Biblica® Open Lao Contemporary Version
ຮາບາກຸກ 3:19
Verse 19 is marked below, with the whole chapter around it. Read from the start
ຄຳອະທິຖານຂອງຮາບາກຸກ
ຄຳອະທິຖານຂອງຜູ້ທຳນວາຍຮາບາກຸກ, ທຳນອງຊິກິໂອໂນດ1
ຂ້າແດ່ພຣະເຈົ້າຢາເວ, ຂ້ານ້ອຍເຄີຍໄດ້ຍິນຊື່ສຽງຂອງພຣະອົງ;
ຂ້າແດ່ພຣະເຈົ້າຢາເວ, ຂ້ານ້ອຍຢືນຢູ່ດ້ວຍຄວາມຢຳເກງໃນກິດຈະການຂອງພຣະອົງ.
ຂໍໂຜດຮື້ຟື້ນກິດຈະການເຫລົ່ານັ້ນໃນສະໄໝຂອງພວກຂ້ານ້ອຍທັງຫລາຍຄືນອີກ,
ຂໍໃຫ້ຮູ້ທົ່ວກັນໃນສະໄໝຂອງພວກຂ້ານ້ອຍທັງຫລາຍ;
ໃນຄວາມໂກດຮ້າຍນັ້ນຂໍໃຫ້ລະນຶກເຖິງຄວາມເມດຕາ.
ພຣະເຈົ້າໄດ້ມາຈາກເຕມານ,
ອົງບໍລິສຸດມາຈາກພູເຂົາປາຣານ.2
ສະຫງ່າລາສີຂອງພຣະອົງກໍປົກຄຸມຟ້າສະຫວັນ
ແລະ ໂລກນີ້ກໍເຕັມດ້ວຍຄຳສັນລະເສີນພຣະອົງ.
ຄວາມສະຫງ່າງາມຂອງພຣະອົງຄືກັບຕາເວັນທີ່ກຳລັງຂຶ້ນ;
ມີແສງກະພິບອອກມາຈາກມື,
ບ່ອນທີ່ລິດອຳນາດຂອງພຣະອົງໄດ້ຖືກເຊື່ອງໄວ້.
ໄພພິບັດໄດ້ໄປກ່ອນພຣະອົງ;
ໂລກລະບາດໄດ້ຕາມບາດກ້າວຂອງພຣະອົງມາ.
ພຣະອົງຢືນ ແລະ ໂລກກໍສັ່ນ;
ພຣະອົງຫລຽວເບິ່ງ ແລະ ບັນດາປະຊາຊາດກໍສັ່ນສະທ້ານ
ພູເຂົາດຶກດຳບັນທັງຫລາຍກໍພັງທະລາຍລົງ
ເນີນພູເກົ່າແກ່ທັງຫລາຍກໍພັງລົງ
ແຕ່ ພຣະອົງເດີນຕໍ່ໄປຕະຫລອດໄປ.
ຂ້ານ້ອຍໄດ້ເຫັນເຕັນຂອງຊາວຄູຊັນຕົກຢູ່ໃນຄວາມທຸກຍາກ
ແລະ ບ່ອນຢູ່ຂອງຊາວມີດີອານກໍຕົກຢູ່ໃນຄວາມທໍລະມານ.
ຂ້າແດ່ພຣະເຈົ້າຢາເວ ພຣະອົງໃຈຮ້າຍໃຫ້ແມ່ນ້ຳບໍ?
ພຣະອົງໂກດຮ້າຍໃຫ້ສາຍນ້ຳບໍ?
ພຣະອົງໂກດຮ້າຍຕໍ່ທະເລ
ເມື່ອພຣະອົງຂີ່ມ້າຂອງພຣະອົງ
ແລະ ລົດມ້າຂອງພຣະອົງໄປສູ່ໄຊຊະນະບໍ?
ພຣະອົງຈັບຄັນທະນູອອກມາ,
ພຣະອົງໄດ້ເອີ້ນຫາລູກທະນູມາຢ່າງຫລວງຫລາຍ.
ພຣະອົງແຍກແຜ່ນດິນດ້ວຍແມ່ນ້ຳ;
ພູເຂົາທັງຫລາຍໄດ້ເຫັນພຣະອົງ ແລະ ບິດໂຕໄປມາ
ກະແສນ້ຳກວດໄປ;
ນໍ້າເລິກສົ່ງສຽງດັງກ້ອງ
ແລະ ຊັດຄື້ນຂອງມັນຂຶ້ນສູງ.
ດວງຕາເວັນ ແລະ ດວງເດືອນຢຸດຢູ່ໃນຟ້າສະຫວັນ
ເມື່ອລູກທະນູທີ່ພຸ່ງອອກມາຂອງພຣະອົງກໍສ່ອງປະກາຍ,
ເມື່ອຫອກຂອງພຣະອົງສ່ອງປະກາຍຄືກັບຟ້າແມບ.
