ເອເຊກຽນ 41

1ແລ້ວ​ຊາຍ​ຄົນ​ນັ້ນ​ກໍ​ໄດ້​ພາ​ຂ້າພະເຈົ້າ​ໄປ​ທີ່​ສະຖານ​ນະມັດສະການ​ດ້ານ​ນອກ ແລະ ໄດ້​ແທກ​ເສົາ; ຄວາມ​ກວ້າງ​ຂອງ​ເສົາ​ແຕ່​ລະ​ດ້ານ​ແມ່ນ 6 ສອກ.1 2ທາງເຂົ້າ​ນັ້ນ​ກວ້າງ 10 ສອກ2 ແລະ ຝາ​ກັ້ນ​ຂອງ​ແຕ່​ລະ​ຟາກ​ກວ້າງ 5 ສອກ.3 ເພິ່ນ​ຍັງ​ໄດ້​ແທກ​ສະຖານ​ນະມັດສະການ​ດ້ານ​ນອກ​ດ້ວຍ ເຊິ່ງ​ມີ​ຄວາມ​ຍາວ 40 ສອກ ແລະ ກວ້າງ 20 ສອກ.4

3ແລ້ວ​ເພິ່ນ​ກໍ​ໄດ້​ເຂົ້າ​ໄປ​ສະຖານ​ນະມັດສະການ​ຊັ້ນ​ໃນ ແລະ ໄດ້​ແທກເສົາ​ທາງເຂົ້າ; ເສົາ​ແຕ່​ລະ​ຕົ້ນ​ແມ່ນ​ກວ້າງ 2 ສອກ.5 ທາງເຂົ້າ​ນັ້ນ​ກວ້າງ 6 ສອກ ແລະ ຝາ​ກັ້ນ​ຂອງ​ທາງເຂົ້າ​ແຕ່​ລະ​ດ້ານ​ກວ້າງ 7 ສອກ.6 4ແລະ ເພິ່ນ​ໄດ້​ແທກ​ຂະໜາດ​ຂອງ​ສະຖານ​ນະມັດສະການ​ຊັ້ນ​ໃນ​ໄປ​ຈົນ​ຮອດ​ສະຖານ​ນະມັດສະການ​ຊັ້ນ​ນອກ ເຊິ່ງ​ມີ​ຄວາມ​ຍາວ 20 ສອກ7 ແລະ ມີ​ຄວາມ​ກວ້າງ 20 ສອກ. ເພິ່ນ​ໄດ້​ເວົ້າ​ກັບ​ຂ້າພະເຈົ້າ​ວ່າ, “ນີ້​ແມ່ນ​ບ່ອນ​ທີ່​ສັກສິດ​ທີ່​ສຸດ”.

5ແລ້ວ​ເພິ່ນ​ກໍ​ໄດ້​ແທກ​ຝາ​ວິຫານ ເຊິ່ງ​ຝາ​ນັ້ນ​ມີ​ຄວາມ​ໜາ 6 ສອກ ແລະ ແທກ​ຫ້ອງ​ລະບຽງ​ອ້ອມ​ວິຫານ ແຕ່​ລະ​ຫ້ອງ​ແມ່ນ​ກວ້າງ 4 ສອກ.8 6ຫ້ອງ​ລະບຽງ​ມີ​ສາມ​ຊັ້ນ, ຊັ້ນເທິງ​ມີ​ຊັ້ນ​ລະ​ສາມ​ສິບ​ຫ້ອງ. ອ້ອມ​ຝາ​ວິຫານ​ມີ​ຂອບ​ເພື່ອ​ຮອງ​ຮັບ​ຫ້ອງ​ລະບຽງ ບໍ່​ໄດ້​ສ້າງ​ຢຶດ​ຕິດ​ກັບ​ຝາ​ວິຫານ. 7ຫ້ອງ​ລະບຽງ​ອ້ອມ​ວິຫານ​ນັ້ນ ຍິ່ງ​ຢູ່​ຊັ້ນ​ສູງ​ຂຶ້ນ​ກໍ​ຍິ່ງ​ກວ້າງ​ຂຶ້ນ. ຢຶດ​ຕິດ​ກັບ​ຝາ​ວິຫານ​ທີ່​ເປັນ​ຊັ້ນ​ຂຶ້ນ​ໄປ. ມີ​ຂັ້ນໄດ​ຈາກ​ຊັ້ນ​ລຸ່ມ​ສຸດ​ຂຶ້ນ​ຜ່ານ​ຊັ້ນ​ກາງ​ໄປ​ຈົນ​ເຖິງ​ຊັ້ນ​ເທິງ​ສຸດ.

