Biblica® Open Lao Contemporary Version
ເຮັບເຣີ 1
ຖ້ອຍຄຳສຸດທ້າຍຂອງພຣະເຈົ້າຄື: ພຣະບຸດຂອງພຣະອົງ
ໃນອະດີດພຣະເຈົ້າໄດ້ກ່າວກັບບັນພະບຸລຸດຂອງພວກເຮົາຜ່ານທາງຜູ້ທຳນວາຍຫລາຍເທື່ອ ແລະ ໂດຍວິທີການຕ່າງໆ, ແຕ່ໃນຍຸກສຸດທ້າຍນີ້ພຣະອົງໄດ້ກ່າວກັບພວກເຮົາທັງຫລາຍໂດຍພຣະບຸດຂອງພຣະອົງ, ຜູ້ທີ່ພຣະອົງໄດ້ແຕ່ງຕັ້ງໃຫ້ເປັນຜູ້ຮັບມໍລະດົກທຸກສິ່ງ ແລະ ໄດ້ສ້າງຈັກກະວານໂດຍພຣະບຸດນີ້. ພຣະບຸດເປັນແສງສະທ້ອນແຫ່ງສະຫງ່າລາສີຂອງພຣະເຈົ້າ ແລະ ເປັນເໝືອນພຣະເຈົ້າທຸກປະການ ແລະ ໄດ້ຄ້ຳຊູສັບພະສິ່ງໄວ້ດ້ວຍຖ້ອຍຄຳທີ່ມີລິດອຳນາດຂອງພຣະອົງ. ຫລັງຈາກທີ່ພຣະອົງໄດ້ຊຳລະບາບແລ້ວ, ພຣະອົງຈຶ່ງໄດ້ນັ່ງລົງທີ່ເບື້ອງຂວາມືຂອງອົງຜູ້ມີບາລະມີໃນສະຫວັນ ດັ່ງນັ້ນ ພຣະອົງຈຶ່ງຍິ່ງໃຫຍ່ເໜືອບັນດາເທວະດາ ເພາະນາມທີ່ພຣະອົງໄດ້ຮັບນັ້ນສູງສົ່ງກວ່ານາມຂອງບັນດາເທວະດາ.
ພຣະບຸດຜູ້ຍິ່ງໃຫຍ່ເໜືອເທວະດາ
ເພາະພຣະເຈົ້າເຄີຍກ່າວກັບເທວະດາຕົນໃດວ່າ,
“ທ່ານເປັນບຸດຂອງເຮົາ,
ວັນນີ້ ເຮົາໄດ້ກາຍເປັນບິດາ1ຂອງທ່ານ”?
ຫລື ອີກຄັ້ງໜຶ່ງ,
“ເຮົາຈະເປັນບິດາ2ຂອງລາວ,
ແລະ ລາວຈະເປັນບຸດຂອງເຮົາ”?
ແລະ ອີກຄັ້ງໜຶ່ງ, ເມື່ອພຣະເຈົ້ານຳບຸດກົກຂອງພຣະອົງເຂົ້າມາໃນໂລກ ພຣະອົງກ່າວວ່າ,
“ໃຫ້ບັນດາເທວະດາຂອງພຣະເຈົ້າທຸກຕົນນະມັດສະການພຣະອົງ”.3
ພຣະອົງກ່າວເຖິງບັນດາເທວະດານັ້ນວ່າ,
“ພຣະອົງເຮັດໃຫ້ເທວະດາຂອງພຣະອົງເປັນວິນຍານ,
ແລະ ໃຫ້ຜູ້ຮັບໃຊ້ຂອງພຣະອົງເປັນແປວໄຟ”.4
ແຕ່ສ່ວນພຣະບຸດນັ້ນພຣະອົງກ່າວວ່າ,
“ຂ້າແດ່ພຣະເຈົ້າ, ບັນລັງຂອງພຣະອົງຈະຕັ້ງໝັ້ນຄົງຕະຫລອດໄປເປັນນິດ,
ພຣະອົງຈະປົກຄອງອານາຈັກຂອງພຣະອົງດ້ວຍກະບອງແຫ່ງຄວາມຊອບທຳ.
ພຣະອົງຮັກຄວາມຊອບທຳ ແລະ ກຽດຊັງຄວາມຊົ່ວ,
ເຫດສະນັ້ນ ພຣະເຈົ້າຜູ້ເປັນພຣະເຈົ້າຂອງພຣະອົງ ຈຶ່ງໄດ້ຕັ້ງພຣະອົງໄວ້ເໜືອສະຫາຍທັງປວງຂອງພຣະອົງ
ດ້ວຍການເຈີມພຣະອົງດ້ວຍນ້ຳມັນແຫ່ງຄວາມຊື່ນຊົມຍິນດີ”.5
ແລະ ພຣະອົງກ່າວອີກວ່າ,
“ຂ້າແດ່ອົງພຣະຜູ້ເປັນເຈົ້າ ໃນປະຖົມມະການພຣະອົງວາງຮາກຂອງແຜ່ນດິນໂລກ,
ແລະ ຟ້າສະຫວັນດ້ວຍມືຂອງພຣະອົງ
ສິ່ງເຫລົ່ານັ້ນຈະສູນຫາຍໄປ ແຕ່ພຣະອົງດຳລົງຢູ່,
ສິ່ງເຫລົ່ານັ້ນທັງໝົດຈະເກົ່າໄປເໝືອນດັ່ງເຄື່ອງນຸ່ງຫົ່ມ.
ພຣະອົງຈະມ້ວນສິ່ງເຫລົ່ານັ້ນໄວ້ເໝືອນດັ່ງເສື້ອຄຸມ,
ສິ່ງເຫລົ່ານັ້ນຈະຖືກປ່ຽນໄປເໝືອນດັ່ງເສື້ອຜ້າ.
ແຕ່ພຣະອົງຍັງເໝືອນເດີມ,
ແລະ ປີທັງຫລາຍຂອງພຣະອົງກໍຈະບໍ່ສິ້ນສຸດຈັກເທື່ອ”6
ມີເທວະດາຕົນໃດແດ່ທີ່ພຣະເຈົ້າເຄີຍກ່າວວ່າ,
“ຈົ່ງນັ່ງທີ່ເບື້ອງຂວາມືຂອງເຮົາ
ຈົນກວ່າເຮົາຈະເຮັດໃຫ້ສັດຕູຂອງທ່ານ
ເປັນບ່ອນຮອງຕີນຂອງທ່ານ”7?
ເທວະດາທັງປວງນັ້ນຄືວິນຍານຮັບໃຊ້ທີ່ພຣະເຈົ້າໃຊ້ໄປບົວລະບັດບັນດາຜູ້ທີ່ຈະໄດ້ຮັບຄວາມພົ້ນເປັນມໍລະດົກບໍ່ແມ່ນບໍ?
Source notes (7)
- Footnote ພສສ 2:7
- Footnote 2ຊມອ 7:14; 1ຂຄ 17:13
- Footnote ພບຍ 32:43
- Footnote ພສສ 104:4
- Footnote ພສສ 45:6,7
- Footnote ພສສ 102:25-27
- Footnote ພສສ 110:1
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.