Biblica® Open Lao Contemporary Version
ປະຖົມມະການ 35
ຢາໂຄບກັບຄືນໄປເບັດເອນ
ຫລັງຈາກນັ້ນ ພຣະເຈົ້າໄດ້ກ່າວແກ່ຢາໂຄບວ່າ, “ຈົ່ງຂຶ້ນໄປຍັງເບັດເອນ ແລ້ວຕັ້ງຖິ່ນຖານຢູ່ທີ່ນັ້ນ ແລະ ຈົ່ງສ້າງແທ່ນບູຊາຂຶ້ນທີ່ນັ້ນຖວາຍແກ່ພຣະເຈົ້າ ຜູ້ໄດ້ປາກົດແກ່ເຈົ້າເມື່ອເຈົ້າປົບໜີຈາກເອຊາວອ້າຍຂອງເຈົ້າ”.
ດັ່ງນັ້ນ ຢາໂຄບຈຶ່ງໄດ້ເວົ້າກັບຄອບຄົວຂອງລາວ ແລະ ທຸກຄົນທີ່ຢູ່ກັບລາວວ່າ, “ຈົ່ງກຳຈັດບັນດາພະຂອງຊາວຕ່າງດ້າວທີ່ພວກເຈົ້າມີຢູ່ກັບພວກເຈົ້າ ແລະ ຊຳລະພວກເຈົ້າເອງໃຫ້ບໍລິສຸດ ແລະ ປ່ຽນເຄື່ອງນຸ່ງຂອງພວກເຈົ້າ. ແລ້ວຈົ່ງມາ ໃຫ້ພວກເຮົາຂຶ້ນໄປທີ່ເບັດເອນ, ບ່ອນທີ່ເຮົາຈະສ້າງແທ່ນບູຊາຖວາຍແກ່ພຣະເຈົ້າ ຜູ້ໄດ້ຕອບຄຳອະທິຖານຂອງເຮົາໃນວັນທີ່ເຮົາມີຄວາມໂສກເສົ້າ ແລະ ຜູ້ໄດ້ຢູ່ກັບເຮົາໃນທຸກບ່ອນທີ່ເຮົາໄປ”. ດັ່ງນັ້ນ ພວກເຂົາຈຶ່ງໄດ້ເອົາພະຂອງຊາວຕ່າງດ້າວທັງໝົດທີ່ພວກເຂົາມີຢູ່ ແລະ ປົດຕຸ້ມຫູຂອງພວກເຂົາມາມອບໃຫ້ຢາໂຄບ ແລະ ຢາໂຄບກໍຝັງເຄື່ອງເຫລົ່ານັ້ນໄວ້ຢູ່ກ້ອງຕົ້ນໂອກທີ່ຊີເຄມ. ຫລັງຈາກນັ້ນ ພວກເຂົາຈຶ່ງໄດ້ອອກເດີນທາງ ແລະ ຊາວເມືອງທີ່ຢູ່ອ້ອມຂ້າງພວກເຂົາກໍເກີດຢ້ານກົວພຣະເຈົ້າ ດັ່ງນັ້ນ ຈຶ່ງບໍ່ມີຜູ້ໃດໄລ່ຕາມພວກເຂົາໄປ.
ຢາໂຄບ ແລະ ປະຊາຊົນທັງໝົດທີ່ຮ່ວມເດີນທາງກັບລາວກໍໄດ້ມາເຖິງເມືອງລູເຊ (ຄືເບັດເອນ) ໃນດິນແດນການາອານ. ຢູ່ທີ່ນັ້ນລາວໄດ້ສ້າງແທ່ນບູຊາຂຶ້ນ ແລະ ເອີ້ນບ່ອນນັ້ນວ່າເອນເບັດເອນ,1 ເພາະວ່າພຣະເຈົ້າໄດ້ເປີດເຜີຍພຣະອົງເອງແກ່ລາວຢູ່ທີ່ນັ້ນເມື່ອເວລາທີ່ລາວກຳລັງໜີຈາກອ້າຍຂອງລາວ.
ບັດນີ້ ເດໂບຣາ ເອື້ອຍລ້ຽງຂອງເຣເບກາ ກໍໄດ້ຕາຍໄປ ແລະ ໄດ້ຖືກຝັງໄວ້ຢູ່ກ້ອງຕົ້ນໂອກທີ່ຢູ່ນອກເມືອງເບັດເອນ. ດັ່ງນັ້ນ ທີ່ນັ້ນຈຶ່ງໄດ້ຊື່ວ່າອານໂລນບາຄູດ.2
ຫລັງຈາກຢາໂຄບໄດ້ກັບມາຈາກປັດດານອາຣາມ,3 ພຣະເຈົ້າໄດ້ປາກົດແກ່ລາວອີກ ແລະ ໄດ້ອວຍພອນລາວ. ພຣະເຈົ້າໄດ້ກ່າວແກ່ລາວວ່າ, “ຊື່ຂອງເຈົ້າແມ່ນຢາໂຄບ,4 ແຕ່ເຈົ້າຈະບໍ່ຖືກເອີ້ນວ່າຢາໂຄບອີກຕໍ່ໄປ; ຊື່ຂອງເຈົ້າຈະຖືກເອີ້ນວ່າອິດສະຣາເອນ,5” ດັ່ງນັ້ນ ພຣະອົງຈຶ່ງໄດ້ຕັ້ງຊື່ໃຫ້ລາວວ່າອິດສະຣາເອນ.