8ຂ້າພະເຈົ້າ​ເຫັນ​ວ່າ​ວິຫານ​ມີ​ຍົກ​ພື້ນ​ອ້ອມ​ຮອບ ເປັນ​ຖານ​ຮອງ​ຮັບ​ຫ້ອງ​ລະບຽງ. ເຊິ່ງ​ເປັນ​ຄວາມ​ຍາວ​ຂອງ​ໄມ້​ວັດແທກ​ຄື 6 ສອກ. 9ຝາ​ອ້ອມ​ນອກ​ຂອງ​ລະບຽງ​ໜາ 5 ສອກ. ບ່ອນ​ໂລ່ງ​ລະຫວ່າງ​ຫ້ອງ​ລະບຽງ​ຂອງ​ວິຫານ 10ແລະ ຫ້ອງ​ຕ່າງໆ​ຂອງ​ປະໂລຫິດ​ແມ່ນ​ມີ​ຄວາມ​ກວ້າງ 20 ສອກ ອ້ອມ​ຮອບ​ວິຫານ. 11ຈາກ​ບ່ອນ​ໂລ່ງ​ນັ້ນ​ກໍ​ມີ​ທາງເຂົ້າ​ສູ່​ຫ້ອງ​ລະບຽງ​ສອງ​ທາງ​ຄື​ດ້ານ​ເໜືອ ແລະ ດ້ານ​ໃຕ້ ແລະ ຍົກ​ພື້ນ​ຕໍ່​ກັບ​ບ່ອນ​ໂລ່ງ​ນັ້ນ ເຊິ່ງ​ກວ້າງ 5 ສອກ ໂດຍ​ອ້ອມ​ຮອບ.

12ອາຄານ​ທີ່​ຫັນ​ໜ້າ​ໄປ​ທີ່​ເດີ່ນ​ວິຫານ​ທາງ​ດ້ານ​ຕາເວັນ​ຕົກ​ນັ້ນ​ກວ້າງ 70 ສອກ.9 ຝາ​ອາຄານ​ນັ້ນ​ໜາ 5 ສອກ ໂດຍ​ອ້ອມ​ຮອບ ແລະ ຍາວ 90 ສອກ.10

13ແລ້ວ​ກໍ​ໄດ້​ແທກ​ວິຫານ ເຊິ່ງ​ມີ​ຄວາມ​ຍາວ 100 ສອກ11 ແລະ ເດີ່ນ​ວິຫານ​ກັບ​ອາຄານ ແລະ ຝາ​ກໍ​ມີ​ຄວາມ​ຍາວ 100 ສອກ. 14ຄວາມ​ກວ້າງ​ຂອງ​ເດີ່ນ​ວິຫານ​ທາງ​ຟາກ​ຕາເວັນ​ອອກ ລວມ​ທັງ​ດ້ານ​ໜ້າ​ຂອງ​ວິຫານ​ແມ່ນ 100 ສອກ.

15ແລ້ວ​ເພິ່ນ​ກໍ​ໄດ້​ແທກ​ຄວາມ​ຍາວ​ຂອງ​ອາຄານ​ທີ່​ຫັນ​ໜ້າ​ໄປ​ຫາ​ເດີ່ນ​ດ້ານ​ຫລັງ​ຂອງ​ວິຫານ ລວມ​ທັງ​ທາງຍ່າງ​ແຕ່​ລະ​ດ້ານ​ແທກ​ໄດ້ 100 ສອກ.