ພຣະອົງກະທືບແຜ່ນດິນໂລກດ້ວຍຄວາມໂກດຮ້າຍ
ແລະ ຢຽບປະຊາຊາດທັງຫລາຍດ້ວຍຄວາມໃຈຮ້າຍ.
ພຣະອົງໄດ້ອອກມາປົດປ່ອຍຄົນຂອງພຣະອົງ,
ເພື່ອຊ່ວຍຜູ້ທີ່ພຣະອົງໄດ້ເຈີມໄວ້ໃຫ້ພົ້ນ.
ພຣະອົງຂະຢີ້ຜູ້ນຳຂອງດິນແດນແຫ່ງຄວາມຊົ່ວຮ້າຍ
ພຣະອົງເຮັດໃຫ້ລາວເປືອຍກາຍຕັ້ງແຕ່ຫົວຈົນຮອດຕີນ.
ພຣະອົງຈະໃຊ້ຫອກຂອງລາວເອງແທງຫົວຂອງລາວ
ເມື່ອບັນດານັກຮົບຂອງລາວບຸກມາເພື່ອຕີພວກຂ້ານ້ອຍໃຫ້ກະຈັດກະຈາຍ,
ຍິ້ມເຢີ້ຍເໝືອນກັບວ່າຈະເຂົ້າມາກັດກິນ
ຄົນໜ້າເວດທະນາທີ່ລີ້ຢູ່.
ພຣະອົງໄດ້ຢຽບຢ່ຳທະເລດ້ວຍຝູງມ້າຂອງພຣະອົງ,
ເຮັດໃຫ້ຫ້ວງນໍ້າໃຫຍ່ປັ່ນປ່ວນ
ຂ້ານ້ອຍໄດ້ຍິນ ແລະ ຫົວໃຈຂອງຂ້ານ້ອຍກໍຕື່ນເຕັ້ນ,
ສຽງນັ້ນເຮັດໃຫ້ຮີບສົບຂອງຂ້ານ້ອຍສັ່ນ;
ຄວາມເຊື່ອມໂຊມກໍໄດ້ເຂົ້າສູ່ກະດູກຂອງຂ້ານ້ອຍ;
ແລະ ຂາຂອງຂ້ານ້ອຍກໍສັ່ນສະເທືອນ.
ເຖິງປານນັ້ນຂ້ານ້ອຍກໍຈະອົດທົນລໍຖ້າວັນແຫ່ງໄພພິບັດ,
ທີ່ຈະມາເຖິງຊົນຊາດທີ່ຮຸກຮານພວກຂ້ານ້ອຍ.
ເຖິງແມ່ນວ່າຕົ້ນໝາກເດື່ອຈະບໍ່ອອກດອກ
ແລະ ເຄືອອະງຸ່ນຈະບໍ່ມີໝາກອະງຸ່ນ,
ເຖິງແມ່ນວ່າຕົ້ນໝາກກອກຈະບໍ່ໃຫ້ຜົນ
ແລະ ທົ່ງນາທັງຫລາຍຈະບໍ່ເກີດພືດເພື່ອເປັນອາຫານ,
ເຖິງແມ່ນວ່າຈະບໍ່ມີແກະຢູ່ໃນຄອກ
ແລະ ບໍ່ມີງົວຢູ່ໃນຄອກກໍຕາມ,
ແຕ່ເຖິງປານນັ້ນຂ້ານ້ອຍກໍຈະຊື່ນຊົມຍິນດີໃນພຣະເຈົ້າຢາເວ,
ຂ້ານ້ອຍຈະມີຄວາມສຸກໃນພຣະເຈົ້າ ພຣະຜູ້ຊ່ວຍໃຫ້ພົ້ນຂອງຂ້ານ້ອຍ.
ພຣະເຈົ້າຢາເວອົງເຈົ້ານາຍເປັນກຳລັງຂອງຂ້ານ້ອຍ;
ພຣະອົງໄດ້ເຮັດໃຫ້ຕີນຂອງຂ້ານ້ອຍເປັນເໝືອນກັບຕີນກວາງ
ພຣະອົງໄດ້ຊ່ວຍໃຫ້ຂ້ານ້ອຍຢຽບເທິງທີ່ສູງໄດ້.
ສຳລັບຜູ້ອຳນວຍການຂອງເພງ ໃຊ້ກັບເຄື່ອງດົນຕີປະເພດສາຍຂອງຂ້ານ້ອຍ.
Source notes (2)
- Footnote ອາດຈະເປັນສັບທາງວັນນະຄະດີ ຫລື ທາງດົນຕີ
- Footnote ອ່ານວ່າ ເສລາ ໃນພາສາເຮັບເຣີຄຳນີ້ມີຄວາມຫມາຍບໍ່ຊັດເຈນ ອາດຈະເປັນສັບທາງດົນຕີ ເຊັ່ນດຽວກັບຂໍ້ 9 ແລະ 13.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.