພວກເຮົາ ຢຶດຖືໃນຄວາມໝັ້ນໃຈທີ່ພວກເຮົາມີໃນທຳອິດນັ້ນຈົນເຖິງທີ່ສຸດ. ຕາມທີ່ໄດ້ກ່າວມາແລ້ວວ່າ:
“ວັນນີ້, ຖ້າພວກເຈົ້າທັງຫລາຍໄດ້ຍິນສຽງຂອງພຣະອົງ
ຢ່າເຮັດໃຫ້ໃຈຂອງພວກເຈົ້າແຂງກະດ້າງເໝືອນດັ່ງ
ທີ່ພວກເຈົ້າໄດ້ກະທຳໃນການກະບົດ”3
ແມ່ນຜູ້ໃດຜູ້ທີ່ໄດ້ຍິນແລ້ວຍັງກະບົດ? ກໍຄືທຸກຄົນທີ່ໂມເຊໄດ້ພາອອກມາຈາກເອຢິບບໍ່ແມ່ນບໍ? ແລະ ຜູ້ໃດທີ່ພຣະອົງໂກດຮ້າຍຕະຫລອດສີ່ສິບປີ? ກໍຄືບັນດາຜູ້ທີ່ເຮັດບາບ ເຊິ່ງໄດ້ຖິ້ມຮ່າງກາຍຂອງຕົນຢູ່ໃນຖິ່ນແຫ້ງແລ້ງກັນດານບໍ່ແມ່ນບໍ? ແລະ ຜູ້ໃດທີ່ພຣະເຈົ້າສາບານວ່າພວກເຂົາຈະບໍ່ມີວັນໄດ້ເຂົ້າສູ່ການພັກສະຫງົບຂອງພຣະອົງຖ້າບໍ່ແມ່ນບັນດາຄົນທີ່ບໍ່ເຊື່ອຟັງ? ດັ່ງນັ້ນ ພວກເຮົາຈຶ່ງເຫັນໄດ້ວ່າພວກເຂົາເຫລົ່ານັ້ນບໍ່ສາມາດເຂົ້າໄປກໍເພາະພວກເຂົາບໍ່ເຊື່ອ.
Source notes (3)
- Footnote ຈບຊ 12:7
- Footnote ພສສ 95:7-11
- Footnote ພສສ 95:7,8
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.