Biblica® Open Lao Contemporary Version
ເອເຊກຽນ 29
ຄຳທຳນວາຍກ່າວໂທດເອຢິບ
ການພິພາກສາເທິງຟາໂຣ
ໃນວັນທີສິບສອງເດືອນທີສິບປີທີສິບ ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ: “ບຸດມະນຸດ, ຈົ່ງຫັນໜ້າຂອງເຈົ້າໄປທາງຟາໂຣກະສັດແຫ່ງເອຢິບ ແລະ ທຳນວາຍກ່າວໂທດລາວ ແລະ ເອຢິບທັງໝົດ. ຈົ່ງກ່າວກັບລາວ ແລະ ເວົ້າວ່າ: ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ:
“ ‘ຟາໂຣກະສັດແຫ່ງເອຢິບ ເຮົາເປັນສັດຕູກັບເຈົ້າ,
ເຈົ້າເປັນສັດຮ້າຍຜູ້ຍິ່ງໃຫຍ່ທີ່ດັກຊຸ້ມຢູ່ໃນສາຍນ້ຳຂອງເຈົ້າ.
ເຈົ້າກ່າວວ່າ, “ແມ່ນ້ຳນິນເປັນຂອງຂ້ອຍ;
ຂ້ອຍສ້າງມັນຂຶ້ນມາເພື່ອໂຕຂ້ອຍເອງ”.
ແຕ່ເຮົາຈະເອົາເບັດກ່ຽວຄາງກະໄຕຂອງເຈົ້າ
ແລະ ເຮັດໃຫ້ປາໃນສາຍນ້ຳຂອງເຈົ້າຕິດກັບເກັດຂອງເຈົ້າ.
ເຮົາຈະດຶງເຈົ້າຂຶ້ນມາຈາກທ່າມກາງສາຍນ້ຳທັງຫລາຍຂອງເຈົ້າ,
ພ້ອມກັບປາທັງໝົດທີ່ຕິດຢູ່ກັບເກັດຂອງເຈົ້າ.
ເຮົາຈະຖິ້ມເຈົ້າໄວ້ໃນຖິ່ນແຫ້ງແລ້ງກັນດານ,
ເຈົ້າ ແລະ ປາທັງໝົດຈາກສາຍນ້ຳຂອງເຈົ້າ.
ເຈົ້າຈະຕົກຢູ່ກາງທົ່ງ
ແລະ ບໍ່ມີຜູ້ໃດຫອບ ຫລື ເກັບເຈົ້າຂຶ້ນມາ.
ເຮົາຈະມອບເຈົ້າໃຫ້ເປັນອາຫານ
ຂອງສັດບົກ ແລະ ນົກໃນທ້ອງຟ້າ.
ແລ້ວທຸກຄົນທີ່ຢູ່ໃນເອຢິບກໍຈະຮູ້ວ່າເຮົາຄືພຣະເຈົ້າຢາເວ.
“ ‘ເຈົ້າເປັນໄມ້ອໍ້ສຳລັບປະຊາຊົນອິດສະຣາເອນ. ເມື່ອພວກເຂົາຈັບເຈົ້າໄວ້ໃນມືຂອງຕົນ, ເຈົ້າໄດ້ແຕກຫັກ ແລະ ເຈົ້າໄດ້ບາດບ່າໄຫລ່ຂອງພວກເຂົາ ເມື່ອເວລາທີ່ພວກເຂົາເອື່ອຍໃສ່ເຈົ້າ, ເຈົ້າກໍຫັກ ແລະ ເຮັດໃຫ້ຫລັງຂອງພວກເຂົາເຄັດ.1
“ ‘ເຫດສະນັ້ນ ພຣະເຈົ້າຢາເວ ອົງເຈົ້ານາຍຈຶ່ງກ່າວດັ່ງນີ້ວ່າ: ເຮົາຈະນຳດາບມາໂຈມຕີເຈົ້າ ແລະ ຂ້າທັງຄົນ ແລະ ສັດຂອງເຈົ້າ. ເອຢິບຈະກາຍເປັນບ່ອນຮົກຮ້າງ. ແລ້ວພວກເຂົາກໍຈະຮູ້ວ່າເຮົາຄືພຣະເຈົ້າຢາເວ.
“ ‘ເນື່ອງຈາກເຈົ້າກ່າວວ່າ, “ແມ່ນ້ຳນິນເປັນຂອງຂ້ອຍ; ຂ້ອຍສ້າງມັນຂຶ້ນມາ”, ເຫດສະນັ້ນ ເຮົາຈຶ່ງເປັນສັດຕູກັບເຈົ້າ ແລະ ກັບສາຍນ້ຳທັງຫລາຍຂອງເຈົ້າ ແລະ ເຮົາຈະເຮັດໃຫ້ດິນແດນເອຢິບກາຍເປັນຊາກຫັກພັງ ແລະ ຖືກຖິ້ມໃຫ້ຮົກຮ້າງຫວ່າງເປົ່າຕັ້ງແຕ່ມິກໂດນໄປຈົນເຖິງອັດວານ ໄປໄກຈົນຮອດຊາຍແດນຂອງກູເຊ.2 ຈະບໍ່ມີແມ່ນແຕ່ຮອຍຕີນຂອງຄົນ ແລະ ຂອງສັດຢຽບຜ່ານ; ຈະບໍ່ມີຜູ້ໃດອາໄສທີ່ນັ້ນຕະຫລອດສີ່ສິບປີ. ເຮົາຈະເຮັດໃຫ້ເອຢິບຮົກຮ້າງເປົ່າທ່າມກາງດິນແດນຕ່າງໆທີ່ຖືກທຳລາຍ ແລະ ເມືອງຕ່າງໆຂອງເອຢິບຈະຖືກຖິ້ມໃຫ້ຮົກຮ້າງຢູ່ທ່າມກາງນະຄອນທີ່ເປັນຊາກຫັກພັງຕະຫລອດສີ່ສິບປີ ແລະ ເຮົາຈະກະຈາຍຊາວເອຢິບໄປຕາມຊົນຊາດທັງຫລາຍ ແລະ ກະຈັດກະຈາຍພວກເຂົາໄປຕາມປະເທດຕ່າງໆ.
“ ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເມື່ອຄົບສີ່ສິບປີ ເຮົາຈະຮວບຮວມຊາວເອຢິບກັບມາຈາກຊົນຊາດທັງຫລາຍ ທີ່ພວກເຂົາຖືກເຮັດໃຫ້ກະຈັດກະຈາຍໄປນັ້ນ. ເຮົາຈະນຳພວກເຂົາກັບມາຈາກການເປັນຊະເລີຍ ແລະ ເອົາພວກເຂົາກັບມາສູ່ດິນແດນເອຢິບຕອນເໜືອ3 ເຊິ່ງເປັນດິນແດນຂອງບັນພະບຸລຸດຂອງພວກເຂົາ. ພວກເຂົາຈະເປັນອານາຈັກທີ່ຕ່ຳຕ້ອຍຢູ່ບ່ອນນັ້ນ. ຈະເປັນອານາຈັກທີ່ຕ່ຳຕ້ອຍທີ່ສຸດ ແລະ ຈະບໍ່ມີວັນຍົກໂຕຂຶ້ນເໜືອຊົນຊາດທັງຫລາຍໄດ້ອີກເລີຍ. ເຮົາຈະເຮັດໃຫ້ເອຢິບອ່ອນແອຈົນບໍ່ໄດ້ຂຶ້ນປົກຄອງຊົນຊາດຕ່າງໆອີກເລີຍ. ເອຢິບຈະບໍ່ໄດ້ເປັນແຫລ່ງເພິ່ງພາອາໄສໃຫ້ຊົນຊາດອິດສະຣາເອນອີກຕໍ່ໄປ ແຕ່ຈະເປັນເຄື່ອງເຕືອນໃຈພວກເຂົາໃຫ້ສຳນຶກເຖິງຄວາມບາບທີ່ໄດ້ຫັນໄປເພິ່ງພາເອຢິບ. ແລ້ວພວກເຂົາກໍຈະຮູ້ວ່າເຮົາຄືພຣະເຈົ້າຢາເວ ອົງເຈົ້ານາຍ’ ”.
ລາງວັນຂອງເນບູກາດເນັດຊາ
ໃນວັນທີໜຶ່ງເດືອນທີໜຶ່ງປີທີຊາວເຈັດ ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ: “ບຸດມະນຸດ, ກະສັດເນບູກາດເນັດຊາແຫ່ງບາບີໂລນຍົກທັບມາສູ້ຮົບກັບຕີເຣຢ່າງໜັກ; ທຸກຫົວຖືກຮຸກຖູຈົນລ້ານ ແລະ ທຸກບ່າໄຫລ່ກໍລອກ. ເຖິງປານນັ້ນລາວກັບກອງທັບຂອງລາວກໍບໍ່ໄດ້ສິ່ງໃດຈາກການສູ້ຮົບກັບຕີເຣ. ເຫດສະນັ້ນ ພຣະເຈົ້າຢາເວ ອົງເຈົ້ານາຍຈຶ່ງກ່າວດັ່ງນີ້ວ່າ: ເຮົາຈະມອບເອຢິບໃຫ້ແກ່ກະສັດເນບູກາດເນັດຊາແຫ່ງບາບີໂລນ ແລະ ລາວຈະປຸ້ນຊັບສົມບັດໄປ. ລາວຈະປຸ້ນເອົາເຄື່ອງຂອງໃນແດນນັ້ນໄປເປັນຄ່າຈ້າງໃຫ້ກອງທັບຂອງລາວ. ເຮົາມອບເອຢິບໃຫ້ເປັນລາງວັນຈາກການບາກບັ່ນລົງແຮງຂອງລາວ ເພາະວ່າລາວ ແລະ ກອງທັບຂອງລາວໄດ້ເຮັດການນີ້ເພື່ອເຮົາ, ພຣະເຈົ້າຢາເວ ອົງເຈົ້ານາຍປະກາດດັ່ງນັ້ນ.
“ໃນວັນນັ້ນ ເຮົາຈະເຮັດໃຫ້ມີເຂົາສັດເຂົາໜຶ່ງ4ງອກຂຶ້ນມາເພື່ອຊາວອິດສະຣາເອນ ແລະ ເຮົາຈະເປີດປາກຂອງເຈົ້າທ່າມກາງພວກເຂົາ. ແລ້ວພວກເຂົາກໍຈະຮູ້ວ່າເຮົາຄືພຣະເຈົ້າຢາເວ”.
Source notes (4)
- Footnote ພາສາເຮັບເຣີວ່າເຮັດໃຫ້ຫລັງຂອງພວກເຂົາຕັ້ງຊື່ຂຶ້ນ
- Footnote ຄື ຕອນເທິງຂອງລຸ່ມແມ່ນ້ຳນິນ
- Footnote ພາສາເຮັບເຣີວ່າ ສູ່ປັດໂລດ
- Footnote ເຂົາສັດ ເຊິ່ງເປັນສັນຍາລັກຂອງກຳລັງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.