Biblica® Open Lao Contemporary Version
ປະຖົມມະການ 49
ຢາໂຄບອວຍພອນບັນດາລູກຊາຍຂອງລາວ
(ພບຍ 33:1-29)
ຢາໂຄບໄດ້ເອີ້ນເອົາບັນດາລູກຊາຍຂອງລາວເຂົ້າມາແລ້ວກ່າວວ່າ: “ຈົ່ງພາກັນມາລວມກັນເພື່ອວ່າພໍ່ຈະໄດ້ບອກພວກເຈົ້າເຖິງສິ່ງທີ່ຈະເກີດຂຶ້ນກັບພວກເຈົ້າໃນວັນຂ້າງໜ້າ.
“ຈົ່ງມາຮ່ວມຊຸມນຸມກັນ ແລະ ຟັງ, ລູກຊາຍທັງຫລາຍຂອງຢາໂຄບເອີຍ;
ຈົ່ງຟັງອິດສະຣາເອນພໍ່ຂອງພວກເຈົ້າ.
“ຣູເບັນ, ເຈົ້າເປັນລູກຊາຍກົກຂອງພໍ່,
ເປັນອຳນາດ ແລະ ເປັນສັນຍານທຳອິດແຫ່ງກຳລັງຂອງພໍ່,
ເຈົ້າເປັນສຸດຍອດແຫ່ງກຽດຕິຍົດ, ເປັນສຸດຍອດແຫ່ງອຳນາດ.
ເປັນນ້ຳທີ່ໄຫລແຮງ, ເຈົ້າຈະບໍ່ໄດ້ເປັນສຸດຍອດອີກຕໍ່ໄປ,
ເພາະເຈົ້າເຂົ້າໄປເຖິງຕຽງນອນຂອງພໍ່ຂອງເຈົ້າ,
ເຂົ້າໄປເຖິງບ່ອນນອນຂອງເຮົາ ແລະ ເຮັດໃຫ້ບ່ອນນັ້ນເປັນມົນທິນ.
“ຊີເມໂອນ ແລະ ເລວີເປັນອ້າຍນ້ອງກັນ
ດາບ1ຂອງພວກເຂົາເປັນອາວຸດຂອງຄວາມຮຸນແຮງ.
ຢ່າໃຫ້ເຮົາເຂົ້າໄປໃນທີ່ສະພາຂອງພວກເຂົາ,
ຢ່າໃຫ້ເຮົາເຂົ້າຮ່ວມໃນການຊຸມນຸມຂອງພວກເຂົາ,
ເພາະພວກເຂົາຂ້າຄົນເມື່ອພວກເຂົາໃຈຮ້າຍ
ແລະ ຕັດເອັນຂາງົວເຖິກຕາມຄວາມພໍໃຈຂອງພວກເຂົາ.
ຄຳສາບແຊ່ງທີ່ຈະຕົກໃສ່ຄວາມໃຈຮ້າຍຂອງພວກເຂົາ ກໍຮຸນແຮງຫລາຍ,
ແລະ ຄວາມແຄ້ນຂອງພວກເຂົາ ກໍໂຫດຮ້າຍຫລາຍ!
ເຮົາຈະໃຫ້ພວກເຂົາກະແຈກກະຈາຍໄປໃນດິນແດນຂອງຢາໂຄບ
ແລະ ໃຫ້ພວກເຂົາກະແຈກກະຈາຍໄປໃນອິດສະຣາເອນ.
“ຢູດາ2ເອີຍ, ອ້າຍນ້ອງຂອງເຈົ້າຈະສັນລະເສີນເຈົ້າ;
ມືຂອງເຈົ້າຈະບີບຄໍຂອງບັນດາສັດຕູຂອງເຈົ້າ;
ບັນດາລູກຊາຍຂອງພໍ່ຂອງເຈົ້າຈະກົ້ມຂາບເຈົ້າ.