ແລະ ພຣະເຈົ້າກໍໄດ້ກ່າວແກ່ລາວວ່າ, “ເຮົາເປັນພຣະເຈົ້າຜູ້ມີລິດອຳນາດຍິ່ງໃຫຍ່;6 ຈົ່ງມີລູກຫລານຈຳນວນຫລວງຫລາຍ ແລະ ເພີ່ມທະວີຈຳນວນຂຶ້ນ. ຊົນຊາດ ແລະ ຊຸມຊົນຂອງຫລາຍຊົນຊາດຈະເກີດມາຈາກເຈົ້າ ແລະ ກະສັດທັງຫລາຍຈະມາຈາກເຊື້ອສາຍຂອງເຈົ້າ. ດິນແດນທີ່ເຮົາໄດ້ມອບໃຫ້ແກ່ອັບຣາຮາມ ແລະ ອີຊາກນັ້ນ ເຮົາກໍມອບໃຫ້ແກ່ເຈົ້າເໝືອນກັນ ແລະ ເຮົາກໍຈະມອບດິນແດນນີ້ໃຫ້ແກ່ເຊື້ອສາຍຂອງເຈົ້າທີ່ຈະມາພາຍຫລັງດ້ວຍ”. ແລ້ວພຣະເຈົ້າກໍໄດ້ຂຶ້ນໄປຈາກລາວຄືຈາກບ່ອນທີ່ພຣະອົງໄດ້ກ່າວກັບລາວນັ້ນ.
ຢາໂຄບຈຶ່ງຕັ້ງເສົາຫີນຂຶ້ນໜຶ່ງເສົາໃສ່ບ່ອນທີ່ພຣະເຈົ້າໄດ້ກ່າວກັບລາວ ແລະ ລາວກໍໄດ້ເທເຄື່ອງດື່ມຖວາຍບູຊາລົງເທິງເສົານັ້ນ; ລາວຍັງໄດ້ເທນ້ຳມັນລົງເທິງເສົານັ້ນເໝືອນກັນ. ຢາໂຄບໄດ້ເອີ້ນບ່ອນທີ່ພຣະເຈົ້າໄດ້ກ່າວກັບລາວນັ້ນວ່າເບັດເອນ.7
ການຕາຍຂອງນາງຣາເຊັນ ແລະ ອີຊາກ
(1ຂຄ 2:1-2)
ຫລັງຈາກນັ້ນ ພວກເຂົາກໍໄດ້ຍົກຍ້າຍອອກຈາກເບັດເອນ. ໃນຂະນະທີ່ພວກເຂົາຍັງຢູ່ໄລຍະຫ່າງໄກຈາກເອຟຣາທາຢູ່, ນາງຣາເຊັນກໍເລີ່ມເຈັບທ້ອງເກີດລູກ ແລະ ນາງໄດ້ເຈັບປວດຫລາຍທີ່ສຸດ. ແລະ ໃນຂະນະທີ່ນາງມີຄວາມເຈັບປວດຫລາຍທີ່ສຸດໃນການເຈັບທ້ອງເກີດລູກຢູ່ນັ້ນ, ໝໍຕຳແຍກໍໄດ້ເວົ້າກັບນາງວ່າ, “ຢ່າຢ້ານເລີຍ, ເພາະເຈົ້າໄດ້ລູກຊາຍອີກຄົນໜຶ່ງ”. ໃນຂະນະທີ່ນາງໃກ້ຈະໝົດລົມຫາຍໃຈ ຄືນາງກຳລັງຈະຕາຍນັ້ນ ນາງກໍໄດ້ຕັ້ງຊື່ໃຫ້ລູກຊາຍຂອງນາງວ່າເບັນໂອນີ.8 ແຕ່ພໍ່ຂອງລາວໄດ້ຕັ້ງຊື່ໃຫ້ລາວວ່າເບັນຢາມິນ.9
ດັ່ງນັ້ນ ນາງຣາເຊັນກໍໄດ້ຕາຍໄປ ແລະ ໄດ້ຖືກຝັງໄວ້ຢູ່ແຄມທາງທີ່ຈະໄປເອຟຣາທາ (ຄືເບັດເລເຮັມ). ຢາໂຄບໄດ້ຕັ້ງເສົາໃສ່ເທິງຂຸມຝັງສົບຂອງນາງເສົາໜຶ່ງ ແລະ ຈົນເຖິງທຸກວັນນີ້ເສົານັ້ນຈຶ່ງເປັນເຄື່ອງໝາຍຂອງຂຸມຝັງສົບຂອງນາງຣາເຊັນ.