ສະຖານ​ນະມັດສະການ​ຊັ້ນ​ນອກ, ສະຖານ​ນະມັດສະການ​ຊັ້ນ​ໃນ ແລະ ລະບຽງ​ແມ່ນ​ຫັນ​ໜ້າ​ໄປ​ຫາ​ເດີ່ນ, 16ທັງ​ທໍລະນີ​ປະຕູ ແລະ ປ່ອງຢ້ຽມ​ແຄບ​ເຂົ້າ​ໄປ ແລະ ທາງຍ່າງ​ອ້ອມ​ທາງເຂົ້າ​ທັງ​ສາມ ຄື​ທຸກ​ສ່ວນ​ທີ່​ຢູ່​ເໜືອ​ຂຶ້ນ​ໄປ​ລວມ​ທັງ​ທໍລະນີ​ປະຕູ​ລ້ວນ​ຫຸ້ມ​ດ້ວຍ​ໄມ້. ພື້ນ ແລະ ຝາ​ຂຶ້ນ​ໄປ​ຫາ​ປ່ອງຢ້ຽມ ແລະ ປ່ອງຢ້ຽມ​ກໍ​ຫຸ້ມ​ດ້ວຍ​ໄມ້. 17ໃນ​ບ່ອນຫວ່າງ​ທີ່​ຢູ່​ເໜືອ​ດ້ານ​ນອກ​ຂອງ​ທາງເຂົ້າ​ໄປ​ສູ່​ສະຖານ​ນະມັດສະການ​ຊັ້ນ​ໃນ ແລະ ທີ່​ຝາ​ເປັນ​ໄລຍະ​ສະໝ່ຳ​ສະເໝີ​ອ້ອມ​ສະຖານ​ນະມັດສະການ​ທັງ​ຊັ້ນ​ໃນ ແລະ ຊັ້ນ​ນອກ​ນັ້ນ 18ຄື​ຮູບ​ແກະສະຫລັກ​ເຄຣຸບ ແລະ ຕົ້ນຕານ. ຮູບ​ແກະສະຫລັກ​ຕົ້ນຕານ​ແມ່ນ​ຢູ່​ສະຫລັບ​ກັນ​ກັບ​ຮູບ​ແກະສະຫລັກ​ເຄຣຸບ. ເຄຣຸບ​ແຕ່​ລະ​ຕົນ​ມີ​ສອງ​ໜ້າ. 19ໜ້າ​ໜຶ່ງ​ເປັນ​ໜ້າ​ມະນຸດ ຫັນ​ໜ້າ​ໄປ​ຫາ​ຕົ້ນຕານ​ທາງ​ດ້ານ​ໜຶ່ງ ແລະ ອີກ​ໜ້າ​ໜຶ່ງ​ເປັນ​ໜ້າ​ໂຕສິງ ຫັນ​ໄປ​ຫາ​ຕົ້ນຕານ​ອີກ​ທາງ​ດ້ານ​ໜຶ່ງ. ສະຫລັກ​ເປັນ​ລວດລາຍ​ຢ່າງ​ນີ້​ອ້ອມ​ວິຫານ​ທັງໝົດ. 20ທີ່​ຝາ​ຂອງ​ສະຖານ​ນະມັດສະການ​ຊັ້ນ​ນອກ ຈາກ​ພື້ນ​ໄປ​ຫາ​ບໍລິເວນ​ເໜືອ​ທາງເຂົ້າ​ແມ່ນ​ແກະສະຫລັກ​ເປັນ​ຮູບ​ເຄຣຸບ ແລະ ຕົ້ນຕານ.

21ສະຖານ​ນະມັດສະການ​ຊັ້ນ​ນອກ​ມີ​ວົງກົບ​ປະຕູ​ເປັນ​ຮູບ​ສີ່​ຫລ່ຽມ ແລະ ປະຕູ​ທີ່​ຢູ່​ທາງ​ໜ້າ​ບ່ອນ​ສັກສິດ​ທີ່​ສຸດ​ກໍ​ຄ້າຍ​ຄື​ກັນ. 22ມີ​ແທ່ນບູຊາ​ທີ່​ເຮັດ​ດ້ວຍ​ໄມ້​ສູງ 3 ສອກ12 ແລະ ກວ້າງ​ຍາວ​ດ້ານ​ລະ13 2 ສອກ.14 ມຸມ​ຂອງ​ແທ່ນ, ຖານ​ຂອງ​ແທ່ນ ແລະ ດ້ານ​ຂ້າງ​ຂອງ​ແທ່ນ​ແມ່ນ​ເຮັດ​ດ້ວຍ​ໄມ້. ຊາຍ​ຄົນ​ນັ້ນ​ໄດ້​ເວົ້າ​ກັບ​ຂ້າພະເຈົ້າ​ວ່າ, “ນີ້​ຄື​ໂຕະ​ທີ່​ຢູ່​ຕໍ່ໜ້າ​ພຣະເຈົ້າ​ຢາເວ”. 23ທັງ​ສະຖານ​ນະມັດສະການ​ຊັ້ນ​ນອກ ແລະ ບ່ອນ​ທີ່​ສັກສິດ​ທີ່ສຸດ ແມ່ນ​ມີ​ປະຕູ​ພັບ. 24ປະຕູ​ແຕ່​ລະ​ບານ​ແມ່ນ​ມີ​ສອງ​ບານ ປະຕູ​ແຕ່​ລະ​ບານ​ມີ​ບານພັບ​ສອງ​ອັນ. 25ແລະ ຢູ່​ທີ່​ປະຕູ​ບ່ອນ​ນະມັດສະການ​ຊັ້ນ​ນອກ​ແມ່ນ​ມີ​ລວດລາຍ​ແກະສະຫລັກ​ຮູບ​ເຄຣຸບ ແລະ ຮູບ​ຕົ້ນຕານ​ເໝືອນ​ກັບ​ທີ່​ແກະສະຫລັກ​ໄວ້​ທີ່​ຝາ ແລະ ມີ​ໄມ້​ກັນສາດ​ຢູ່​ໜ້າ​ລະບຽງ. 26ຢູ່​ທີ່​ຝາ​ດ້ານ​ຂ້າງ​ຂອງ​ລະບຽງ​ແມ່ນ​ມີ​ປ່ອງຢ້ຽມ​ແຄບ​ເຂົ້າ​ໄປ ແລະ ມີ​ຮູບ​ແກະສະຫລັກ​ຕົ້ນຕານ​ຢູ່​ທີ່​ແຕ່​ລະ​ດ້ານ. ຫ້ອງ​ລະບຽງ​ຂອງ​ວິຫານ​ກໍ​ກັນສາດ.