ຢູດາເອີຍ, ເຈົ້າຄືລູກສິງ,
ລູກຊາຍຂອງເຮົາເອີຍ, ເຈົ້າຫາກໍກັບມາຈາກກິນເຫຍື່ອ.
ເໝືອນດັ່ງສິງທີ່ໝອບ ແລະ ນອນລົງ,
ເໝືອນດັ່ງສິງແມ່ ຜູ້ໃດຈະກ້າປູກລາວໄດ້?
ໄມ້ກະບອງຈະບໍ່ໜີໄປຈາກຢູດາ,
ຫລື ໄມ້ຄ້ອນເທົ້າຂອງຜູ້ປົກຄອງຈະບໍ່ໜີໄປຈາກລະຫວ່າງຕີນຂອງລາວໄດ້3,
ຈົນກວ່າບຸກຄົນຜູ້ເປັນເຈົ້າຂອງອຳນາດທີ່ແທ້ຈິງຈະມາເຖິງ4
ແລະ ບັນດາຊົນຊາດຕ່າງໆຈະເຊື່ອຟັງຜູ້ນັ້ນ.
ລາວຈະມັດລໍຂອງລາວໄວ້ທີ່ເຄືອອະງຸ່ນ,
ມັດລູກລໍຂອງລາວໄວ້ໃສ່ກິ່ງທີ່ດີທີ່ສຸດ;
ລາວຈະຊັກເສື້ອຜ້າຂອງຕົນໃນເຫລົ້າອະງຸ່ນ,
ຊັກເສື້ອຄຸມຂອງລາວໃນນ້ຳອະງຸ່ນສີເລືອດ.
ຕາຂອງລາວເຂັ້ມກວ່າເຫລົ້າອະງຸ່ນ,
ແຂ້ວຂອງລາວຂາວກວ່ານ້ຳນົມ.5
“ເຊບູໂລນຈະອາໄສຢູ່ຕາມແຄມຝັ່ງທະເລ
ແລະ ກາຍເປັນທ່າເຮືອ;
ເຂດແດນຂອງລາວຈະຂະຫຍາຍອອກໄປຈົນຮອດຊີໂດນ.
“ອິດຊາຄາເປັນເໝືອນລໍທີ່ແຂງແຮງ
ນອນລົງຢູ່ຕາມຄອກແກະ.6
ເມື່ອລາວເຫັນວ່າສະຖານທີ່ພັກຜ່ອນຂອງລາວດີ
ແລະ ດິນແດນຂອງລາວເປັນທີ່ໜ້າພໍໃຈ,
ລາວກໍຈະງ່ຽງບ່າຂອງຕົນລົງແບກພາລະໜັກ
ແລະ ຍອມເປັນທາດຮັບໃຊ້.
“ດານ7ຈະໃຫ້ຄວາມເປັນທຳແກ່ພົນລະເມືອງຂອງຕົນ
ເໝືອນໃຫ້ແກ່ເຜົ່າອື່ນໆໃນອິດສະຣາເອນ.
ດານຈະເປັນເໝືອນງູຕາມແຄມທາງ
ເໝືອນງູພິດນ້ອຍທີ່ຢູ່ຕາມຫົນທາງ,
ມັນຈະຕອດສົ້ນໜ່ອງມ້າ
ເພື່ອໃຫ້ຄົນຂີ່ຕົກຈາກຫລັງມ້າ.
“ຂ້າແດ່ພຣະເຈົ້າຢາເວ, ຂ້ານ້ອຍລໍຄອຍຖ້າການກອບກູ້ຂອງພຣະອົງ.
“ກາດ8ຈະຖືກໂຈມຕີໂດຍກຸ່ມຜູ້ໂຈມຕີ,
ແຕ່ລາວຈະໂຈມຕີພວກເຂົາທີ່ສົ້ນໜ່ອງຂອງພວກເຂົາ.
“ອາຫານຂອງອາເຊຈະອຸດົມສົມບູນ;
ລາວຈະຈັດຫາອາຫານດີເລີດທີ່ເໝາະສົມກັບກະສັດ.
