ເອຊະຣາ 8

ລາຍ​ຊື່​ຫົວໜ້າ​ຄອບຄົວ​ທີ່​ກັບ​ມາ​ກັບ​ເອສະຣາ

1ຕໍ່ໄປ​ນີ້​ແມ່ນ​ລາຍ​ຊື່​ບັນດາ​ຫົວໜ້າ​ຄອບຄົວ ແລະ ຜູ້​ທີ່​ໄດ້​ຂຶ້ນ​ທະບຽນ​ໄວ້​ກັບ​ພວກເຂົາ ທີ່​ຮ່ວມ​ເດີນ​ທາງ​ມາ​ກັບ​ຂ້າພະເຈົ້າ​ຈາກ​ບາບີໂລນ​ໃນ​ລະຫວ່າງ​ການ​ປົກຄອງ​ຂອງ​ກະສັດ​ອາກຕາເຊເຊັດ ມີ​ດັ່ງນີ້:

2ຈາກ​ເຊື້ອສາຍ​ຟີເນຮາ​ມີ:

ເກໂຊນ;

ຈາກ​ເຊື້ອສາຍ​ອີທາມາ​ມີ:

ດານີເອນ;

ຈາກ​ເຊື້ອສາຍ​ດາວິດ​ມີ:

ຮັດຕຸຊະ; 3ເຊິ່ງ​ສືບ​ເຊື້ອສາຍ​ມາ​ທາງ​ເຊການີຢາ;

ຈາກ​ເຊື້ອສາຍ​ປາຣົດ​ມີ:

ເຊກາຣີຢາ ແລະ ຜູ້ຊາຍ​ອີກ 150 ຄົນ​ທີ່​ຂຶ້ນ​ທະບຽນ​ກັບ​ລາວ;

4ຈາກ​ເຊື້ອສາຍ​ປາຮາດ​ໂມອາບ​ມີ:

ເອລີໂຮນາຍ​ລູກຊາຍ​ຂອງ​ເຊຣາຮີຢາ ແລະ ຜູ້ຊາຍ​ອີກ 200 ຄົນ;

5ຈາກ​ເຊື້ອສາຍ​ຊັດຕູ1​ມີ:

ເຊການີຢາ​ລູກຊາຍ​ຂອງ​ຢາຮາຊີເອນ ແລະ ຜູ້ຊາຍ​ອີກ 300 ຄົນ.

6ຈາກ​ເຊື້ອສາຍ​ອາດິນ​ມີ:

ເອເບັດ​ລູກຊາຍ​ຂອງ​ໂຢນາທານ ແລະ ຜູ້ຊາຍ​ອີກ 50 ຄົນ;

7ຈາກ​ເຊື້ອສາຍ​ເອລາມ​ມີ:

ເຢຊາອີຢາ​ລູກຊາຍ​ຂອງ​ອາທາລີຢາ ແລະ ຜູ້ຊາຍ​ອີກ 50 ຄົນ;

8ຈາກ​ເຊື້ອສາຍ​ເຊຟາຕີຢາ​ມີ:

ເຊບາດີຢາ​ລູກຊາຍ​ຂອງ​ມີຄາເອນ ແລະ ຜູ້ຊາຍ​ອີກ 80 ຄົນ:

9ຈາກ​ເຊື້ອສາຍ​ໂຢອາບ​ມີ:

ໂອບາດີຢາ​ລູກຊາຍ​ຂອງ​ເຢຮີເອນ ແລະ ຜູ້ຊາຍ​ອີກ 218 ຄົນ;

10ຈາກ​ເຊື້ອສາຍ​ບານີ2​ມີ:

ເຊໂລມິດ​ລູກຊາຍ​ຂອງ​ໂຢຊິຟີຢາ ແລະ ຜູ້ຊາຍ​ອີກ 160 ຄົນ;

11ຈາກ​ເຊື້ອສາຍ​ເບບາຍ​ມີ:

ເຊກາຣີຢາ​ລູກຊາຍ​ຂອງ​ເບບາຍ ແລະ ຜູ້ຊາຍ​ອີກ 28 ຄົນ;

12ຈາກ​ເຊື້ອສາຍ​ອາຊະກາດ​ມີ:

ໂຢນາທານ​ລູກຊາຍ​ຂອງ​ຮັກກາຕານ ແລະ ຜູ້ຊາຍ​ອີກ 110 ຄົນ;

13ຈາກ​ເຊື້ອສາຍ​ອາໂດນີກຳ​ມີ:

ພວກ​ສຸດທ້າຍ​ມີ​ຊື່​ວ່າ​ເອລີເຟເລັດ, ເຢອູເອນ, ເຊມາອີຢາ ແລະ ຜູ້ຊາຍ​ອີກ 60 ຄົນ;

14ຈາກ​ເຊື້ອສາຍ​ບິກໄຫວ​ມີ:

ອູໄທ ແລະ ຊັກກູເຣ ແລະ ຜູ້ຊາຍ​ອີກ 70 ຄົນ.

