Biblica® Open Lao Contemporary Version
ປະຖົມມະການ 34
ດີນາກັບຊາວຊີເຄມ
ບັດນີ້ ນາງດີນາລູກສາວຂອງນາງເລອາທີ່ເກີດໃຫ້ແກ່ຢາໂຄບ ໄດ້ອອກໄປຢ້ຽມຢາມບັນດາແມ່ຍິງໃນດິນແດນນັ້ນ. ເມື່ອຊີເຄມລູກຊາຍຂອງຮາໂມຊາວຮີວີ ເຊິ່ງເປັນຜູ້ປົກຄອງຂອງເຂດນັ້ນ ໄດ້ເຫັນນາງ, ລາວໄດ້ຈັບນາງໄປ ແລະ ໄດ້ຂົ່ມຂືນນາງ. ໃຈຂອງລາວກໍຜູກພັນກັບດີນາລູກສາວຂອງຢາໂຄບ; ລາວຮັກຍິງໜຸ່ມນັ້ນ ແລະ ເວົ້າອ່ອນຫວານຕໍ່ນາງ. ແລະ ຊີເຄມກໍໄດ້ເວົ້າຕໍ່ຮາໂມພໍ່ຂອງລາວວ່າ, “ຂໍໃຫ້ພໍ່ໄປເອົາຍິງສາວຄົນນີ້ມາເປັນເມຍລູກ”.
ເມື່ອຢາໂຄບໄດ້ຍິນວ່ານາງດີນາລູກສາວຂອງຕົນເປັນມົນທິນແລ້ວ, ບັນດາລູກຊາຍຂອງລາວກໍຍັງຢູ່ທີ່ທົ່ງນາກັບຝູງສັດລ້ຽງຂອງຕົນຢູ່; ດັ່ງນັ້ນ ຢາໂຄບຈຶ່ງບໍ່ໄດ້ເຮັດສິ່ງໃດກ່ຽວກັບເລື່ອງນີ້ຈົນກວ່າບັນດາລູກຊາຍກັບມາເຮືອນ.
ຫລັງຈາກນັ້ນ ຮາໂມພໍ່ຂອງຊີເຄມກໍໄດ້ອອກໄປເວົ້າກັບຢາໂຄບ. ໃນຂະນະດຽວກັນນັ້ນ ບັນດາລູກຊາຍຂອງຢາໂຄບກໍໄດ້ກັບມາຈາກທົ່ງນາ ທັນທີທີ່ພວກເຂົາໄດ້ຍິນສິ່ງທີ່ໄດ້ເກີດຂຶ້ນນັ້ນ, ພວກເຂົາກໍໄດ້ຕື່ນຕົກໃຈ ແລະ ໃຈຮ້າຍແຮງ, ເພາະຊີເຄມໄດ້ເຮັດສິ່ງຝ່າຝືນຂຶ້ນໃນ1ອິດສະຣາເອນ ໂດຍຮ່ວມຫລັບນອນກັບລູກສາວຂອງຢາໂຄບ ເຊິ່ງເປັນສິ່ງທີ່ບໍ່ຄວນເຮັດ.
ແຕ່ຮາໂມໄດ້ເວົ້າກັບພວກເຂົາວ່າ, “ຊີເຄມລູກຊາຍຂອງຂ້ອຍປັກໃຈຢູ່ກັບລູກສາວຂອງເຈົ້າ. ກະລຸນາມອບນາງໃຫ້ເປັນເມຍຂອງລາວສາ. ໃຫ້ພວກເຮົາມາແຕ່ງງານກັນ; ເອົາບັນດາລູກສາວຂອງພວກເຈົ້າໃຫ້ພວກເຮົາ ແລະ ເອົາບັນດາລູກສາວຂອງພວກເຮົາໄປໃຫ້ພວກເຈົ້າ. ພວກເຈົ້າສາມາດຕັ້ງຖິ່ນຖານຢູ່ທ່າມກາງພວກເຮົາ; ດິນແດນນີ້ເປີດໄວ້ສຳລັບພວກເຈົ້າແລ້ວ. ເຊີນອາໄສຢູ່ໃນດິນແດນນີ້, ເຮັດຄ້າຂາຍໃນດິນແດນນີ້ກໍໄດ້2 ແລະ ເຂົ້າຄອບຄອງທີ່ດິນໃນດິນແດນນີ້ກໍໄດ້”.
ແລ້ວຊີເຄມຈຶ່ງເວົ້າກັບພໍ່ ແລະ ບັນດາອ້າຍຂອງດີນາວ່າ, “ຂໍໃຫ້ພວກທ່ານກະລຸນາຂ້ານ້ອຍດ້ວຍ, ແລ້ວຂ້ານ້ອຍຈະໃຫ້ທຸກຢ່າງຕາມທີ່ພວກທ່ານຂໍມາ. ເຊີນເອີ້ນເອົາຄ່າດອງຂອງເຈົ້າສາວ ແລະ ຂອງຂັວນທີ່ຂ້ານ້ອຍຕ້ອງນຳມາຫລາຍເທົ່າໃດກໍໄດ້ຕາມທີ່ພວກທ່ານມັກ ແລະ ຂ້ານ້ອຍຈະຈ່າຍຕາມທີ່ພວກທ່ານຂໍມາ. ຂໍແຕ່ພຽງຍົກຍິງສາວໃຫ້ເປັນເມຍຂອງຂ້ານ້ອຍ”.