ອິດສະຣາເອນໄດ້ຍົກຍ້າຍອອກໄປອີກ ແລະ ໄດ້ຕັ້ງເຕັນຂອງລາວຂຶ້ນຢູ່ກາຍຈາກມິກດັນເອເດໄປ. ໃນຂະນະທີ່ອິດສະຣາເອນຍັງອາໄສຢູ່ໃນທ້ອງຖິ່ນນັ້ນ, ຣູເບັນກໍເຂົ້າໄປໃນ ແລະ ຮ່ວມຫລັບນອນກັບນາງບິນຮາ ຜູ້ເປັນເມຍນ້ອຍຂອງພໍ່ລາວ ແລະ ອິດສະຣາເອນກໍໄດ້ຍິນເຖິງເລື່ອງນີ້.
ຢາໂຄບມີລູກຊາຍສິບສອງຄົນຄື:
ລູກຊາຍຂອງເລອາມີຄື:
ຣູເບັນລູກຊາຍກົກຂອງຢາໂຄບ,
ຊີເມໂອນ, ເລວີ, ຢູດາ, ອິດຊາຄາ ແລະ ເຊບູໂລນ.
ລູກຊາຍຂອງນາງຣາເຊັນມີຄື:
ໂຢເຊັບ ແລະ ເບັນຢາມິນ.
ລູກຊາຍຂອງນາງບິນຮາຄົນຮັບໃຊ້ຂອງນາງຣາເຊັນມີຄື:
ດານ ແລະ ເນບທາລີ.
ລູກຊາຍຂອງນາງຊີລະປາຄົນຮັບໃຊ້ຂອງນາງເລອາມີຄື:
ກາດ ແລະ ອາເຊ.
ທັງໝົດນີ້ຄືບັນດາລູກຊາຍຂອງຢາໂຄບ ທີ່ໄດ້ເກີດໃຫ້ລາວໃນປັດດານອາຣາມ.
ຢາໂຄບໄດ້ກັບມາທີ່ເຮືອນອີຊາກພໍ່ຂອງລາວຢູ່ທີ່ມຳເຣ ເຊິ່ງຢູ່ໃກ້ກິຣິອາດອາກບາ (ຄືເມືອງເຮັບໂຣນ), ບ່ອນທີ່ອັບຣາຮາມ ແລະ ອີຊາກໄດ້ອາໄສຢູ່. ອີຊາກມີຊີວິດຢູ່ 180 ປີ. ແລ້ວອີຊາກກໍໄດ້ໝົດລົມຫາຍໃຈ ແລະ ໄດ້ຕາຍໄປ ແລ້ວກໍໄດ້ຖືກຮວບຮວມໄວ້ກັບຄົນຂອງເພິ່ນ, ເພິ່ນຕາຍໄປເມື່ອເຖົ້າແກ່ຫລາຍແລ້ວ. ແລ້ວເອຊາວກັບຢາໂຄບຜູ້ເປັນລູກຊາຍກໍໄດ້ຝັງສົບຂອງເພິ່ນ.
Source notes (9)
- Footnote ແປວ່າ ພຣະເຈົ້າແຫ່ງເບັດເອນ
- Footnote ແປວ່າ ຕົ້ນໄມ້ໃຫຍ່ແຫ່ງການຮ້ອງໄຫ້
- Footnote ນັ້ນແມ່ນ ຢູ່ທາງຕາເວັນຕົກສ່ຽງເໜືອຂອງເມໂຊໂປຕາເມຍ; ເໝືອນກັນ ໃນ ຂໍ້ 26
- Footnote ອາດມີຄວາມໝາຍວ່າ ລາວຈັບສົ້ນຕີນ (ເປັນສຳນວນໃນພາສາເຮັບເຣີທີ່ແປວ່າ, ລາວຫລອກລວງ)
- Footnote ອາດມີຄວາມໝາຍວ່າ ລາວຕໍ່ສູ້ກັບພຣະເຈົ້າ
- Footnote ພາສາເຮັບເຣີວ່າ ແອວຊາດາຍ
- Footnote ແປວ່າ ເຮືອນຂອງພຣະເຈົ້າ
- Footnote ມີຄວາມໝາຍວ່າ ລູກຊາຍແຫ່ງຄວາມເຈັບປວດຂອງເຮົາ
- Footnote ມີຄວາມໝາຍວ່າ ລູກຊາຍແຫ່ງມືຂວາຂອງເຮົາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.