ການ​ກັບ​ຄືນ​ສູ່​ເຢຣູຊາເລັມ

15ຂ້າພະເຈົ້າ​ໃຫ້​ພວກເຂົາ​ມາ​ຊຸມນຸມ​ກັນ​ຢູ່​ທີ່​ຫ້ວຍນ້ຳ​ທີ່​ໄຫລ​ໄປ​ສູ່​ອາຮາວາ ແລະ ຕັ້ງຄ້າຍ​ຢູ່​ທີ່​ນັ້ນ​ສາມ​ວັນ. ເມື່ອ​ຂ້າພະເຈົ້າ​ກວດ​ເບິ່ງ​ທ່າມກາງ​ປະຊາຊົນ ແລະ ປະໂລຫິດ ກໍ​ພົບ​ວ່າ​ບໍ່​ມີ​ຄົນ​ເລວີ​ເລີຍ. 16ຂ້າພະເຈົ້າ​ຈຶ່ງ​ໄດ້​ເຊີນ ເອລີເອເຊ, ອາຣີເອນ, ເຊມາອີຢາ, ເອນນາທານ, ຢາຣິບ, ເອນນາທານ, ນາທານ, ເຊກາຣີຢາ ແລະ ເມຊຸນລຳ ຜູ້​ເປັນ​ຜູ້ນໍາ ແລະ ເຊີນ​ໂຢອີອາຣິບ ແລະ ເອນນາທານ, ເຊິ່ງ​ເປັນ​ຜູ້​ຮອບ​ຮູ້​ມາ​ນໍາ, 17ແລະ ຂ້າພະເຈົ້າ​ໄດ້​ສັ່ງ​ໃຫ້​ພວກເຂົາ​ໄປ​ພົບ​ອິດໂດ, ຜູ້ນຳ​ໃນ​ກາຊີຟີອາ, ຂ້າພະເຈົ້າ​ໄດ້​ບອກ​ພວກເຂົາ​ໃນ​ສິ່ງ​ທີ່​ຈະ​ກ່າວ​ກັບ​ອິດໂດ ແລະ ຄົນ​ເລວີ​ທີ່​ຕິດຕາມ​ເພິ່ນ, ຜູ້ຮັບໃຊ້​ໃນ​ວິຫານ​ທີ່​ອາໄສ​ຢູ່​ທີ່​ກາຊີຟີອາ, ເພື່ອ​ພວກເຂົາ​ຈະ​ໄດ້​ພາ​ຄົນ​ທີ່​ຈະ​ເຮັດວຽກ​ໃນ​ວິຫານ​ຂອງ​ພຣະເຈົ້າ​ຂອງ​ພວກເຮົາ​ມາ​ຫາ​ພວກເຮົາ. 18ເພາະ​ມື​ອັນ​ເຕັມ​ດ້ວຍ​ຄວາມ​ເມດຕາ​ຂອງ​ພຣະເຈົ້າ​ຢູ່​ເໜືອ​ພວກເຮົາ, ພວກເຂົາ​ໄດ້​ສົ່ງ​ເຊເຣບີຢາ ຜູ້​ທີ່​ມີ​ຄວາມ​ສາມາດ ພ້ອມ​ກັບ​ລູກຊາຍ ແລະ ພີ່ນ້ອງ​ຂອງ​ລາວ​ສິບ​ແປດ​ຄົນ​ມາ​ໃຫ້. ເຊເຣບີຢາ​ເປັນ​ເຊື້ອສາຍ​ຂອງ​ມາຮະລີ ລູກຊາຍ​ຂອງ​ເລວີ ຜູ້​ເປັນ​ລູກຊາຍ​ຂອງ​ອິດສະຣາເອນ; 19ແລະ ຮາຊາບິຢາ​ກັບ​ເຢຊາອີຢາ​ຈາກ​ເຊື້ອສາຍ​ຂອງ​ເມຣາຣິ ພ້ອມ​ທັງ​ພີ່ນ້ອງ ແລະ ຫລານ​ຊາຍ​ຊາວ​ຄົນ. 20ພວກເຂົາ​ຍັງ​ໄດ້​ສົ່ງ​ຜູ້ຮັບໃຊ້​ໃນ​ວິຫານ​ອີກ 220 ຄົນ​ມາ ນີ້​ແມ່ນ​ກຸ່ມ​ຄົນ​ທີ່​ດາວິດ ແລະ ເຈົ້າໜ້າທີ່​ຂອງ​ເພິ່ນ​ໄດ້​ແຕ່ງຕັ້ງ​ຂຶ້ນ​ເພື່ອ​ໃຫ້​ຊ່ວຍ​ຄົນ​ເລວີ. ທຸກຄົນ​ໄດ້​ມີ​ຊື່​ລົງ​ທະບຽນ​ໄວ້​ແລ້ວ.