“ເນັບທາລີເປັນກວາງແມ່ທີ່ຖືກປ່ອຍໃຫ້ເປັນອິດສະຫລະ
ທີ່ເກີດລູກກວາງທີ່ໜ້າຮັກ.9
“ໂຢເຊັບເປັນເຄືອອະງຸ່ນທີ່ເກີດຜົນ,
ເປັນເຄືອອະງຸ່ນທີ່ເກີດຜົນຢູ່ໃກ້ບໍ່ນ້ຳ,
ເຊິ່ງມີເຄືອເລືອຂຶ້ນຂ້າມກຳແພງ.10
ນັກຍິງທະນູໄດ້ໂຈມຕີລາວດ້ວຍຄວາມຂົມຂື່ນ;
ພວກເຂົາຍິງໃສ່ລາວດ້ວຍຄວາມເປັນສັດຕູ.
ແຕ່ທະນູຂອງລາວຍັງຕັ້ງໝັ້ນຄົງຢູ່,
ແຂນທີ່ແຂງແຮງຂອງລາວບໍ່ອ່ອນແຮງ.
ເພາະມືຂອງຜູ້ມີອຳນາດຂອງຢາໂຄບ,
ເພາະຜູ້ລ້ຽງແກະ ຜູ້ເປັນສີລາຂອງອິດສະຣາເອນ,
ເພາະພຣະເຈົ້າຂອງພໍ່ຂອງເຈົ້າ, ຜູ້ທີ່ຊ່ວຍເຈົ້າ,
ເພາະຜູ້ມີລິດອຳນາດຍິ່ງໃຫຍ່,11 ຜູ້ທີ່ອວຍພອນເຈົ້າ
ດ້ວຍພອນແຫ່ງທ້ອງຟ້າເບື້ອງເທິງ
ພອນແຫ່ງບໍ່ນ້ຳເລິກເບື້ອງລຸ່ມ,
ພອນແຫ່ງນົມ ແລະ ມົດລູກ.
ພອນຈາກບິດາຂອງເຈົ້ານັ້ນ
ໃຫຍ່ກວ່າພອນຂອງພູເຂົາດຶກດຳບັນ,
ກວ່າ12ຄວາມອຸດົມສົມບູນຂອງເນີນພູເກົ່າແກ່.
ຂໍໃຫ້ພອນເຫລົ່ານີ້ຈົ່ງຢູ່ເທິງຫົວຂອງໂຢເຊັບ,
ຢູ່ເທິງໜ້າຜາກຂອງເຈົ້າຊາຍໃນທ່າມກາງ13ອ້າຍນ້ອງຂອງລາວ.
“ເບັນຢາມິນເປັນໝາປ່າທີ່ຫິວໂຫຍ,
ໃນຕອນເຊົ້າລາວກິນເຫຍື່ອ,
ໃນຕອນແລງລາວແບ່ງຂອງທີ່ຢຶດມາໄດ້”.
ທັງໝົດນີ້ຄືສິບສອງເຜົ່າຂອງອິດສະຣາເອນ ແລະ ນີ້ແມ່ນສິ່ງທີ່ພໍ່ຂອງພວກເຂົາໄດ້ເວົ້າກັບພວກເຂົາເມື່ອເພິ່ນອວຍພອນພວກເຂົາ, ໂດຍໃຫ້ພອນແຕ່ລະຄົນຕາມທີ່ເພິ່ນເຫັນສົມຄວນ.