ເພາະນາງດີນານ້ອງສາວຂອງພວກເຂົາເປັນມົນທິນແລ້ວ, ບັນດາລູກຊາຍຂອງຢາໂຄບຈຶ່ງໄດ້ຕອບຢ່າງຫລອກລວງຂະນະທີ່ພວກເຂົາໂອ້ລົມກັບຊີເຄມ ແລະ ຮາໂມພໍ່ຂອງນາງ. ພວກເຂົາໄດ້ເວົ້າຕໍ່ຄົນເຫລົ່ານັ້ນວ່າ, “ພວກເຮົາເຮັດເຊັ່ນນັ້ນບໍ່ໄດ້; ພວກເຮົາບໍ່ສາມາດຍົກນ້ອງສາວຂອງພວກເຮົາໃຫ້ແກ່ຊາຍທີ່ຍັງບໍ່ໄດ້ຮັບພິທີຕັດ. ເພາະຈະຖືວ່າເປັນເລື່ອງອັບອາຍແກ່ພວກເຮົາ. ພວກເຮົາຈະເຮັດຕາມຂໍ້ຕົກລົງກັບພວກເຈົ້າກໍໃນເງື່ອນໄຂດຽວເທົ່ານັ້ນຄື: ພວກເຈົ້າຈະຕ້ອງເປັນເໝືອນພວກເຮົາໂດຍໃຫ້ຜູ້ຊາຍທຸກຄົນໃນພວກເຈົ້າຮັບພິທີຕັດ. ແລ້ວພວກເຮົາຈຶ່ງຈະຍົກບັນດາລູກສາວຂອງພວກເຮົາໃຫ້ພວກເຈົ້າ ແລະ ພວກເຮົາຈະຮັບບັນດາລູກສາວຂອງພວກເຈົ້າມາເປັນຂອງພວກເຮົາເອງ. ພວກເຮົາຈະຕັ້ງຖິ່ນຖານຢູ່ທ່າມກາງພວກເຈົ້າ ແລະ ເປັນປະຊາຊົນກຸ່ມດຽວກັນກັບພວກເຈົ້າ. ແຕ່ຖ້າພວກເຈົ້າບໍ່ຕົກລົງທີ່ຈະຮັບພິທີຕັດ, ພວກເຮົາຈະເອົານ້ອງສາວ3ຂອງພວກເຮົາແລ້ວກໍໄປ”.
ຮາໂມກັບຊີເຄມເຫັນວ່າຂໍ້ສະເໜີຂອງພວກເຂົາດີ. ຊາຍໜຸ່ມຜູ້ໄດ້ຮັບການນັບຖືຫລາຍທີ່ສຸດໃນຄອບຄົວຂອງພໍ່ລາວ ກໍບໍ່ໄດ້ເສຍເວລາໃນການເຮັດສິ່ງທີ່ພວກເຂົາໄດ້ກ່າວໄວ້, ເພາະລາວພໍໃຈກັບລູກສາວຂອງຢາໂຄບຫລາຍ. ດັ່ງນັ້ນ ຮາໂມ ແລະ ຊີເຄມລູກຊາຍຂອງລາວຈຶ່ງໄປທີ່ປະຕູເມືອງຂອງພວກເຂົາເພື່ອເວົ້າກັບຄົນໃນເມືອງພວກເຂົາ. ພວກເຂົາໄດ້ເວົ້າວ່າ, “ຄົນເຫລົ່ານີ້ເປັນມິດຕໍ່ພວກເຮົາ. ໃຫ້ພວກເຂົາມາອາໄສຢູ່ໃນດິນແດນຂອງພວກເຮົາ ແລະ ຄ້າຂາຍໃນດິນແດນນີ້; ແຜ່ນດິນນີ້ມີບ່ອນກວ້າງພຽງພໍສຳລັບພວກເຂົາ. ພວກເຮົາສາມາດແຕ່ງງານກັບບັນດາລູກສາວຂອງພວກເຂົາ ແລະ ພວກເຂົາກໍສາມາດແຕ່ງງານກັບບັນດາລູກສາວຂອງພວກເຮົາໄດ້. ແຕ່ມີເງື່ອນໄຂດຽວທີ່ພວກເຂົາຈະຍອມມາຢູ່ເປັນຄົນກຸ່ມດຽວກັນກັບພວກເຮົາກໍຄື ໃຫ້ບັນດາຜູ້ຊາຍຂອງພວກເຮົາທຸກຄົນຮັບພິທີຕັດເໝືອນດັ່ງທີ່ພວກເຂົາເອງທີ່ຮັບພິທີຕັດ. ແລ້ວສັດລ້ຽງ, ຊັບສົມບັດ ແລະ ສັດອື່ນໆທັງໝົດຂອງພວກເຂົາກໍຈະກາຍເປັນຂອງພວກເຮົາບໍ່ແມ່ນບໍ? ດັ່ງນັ້ນ ໃຫ້ພວກເຮົາຕົກລົງຕາມເງື່ອນໄຂຂອງພວກເຂົາ, ແລ້ວພວກເຂົາຈຶ່ງຈະມາຕັ້ງຖິ່ນຖານຢູ່ທ່າມກາງພວກເຮົາ”.