21ຢູ່​ທີ່​ແຄມ​ຫ້ວຍ​ນ້ຳ​ອາຮາວາ, ຂ້າພະເຈົ້າ​ໄດ້​ປະກາດ​ໃຫ້​ຖື​ສິນ​ອົດ​ອາຫານ ເພື່ອ​ວ່າ​ພວກເຮົາ​ຈະ​ຖ່ອມ​ໃຈ​ລົງ​ຕໍ່ໜ້າ​ພຣະເຈົ້າ​ຂອງ​ພວກເຮົາ ແລະ ຂໍ​ພຣະອົງ​ໃຫ້​ພວກເຮົາ ແລະ ລູກ​ຫລານ​ຂອງ​ພວກເຮົາ ພ້ອມ​ດ້ວຍ​ຊັບສິນ​ຂອງ​ພວກເຮົາ​ທັງໝົດ ເດີນທາງ​ດ້ວຍ​ຄວາມ​ປອດໄພ. 22ຂ້າພະເຈົ້າ​ລະອາຍ​ໃຈ​ທີ່​ຈະ​ຂໍ​ກຳລັງ​ທະຫານ ແລະ ທະຫານ​ມ້າ​ຈາກ​ກະສັດ​ໃຫ້​ປົກປ້ອງ​ພວກຂ້າພະເຈົ້າ​ຈາກ​ສັດຕູ​ຕາມ​ທາງ ເພາະ​ພວກຂ້າພະເຈົ້າ​ໄດ້​ບອກ​ກະສັດ​ໄວ້​ວ່າ “ມື​ອັນ​ເຕັມ​ດ້ວຍ​ຄວາມ​ເມດຕາ​ຂອງ​ພຣະເຈົ້າ​ຂອງ​ພວກຂ້ານ້ອຍ​ຢູ່​ເໜືອ​ທຸກຄົນ​ທີ່​ຫວັງ​ເພິ່ງ​ພຣະອົງ ແຕ່​ພຣະອົງ​ໃຈຮ້າຍ​ຫລາຍ​ຕໍ່​ທຸກຄົນ​ທີ່​ປະຖິ້ມ​ພຣະອົງ”. 23ດັ່ງນັ້ນ ຂ້າພະເຈົ້າ​ຈຶ່ງ​ຖື​ສິນ​ອົດ​ອາຫານ ແລະ ອ້ອນ​ວອນ​ພຣະເຈົ້າ​ຂອງ​ພວກຂ້າພະເຈົ້າ​ໃນ​ເລື່ອງ​ນີ້ ແລະ ພຣະອົງ​ໄດ້​ຕອບ​ຄຳ​ອະທິຖານ​ຂອງ​ຂ້ານ້ອຍ.