ການຕາຍຂອງຢາໂຄບ
ແລ້ວຢາໂຄບກໍໃຫ້ຄຳແນະນຳເຫລົ່ານີ້ແກ່ພວກເຂົາຄື: “ເຮົາກຳລັງຈະຖືກຮວບຮວມໄປຢູ່ກັບຄົນຂອງເຮົາ. ຈົ່ງຝັງເຮົາໄວ້ຮ່ວມກັບບັນພະບຸລຸດຂອງເຮົາໃນຖ້ຳທີ່ຢູ່ໃນທົ່ງນາຂອງເອຟະໂຣນຊາວຮິດຕີ, ຄືຖ້ຳທີ່ຢູ່ໃນທົ່ງນາມັກເປລາໃກ້ມຳເຣໃນການາອານ, ເຊິ່ງອັບຣາຮາມໄດ້ຊື້ພ້ອມກັບທົ່ງນາຈາກເອຟະໂຣນຊາວຮິດຕີເພື່ອເປັນບ່ອນຝັງສົບ. ທີ່ນັ້ນເປັນບ່ອນຝັງອັບຣາຮາມກັບຊາຣາເມຍຂອງເພິ່ນ, ເປັນບ່ອນຝັງອີຊາກກັບເຣເບກາເມຍຂອງເພິ່ນ ແລະ ເປັນບ່ອນທີ່ເຮົາໄດ້ຝັງເລອາໄວ້. ທົ່ງນາ ແລະ ຖ້ຳທີ່ຢູ່ໃນນັ້ນໄດ້ຊື້ມາຈາກຊາວຮິດຕີ”.14
ເມື່ອຢາໂຄບໃຫ້ຄຳແນະນຳແກ່ລູກຊາຍທັງຫລາຍຂອງລາວຈົບແລ້ວ, ລາວກໍຍົກຕີນຂຶ້ນເທິງຕຽງນອນ, ແລ້ວລາວກໍສິ້ນໃຈ ແລະ ຖືກຮວບຮວມໄວ້ກັບຄົນຂອງລາວ.
Source notes (14)
- Footnote ໃນພາສາເຮັບເຣີຄຳນີ້ມີຄວາມໝາຍບໍ່ຊັດເຈນ
- Footnote ຄຳວ່າ ຢູດາ ມີສຽງຄ້າຍຄື ແລະ ອາດມາຈາກຄຳພາສາເຮັບເຣີທີ່ມີຄວາມໝາຍວ່າ, ສັນລະເສີນ
- Footnote ຫລື ຈາກເຊື້ອສາຍຂອງລາວ
- Footnote ຫລື ຈົນກວ່າຄົນທີ່ຖືວ່າເປັນເຈົ້າຂອງຈະມາເຖິງ; ຄວາມໝາຍໃນພາສາເຮັບເຣີສຳລັບປະໂຫຍກນີ້ບໍ່ຊັດເຈນ.
- Footnote ຫລື ຕາຂອງລາວຈະເປັນສີໝົ່ນຈາກເຫລົ້າອະງຸ່ນ ແຂ້ວຂອງລາວຂາວຈາກນ້ຳນົມ
- Footnote ຫລື ນອນລົງເທິງກອງໄຟໃນສະໜາມ; ຫລື ນອນລົງເທິງເບາະນັ່ງທີ່ຫລັງສັດ
- Footnote ໃນທີ່ນີ້ແປວ່າ ລາວຈັດຫາຄວາມເປັນທຳ
- Footnote ແປວ່າ ໂຈມຕີ ແລະ ກອງໂຈນ ກໍໄດ້
- Footnote ຫລື ເປັນອິດສະຫລະ; ຫລື ລາວເປັ່ງຖ້ອຍຄຳທີ່ມ່ວນຫູ
- Footnote ຫລື ໂຢເຊັບເປັນລູກລໍປ່າ ເປັນລູກລໍປ່າຢູ່ໃກ້ນ້ຳພຸ ຫລື ລໍປ່າທີ່ເນີນພູຂັ້ນໄດ
- Footnote ພາສາເຮັບເຣີວ່າ ຊາດາຍ
- Footnote ຫລື ແຫ່ງບັນພະບຸລຸດຂອງຂ້ອຍ ຍິ່ງໃຫຍ່ເທົ່າກັບ
- Footnote ຫລື ຜູ້ທີ່ແຍກຈາກ
- Footnote ຫລື ເຊື້ອສາຍຂອງເຮດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.