ຊາຍທຸກຄົນທີ່ອອກໄປຈາກປະຕູເມືອງກໍເຫັນພ້ອມກັບຮາໂມ ແລະ ຊີເຄມລູກຊາຍຂອງລາວ, ແລ້ວຊາຍທຸກຄົນໃນເມືອງກໍໄດ້ຮັບພິທີຕັດ.
ສາມມື້ຕໍ່ມາ, ຂະນະທີ່ພວກເຂົາທຸກຄົນຍັງເຈັບປວດຢູ່ນັ້ນ, ລູກຊາຍສອງຄົນຂອງຢາໂຄບຄື: ຊີເມໂອນ ແລະ ເລວີ ເຊິ່ງເປັນອ້າຍຂອງນາງດີນາ ກໍໄດ້ຈັບເອົາດາບຂອງຕົນແລ້ວເຂົ້າໄປໂຈມຕີເມືອງທີ່ບໍ່ທັນໄດ້ລະວັງຕົວ ດ້ວຍການຂ້າຜູ້ຊາຍທຸກຄົນ. ພວກເຂົາໄດ້ຂ້າຮາໂມ ແລະ ຊີເຄມລູກຊາຍຂອງລາວດ້ວຍດາບແລ້ວເອົານາງດີນາອອກມາຈາກເຮືອນຂອງຊີເຄມແລ້ວໜີໄປ. ບັນດາລູກຊາຍຂອງຢາໂຄບຂ້າມສົບຄົນຕາຍເຫລົ່ານັ້ນເຂົ້າມາ ແລະ ປຸ້ນເມືອງບ່ອນທີ່4ນ້ອງສາວຂອງພວກເຂົາໄດ້ຖືກເຮັດໃຫ້ເປັນມົນທິນນັ້ນ. ພວກເຂົາໄດ້ຢຶດເອົາຝູງແບ້, ຝູງແກະ, ຝູງງົວ, ຝູງລໍ ແລະ ສິ່ງຂອງອື່ນໆທຸກສິ່ງທີ່ເປັນຂອງຄົນເຫລົ່ານັ້ນທີ່ຢູ່ໃນເມືອງ ແລະ ຢູ່ທົ່ງນານອກເມືອງ. ພວກເຂົາໄດ້ກວາດເອົາຊັບສົມບັດທັງໝົດຂອງຄົນເຫລົ່ານັ້ນ ແລະ ກວາດເອົາບັນດາແມ່ຍິງ ແລະ ເດັກນ້ອຍຂອງຄົນເຫລົ່ານັ້ນ, ເອົາທຸກສິ່ງທີ່ຢູ່ໃນເຮືອນເໝືອນກັບນັກປຸ້ນ.
ແລ້ວຢາໂຄບຈຶ່ງໄດ້ເວົ້າກັບຊີເມໂອນ ແລະ ເລວີວ່າ, “ພວກເຈົ້າໄດ້ນຳເອົາຄວາມເດືອດຮ້ອນມາໃສ່ພໍ່ໂດຍເຮັດໃຫ້ພໍ່ເປັນທີ່ໜ້າລັງກຽດຕໍ່ຊາວການາອານ ແລະ ຊາວເປຣິຊີ, ປະຊາຊົນທີ່ອາໄສຢູ່ໃນດິນແດນນີ້. ພວກເຮົາມີຈຳນວນພຽງໜ້ອຍດຽວ ແລະ ຖ້າພວກເຂົາຮວມກຳລັງມາຕໍ່ສູ້ພໍ່ ແລະ ໂຈມຕີພໍ່, ພໍ່ກັບຄົວເຮືອນຂອງພໍ່ກໍຈະຖືກທຳລາຍ”.
ແຕ່ພວກເຂົາໄດ້ຕອບວ່າ, “ຄວນບໍທີ່ລາວມາເຮັດກັບນ້ອງສາວຂອງພວກເຮົາຄືກັບຍິງໂສເພນີ?”
Source notes (4)
- Footnote ຫລື ຕໍ່
- Footnote ຫລື ໄປມາຢ່າງເສລີ ເຊັ່ນດຽວກັບຂໍ້ 21
- Footnote ພາສາເຮັບເຣີວ່າ ລູກສາວ
- Footnote ຫລື ເພາະວ່າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.