24ແລ້ວ​ຂ້າພະເຈົ້າ​ກໍ​ໄດ້​ແຕ່ງຕັ້ງ​ຜູ້ນຳ​ປະໂລຫິດ​ສິບ​ສອງ​ຄົນ ພ້ອມ​ດ້ວຍ​ເຊເຣບີຢາ, ຮາຊາບິຢາ ແລະ ພີ່ນ້ອງ​ຂອງ​ພວກເພິ່ນ​ສິບ​ຄົນ. 25ແລະ ຂ້າພະເຈົ້າ​ໄດ້​ຊັ່ງ​ນ້ຳໜັກ​ເງິນ, ຄຳ ແລະ ເຄື່ອງ​ໃຊ້​ຕ່າງໆ ທີ່​ກະສັດ, ທີ່ປຶກສາ​ຂອງ​ເພິ່ນ, ເຈົ້າໜ້າທີ່​ຂອງ​ເພິ່ນ ແລະ ປະຊາຊົນ​ອິດສະຣາເອນ​ທັງໝົດ​ທີ່​ຢູ່​ທີ່​ນັ້ນ​ໄດ້​ຖວາຍ​ສິ່ງ​ເຫລົ່ານີ້​ເພື່ອ​ວິຫານ​ຂອງ​ພຣະເຈົ້າ​ຂອງ​ພວກເຮົາ. 26ຂ້າພະເຈົ້າ​ໄດ້​ຊັ່ງ​ນ້ຳໜັກ​ສິ່ງ​ຕໍ່ໄປ​ນີ້​ມອບ​ໃຫ້​ພວກເຂົາ ມີ​ເງິນ​ໜັກ​ປະມານ 650 ຕາລັນຕົນ,3 ເຄື່ອງ​ໃຊ້​ທີ່​ເຮັດ​ດ້ວຍ​ເງິນ​ຕ່າງໆ ໜັກ​ປະມານ 100 ຕາລັນຕົນ,4 ຄຳ​ໜັກ​ປະມານ 100 ຕາລັນຕົນ, 27ຊາມ​ທີ່​ເຮັດ​ດ້ວຍ​ຄຳ 20 ໃບ ມີ​ຄ່າ​ເທົ່າ​ກັບ​ຄຳ​ປະມານ 1.000 ດາຣິກ,5 ແລະ ມີ​ເຄື່ອງໃຊ້​ທີ່​ເຮັດ​ດ້ວຍ​ທອງສຳລິດ​ຂັດ​ເງົາ​ຢ່າງ​ດີ​ສອງ​ອັນ, ເຊິ່ງ​ມີ​ຄ່າ​ທຽບ​ເທົ່າ​ກັບ​ຄຳ.

28ຂ້າພະເຈົ້າ​ໄດ້​ເວົ້າ​ກັບ​ພວກເຂົາ​ວ່າ, “ພວກທ່ານ ແລະ ເຄື່ອງໃຊ້​ເຫລົ່ານີ້​ໄດ້​ຮັບ​ການ​ຊຳລະ​ໃຫ້​ບໍລິສຸດ​ຖວາຍ​ແດ່​ພຣະເຈົ້າ​ຢາເວ. ສ່ວນ​ເງິນ ແລະ ຄຳ​ເປັນ​ຂອງ​ຖວາຍ​ຕາມ​ຄວາມ​ສະໝັກ​ໃຈ​ແກ່​ພຣະເຈົ້າ​ຢາເວ, ພຣະເຈົ້າ​ຂອງ​ບັນພະບຸລຸດ​ຂອງ​ພວກທ່ານ. 29ຈົ່ງ​ປົກປ້ອງ​ຮັກສາ​ເຄື່ອງ​ທັງໝົດ​ນີ້​ໄວ້​ໃຫ້​ດີ​ຈົນ​ກວ່າ​ພວກທ່ານ​ຈະ​ນຳ​ອອກ​ມາ​ຊັ່ງ​ນ້ຳໜັກ​ຢູ່​ທີ່​ຄັງ​ວິຫານ​ຂອງ​ພຣະເຈົ້າ​ຢາເວ​ໃນ​ເຢຣູຊາເລັມ​ຕໍ່ໜ້າ​ບັນດາ​ຫົວໜ້າ​ປະໂລຫິດ, ຄົນ​ເລວີ ແລະ ຫົວໜ້າ​ຄອບຄົວ​ທັງຫລາຍ​ຂອງ​ອິດສະຣາເອນ”. 30ຫລັງຈາກນັ້ນ ປະໂລຫິດ ແລະ ຄົນ​ເລວີ​ຈຶ່ງ​ຮັບ​ເງິນ, ຄຳ ແລະ ເຄື່ອງໃຊ້​ສັກສິດ​ທີ່​ໄດ້​ຊັ່ງ​ນ້ຳໜັກ​ແລ້ວ​ນັ້ນ ເພື່ອ​ນຳ​ໄປ​ຍັງ​ວິຫານ​ຂອງ​ພຣະເຈົ້າ​ຂອງ​ພວກຂ້າພະເຈົ້າ​ໃນ​ເຢຣູຊາເລັມ.

31ໃນ​ວັນ​ທີ​ສິບ​ສອງ​ຂອງ​ເດືອນ​ທີ​ໜຶ່ງ ພວກຂ້ານ້ອຍ​ໄດ້​ອອກເດີນທາງ​ຈາກ​ແມ່ນ້ຳ​ອາຮາວາ​ໄປ​ທີ່​ເຢຣູຊາເລັມ. ມື​ຂອງ​ພຣະເຈົ້າ​ຂອງ​ພວກຂ້ານ້ອຍ​ກໍ​ຢູ່​ເໜືອ​ພວກຂ້ານ້ອຍ ແລະ ພຣະອົງ​ໄດ້​ປົກປ້ອງ​ພວກຂ້ານ້ອຍ​ຈາກ​ບັນດາ​ສັດຕູ ແລະ ໂຈນ​ຕາມ​ທາງ. 32ດັ່ງນັ້ນ ພວກຂ້ານ້ອຍ​ຈຶ່ງ​ມາ​ຮອດ​ເຢຣູຊາເລັມ ແລະ ພັກ​ຢູ່​ທີ່​ນັ້ນ​ເປັນ​ເວລາ​ສາມ​ວັນ.

33ໃນ​ວັນ​ທີ​ສີ່, ໃນ​ວິຫານ​ພຣະເຈົ້າ​ຂອງ​ພວກຂ້ານ້ອຍ, ພວກຂ້ານ້ອຍ​ໄດ້​ຊັ່ງ​ນ້ຳໜັກ​ເງິນ, ຄຳ ແລະ ເຄື່ອງໃຊ້​ສັກສິດ​ຕ່າງໆ ມອບ​ໃຫ້​ເມເຣໂມດ​ລູກຊາຍ​ຂອງ​ອູຣິຢາ, ຜູ້​ເປັນ​ປະໂລຫິດ. ເອເລອາຊາ​ລູກຊາຍ​ຂອງ​ຟີເນຮາ ພ້ອມ​ກັບ​ຄົນ​ເລວີ​ຄື: ໂຢຊາບັດ​ລູກຊາຍ​ຂອງ​ເຢຊູອາ ແລະ ໂນອານີຢາ​ລູກຊາຍ​ຂອງ​ບິນນູອີ​ກໍ​ຢູ່​ທີ່​ນັ້ນ​ດ້ວຍ. 34ມີ​ການ​ກວດ​ຮັບ​ທຸກ​ຢ່າງ​ຕາມ​ຈຳນວນ​ກັບ​ນ້ຳໜັກ ແລະ ຈົດ​ນ້ຳໜັກ​ທັງໝົດ​ໄວ້​ໃນ​ຄັ້ງ​ນັ້ນ.

35ຫລັງຈາກນັ້ນ ບັນດາ​ຊະເລີຍ​ທີ່​ກັບ​ມາ​ກໍ​ໄດ້​ຖວາຍ​ເຄື່ອງບູຊາ​ແກ່​ພຣະເຈົ້າ​ແຫ່ງ​ອິດສະຣາເອນ​ຄື: ງົວ​ເຖິກ 12 ໂຕ​ສຳລັບ​ຄົນ​ອິດສະຣາເອນ​ທັງໝົດ, ແກະ​ເຖິກ 96 ໂຕ ແລະ ລູກແກະ​ໂຕຜູ້ 77 ໂຕ, ພ້ອມ​ທັງ​ແບ້​ຜູ້ 12 ໂຕ ເພື່ອ​ເປັນ​ເຄື່ອງບູຊາ​ໄຖ່​ບາບ.6 ທັງໝົດ​ນີ້​ເປັນ​ເຄື່ອງ​ບູຊາ​ຖວາຍ​ແກ່​ພຣະເຈົ້າ​ຢາເວ. 36ພວກເຂົາ​ຍັງ​ໄດ້​ມອບ​ຄໍາສັ່ງ​ຂອງ​ກະສັດ​ໃຫ້​ແກ່​ບັນດາ​ເສນາບໍດີ ແລະ ບັນດາ​ຜູ້​ທີ່​ປົກຄອງ​ເຂດ​ຕ່າງໆ​ທີ່​ຢູ່​ອີກ​ຟາກ​ໜຶ່ງ​ຂອງ​ແມ່ນ້ຳ​ເອີຟຣັດ, ຫລັງຈາກນັ້ນ ພວກເຂົາ​ຈຶ່ງ​ໃຫ້​ຄວາມ​ຊ່ວຍເຫລືອ​ແກ່​ປະຊາຊົນ ແລະ ແກ່​ວິຫານ​ຂອງ​ພຣະເຈົ້າ.